اللي اسويه صح او غلط ؟؟

twonty;14645192:
تدرين زوجج به شي من زوجي انه اذا ادمن شي يلهى معاه (اذا منزل حلقات مسلسل على الكمبيوتر ينسى العالم اللى حوله لدرجه اناديه ما يرد يقول ما سمعت وانا مندمج)واذا يطالع التلفزيون ومن ذي الامور,انا ما قريت المشاكل اللى مريتي بها من قبل لكن اقول يمكن ريلج متملل من الروتين اللى هو به ويبي يغير فامب لاقي الا انه يطلع المزرعه ويمر اصدقائه خليه على راحته وارجعي وكلميه بالموضوع ولا تعصبين لانه انت حامل وتعبانه ما يسوى عليج.تدرين فيه وحده زوجها يروح الدوام يرجع يوميا يروح للعزبه ويجتمع مع اصدقائه ما يتغدى مع حرمته ولايتعشى لا وعياله بعد صغار و كبار تقول تعودت انه يطبخ في العزبه ويطلع مع ربعه وانا مع عيالي اقوم بواجباتهم ومن سنوات وهم على ذي الحال ,بس بينهم الود والاحترام.
كثير رجاجيل جذي ما يهتمون لعيالهم بس يحنون نبي عيال وبالاخير حنا اللى نستحمل كل شي فاتعودي عادي كثير ازواج جذي .
الهي نفسج بأي شي علشان يخف الضغط عنج او دوري عمل اذا هو راضي واذا تضايقتي كثير اكثري من دعاء المصيبه والاستغفار

cute soul;14645242:
الله يهديه ان شاء الله العرايس يساعدونك

سوسيتا;14645265:
الله يهديه و يسخره لج


حبيبتي حاولي تشاركينه في كل شي لأنج شريكة حياته و فهميه شو معناة شريكة..

لما يطلع عند الحيوانات تمشي عنده و طلعي السوالف الي يحبها مو شرط عن الحيوانات بس .. يعني عن اهتماماته هواياته .. و حسسيه انج صديقتة الصدوقة تكلموا في كل شي حتى لو ما تحبين الاشياء الي يحبها .. ادخلي عالمه .. خليه يعرفج عليها .. لين تصير عندكم اشياء مشتركة F:

ريمااان;14645508:
الله يعينك صدق اللي قال اللي يشوف مشاكل غيرة تهون علية مشكلته
انا نفس مشكلتك بس أهون بكثير يعني زوجي يرجع 3 الظهر نتغدى وينام لحد المعرب وبعد المغرب يطلع ويرجع 11
وطبعا كنت دايما متضايقة لحد ما وجدنا حل وهو انة بعد الغدا ينام ساعة ويطلعني البحر أو أي مكان وبعد المغرب يطلع مع ربعة الصراحة ارتحت كثير وهو بعد ترتب جدولة وكل حد راضي الحين

ام مريم ملاك منار;14645704:
السلام عليكم ورحمة الله
عزيزتي ام شهودة الحلوة اولا ابي اعرف اذا كنتين تشتغلين او لا ؟لماذا لان هذا امر مهم اذا كنتين جالسة في البيت بدون شغل يكون كل اهتمامك على ان يجي زوجي ويطلعني او اغير جو الوحدة معاه(هذا ما تتوقعينه او ما تتمنينه) ولكن الواقع شي اخر لذا انصحك ان تجدي لنفسك شي يشغلك تستثمرين فيه طاقتك ووقتك الثمين .
لان زوجك عندما يعود من العمل يشعر بالحرية لخروجة من دائرة العمل يريد ان يتنفس لا ان يجلس في البيت ليس لانه لايحبك أو لايحب الجلوس معك .
لابد ان يكون بينك وبينه اتفاق مسبق لتحديد يوم في الاسبوع للخروج والتنزه والغذاء وهذا اليوم اسمه يوم الاسرة
اعتذر على الاطالة ولكن هذا الشي من واقع تجربه انا عن نفسي لا التقي به كثيرا ولكن عندما اراه يكون الحب متجدد وينعكس بدوره على الاطفال عندما نخرج معا نتنزه نشتري ما نريد بناتي يؤجلون طلباتهم لهذا اليوم المتفق عليه لماذا التنازع الحوار والتفاهم والاتفاق .
اسأل الله ان يمن عليك بالصبر ( حتى الدوار روحي بروحش مو لازم هو يوصلش ) اللهم عجل لوليك الفرج

