ّمملكتناااااااا ((((13)))) جماد الثاني تشع نشااااااط &حيووووويه & تفااااااؤل ّّ

صباح النور
كوامن
يسعد صباحك والله أنك غير بعد هههههه ضحكتيني الله يسعدك

نجديه
سلامة ييونه والله ماعندي فكرة بس أفتكرت ست الحبايب بعد ماتعجز من المراهم تحط لأختي نشاء
آآآآه أفتكرت معلومه وأنا أكتب وحده من صحباتي ولدها دائماً تعباان زي بنتك ونصحها الدكتور تغييير الرضاعه
كل شهر على الأقل بوحده جديده وبخري بالجاوني للتعقيم على طاري الجاوني قبل يومين بخرت البيت بجاوني
وأفتكرت كلام خلود وأبخر وأقرأ وأسمي ههههه

روووز
ياحبي لك وللمعارك حقتك أن شاء الله اليوم بهجم على الصاله والمقلط

وتر
والله ولك وحشه بعد

كوستا
سلامتك ولا تطولي الغيبه مارديتي علي هوه أنت كان معرفك أم سعف
البقيه
أحبكم بس مالقيت لكم رد غير أحبكم :adore:

يسسسسسعد صبــــــآح.. آللي مع آلصبح
(صصصآحي)


..

عندي يوميات وانجآزات بس مالقيت وقت آكتبها
لي عودتووون مرتوووون اوخرررتون
..
آرآكم على خير ..

صباح الخير ،

لمعة الماس ، مرتوووون اخرتوووون هههههههه شكلك متأثره بالروافض اللي يجيبونهم في قناة وصال ،

ذوليك النكت ههههه

كوستا كوفي ،

هلابك وبطلتك ، سلامتك من كل شر ، يارب تشفيها وترزقها من حيث لاتحتسب ، والجميع يارب ،

كوامن ،

يااااااقلبي والله ، اكره شي في حياتي هالنامس ، اذا بدأ يشوف شغله وانتي في عز النوم ، والموت انه يدور مناطق توجع وتهبل بالعقل

تحت القدم او في الاصابع ،

وتوره ،

يااااااارب يسر لها امرها ، بس قولي لي في اذني وشو ؟؟؟؟

بنت نجد ،

البنات ماقصروا في الوصفات ، الله يشفي بنيتك ،

ويعظم اجرك ، وش اللي يخلي حق الام عظيم الا هالتعب ،

النشاء اخلطيه مع زيت الزيتون بعدين غرقي المنطقه ، الله ينفع به ،

خلود\
كأنك عارفه وين قرصني خخخخخخخ



ابتسامه\
دووم هالضحكة يا رب



لمسة أمي \
بتنورينا في جده حياك الله
ومبروك زواج أخوكم مقدماً



همس\
صباحك عسل يا عسل



فاقدة شذو
والله أشتقنا لها =)

----------------------------------------------------

صحيت 10 صليت الضحى وأفطرت وجالسه أتصفح شوي . وقلت أدخل أسلم عليكم وأقوم لشغلي

-------------------------------------------------

جداويا \
بسألك أنتي تقولين أفطرت جبن وزعتر ..... كيف الزعتر ؟ يعني كيف تاكلينه خخخخ
انا شريت زعتر من خيمة المعارض قبل فترة ولساته في الثلاجة ما أعرف وش أسوي فيه
اللي أعرفه أنه يتصلح فطاير هذا اللي اعرفه وببس
علمينا كيف تفطرين عليه خليني أقلدك =)

إضافه \ لو بغيت أأكل عيالي منه كيف أعطيهم بدون ما يحسون به

صباح العسل لربات البيوت السنعات الغاليااااات على قلبي

روز
طمنتيني ع الاكل يعني الوضع طبيعي !!
الحمدلله على كل حال مالي الا اصبر وان شاء الله فترة وتعدي على خير مع حرصي على التعقيم والنظافه بس اللي من الله حياه الله
الله يسعد قلبك ع النصايح وان شاء الله اطبقها وفعلا البارح قبل تنام هويتها شوي وكأنه خف بس لو البيت سيراميك كان خليتها تتهوى كثييير بس مشكلة الفرشات :worn_out:
وهذاي كل شوي اغصبها لو على قطرة ماء والنفسيه احسن شوي لاننا بنمشي بعد ساعه بإذن الله
وجربت لها فازلين وكمون وصرخت ومسحته على طول انا ماتحمل :badly:

كوامن
بجرب لها ميبو وراح اخلي كينا كومب اخر الحلول F:
الله يسعد قلبك مشكوره

ابتسامه
الله يسلم قلبك
انا اغير لها الرضاعات كل شهر تقريبا واعقمهن كل يومين بس على ماقالت روز فايروس دخل وانتهى
والجاوني بعمري ماجربته بس اشوف امي تبخر فيه اذا جت الغاليه من مكه اباخذ منها شوي F:


خلود
الله يسلم قلبك
وجربت النشا مع زيت البارح بس ماغير لان الاسهال وانتي بكرامه مررررررررررره حار :sick:
صارت بنتي فار تجارب عندي ههههه

كوستا
مشكوره ياقلبي كفايه لو ردك

جوجو
ناويه على كلامك بإذن الله اجيب صيدلية متنقله معاي وهذاي جالسه اسجل اللي قلتي بالجوال لاني احس نفسي مخربطهوان شاء الله كلها شهر واروح لاهلي وودااااعا ياقريتنا :thumbs_up:
الله يسعد قلبك جوجو ويحفظك على وقفتك انتي والبنات


:L:



ماعندي يوميات لاني صحيت وبديت اضف ملابسنا واغراضنا بشكل سريع
ولقيت بنتي حايسه ملابسها وغيرت لها وعطيتها قطعة خبزه كبر عينها وللحين تعلكها 8o| حشى لحم مو خبز:lol:
وغيرت انا ملابسي وافطرت
ونقعت المطبخ والحمام بالعملاق مع شوي كلور وسكرتهن بعد مابخيت بف باف
وحطيت اغراضنا عند الباب
ودخلت نت وحاطه جوالي جنبي وانتظر محروسي يشرف عشان نمشي



اشوفكم على خير حبايب قلبي
:L:

كوامن
دخلت عرض على جوجو ههههههههه
اخلطيه مع زيت زيتون او جبن مالح
ماتشبعين منه وتراه مررره مفيد :)

ههههههههههه بنت نجد ،،،

ضحكت ضحك على خبزة بنتك ، الله يستر عليكم انتبهي للباب هههه

،،،،،،،،،،،،،،،،،

امس عقب مارجعت من الدار ، صليت العشاء ، ورتبت بيتي وكببت مويه مع موبي صنوبر في الاسياب وغرفة عيالي وغرفتي وشطفتهم وصار البيت يلق ،

وشلت مفرش سريري وحطيت واحد ثاني وعطرته ، وغسلت اكياس الوسايد وعطرتها وانتظرتها تنشف ولبستها في الوسايد ،

طقني الجوع ، قمت صلحت لي فول ونواشف وتعشيت مع عيالي ، وراجعت لبناتي الاذكار اليوم بيختبرون فيها ، وانا انومهم جاء زوجي ،

ونمنا الساعه 1 ،

،،،،،،،،،،،،،،،،،

روز ، الصاله منظفتها عميق يوم السبت ، منفضه الستاره والجلسه وماسحه الشباك ، وزولية عيالي بغسلها

بس اذا جتني شغالة اهلي الاسبوع الجاي لانهم يمكن يسافرون ،

عندي في الصاله موكيت وجلسه بس مخليتها اذا جانا احد او لجلستنا انا وزوجي ،

والجزء الثاني من الصاله فارشه فيه زوليه كبيره قبال التي في هذي لعيالي وحوستهم واكلهم ، واذا جاني احد طويتها ورفعتها ،

عاد ناويه اغسلها احسها طالع لها ريحه اذا دخلت بيتي ،والفرك ماعاد نفع معها ، / موب كني كثرت كلام

