|| في بيتنآ مرآهقه..

مآهي مرحله الرآهقه ؟ إقتباس » تعني فترة الحياة الواقعة بين الطفولة المتأخرة والرشد،أي أنها تأخذ من سمات الطفولة ومن سمات الرشد وهي مرحلة انتقاليه يجتهد فيها المراهق للانفلات من الطفولة المعتمدة على الكبار،ويبحث عن الاستقلال الذاتي الذي يتمتع به الراشدون فهو موزع النفس بين عالمي الطفولة والرشد
* * *


طيب خلونآ من هالتعريف وخلونآ نرجع شوي لورى نتذكر فتره مرآهقتنآ أهم وابرز الأشيآء اللي كنآ نعآنيهآ من عمر 9-12 الى 17-19 ربيعآ ..
اولآ : التغيرآت الجسديه ..
.. بروز الثدين .. السمنه لدى البعض .. حدوث الطمث .. الطول .. حب الشباب في الغالب يظهر في هالعمر .. وأكيد الهرمونآت لهآ دور كبير في كل هالاشيآء ..
ثآنيآ : التغيرآت النفسيه ..
إكتئآب .. كثره البكآء لأسبآب تآفهه في الغالب وتعقبهآ لحظه فرح ربمآ لآتستحق كل هذآ .. عدم الثقه بالنفس .. عدم الرضى عن الشكل الخارجي ..
الحسآسيه المفرطه ..
التقلب الوجدآني يحدث للمرآهقين بشكل عآم ولكن يظهر بصوره أوضح عند البنآت ..

هذآ بشكل عآم .. ولكن في هالموضوع رآح نتنآول التغيرآت النفسيه بشكل أوضح ..

* * *

[1]



التقلب الوجدآني
هو نفسه التغيرات النفسيه اللي ذكرتهآ فوق ..
اكتئآب , حزن , حب التقليد , عدم الرضآ عن الذآت , الحسآسيه المفرطه , العصبيه في الغالب ,
كلها في الغالب تكون لأشيآء مآتستحق هالشعور كله في وقتهآ ولكنهآ كآنت لحظه اضطرآب ..
مشكلتنآ ككبآر وتعدينآ هالمرحله نفكر تفكير اللي عمرنآ وننسى شعور المرآهق اللي عندنآ ..
نعآمله وكأنه هو نفس احسآسنآ .. نستحقر مشآكله .. ونسخر من الموآقف اللي تأثر فيه ..
ولآنعذره .. أغلبنآ مآزآل عنده أُميه المشآعر والاحساس ان صح التعبير ..
مثلآ عندك اخت | بنت مرآهقه شفتيها ضآيق صدرهآ مكتئبه تسألينهآ وش فيك ؟ تقولك والله تزاعلت مع زميلتي فلآنه ..
رده فعلنآ في الغآلب : وبسسس هذا اللي مضيق صدرك اقولك بلا سخآفه صدق ماعندك سآلفه روحي ي شيخه
ترآ هالكلآم في وجه نظري ونظرك كـ بنآت تعدينا هالمرحله عآدي حآليآ ..
بس ي ترى لو اننا في عمرهآ وسمعنآ هالكلآم هل راح يمر مرور الكرآم مثل ألحين ؟ مآ أظن بالعكس بنشوفه جرح وعدم مبلآه من اللي قدآمنآ وتحز بخآطرك ..
فالمطلوب مننآ نمآشيهآ ع قد عقليتهآ حآليآ ونسمع لهآ .. ونآخذ ونعطي بس ما نعطي الموضوع اكبر من حجمه ولآ أصغر من حجمه (نستحقره قدآمهآ) ..
نآخذ ونعطي معهآ وكأنه فعلآ مهم لنآ مثل مآهو مهم لهآ ..