محبة الرشاقة;14645715:
قولولي اللي اسويه صح او غلط ؟؟ اني اهمله ومااقعد معاه .. لان يحسسني انه احنا اخر اهتماماته

هالعبارة استغربت منها هو متى بتشوفي عشان تهملي وماتقعدي معاة ما حسب كلامك بجي عشان ينام يعني مافي اي علاقة بينكو هيك مابنفع بالمرة وانتي ايش انتي وابنك حالحياة مستحيلة انا لو منك بجلس معاة بهدوء وبتتفقو على شئ واحد انو لازم يقسم وقت مش كلو اللو هاي اسمها انانية يوم ليكي يوم لنفسو يوم لابنكو هيك حياة اخد وعطاء وتضحية وحب عشان تتقدرو تعيشو بجو من الاستقرار وطمانئنية ربي ير امرك

الفتاه الذهبيه;14645829:
حبيبتي مالك الا الدعااااااااااااء واطلبي من ربي ان يهدي لك
وكثري من الاستغفار
وبيني انك مهتمه فيه لاتهملينه ابد حتى لو اهملك لان الرجال طبعهم اناني مايفكرو الا بانفسهم وبس
انتي اتصلي عليه كثير وبيني له انك خايفه عليه
ولاراح تأكلين الا وهو معاكي عامليه مثل ماتعاملين طفلك
وبأذن راح يكون خاتم باصبع
وربي يسخره لكي ياقلبي وبالتوفيق

life is dream;14645942:
اختي الغالية ....مشكلتك هي مشكلة كل البيوت تقريبا ....بس همس في اذنك الزوجة هي اللي تعرف كيف تخلي زوجها خاتم في اصبعها ...وانا لي تجارب وايد مع زوجي اللي كان عنده نفس مشكلتك واكيد كل رجل يختلف عن الثاني بس خير الامور الوسط لا تهتمي فيه اكثر من اللازم .....اهتمي بنفسك اكثر ....


وعلى فكرة الزوج يحب الزوجة المتجددة مو الزوجة الحلوة

حبيبة حبوب;14646079:

ام شهوده

في البداية بعد مو حل انج تنامين لما يوصل
جذي العلاقة بينكم راح تنتهي لانج ما تشوفينه ابد

مثلاً وقت إلي يرجع خلج قاعده مع التلفزيون تابعي اي برنامج
ولما يرجع خلج عادية ولا تعطينه اهتمام تكلم معاج اهلاً وسهلاً ما تكلم طنشي
واذا كلمج خلج مبينة انج مشغولة شوي لا تردين عليه بسرعه
واذا قالج شي قولي له عادي مندمجة حرام يعني آخذ شوية وقت لفنسي
واهم شي خلج لابسة وحاطة شوية ميك اب يعني كاشخه واذا قالج ليش حاطة ميك اب او كاشخه قولي له جذي حق نفسي يعني تشوف معاي احد اكشخ له او طالعه مكان مثلاً علشان اكشخ ؟؟؟ كاشخه حق نفسي بس ...
واذا حسيتي انه جاء بيقعد معاج او شي
قولي له آنه تعبت من القعده وباقوم اريح وخلية ورحي نامي
حسسية انج مهتمة في نفسج علشانج انتي مو علشانه ...
حاولي تطنشينة شوي مثل ما اهو مطنش
وخلج جذي جم يووم وشوفي شنو يصيرر
ولا تضاييقين روحج وايد

ترا اغلب الرجال جذي ما يقعدون في البيت كلا برى

Dior Me;14646095:

حلك في إنك تطلعوا من البيت الكبير وتسكنوا لوحدكم في شقة بعيد عن أهله !! ..