كيفكم خواتي

لي كم يوم مسيطره على البيت ولله الحمد ترتيب سطحي فقط يعني ترتيب البيت وكنس وغسيل الحماماتتحميم الصغار قبل النوم لاني لاحضتهم بسرعه ينامون وتفتحت بشرتهم
وقبل امس دق علي زوجي قال بيجون رجال على الغداء ومعك ساعه بس والساعه الحين 12 يبيه 1جاهز
وبسرررررعه اركض لقسم الرجال اطلع الاغراض اللي فيه حاطين فيه دلال ابو زوجي وفراش زميل زوجي ناسيه عندنا قبلها بكم يوم مااخذه
وانطلقت للسوبر ماركت ورحت جبت فلاش ودجاج مبرد وخضار وفواكه وكاسترد
ودخلت البيت وطلعت الغساله من الحمام الغساله العاديه مخليتها للملابس البيضاء ومبقعه بالحمام وكبيت فيه فلاش الاصلي امريكي طلع الحمام يلق لق وبسررررعه البرق ركبت الغداء وسويت الحلا ورحت بسرعه ركبت المرق وعندي جريش من العشاء دفيته وشمبانيا وجرير وفجل وبصل اخضر بصحون جانبيه
وجت الساعه 1ونص ونا ماركبت الرز :(
وسريع اروح ادق على زوجي قلت عادي تجون 2 قال اصلا المدير مو مطلعنا الا الساعه 2
ورحت شغلت الفواحه والبخور ولبست العيال وعطرتهم وركبت الرز وحمرت الدجاج واكتشفت ان ماعندي صحن كبير بس الصحن الصغير اللي قدنا وارسلت لجارتي ماعندا :( يابي وش اسوي لي فتره اطلب زوجي اغراض اسايه ناقصه علي يقول بالبيت الجديد ياربيه هذانا انزنقنا
ودخل زوجي وهو محمل انواع الفواكه قلت له اناجايبه قال زياده الخير خيرين وبسرعه قمت احضر وعيالي يودون للمجلس عند الرجال لان المقلط غرفه غسيل ههههههههههههههههههه
وزوجي هاوشني لان الصحن صغير قلت هذا اللي عندي
وواعدني اروح واشتري النواقص الضروريه
وعطيت عيالي الاب توب عشان مايروحون للرجال ورحت اتمدد على الكنب لاني تعبببببت من الركض
وبعد نص ساعه ارسلت العيال يجيبون المواعين من عند ابوهم بس لقيته مكومهن عن الباب خخخخخخخخ ودخلتهن المطبخ ورحت تروشت وطلبوا شاي اخضر وجهزته ودق زوجي قال ترا طلعنا وشربت منه شوي وتغديت بعدهم ونمممممت الى اذان العصر ودقيت على امي اطلبها الشغاله الله لايحرمني من امي ووافقت وراحوا الحلوين للحلقه ونومت الصغير وجت الشغاله وخلصت كل المطبخ حتى الدواليب الله يعافيها والثلاجه لمعتها وراحت لغرفع الغسيل ورجعت الغساله مكانها ونضفت كل البيت وكوت شوي ودقت امي قالت خليها تنزل وراحت وذاكرت للعيال ونااااموا ونمت معاهم ووعدني زوجي بطلعه محترمه بعد هالغداء زميله يقول ماني مغسل يدي عن غداكم معجبته ريحته هههههههه الحمد لله
وبعد هالغداء جلست يومين ما اشوف زوجي يجي ينام ويطلع الله يعين على هالرجال يقولي مو لازم طلعه كل يوم وانا عندك

واوضاعي الحين
منحاسه بالاختبارات وطلع لنا مناسبه ضروريه للرياض وعيالي مستواهم ناااااااااااااااااااااازل للاسف وانا هالترم موادي كثار ومو قادره الحق
الترم الجاي باخذ بس 6 لاني برفع معدلي هالترم اخذت 9 اووووف واجد

غير راضيه عن نفسي ابد هالترم لامن ناحيتي ولا من ناحيه عيالي ابد
نرد على الحورمات السنعات
بنت نجد جربي لها زبادي مع كمون مطحون بالقوه اكلها ايه بسرررعه يوقف الاسهال حتى الكبار بسرعه يوقفه لهم

خلود مبروك الراتب الله يعطيك خيره ويكفيك شره عندنا رواتب معلمات الدور 800 واذا غابت يخصم عليها 50

لمسه امي شخبارك مع الصغيره وايش قصه حروقك

جداويا من زمااان عنك يابنت ماتدخلين مسن !!!

كوامن قلبي لاتضيقين صدرك صدقيني زوجك يمكن كان متنرفز بس مرة ثانيه قومي عن المكان اللي هو فيه .....

مايمدحني الله يهون عليك

روحي تحبك وابتسامه بدلع وعطر كوكو عجزت افرق بينكم ههههههههه ادري اسمائكم مختلفه بس الخبط بينكم

همس شخبار سارونه كم صار عمرها

روز ماعطيتينا تفاصيل روحتك لليبيه <نشبه هههههههه وبالنسبه لحملتكم انا ابي بس اخلص الاختبارت بشن حمله ارض جو على البيت بكل مافيه واللي ماينضف برميه اجلس على بلاط نضيف ولا على فرش مبقع

سلخير مشكوره على المعلومات ارسلت لك بس شكلها ماوصلتك علاعموم مشكوووووره وشكلي بسويها س بكيت يوم قلتي ماتحكين عينك ابد

خيط من حرير اخبارك انتي لمسه حرير اللي بحواء

صباح الروقان والتفاؤل..

احدثكم من صالتي السجادة طايحة بالارض والجلال مرفوع عالكنب..