[2]

مخالف

الخوف
الخوف شيء فطري موجود في كل انسآن بالغآلب مع اختلاف درجآته وانوآعه ..
ولكن هالخوف قد يزدآد في هالمرحله .. مثل الخوف من عدم تكوين صدآقه حميمه .. في الغالب المشاعر السلبيه تكون مسيطره .. مثل فكره اني غير جميله ,
غير محبوبه , ما اعرف اتكلم زين ,
مثآل :
بنت خالتي رآحت لمدرسه جديده فتره المتوسطه تقول لحالي .. وأغلب الوقت جآلسه لوحدي في الفصل تقول قلت خلاص ابي اتعرف طفشت ..
اول وحده قابلتهآ قلت لهآ ممكن نتعرف
قالت البنت : لأ عندي صديقآتي ماله دآعي نتعرف ..
بنت خالتي وقتهآ تقول حزت بخاطري وكرهتهآ وكرهت نفسي حتى الفصل كرهته ..
حتى نقلت للفصل الثاني جو بنات لي وتعرفوآ علي
ايه مرت السنين وصارت بنت خالتي ذي بالكليه وتقول تعرف على بنات فيه منهم اللي رحب وتعرف ومنهم اللي قالتلي لأ خخخ
بس تقول عادي ما أثر علي تقول خشتي تكون كذا سواء ايه او لأ ..
وصآر عندهم تطبيق بالصدفه تقول صار اللي طالع معي بالتطبيق ذيك البنت(اللي قالت ما ابي اصادقك ايام المتوسط ) تقول تفآجئت حتى هي وجت تسلم
قالت هاه ي فلآنه عرفتيني تقول قلت لها :
مستحيل مآ أعرفك انتي اللي طردتي صدآقتي هههههههههه وجلسنآ نضحك .. انتهى
بنت خالتي ايام النتوسط اي فتره المراهقه كآن على بآلهآ ان الرفض كآن لشخصهآ ..
البنت وقتهآ كآنت رآفضه الصدآقه انهآ مستغنيه عندهآ زميلآت مو لشخص لذآت البنت ..
|| المطلوب هنآ .. تقولين لهآ : مو اي بنت ترفض صدآقتك أو ترفض تطلع معك
أو تجيك انهآ ماتبيك أو مآتحبك .. لأ عندهآ ضروفهآ ومستحيل تفكر في هالشي ..
انتي كلن يتمنآك ..
في خوف آخر : وهو الخوف من فقد غشآء البكآره
أغلبنآ مر في هالشي .. خوف من فقدآنه والحساسيه المفرطه في التفكير فيه .. وخوف من مصآرحه الاهل فيه ..
مثلآ هالبنت : إقتباس » انا عمري 18 سنة واعيش في شك وخوف كبير
فأنا الآن في سن زواج وكل من يتقدم لي اقوم برفضه
والسبب اني خائفه من ان لا اكون عذراء وشاكه في هالموضوع
اخاف على ابي وامي اذا اخبرتهم يحصل لهم شيء وخصوصا ان والدي مريض بالضغط
واخشى على نفسي ايضا ان يقتلني اخواني ان عرفوا بالموضوع
انا والله العظيم والله على ما اقول شهيد لم اخرج يوما لوحدي اعيش في عائلة محترمة ومحافظة وكذلك مدينة محافظة ولا اخرج الا مع احد من اهلي امي او ابي او احد اخواني
و ولم اعرف او افكر حتى بمعرفة شاب ليس من محارمي و لست من هذه النوعية والحمد لله
ولكن الشيء الذي سبب عندي هذه الحيرة وهذا الخوف عدة امور
اولا اني قبل فترة سمعت ان الماء الشديد قد يفقد الفتاة غشاء البكارة لديها وانا حين كنت صغيرة كنت العب كثيرا بالماء او ما يعرف (الشطاف) و اثناء هذا اللعب كان يأتي الماء بقوة على منقطة العانة والمنطقة الحساس ولا اعرف هل آذيت نفسي او لأ
كذلك كنت اركب الدراجة كثيرا وسمعت وقرت ايضا منذ فترة عن ان هذا الموضوع افقد بعض البنات غشاء البكارة لديهن ولا اعرف مدى مصداقية هذه القصص !
وبعد ماتروح البنت وتكشف وتشوف نفسهآ سليمه 100% .. وعذرآء .. وتكبر تجلس تضحك على نفسهآ ..
اذكر وحده من البنات كانت تقول لنآ .. لآ أحد يضربك مع ظهرك بقوه أو انك تنطين (تقفزين) من مكان عالي ترآ هذآ يفقدك غشآء البكآره
>> اوخس ي الأرآنب .. عآد وقتهآ كنآ مصدقين ونجلس نتذكر كم مره انضربنآ على ظهورنآ وكم مره نقزنا من السور ومنهآ تبدأ الوسوسه ..
من هالمنطلق نقول : اعطآء المرآهقه الأمآن ونتحدث معهآ في مثل الاشيآء علشآن تكون على علم ويقين ووضوح في هالاشيآء ..
بدلآ من ان تسمع كلآم (مأخوذ خيره) يأثر عليهآ بكرآ نفسيآ ..
خلونآ من كلمت عيب أو اذآ كبرت عرفت ..
تعرف منك بطريقه صحيحه أفضل من منتدى او صديقه ..


