شات منتظرات الحمل وامهات الستقبل القريب بإذن الله (بنات مصر)لشهر ربيع ثانى

N0rma;14706930:
ايون يا دونا هو الرقم

منا بسيرش اهو
انتى وحشانى اوى على فكره م بتيجى شات البنات ليه

وانتى يانورمتى وحشانى والله وعايزة اعرف اخبارك ياقمر
دخلت كذا مرة الشات فمش بلاقى حد ياقمر

أجمل ايام العمر;14706934:
انا جيت نورت البيت .. دينا صباحو فل

صباحو قشطة ياهدهد بوسيى لى بيلا بوسة كبيرة :D
هتعملى ايه فى الاستفتاء

هالو ازيكم مين هنا
انا لسه جايه من برا

دينا حمدى;14706795:
ههههههههههههه انتى تحفة وعليكى كلام
على فكرة لازم تستخدمى اسلوب الترهيب والترغيب هههههههه
واخس 5كيلو مرة واحدة ياريت ياختشى ياريت
بس انا بطيئة اساسا تفتكرى ممكن اخسهم مثلا فى شهرين ونص ههههههه
وحلوة جعانة بشكل مثير للدهشة دى
اتصدقى انا اندهشت جدا من كلامك ههههههههه وكمان بطنك بتعمل اصوات
الله يكون فى عونك يا جوز امونة



ماتحللى يابت يا عليا ويارب يارب يارب ماتجيش وتبقللى يارب



بصى ياستى حسب فهمى ونظرتى المتواضعة:D
ان احنا قمنا بثورة واسقطنا النظام الفاسد فبالتالى الدستور سقطت شرعيته بالاضافة انه دستور اصلا مايصلحش ابدا للمرحلة اللى جاية

لانه حسحس كان عامله عليه هو وابنه وفى ثغرات كتير
زى مثلا ان التعديلات بتقول ان الرئيس له اربع سنسن وممكن يرشح نفسه لمدة تنية فقط وفى مادة تانية فى الدستور بتقول ان الرئيس يحكم 6سنوات((تنتهى مدة رئيس الجمهورية الحالى بانقضاء ست سنوات من تاريخ اعلان انتخابه رئيسا للجمهورية العربية المتحدة.)المادة (190) )

طيب ازاى مادتين يبقو عكس بعض واحنا هنستند لمين فيهم
فتحسيه متناقض ومرقع زى مابيقولو
ومش معقول هيعدلو 170 ولا 190 مادة علشان يبقى كله متماشى مع بعض ومفيهوش ثغرات او تناقضات يستغلها الرئيس القادم او اى حد له سلطة استغلال غلط يحقق بيه مصالحه هو
حاجة تانية كمان لو وافقنا على التعديلات دى فهنبقى مضطرين اننا نعمل انتخابات مجلس الشعب والشورى قبل الرئاسة
وده هيخلى بقايا الحزب الواطى والاخوان مع احترامى الكامل للاخوان انهم هما بس اللى بكون عندهم فرصة الترشح لكن الاحزاب اللى بتمثل الشباب والشعب والثورة مش هتكون لسه لحقت اتكونت بشكل فعال ومارست دورها


ايه الكلام الكبير اللى انا كتبته ده وماحدش يسالنى تانى علشان مش هعرف اقوله تانى هههههه
عليا انتى هتقولى نعم ولا لا

وعلى فكرة فى نغمة احنا كنا فين وبقينا فين واحنا كنا نحلم بكل ده
لو كنا مشينا على النغمة دى من الاول كان زمان مبارك قاعد فى ارابيزنا لحد دلوقتى
حلوة ارابيزنا دى


صباح الفل يامانيا

انتى ايه رايك فى تعديلات الدستور نعم ولا لا


كل واحدة يابنات حتى البنات اللى بره مصر يقولو لنا رايهم ونتناقش فيه

N0rma;14706881:
معاكى الرقم اللى اوله 019؟
طيب ازاى سايبين الماده التانيه اللى بتقول 6 سنين دى؟
هما بيستهبلونا
هما مش هايتغيرو بئا