كاس عالارض..وثاني تحت الطاولة.. وبداد السريل هنا شوي وهناك شوي..

وروفه لازقة بالشاشة ترقص وتقلد حركات الاطفال اللي يرقصون..

وكل شوي تلتفت علي مستملحة عمرها..:062:

وعيني عالساعة محددة لي وقت واقوم عليه..

امس كان مطر قوي قوي قوييييييي.. وبروق ورعود..

جا وقت طلعة بناتي و كنت مرسلة لزوجي اطلب منه يجيبهم بدالي..

دقيت عليه اشوف بيجيبهم والا اطلع.. لقيت جواله مقفل!!! يعني ما وصلته الرسالة..

قلت امري لله.. كانت روفة نايمة عالكنب.. فكرت وتوكلت على الله..

شغلت الـTV على قناتها المفضلة وقصرت عليها ماااارة.. قعدت اغسل المواعين وعيني عالساعة..

دايم اوصل المدرسه قبل يطلعون بناتي بعشر دقايق..بس هالمره بتاخر عليهم شوي عشان على طول اخذهم ونرجع..

سكرت بيبان غرفتي ومكتب زوجي وفتحت باب غرفة الالعاب..

سكرت باب المقلط والمطبخ..وطلعت لحالي..

استودعت الله بنتي وبيتي هو خير الحافظين.. وامشي 240..

على طول وصلت المدرسه لقيت بناتي قد طلعن خذتهن ورجعنا للبيت..

وسبحان الله المطر من ثلاث وهو موقف!!موعد طلعتي اليومي!!!

اقبلنا عالبيت واحاول اقز شباك المجلس قز..لين شفت رويس بنتي لايزال عالكنب..

وانا اهدي السرعة واتنفس الصعداء..

دخلنا البيت ورحت لبنيتي قامت على صجة خواتها..

ظميتها وحببتها وهي ما تدري وش السالفة..:study:

جا زوجي وسولفنا وتعشينا وبالصدفه زوجي مسك بباب المدخل الرئيسي ولقاه مفتوح:-o

هالباب ما نستعمله الا اذا جانا احد.. وقبل امس زوجي طالع منه ونسى يقفله:woo:

يماااااااااه..يعني اليوم بنتي كانت لحالها بالبيت وهو مفتوح عليها..يارب رحمتك..

الحمد لله جت سليمة..:hysterical:

قطيو..

روحي تحبك.. المدرسة امشي لها سبع دقايق من البيت فقط..

لكن فيه طلعة ..بيتنا براس تلة والمدرسة اسفل التلة..

ومع العربية يكون مشوار العودة متعب..

حنينـ .. الله يوفقك ويسخر لك.. كني عرفت ليه بيجون..

_________________

يومياتي..

مسحت شبابيك الكونسيرفتي وفركت موكيت المجلس وصمغت جزء من الطاولة منقشع..

سويت لبناتي مكرونة بالصلصة..

والحين جلست اريح قبل ادخل المطبخ وابدأ بالعشى..

قطو..

:lol: اخباركم برد قد ماتسعفني الذاكره كوامن ياعمري الزعتر نفس طريقه البنات احينا احط جبن كرافت السايل وارش عليه زعتر وع الحماصه امممم لذيذ
واحيانا زيت زيتون فقط وزعتر وع الشاي ياسلالام تصدقين احيانا اكله بالملقعه :pخخخ ناشف بس لذيذ امووووت عليه
بنت نجد سلالالامة القمر وماتشوف شر اهم شي لا تكتميها بالحفاضات خليها تتهوي وبوسي لي ياها
رايقه الله يوفقك يارب عشت جو مع العزيمه بس سنعه والله ماقصرتي F: وسارونه توها دخلت الشهر السابع فديت قلبهاااااا:L:
جداويا اخبار العرايس واخبارك
روز يسعدها الي ترقص اموووت ع حركات البنات يهبلون
بكمل بعددددين عيالي وعيال جاراتي غثووني:mad: ع الباب

مساكم الله بالخير يالعمالي العماليه <<والله لي خلق انكت وانا مولعه حرااااره امس بنتي والي قلله ولدي واليوم انا لوز تروووع الله يستر لايجي الابوو بس توني متروشه ..
وانا اقول شفيتي مكسره كل هاذيك الايام ومافيني حييييل
حبيت ابارك لجالكسي
وتوره كني فهمت الله ييسر لك ويوفقك ...
سامحوني ...