[3]

مخالف

من انآ؟!
لو نذكر ايام المرآهقه بالله كم شخصيه تقمصنآهآ .. علشآن أكون (أنآ) ..
في هالفتره تكون الشخصيه جدآ مهزوزه .. تسعى المرآهقه فيهآ بتقليد من تحب سوآء من وسط مجتمعهآ أو خآرجه .. تلقيد معلمه .. مغنيه ..ممثله ..
أخت .. أم .. في طريقه الكلآم أو اللبس ..
لأن الشخصيه توهآ ما تقوت فشي طبيعي تكون مهزوه وأي شي يأثر عليهآ .. التأثير يختلف من بنت لبنت .. مثلآ عندك مرآهقه ولآحظتي هالشي عليهآ ..
وفهمتهآ بهدوء انهآ بعمر مرآهقه وبكرآ رآح تضحك على نفسهآ بسلوب مزوح بدون تجريح لهآن الأمر عليهآ ويكن تتريث فيه ..
او تقولين يووه ذكرتيني بنفسي يوم كنت بعمرك وألحين أضحك على نفسي
بعكس لمآ مآ يكون عندهآ مرشد او نآصح .. ومآ تعي هالشي الآ عقب ما تكبر ..
تبحث الفتيات في الغالب في هالسن عن المثآليه ..
فتلقين الاغلبيه يعشق العالم الجديد مثل الشات او صديقات جديدات وغيره
لأنه تظهر بمظهر الملآك الافلاطونيه في عينهآ لأنهآ في نظرهآ انسآنه ستكون خآليه
من الاخطآء ..
وتنصدم اذآ أخطأت ..
واحينا عند الوقوع بالخطأ تلجأ لتقمص أحد الشخصيآت القويه في نظرهآ ..
ولكن رده فعل الاهل في الغالب تكون (( ايه انتي جالسه تقلدين فلانه .. معجبتك يعني .. آلله يعيننآ عليك اذآ صرتي مثلهآ ))
وهذآ الخطأ بعينه .. خلي المراهقه تآخذ مجرهآ حتى تنتهي وتهدى ..
بعدهآ بكم يوم تكلمي معهآ عن كيف الوآحد يُكون شخصيته
ويكون مستقل بذاته عن غيره بطريقه غير مباشره ..
انتي بكذآ تعآلجين اللي عندهآ((التقليد)) بدون تجريح او اتهآم مبآشر ..


[4]

مخالف

الشعور بالوحده
الشعور بالوحده شي مؤلم .. ولكنه عند المرآهقآت متضآعف الألم ..
انه يكون حولك نآسك وأهلك مو حآسين فيك قمه الألم النفسي ..
طبعآ هالشي من دون قصد منهم ..
في فتره المرآهقه تميل أغلب البنآت الى الوحده .. حتى لو جو الاهل بخففون عنهآ انه يله تعالي بنسوي او بنروح بلآش جلستك وحدك .. تردهم ..
وإذآ رآحوآ او سمعت اصوآت ونآستهم
تتألم أكثر .. وفيه بعض الامهآت والابآء
يعتبرونهآ خصوصيه وانه برآحتهآ وهذآ اللي تحبه ..
فيحز برضوآ بخآطرهآ >> بتقولون والله احترنآ ..
اقولكم هذآ ندآء غير مبآشر من بنتك اني محتآجتك .. محتآجه حنآنك .. حضنك ..
ان يدك تمسح
على شعري .. وتضميني لصدرك ي أمي .. ي أختي ..
ابكي وافضفض لك ..
صحيح مو كل مره يكون هالندآء ولكن في هالفتره العمريه كثير يصير ..
بمعنى مو كل مره تكون المرآهقه محتآجه تجلس لوحدهآ ننط لهآ .. لأ من فتره لفتره ..
نقيس هالشي على أنفسنآ ..
في أكثر الاحيآن تعآني المرآهقآت من الوحده الوجدآنيه أكثر من الوحده الاجتمآعيه ..
الوحده الاجتمآعيه : هو ان المرآهقه تشعر بأنهآ لم تكون عدد كآفي من الاصدقآء أو لم تحصل على المطلوب عند الاصدقآء ..
الوحده الوجدآنيه : هو ان المراهقه تشعر بأنهآ تفتقر للحنآن .. الحب .. والتعمق في الصدآقه .. الاهتمآم ..

