ساعدوني امي بتنهار والسبب اخوي بيضيع نفسه

الله يكون في عونكم .. الأولاد مفاجآتهم كثيرة ..
من سن 14 سنة يبدأ يخرج عن سيطرة أهله ويكون له عالمه الخاص ..
جلسته على النت وبلاويه .. والجوال .. والبلاك بيري ..
هذي كلها تعطيه مجال واسع وخصوصية تخليه ممكن يجرب يدخل على أشياء ماتدري عنها حتى وهو قاعد قدامك ..
أفضل شي الأهل يسووه في هذا السن إنهم يشغلوه بشي فيه حركة بدنية تهد حيله
يجي آخر الليل مهلوك يدور السرير وينام على طول ..
يدخلوه نادي رياضي .. أو يجيبوله كاميرا ويدخلوه دورات تدريب يصير باله مشغول بالتصوير ..
أو حتى لو يحب الموسيقى يتعلم على آلة موسيقية يشغل وقته فيها مجرد تسلية ..
على الأقل أحسن من الفراغ اللي يخلي فضوله يشتغل ويدور على الأفلام البطالة والصور الخليعة ..
الموسيقى مع إنها فيها نظر و عليها ملاحظات بس أرحم من المصايب اللي ممكن يوقع فيها ..

أخوكي تقريباً عمره 16 سنة .. لسه فيه مجال تلحقوه ..
خصوصاً إن طبيعته فيه طيبة وعقل وأخلاق وبار بأمه وأبوه ..
وإن شاء الله إن اللي صار مجرد نزوة عابرة تاخذ وقتها وتروح لحالها بدون آثار ..

أجلسي معاه جلسة أصحاب .. قولي له
إيش رايك نكون أصحاب ؟
تحكي لي اللي في نفسك .. إيش تحب وإيش تكره ..
إيش نفسك تسوي وتحس إنك مالقيت الفرصة ؟؟
قولي له
على تعب أمك من تصرفاته ..
وإنك تعرفي إنه رجال وينشد فيه الظهر ..
و ممكن يكون شخص رائع إذا قرر يطور شخصيته ويبتعد عن الأشياء الغلط ..
فهميه إن الشغالة إنسانة جاية عشان لقمة العيش ..
حرام يعاملها كجارية أو ساقطة !!
لازم يحترمها و يقدّرها ويعاملها بالحسنى ..
ويراعي الله فيها وفي نفسه ولايبالغ في الاحتكاك فيها ..
لايدخل عليها وهي لوحدها عشان الشيطان مايجرفه ويصير شي غلط يغضب الله عليه وهو في هذا السن الصغير ..
قولي له
إنت لسه صغير وماتفهم كيف بعض الشغالات يفكروا ..
ممكن إنت في ساعة تفكر تجرب شي حرام وتحسب إنك مأمن نفسك مضبوط ومع هذا يحصل حمل ..
وتدخل في سين وجيم ومصايب وتبهذل نفسك وأهلك بسبب ساعة غباء منك مافكرت في عواقبها ..!!
الشغالة طلعت آدمية وجات تكلمت .. كيف لو ماتكلمت ؟؟؟ ايش بتسوي ؟؟
تبغى أمي تطيح علينا وتروح مننا لاقدر الله بسببك ؟؟
بتقضي عمرك تبكي بدل الدموع دم
ولاعمرك تقدر ترجع الزمن لحظة للخلف عشان تصلح غلطتك وترجع أمك للحياة !!
وريه الوصية اللي كتبتها من وجع قلبها من اللي سواه عشان يحس بحجم جرحها منه ..

بالكلام الطيب والله تقدري عليه ياأختي ..
حسسيه بالأمان وإنك تحبيه وتخافي عليه ..وكوني صديقته ..
قولي له أنا عارفة إنك كبرت و من حقك تعيش حياتك وتجرب ..
بس جرب أشياء صح .. لاتجرب الكوارث .. الكوارث تدمر ..
عمرك ماتجرب كارثة وتطلع منها من غير خساير .. !!!!!!
فكر في بكرة .. لاتسوي شي تخجل منه وماتحب تفتكره لمن تكبر ..
ايش تبغى بالتجارب من هذا النوع اللي مامن وراها إلا الأذية والأمراض ..
تشغل نفسك بصور وأفلام وتثير نفسك وتلاقي نفسك منت قادر تفرغ الإثارة إلا بالحرام ..
تدخل نفسك في مصايب العادة السرية و تجيب لنفسك مشاكل ..
يوم ماتتزوج والله ماتعرف تسوي شي .. وزوجتك تفضحك بين الناس إنك عاجز ..
كله بسبب هذي البلاوي اللي تسويها الآن في هذا العمر
واللي بتأثر في بقية حياتك أسوء تأثير..!!
لازم يعرف تبعات اللي يسويه ياأختي ... لاتستحتي ..
كلميه وقولي له كل شي ..
مو غلط ولا عيب إنك تكوني صريحة مع أخوكي في هذي الأمور طالما وصلت المواصيل معاه لهنا ..
سبحان الله هذا الجيل ماتعرفي له ..
تجيه يمين يروح لك شمال .. تروحي شمال يجيكي يمين ..
بس على الأقل كوني في الصورة معاه خطوة بخطوة عشان مايخبي عليكي شي ..
ويوم مايحس إنه محتاج مشورتك يجيكي وهو واثق من تفهّمك لموقفه ..