بصراحة انا محتارة جدا.. الدستور و الجو ده جديد و غريب علية أوي... بس أنا كل ما اقرا رأي أقتنع بيه.. و لحد دلوقتي مش قادرة أحدد انهي رأي الأسلم.. يعني الأول كنت بقول لأ .. و لازم دستور جديد و الجيش يطول معانا مهما يطول مش لازم يمشي بعد 6 شهور يعني لحد ما يخلصولنا دستور جديد على نظافة بدل ترقيع القديم....
بس لما قريت الآراء اللي بتقول نعم لقيتها برده مقنعة..
أولا الرأيين متفقين انهم عايزين دستور جديد ... بس (نعم) بيفكروا انه التعديلات الحالية إيجابياتها كويسة و كبيرة و في مادة في التعديلات بتلزم المجلس اللي حينتخب و الرئيس انه يحط دستور جديد و يكون بآراء الشعب كله .. و يرضي متطلبات الثورة .. و نضبط مادة مادة على راحتنا و كمان ده في خلال مدة محددة من تاريخ اختيار مجلس الشعب و الرءاسة..
كمان ان الجيش مش واخد على التحكم في الحياة المدنية و ابتدوا يتخنقوا مننا و ده رأي نوارة نجم.. و بدل ما الدستور الجديد يتحط من قبل المجلس الأعلى دلوقتي.. لأ نحطه احنا مع نفسنا بعدين.. و عشان مواد الدستور كتير و أكيد حتحصل اختلافات بين الشعب على مواد الدستور الجديد على بال ما نوصل لدستور يرضي الشعب كله.. و الجيش مش حيستحمل مننا لا اعتراضات و لا مظاهرات و لا احتجاجات ..فعشان كدا بيقولوا نعم .. عشان الجيش خلاص يمشي (خصوصا انه مصر على ال 6 شهور بس) و احنا كدا نبقى على أول الطريق و بنتقدم في خطى واضحة...
و بعدين المادة 190 قالوا انها كدا ملغية خلاص ... و انها تعني الرئيس الحالي وقت ما اتحطت المادة دي و بانتهاء الرئيس ده انتهت المادة دي.. الكلام الأكيد دلوقتي ان الرئيس فترته 4 سنوات فقط و تجدد مرة واحدة و بس...
و على فكرة .. اللي بيقولوا نعم و اللي بيقولوا لأ الاتنين من الثورة و أهل الثورة ... يعني مفيش مزايدة لحد على التاني... بس كل واحد من وجهة نظره شايف انه ده الأصلح للبلد.. و دي ميزة الثورة انه يبقى فيه ديموقراطية و حرية في الرأي سواء قلت نعم أو قلت لأ ... المهم انه يكون لك رأي...
ابقوا اقروا مقال نوارة نجم على الفيس بوك..
و بالتالي انا الى الآن مش عارفة ... بس حاسة اني بقيت أميل أكتر لنعم... و أعتقد اني لو كنت في مصر كنت حقول نعم برده...

ده جزء من كلام نوارة.. و قالت رأيها بعد ما قعدت مع قانونيين .. و مستشارين و كدا.. (أنا مش عارفة ممنوع وللا مسموح نتناقش هنا في السياسة.. فلو ممنوع قولولي عشان ألغيه.. )
المهم، المادة 190 دي مادة معطلة سقطت بانتهاء الفترة الاولى للسادات وفيه اسباب ليه ما اتشالتش حابقى اشرحها لما افضى، المادة 189 ملزمة لانها احالة الى منهجية التعديل وليس الى صلاحية التعديل
الخلاصة: الدستور ده مؤقت، يلزم البرلمان والرئيس بكتابة دستور جديد، ويخلي الرئيس والبرلمان اللي جايين انتقاليين
وكمان سألت في المجلس الرئاسي، المجلس الرئاسي ما هو الا ستار للمجلس العسكري، بمعنى ان المجلس الرئاسي هو حكم عسكري بمشاركة مدنيين واحنا مش محتاجينه لان الوزارة المدنية تغني عنه، والمجلس العسكري مش حيسلم السلطات الا لسلطة شرعية منتخبة وهي البرلمان والرئيس، يعني حتى لو عملنا مجلس رئاسي الشرطة العسكرية حتفضل موجودة، والجيش مش حيرجع لثكناته
احنا مش محتاجين اعلان دستوري لان الدستور القائم هو دستور مؤقت، وهو بمثابة الاعلان الدستور، كل ده واكتر حاحكي فيه بعد ما قعدت مع قانونيين فهموني، وابقوا اقعدوا انتوا كمان مع قانونيين ما يبقوش متغاظين انهم ما حدش حطهم في اللجنة
كمان الدستور الدائم محتاج يتعمل على مهل
وفي ظروف يبقى فيه حياة مدنية متكاملة، مش شرطة عسكرية ومحاكم عسكرية، قال وبتتخانقوا مع الجيش عشان مش معترف بحقك في الاحتجاج والتظاهر السلمي.. انتوا حتمثلوا؟ احنا في احكام عرفية وتحت حكم عسكري، هو فيه حكم عسكري عامل احكام عرفية وسايب البلد نادي الجزيرة كده؟
اثناء كتابة دستور جديد احنا محتاجين نقاش مجتمعي، يمكن ينتج عنه بعض المساجلات، التي قد تؤدي الى بعض الاحتجاجات، وفيه نقاط حساسة، زي مثلا المادة التانية، وزي خمسين في المية عمال وفلاحين، وطبعا الناس حتسخن، وعايزة تنزل تتظاهر

ازيكم يا بنات
انتوا قلبتوا الشات من منتظرات الحمل للسياسة
وحشتونى يا بنات

انا هقول نعم ان شاء الله

نورما وحشانى اوى

والله يا بنات هى التعديلات من وجهة نظرى جميلة

ازيك يا هدى وشوشو و دينا ومنايا وام صوفيا

منمن الجو ده جديد علينا كلنا مش انتى لوحدك
احنا اصلا عمرنا انتخبنا ولا كان لينا رأى فى حاجة

