خايفه

السلام عليكم ورحمة الله وبركاته

عندي موضوع مخوفني وايد ..

واتمنى منكم ابداء ارائكم .. واعطائي الحل المناسب لاني تعبت لدرجة اني اخذت اجازه من دوامي

الموضوع فيه شاب (موظف معاي) .. انا اشتغل في شركة .. وطبعا النظام mix
الموضوع بدى اول اسبوع داومت فيه .. وطبعا انا كنت فترة تدريب .. جاني يبي اخلص له شغله المهم وانا اشتغل ومدمجه اخلص له شغله .. فجاه اسمع يقولي ركزي لاتغلطين ترى هاي مسووليه التفت عليه وانا مصدومه واقول " ايه في ايه"

بعدها بفتره جاني جايب بعد شغل و كانت مسوولتي واقفه تكلمني .. وهو وقف معاها ودخل نفسه فالموضوع وطلعني من السالفه وانا ماكنت مخلصه كلامي مع المسؤوله فتميت اقول الي عندي ولا التفت عليه لين خلصت رجعت اشتغل وسكت عنهم ..

وعقب يمكن بكم يوم بحكم اني خدمة عملاء فالشركة وهو مدير علاقات عامه .. صارت مشكله مع عميل بس المشكله كانت من قبل ما اتوظف انا .. بس محد حلها .. فجاني عند مكتبي وتميت اشتغل معاه عشان نحل مشكلة العميل .. ولين حليناها .. ومن ذاك اليوم وانا احسه يسوي اي شي عشان يجي يكلمني ..

صارت مشكله مع عميل ثاني وانا مالي اي دخل فيها اتصل فيني ..وتم يهذر وانا مصدومه وساااااااكته واقول في قلبي ذي شيقول .. بعدها حس اني مب متقبله الموضوع او اني ماعطيته اي اهميه سكر..ومره جاني عميل بارواق ناقصه من طرفه هو .. طرشت له ايميل عشان مايتصل ولا يجي مكتبي .. قلت هاي احسن طريقه عشان ابعده وماعطيه مجال .. اول ماوصله الايميل .. الا هو جدامي .... وكان عندي عميل وتعمدت اتاخر مع العميل عشان يروح .. الا جاله واحد من الموظفين وقاله في شي بغيت شي .. قال لا عندي شغله مع "فلانه "وبعدين قال خلاص باروح وبارجع لها عقب .. انا ارتحت قلت خلاص بيرد علي بالايميل .. الا اخ يتصل على مكتبي ... يقولي يتج شفتج مشغوله .. تميت ساكته .. قالي ترى انا كلمت العميل وقال بيجيب الاوراق .. وبعدها بعد تم يسوووولف .. وانا تميت ساكته شفته مصخها قلت له عندك شي !! قال لا قلت له خلاص باخلص شغلي ..

وطبعا الاتصالات وجياته ونظراته من بعيد ماوقفت والتعيلث باسباب احسها كاذبه و واهيه..بعدها بفتره .. انقلوني من قسمي لين قسم اغلب الموجودين شباب .. جاني قالي نقلوج .. هزيت راسي .. قالي : ان شاء الله مرتاحه .. قلت الحمدلله بس المكان ضيق وايد .. بس عادي .. المهم سكت و راح ..اخر الدوام كنت رايحه اصلي وغرفة الصلاة قريبه من مكتبه .. وانا طالعه صادفته وتم يقولي انتي لازم تتكلمين ولازم تغيرين مكانج ..مكانج مب مريح وانتي جامعيه شلون ترضين بهالوظيفه .. ولازم تغيرين ..وانتي مب مرتاحه وانا ادري .. قلت له اوكي مب مرتاحه .. بس مب عشان المكان انا مب مرتاحه من المكان و الشركة بكبره وباروح مكان احسن من هاي ان شاء الله.. هني عصب اني قلت باطلع من الشركه .. ..وتم يحاول يقنعني اشتكي واقعد .. تميت سااااااااكته .. لين خلص كلامه مشيت .. الا اسمع يقول حق وحده من الموظفات هاي وايد بريئه.. كملت ولا كاني سمعت شي ..

وموقف مره كان جايني مع العميل عشان امشيه بسرعه .. عقب ماراح العميل .. الاواحد من الموظفين اسحبه قاله تعال نروح ندخن .. الا يقولي شوفي بيخربوني :| ..قلت في قلبي يعني كلش انت ماتدخن مثلا

والغريب في الموضوع ان بس يتصرف معاي جذي بس مع باقي البنات لا..

وغير طبعا ان وايد سئلني عن عنوان بيتنا وعن اسمي بالكامل .. وانا كنت اتصدد .. والف وادور .. لين سئل وحده معانا فالدوام وقالت له عن عنوان بيتنا ..

هاي المواقف الي معاه واذا تذكرت شي بعد باكتبه ..

بنات ساعدوني شورو علي شاسوي .. والله اني خايفه منه وايد .. ولاني قادره اقول لحد من هلي .. ولاني عارفه اتصرف .. ولا عارفه نواياه..

وانا الحمدلله وحده خايفه ربي.. ومصليه ومسميه وماعطي الشباب مجال حق هالسوالف .. وهالموضوع مسبب لي ازمه نفسيه .. الي على طول يا اصيح ياساكته .. وانا ماحب هالحركات ولا احب سوالف الشباب ..