روز ،

جعل والديك في الجنه لاتعيدينها وتخلين بنيتك ، بسم الله عليها ،

،،،،،،،،،،

بنات ماقلت لكم ، الجمعه اللي فاتت ، رحت اتروش قبل المغرب ،

صليت وجلست ارتب الملابس بدولاب زوجي الا اسمع صوت دووووووووووووووووووووو&#1700; ، بغى يوقف قلبي

طلعت من غرفتي مرتاعه ، والف على البيت بشوف وش مصدر الصوت ،

فجأه شميت ريحة حرق ولقيت سخانة الحمام تخر مويه ، طيران فصلتها ، صارت ملتمسه ، اخو زوجي يعرف في الكهرباء يقول لو احد كان يتروش تحت الدش

كان راح فيها ،ياربي لك الحمد اللي نجاني منها ،

كل أبو اللي ردو علي بخصوص الأبضاي الزعتر خخخخخخخ
مشكورين من كل قلبي

مشكلتي ما أحب الجبنة البيضاء الحامضة وما عندي لبنه
شكلي بجريه ع الجبنه السايل مثل ماقالت همس
أو بشتري جبنه عاديه مو حامضه

======================================

جيتكم بعد ما فتحت لعيالي قناة المجد أطفال وأعطيتهم ألعابهم وقفلت على نفسي المطبخ >> طبعاً حاجز مو باب كامل
وحاطة الابتوب على سطل الرز وأنا جالسه على كرسي صغير هههههههه
شكلي يحزن ويفطس ضحك

====================

المهم اليوم الحمد لله قمت 10 وضغطت على نفسي ما أرجع أنام
سويت لي فطور وروقت ع النت لحد 11 ونص
قمت بدأت في الغداء مصقعه ورز أبيض وكملتها على 1 ونص >> بطييييييئة مووت *_*

في أثناء ما سوي الغدا صحيت عيالي وروشتهم وغيرت لهم
فطرتهم على 2 عشان يريحوني ع الغداء لكن ما أرتحت الله يصلحهم
لبست وتكشخت جا زوجي حطينا الغداء

وقبل لا أحط الغداء طححححت آآآآآآخ كنت غاسله حبق وبردقوش وأبغى أجففهم وديتهم المجلس كان فيه مويه ع السيراميك
وطااااااااخ تقربعت أنا وصحوني وولدي كان حولي أنفجع وجا يركض حولي وفي وجه الخوف .. ضميته وسميت عليه وأنا يبغالي من يسمي علي
وألتفت لزوجي مروق ع الكمبيوتر هو وبنته ولا سمعني قلت لو أني تكسرت مادريت عني .. أنصدم قال طحتي ؟؟ سلامات والله ما أنتبهت
جات بنتي تبربر وتتحطلم مدري وش تقول وتجمع الحبق فديتها وتقول كوبه كوبه يعني كبيتيه ههههههههه

نامو بعلي وعيالي العصر وأنا ما صدقت آخذ لي وقت أستراحه لوحدي
جبت كيك وبردقوش وروقت ع النت شوي
بعدها صحيو عيالي أكلتهم من غدانا

وع المغرب فكيت وجه المكيف حق غرفة النوم وغسلته ومسحت المكيف زييييين وكنسته بالمكنسة
رجعت ع المهمة الثانية شباك الصالة كنسته ورجعت مسحته الحمد لله
الشي اللي ما قد سويته كنس البيت
إذا ما طلعنا الليله كنست

أعتبر نفسيتي هالأيام زينه الحمد لله وأحاول قد ما أقدر أفكر بإيجابية أكثر
صح أن مو كل شي أبغاه يصير وفي الوقت اللي أبغاه لكن أملي بالله كبييير


تدرون وش مشكلة زوجي كل ما طفشت وطلبته نكمل نواقصنا وأشغالنا ... و أني طفشت وتعبت من تسويفه ولامبالاته ومن هالكلام
يضرب على صدرة ويقول ابشري اليوم نطلعكم تتمشون ونلفلف وووو...............
نفسي يكمل شغله بلاش تماشي أبغى أكمل شغلي نبغى ننجز أشغالنا
والتماشي لها وقتها بس هذي نظرته صح حلوه بس مو دايم

اليوم سمعته بالصدفه يكلم خالتي وشكلها توصيه على شغلات وتحرص عليه لأنها تعرفه كسول >> كالعادة
واسمعها تقول الله يعين فلانه >> أسمي .. مو كاسر خاطري غيرها خخخخخخخخ
وهو يضحك ولا على باله وجالس يتريق .. عارف أنه كسول لكن نفسه وسييييييييعه
قلت في نفسي صادقة والله حسيتي فيني يا خالتي ههههههههه

الله يسخر لنا ولكم