بصى يامنم المادة مثلا 76(نتخب رئيس الجمهورية عن طريق الاقتراع السري العام المباشر ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضوا علي الأقل من الأعضاء المنتخبين لمجلسي الشعب أو الشوري، أو أن يحصل المرشح علي تأييد مالا يقل عن ثلاثين ألف مواطن ممن لهم حق الانتخاب في خمس عشرة محافظة علي الأقل، بحيث لا يقل عدد المؤيدين في أي من تلك المحافظات عن ألف مؤيد.)
اولا مجلس الشعب والشورى هيكون غالبيته بواقى الحزب الواطى واخوان دى حاجة يعنى عاييزن 30 تاييد منهم
يا اما 30الف توقيع ممن لهم حق الانتخاب
يعنى مش هنعرف نختار رئيسنا بحرية هيبقو ادامنا خيارات محدودة جدااااا
ليه الفترة الانتقالية ماتطولش شوية ونبنى دستورنا وانتخابتانا على اساس سليم بدل ما كل شوية تعديلات وانتخابات ولخبطةة
متاتبقى مرة واحدة وخلاص ويكون عندنا قوى سياسية بتمثلنا فعلا

والمادة 77 بتقول فترة الرئاسة اربع سنين وتعاد لمدة اخرى فقط وزى ماقولت لنورما المادة 190 بتقل 6سنوات
ليه الترقيع وليه نلخبط نفسنا ونبقى مش فاهمين مانعمل دستور جديد افضل ونمشى خطوة خطوة صح من الاول ولا انتى ايه رايك
وطالما ملغية مالغوهاش ليه رسمى بدل مايلخبطو الناس ويشككوهم
وحكاية ان هيحصل بين الناس اعتراضات فده طبيعى بس كل واحد له رايه واللى بينى وبينك صناديق الانتخابات واللى يختاره الاغلبية هو اللى هيمشى طالما هنبقى واثقين فى نزاهة الانتخابات
غير ان برضو الدستور لسه مدى الرئيس صلاحيات كبيرة جداااااااااااا وماقللش منها اى حاجة

ماهو شات بقى يا شوشو :) حنرغي فين و في ايه طيب هههههههههههههه
ازيك يا ام صوفيا.. اخبارك و اخبار تركيا معاكي ايه ؟
هدى... صباح الخير يا جميل... بيلا عاملة ايه انهاردة..

يا بنات عندى جمبرى عاوزة اطريقة حلوة وغريبة اعمل بيها الجمبرى

حقوم أرمي الغسيل في الغسالة و أجيلكم..

ازيك ياشوشو
اه قلبناها سياسة
اهو تغيير بقى شوية هههههههه
زهقنا من الكلام فى الحمل


عارفين يابنات احسن حاجة ايه ان كل واحد يقول رأيه ويحترم رأى الاخر بحيث ماحجرش على رأيك يعنى نتناقش وفى الاخر كل واحد شايف الراى الصح يعمله

وعندك حق يامنمن مفيش اى مزايدات على وطنية حد لان كلنا همنا مصلحة البلد قبل اى حاجة بس كل واحد شايفها من وجهة نظره وهى دى الديمقراطيه

هيييييه هييييييه هيييييييه بقى عندنا ديمقراطية هيييييييييه ههههههههه
انا اتجننت

الحمدببه بخير يا حبيبة امها انتى ازيك


مانيا تركيا بتسلم عليكى والجو النهارده حلو موت

ماهنديش فكرة في عمايل الجمبري يا شوشو.. أصلي مبحبوش غير مقلي.. أي طريقة تانية بقرف منه.. استغفر الله العظيم...

مصر وحشتنى اوووووووووى
هو دا احساس طبيعى ولا انا بس
انا بقالى 5 شهور بس هنا

هههههههههههههههههه دينا.. فعلا أحلى حاجة انه الناس تصوت ... أول مرة نحس ان صوتنا حيتحسب... و دا في حد ذاته انجاز بصراحة .. ماتخيلتش انه حيجي اليوم و يتحقق ...يا ريتني كنت في مصر عشان أصوت بعلو صوتي هههههههههههه...

أم صوفيا... طب وسعيلي مكان جنبك بقى أحسن نفسي أروح تركيا موووت... قوليلي صحيح .. هو الواحد لو حب يتفسح في تركيا .. اسبوع مثلا... يكلفه كام ؟؟ لشخصين بس...

بصي يا شوشو.. هي ما كانتش واحشاني بصراحة.. بس من ساعة الثورة حاسة انها واحشاني.. حاسة اني حنزل أشوفها بتوبها الجديد (ربنا يستر و ما اتصدمش حتبقى صدمة عمري بصراحة )
صحيح قولولي أخبار الأمن و الشرطة و الأمان في الشارع ايه؟؟لسة في حوادث بلطجة؟؟وللا كله تحت السيطرة؟

انتوا ساكتين ليه انهاردة فاطرين سد الحنك وللا ايه...
تصدقوا اني فعلا نفسي أوي اكل سد الحنك ..اللي انا متعدة عليه ان اسمه حلاوة الدقيق :)