ف انقآذ الفتاة من الوحده الوجدآنيه أهم من انقآذهآ في الوحده الاجتمآعيه


[5]

مخالف

مآقبل الدوره الشهريه
المرآهقه يصبح لديهآ حسآسيه مفرطه وعصبيه فتأتي الدوره لتكمل النآقص ..
أي كلمه حتى لو كآنت تآفهه او تصرف بسيط يصبح في نظرهآ جريمه وجرح لآ يمكن ان يغتفر ..
اننآ مانتفهم وضعهآ هذي مشكله .. واننا نتفهم المشكله ونعاملهآ كشخص نآضج هذي مشكله أكبر ..
بمعنى .. لو أختك او بنتك كآنت متحمسه لشي عمره .. زوآج .. رحله ..ومتجهزه وفجأه نزلت الدوره عليهآ وخربت عليهآ كل شي ..
ان كانه عمره ماراح تقدر تعتمر أوان كانه زواج فإنه خربت مودهآ وطلعت حبوب الدوره وو..الخ .. في هالوقت تعاملي مع الموقف بكل حساسيه وحذر ..
لأن كل شي عندهآ كبير .. تحس بكئآبه وعدم ثقه بالنفس وانهآ اتعس مخلوق ووو ..>> اتوقع كلنآ مآرآت فيه
بكل هدوووء هوني عليهآ .. وانه أمر عآدي .. يمكن مآتخلي لك فرصه وتجلس تصارخ او تصيح
خليهآ حتى تهدآ وارجعي لهآ .. قولي هذا امر عآدي وكلنآ نمر فيه .. صحيح انه شي يضيق الصدر بس لآ تخلينه سيد الموقف ..
مشيهآ والله تمشي .. ومن هالكلآم اللي يهديهآ >>
ترآ هذآ اسلوبي متأكده انكم اطلق مني اسلوب


تذكري : انهآ في هالفتره عرضه لأي مرض نفسي من أهمهآ .. ]الاكتئآب – الرهآب الاجتمآعي – الخوف المفرط [
فكوني لهآ خير عوين .. على تخطي هالمرحله


* * *

قبل ما أنهي الموضوع عندي كم نصيحه للي عندهآ مرآهقه :

- شجعيهآ على أعمآل الخير .. وحثيهآ على الصلآه بسلوب ينآسب عمرهآ ..
- تقربي منهآ .. خلك ملآذهآ بعد الله ..
- خليك حنوونه معهآ لآ تحرمينهآ من حضنك ..
- لا توبخينهآ عند الخطأ .. علميهآ خطأهآ ولكن بدون تصريخ او (معآيره) عطيهآ الأمآن تكون لك كتآب مفتوح ..
- خليهآ تعيش حيآتهآ .. وعمرهآ وجيلهآ بحدود انه مايكون شي يغضب رب العالمين أو مخالف لديننآ
- عطيهآ الثقه .. وشجعيهآ ..
- ابعدي عن اسلوب فرض الرأي .. وحسيسهآ بقيمه شعورهآ ورآيهآ عندك ..
- خلي لهآ حريه الاختيآر والتصرف في الاشيآء اللي تشوفي ما فيها خطر على حيآتهآ ..
وان كان فيه خطر على حياتها قوليلها عن رآيك ووجه نظرك
لأنك حآبه انه تسوي هالشي
لأنه في من الايجآبيآت كيت وكيت ..
- لآ تحسسينهآ انك مرآقبتهآ .. لأن هالشي يبعدهآ عنك كثير ..
- حسيسهآ انك وآثقه فيهآ وانهآ قد الثقه ..
- انصح كل وحده عندها مرآهقه تشتري لهآ كتآب فن اداره المشآعر لـ رضوى اسآمه
كتآب يصلح جدآ للمرآهقآت .. يخآطبهم بسلوب ينآسب عمرهم .. بالنسبه لي جدآ اعجبني ..

انتهى ..


منقول
أتمنى اني قدرت أفيدكم لو بالشي القليل اللي عندي .. واللي عندهآ زيآده حيآهآ المطرح مطرحهآ


انـــطــــلـــقــوآ