إذا فيه إمكانية عندكم لتنفيذ هذا القرار ..
حاولي تتكلمي مع زوجك وتنقلوا بأسرع وقت..
إنتي أدرى بوضع زوجك المادي .. إذا يقدر وماعنده مشكلة
حتى لو شقة غرفتين وصالة ومطبخ وحمام كفاية عليكم ..
وإذا رفض وهو قادر على هذا الشي .. كلمي أهلك يكلموه
وحتى لو مايقدر وأهلك يقدروا يساعدوكم .. ليش لا !!
زوجك مو حاس ان عنده بيت هو مسؤول عنه
عنده زوجه وطفل والحياة ماشية وماله من هذا الزواج إلا غرفة وبس ..
حاس إن البيت شايلكم وشايل غيركم ..
عشان كذا قاعد يدور شي يلهيه لأنه تعود إن كل شي مشترك في حياته مع أهله ..
خروجكم لبيت مستقل وحياة مستقلة بيحسسه بالمسؤولية أكثر ..
مجرد مايخرج من عمله بيرجع لبيته مشتاق لشعوره بالراحة في بيته الخاص ..
يلبس زي مايبغى .. ياكل متى مايبغى .. ينام في الوقت اللي يناسبه ..
يشوفك براحته وانتي رايحة جاية في بيتك لابسة زي ماتبغي ..
تتحركوا بحرية و تحسوا بمعنى الخصوصية ..
طقت في راسكم تخرجوا آخر الليل مالأحد عندكم شي ..
تخرجوا وترجعوا براحتكم ..
هذي التفاصيل المهمة في حياة الزوجين هي اللي تقربهم من بعض اكثر
و تحسسهم بإن لهم كيان وحياة ملكهم يعيشوها بطريقتهم من غير قيود أو ضوابط مفروضة من العيلة الكبيرة ..

لأنه يفتقد لهذي الخصوصية والحرية .. صار يدور اشياء يلهي نفسه فيها
ولاتلوميه .. يمكن هو متضايق أكثر منك بس مايقول ولا يبين ويمكن عنده أسبابه
ممكن ظروفه المادية ماتسمح له يسكنك برا في المستوى اللي تتمنيه ..
يمكن أهله ضاغطين عليه ومحرصين عليه من قبل مايتزوجك مايتكلم في موضوع الخروج من البيت ..
إذا المشكلة مادية .. جربي تشوفي أهلك لو يقدروا يساعدوكم
حتى لو زوجك رفض قولي له دين علينا وبنسدده لاتشيل هم ..
وإذا المسألة قانون عائلي غير قابل للنقاش .. هنا وقت أهلك وتدخلهم ..
يتكلموا معاه ومع أهله لأن هذا حق من حقوقك
والمفروض مايتسببوا في مشاكل من هذا النوع ويخربوا علاقة زوجين لسه في أول حياتهم بسبب الأنانية ..

كل الحلول اللي بتنقال لك غير هذا الحل ممكن تجيب نتيجة .. بس مؤقتة
لا الزعل بينفع ولا المشاكل ولا روحتك بيت أهلك ..
إنتي كذا زي اللي ينظف جرح ملتهب تنظيف أي كلام من برا ويغطيه وهو من داخله ملوث..
لاالجرح التأم ..ولا الإلتهاب راح ..
وبقي الجرح موجود وكل فترة وفترة يرجع يلتهب والألم مكانه ماتغير ..
عشان يروح الإلتهاب لازم يتنظف الجرح من داخل ..
أوقات يحتاج لفتحه وتحمل ألمه عشان يتنظف من داخل ويلتئم بشكل سليم ..

وانتي لازم تسوي كذا ..
صلحي الأساس عشان تختفي المشاكل الفرعية اللي كل يوم طالعة لك بشكل وحالة ..
ولين يجي اليوم اللي تطلعوا فيه لبيتكم
حاولي تتحمليه شوية .. ولاتطفشيه باللوم والعتاب كل يوم عشان مايمل
فهميه إنك متحملة لأنك متأملة يجي يوم خروجكم لبيتكم الخاص قريب ..
وإن اللي يصير منه متعب كثير ويأثر عليكم تأثير سلبي
ضروري يتصرف بسرعة ويصلح هذا الوضع ..

وربي يعينك ويسهل أمرك إن شاء الله