بالنسبة للشغالة اللي عندكم .. سفروها بدون تأخير .. وإذا أبوكي مطنش ..
ممكن أمك توديها لبيت أي أحد من معارفكم تشتغل عندهم وسوولها تنازل وافتكوا منها ..
فيه مليون حل تقدروا عليه بشكل مؤقت .. المهم تنقلع من البيت ..
والله أنا 13 سنة شغالة تروح وشغالة تجي ..
لمن كبروا عيالي الله يحفظهم .. قررت إن شغالتي الأخيرة تكون الأخيرة فعلاً ..
وسافرت لها سنة ونص الآن .. استبدلت خدماتها بأجهزة في البيت وريحت راسي ..
غسالة صحون .. نشافة .. مكواة بخار .. اختصرت الوقت بهذي الأجهزة ..
لابتقول أبغى راتب آخر الشهر .. ولا تبغى إجازة تسافر لأهلها
ولا أقعد يدي على قلبي خايفة لاتسوي مصيبة من مصايب الشغالات ..
وسويت اشتراك في مغسلة للثياب والاشمغة والغُتر .. وغسيل اللحافات ..
السواق يودي ويجيب ويخلص لي مشاويري ...
والحمدلله نفسياً مرتاااااااحة ...
تعب البدن ولا تعب القلب يابنت الحلال ..
والله حتى أختي سوت زيي واستغنت عن الشغالات وكرفت عيالها شغل في البيت
عودنا الأولاد يرتبوا غرفهم ويهتموا بأغراضهم ..
قسماً بالله حياتنا صارت أحلى .. كل واحد عنده شغل يسويه ...
يحس إنه مسؤول و عنده إلتزامات لازم يسويها ..
حتى البنت تتعلم تساعد أمها وتشتغل .. بكرة تزوجت وهي مازالت تدرس
ماتضطر تتنازل عن دراستها عشان شغل البيت اللي ماقدرت توفق بينه وبين دراستها
ولاتضطر تجيب شغالة ماتدري ايش تسوي من بلاوي وسحر وتخرب حياتها ..
إذا تقدروا تستغنوا عنها ..نصيـــــحة لوجه الله
ابذلوها جهدكم عشان ماتدخلوا شغالات لبيتكم بعد كذا ..
مهما كان البيت كبير والشغل كثير .. تقدروا تسيطروا على الوضع بشوية تنظيم ..
وجيبوا شغالة بنظام الساعات كل كم يوم تخلص الأشغال الثقيلة وتروح آخر اليوم ..

والجوالات عندي قانون صارم والحمدلله مطبقته
جوال في يد ولد صغير ماااافي ..
اشمعنى أصحابي .. وليه فلان عنده وأنا ماعندي .. مافي يعني مافي
قلت أبغى سوني جبنا لك ..
قلت أبغى لابتوب جبنا لك أحسن وأغلى الأجهزة ..
قلت أشترك في نادي قلنا لك أبشر ونقي النادي اللي يعجبك ..
الجوال بعد 16 سنة ياخذه ويترااااااااقب ..
يكلم مين .. يراسل مين ..
البلاك بيري واللابتوب .. يتفتش كل يوم .. ماينترك على راحته أبداً ...
لحظة مايسوي شي غلط .. ينسحب منه مباشرة ولو جادل وقال ليه ؟؟
ينقال له إنت منت قد الثقة وشكلك لسه طفل ومحتاج تتعامل معاملة الأطفال ..

شوية مراقبة وصداقة بين الأهل والولد تخليه يحس بالمسؤولية
ويخاف يخذلهم ويحرص كثير على ثقتهم فيه ..

ربي يهدي أخوكي ويصلح حاله ويريح قلب أمك :032: