ساعدوني في جدول خفيف للبيت

الله يعينك .. والله انا زيك محتاره اهل زوجي بيجون يجلسون عندي شهر وما شاء الله عليهم كثيرين واو مره استقبل ضيوف .. فنفس السؤال للعروسات .. ان شاء الله ما بيقصرون

يلا ياعروسات صرنا 2 نبغى مساعدتكم

اول مره تطنشوني :(

مممم مدة شهر وآآآيد

آلله يعينكم حبآيبي :D


يعني آحسن شي تقومين قبلهم عشآن يقولون عنج سنعه و رآعية بيت :D

آول مآتقومين نظفي ع آلسريع آلصآله آو آلمكآن آللي متعودين تقعدون فيه دآيم و دخنيه و تآكدي آن آلحمآمآت نظيفه و آلمنآشف بعد

بعدين جهزي دلآل شآي آلحليب و شآي آلآحمر و آلقهوه و آلرطب و ريوق يعني كل شي سريع و خليه لهم ع صوب

بعدين روحي سبحي و لبسي آحلى لبس عندج و يكون بسيط و تعطري بعطر خفيف

و بعدين لمآ يقعدون جآبليهم و ضحكي و سولفي معآهم سآليهم شو ف خآطرهم يتغدون و خلي آحد يسآعدج ف آلطبآخ حلو لمآ يجتمعون آلبنآت ف آلمطبخ و يبدعوون :D

بعدييين جهزي حلو بآرد ع آلسريع و بعدين آلعشآ يآ خفآيف آو خلي زوجج آو آحد آلشبآب آييب عشآ من برع و من ينآمون آنتي نآمي :D

و لآ تنسين زوجج طبعآآآ آلحجره حآولي مآتعفسينهآ وآآآيد :p

ممم تخيلت نفسي ف مكآنكم :D آتوقع بسوي هيك


هذآ آللي فهمته منج :p و آن شآء آلله آلعروسآت مآبيقصرون معآكم

مشكوره ياقلبي

بس مشكله اصحى قبلهم ههههههههه المشكله انهم راعين سهر واكيد اني بقابلهم لين ينامون وانام معهم

انا فرحانه بزيارتهم بس شايله هم الترتيب في الوقت

على كل حال مشكووره على ردك وبحاول اطبق كلامك

إذا ما تقدرين تقومين قبلهم، حاولي تنظفين بعد ما ينامون... غسلي الحمامات و انتي بكرامة و كنسي و رتبي البيت و نامي، عشان إذا قمتي يصير كل شي مرتب و تبدين بالفطور على طول...

كتغيير اعزميهم عالفطور برا، و بعد ما ترجعون جهزي الغدا... أحياناً و أنا أسوي الغدا أسوي كيكة و أدخلها الفرن، و بس نخلص غدانا تكون الكيكة جاهزة، و يصير عندي وقت أريح بعد الغدا، و لما أقوم العصر أسوي بس الشاي و القهوة...
فانتي إذا تقدرين سوي كذا، و بعد الغدا على طول قوليلهم يرجعون يريحون و ياخذون قيلولة... و هذي القيلولة ضرورية حتى لج انتي عشان ما تتعبين و انتي مقابلتهم طول الوقت، حتى لو نص ساعة بتريحج!

و بعد ما تقعدين جهزي الشاي و القهوة و الحلى... و ممكن تبدين تجهزين جزء من العشا، مثلاً لو العشا صينية (مكرونة بالباشاميل، خضار، مسقعة) يعني كذا، جهزيها و غطيها، و وقت العشا كل اللي تسوينه تدخلينها الفرن و بيصير عندج وقت تسوين شي معاها، مثلاً سلطة أو مقبلات...

و في السهرة، جيبي لهم كوفي أو كابتشينو أو آيسكريم أو بوب كورن و مكسرات يعني شغلات خفيفة تتسلون فيها مع السوالف...

و الله يعينج و يقويج و إن شاء الله تنبسطون F:

فديت روحك قكره حلوه

يسلموو ياعسل

ياقلبي أبشرك أنا مثلك .. وأكثر ..

عاد أهل زوجي بيجون بعد اسبوعين تقريبا وبيقعدون إلى نهاية رمضان ..

يعني شهرين تقريبا ..

لكن قلت بأسوي هالجدول إن شاء الله .. وأنت على حسب ضيوفك ..

شوفي يالغلا ..

جهزي من الآن كل اللي تحتاجينه ... ولو هم عندهم شغالة بتساعدك .. ولو عندهم بنات بيساعدونك لكن المشكلة لو ما عندهم ..

المهم لازم تجهزين من قبل لا يجوون ..

وهذا تجهيز قبل ما يجونك /

طبعا سوي من الأن مفرزنات جاهزة في الفريزر للتسلية وخذي شكولاتات وحلويات وجاتوهات تحطينها كلها بالفريزر ..

للقهوة ..

أنا قد سويت وحطيت كيكة (تورتة) بالفريزر بعد ما قسمتها وغلفتها مضبوط وأخرج كل يوم قطعة وأخليها فترة برى صدقيني ترجع كأنها جديدة لكن أهم شيء يكون من محل ممتاز ..

حطي الجاتوهات والشكولاتات بالفريزر زأشياء تناسب إنها تتفرزن وتنفع للقهوة .. مثلا سمبوسة مثلثات صغار بجبن الكيري وتضيفين عليها الشيرة ..

وسوي شيرة جاهزة وحطينها ببرطمان وحطيها بالثلاجة ..

للشاي :.

سوي سمبوسة هندية وسمبوسة بالجبنة وبيتزا صغيرة ممكن فطاير منوعة وفرزينيها ممكن البيتزا تدخلينها بالفرن شوي من تحت وبعدها تفرزنيها ..

ألحين مسألة التسالي مع القهوة والشاي منتهية .. مع شوي مكسرات وفصفص .. يكون الوضع ممتاز ..

نجي للوجبات طبعا لازم تطبخين وتنفخين .. سوي جدول بالطبخات اللي تسوينها ..

طبعا أغلب الطبخات تحتاج لكشنة أطحني أو قطعي الطماطم وحطيها بكيس حق كل يوم بيومه يعني كل طبخة بكيس وحطيها بالفريزر ..

أو ممكن تكشنيها سمعت وحده تسوي كذا تكشنها جاهزة وتحطها بالفريزر عاد هذا أفضل لكن ما جربتها ..

ولو عندكم مثل عندنا لازم يكون ايدامات بجانب الوجبة الرئيسية .. أطبخيها من الآن وحطيها بحافظات حق كل يوم بيومه وأكتبي عليه نوع الايدام وحطيها بالفريزر .. حتى المحاشي يسوونه مفرزن ..

خلاص تقريبا الوجبات الرئيسية جهزنا الغالب منها .. بكذا تخفضين نسبة الاشغال وتستمتعين بالجلوس أكثر مع ضيوفك وما تتعبين ..

قبل ما يجونك بيوم ..

خلي في كل حمام الله يكرمك قارورتين موية صحة وحطي في الأولى تايد + ماء + ملح ليمون وفي القارورة الثانية ماء + ديتول أو كلوركس وخليها الله يكرمك ورى المرحاض ولا ورى المغسلة أو بداخل صندوق جميل يوضع في أحد زوايا الحمام ومعه أسفنجة ..

وكلما تدخلين الحمام قد جاهز الخلطة عشان تغسلي الحمام بسهولة وسرعة ..

ألحين تجهيزاتك بعد ما يجونك ..

دامهم من النوع اللي يسهر لما بعد الفجر ويصحى متأخر .. قبل ما تنامون يعني قبل أذان الفجر أعطيهم شوي تسالي وخفايف بدل الفطور مع حليب او عصير لآنهم أصلا لو سهروا لما بعد الفجر متى يصحون على الظهر ؟!! وقتها وقت الغدا..

عاد أنت تشوفين اللي يناسبك ..

قبل النوم رتبي أمورك وغسلي الحمامات الله يكرمك ورتبي ترتيب عام ..

نامي من الساعة 4 الفجر مثلا وأصحي الساعة 11 بكذا تنامين 7 ساعات وهي تقريبا كافية جدا .. أو على حسب ممكن تنامي أبدر شوي ..

أهم شيء لا تضيعين أوقات الصلاة عشان الضيوف نصيحة سريعة ..

أول ما تصحين سوي القهوة جهزي التمر والرطب وخرجي الاشياء المفرزنة حق الغدا لذاك اليوم .. ولو ما يبغون الفطور لآن الوقت تأخر اعطيهم القهوة ولو لازم فطور سويلهم الفطور اول بعدها القهوة في لحظة ما تطبخين ..


بعد ما تخلصين الفطور وترتبين هالامور أقعدي معهم شوي وبعدين كملي تجهيز للغدا .. سوي الغداء وقدميه في هاللحظة خرجي المفرزنات تبع التسالي طبعا مو كلها فقط على حسب الكمية المطلوبة وبعد الانتهاء من الغدا ..

ياليت يساعدونك ويشمرون عن اياديهم شوي ..

وبعدها الشاي والقهوة ومعها التقديمات اللي جهزتيها وهكذا ..

وقدمي لهم كابتشينو أو نسكافيه أو على حسب المزاج والمتوفر ..

بكذا يكون انت توفرين وقت طويل وتجلسين مع ضيوفك أكثر ..


لو متكاسلة أنك تسوين المفرزنات ترى فيه حريم يسوونه وأنت تاخذذينه جاهز بس لازم تكون وحده مضمونة عشان ترفع راسك قدام الناس بالطعم الحلو .. وحتى فيه محاشي يسوونه مفرزن جاهز يساعدك في الغدا أو العشا ..


أنا أفضل يكون العشاء على خفيف ..


عاد هذا تقريبا إللي فكرت اسويه إن شاء الله .. لكن أهل زوجي نصهم ينامون بدري ونصهم ينامون متأخر .. يعني لازم أكون سهرانة وأصحى بدري ..

لكن أخذ لي غفوة تقريبا بعد الفطور .. لانهم هم يسوون كذا .. و الحمدلله إن شاء الله شغالتهم تساعدني وتخفف علي ..


طولت عليك بالمرة إن شاء الله أكون قد أفدتك .. لاتنسيني من خالص دعواتك ..

صراحه ما عندي حد بيزوورني بس استفدت من الموضوع

مشكورات .. وحركه المفرزنات ما بقدر عليها لاني حامل وتعبااااااااااااانه .. بس حلوه الافكار تبع الحمام وهيك .. وانا مشكلتي انهم ما شاء الله كثير يعني بيكونون موزعين في البيت حتى الصاله في ناس بينامون فيها .. فهذا اللي انا شايله همه .. معنهم ما يقصرون قد جلسوا عندي اسبوعين على فتره وحمي والله اهم اللي قاموا فيني مو انا اللي قمت فيهم ... عشان كذا بما انه الوحم خف ابي اعوضهم بس الترتيب اهو المشكله وحماتي يمكن تولد بدري وتنفس عندي بما انه اهلها عندي وتوها بتنقل بيت جديد عشان كذا انا شايله هم لان البيت بيكون مليان .. وسلامتكم