مصدومه

وينكم خواتي تكفووووووووووون والله انا على اعصابي من يومين ومش عارفه اتصرف .. كاتمه بقلبي واتصنع ضحكتي وكلامي قدامه وقدام اهلي وانا قلبي محترق والله مش عارفه شاسوي .. فكرت اني اواجهه واحلفه قبلها عالقران عشان يقول لي الصج عقب اسأله عن الفندق وعن البنت اللي كان يراسلها شعلاقته فيها .. وشوي اتراجع واقول خل انطر واشوف ايش الشور اللي بيجيني من عندكم ... تكفووووووون لا تتأخرون علي اكثر من جذي .. والله العظيم تعبانه ونفسيتي زفت الزفت ... انا زوجي احبه واموت فيه والله بس هالشي يقهر ويحر اي مره حتى لو ماتحب زوجها ... انتوا عارفين زوجي وعلاقتي فيه شلون من مشكلتي السابقه واموري معاه تحسنت وايد لاني صرت احاول قد ما اقدر اشري رضاه وهو بعد كلامه معاي طيب ومايقصر قد مايقدر رغم ضيق حاله ... بس والله مو بيدي صعبه علي وايد ... على كثر ماسويت له وقاعده اسوي له القى هالشي منه ... حرام بحقي ... والله العظيم حرااااااااااااااااام ... الله يسامحه الله يسامحه

السلام عليكم
هلا اختي الغاليه
وسعي صدرج وتعوذي من الشيطان اللي يحوم حواليج ويحاول انه يخرب بيتج
هذا هدف الشيطان الوسواس والعياذ بالله

اللي شفتيه يمكن يكون زوجج ويمكن يكون لاحد يعرفه صديق .. أخ .. مايعلم الا رب العالمين
يعني يكون صديقه مأجر غرفة في فندق .. بأسم زوجج او ماشابه

تعوذي من الشيطان

وجلسي معاه وتناقشي بكل هدوء وحب ووساعة صدر ... وادعي الله بأن الله يهديه ويصلحه ان شاءالله ويؤلف مابين قولبكم اكثر واكثر ان شااءلله

وشوفي شنو يصير معاج وشنو يقولج وقوليلي بانتظارج

انا فكرت باللي تقولينه يمكن الحجز لشخص بس باسم زوجي مثلا واحد استغفر الله يبي يحجز له ولرفيجته ومب متزوج فطلب من زوجي بس لو رفيجه حاجز باسم زوجي ليش يحط ايميل زوجي ؟؟ بيحط ايميله هو مب ايميل زوجي .. بعدين الموضوع الثاني مال اللي كان مكلمها فالنت وقايلها محتاجج والارقام اللي بتلفونه باسامي شباب .. شاقول له وشلون ابدا معاه .. فكرت اني وهو عالسجاده عقب صلاته اجيه بالمصحف واحلفه انه يقول الصج وعقب اساله عن اللي ابيه واطلب منه يصارحني بكل شي عن الفندق والتلفون والمسن .. والله العظيم والله العظيم يا اختي اني شايلته شيل ومب مقصره بشي وهو بنفسه وبلسانه يقول هالشي لي وللناس من اهله واهلي وربعه اللي هم رياييل فالميلس كذا مره لما يسالونه شلونك فزواجك الثاني يقولهم بنت الناس والنعم فيها شايلتني شيل ومب عارف شلون اوفيها حقها وكذا مره قال قدام اهله والله انها تستاهل الاحسن مني .. وانا دوم اقول له مابي من دنيتي غيرك واذا عاضيق الحال بتنفرج باذن ربك واذا عالجرح اللي فقلبك من زواجك الاول فمع الايام انت بنفسك بتنساه وبيصير ماضي ولو تدرين انا شكثر راضيه بامور معاه والله لو اهلي يدرون فيها بيزعلون علي لاني رضيت فيها بنفسي .. بس انا شاريه هالزوج والله واحبه وايد وهو بعد يحبني بس هالشي وايد معور قلبي فوق ماتتصورين .. ومن زود ما خايفه من هالشي اخاف لو صارحته اسمع كلام بيتسبب بموتي .. والله العظيم تعبانه اختي والله .. اني مابي اخسره وبنفس الوقت مابي انجرح منه .. هو دوم كان يقول لي عقبج مالي حياه والله انتي الوحيده اللي فاهمتي اكثر من اي حد وتخافين علي وصج تحبيني وانتي الصح الوحيد بحياتي .. كل ما اتذكر كلامه ارتاح بس لما ارجع اتذكر اللي شفته بالايميل اقول معقوله كل هذا كذب ؟ مادري اذا فاهمتني اختي ولا لااا
انا مادري شلون ابدا معاه او شاقول له .. شرايج اختي شوري علي ربي يجزاج خير .. شالحل ؟؟ كل الغلطات ممكن الواحد يغفرها الا الخيانه صعبه وايد بحقي .. انا اللي مخليني ساكته للحين بعد ان هو هالايام يمر بظرف صعب وايد وانا وياه حاطين يدنا ع قلوبنا ماندري شبيصير معاه في هالظرف .. في ناس يطالبونه وهو عليه متاخرات اقساط وربي يعلم شكثر سعيت عشان اساعده بس كل اللي طلع بيدي سويته قبل والحين مافي مجال اساعده بشي وهالشي خلاني ازعل اكثر لان بعد كل هذا يكون هذا رد الجميل وهذا جزاي .. ؟ يارب شيل عني يارب خفف همي يارب طلبتك تساعدني .. اختي لاتخليني ارجوج .. ادري وايد طولت بكلامي بس مالي غير هالمكان افضفض فيه فاسمحيلي ع التراجيديا مالتي .. اسفه .. بس داخله ع الله ثم عليكم . ساعدوني

الشيخه وينج مارديتي علي

تدرين شصاير معااي الحين وشقد اشقد اشقد متحمله فووووووووووق طاقتي
الظغط زايد عليه فوق ماتتصورين وانا مستحمله واااااااااااايد وكاتمه موضوع الايميل فقلبي
صاير عصبي ومش طايق نفسه بسبب اللي يطالبونه وانا اللي بالعه الهم ومتغصصه بالضيم
فيني اللي مكفيني وامي مرقده من امس مسويين لها عمليه وانا يوميا من الصبح لليل عندها .. لاهيه معاها بس مش ناسيه موضوع زوجي وامس بالذات كنت رايحه معاه لما جاني ياخذني من المستشفي قلت له ما احب انك تطلب من غيري ولو علي جان ماخليتك تحتاج لغيري او تحتاج بيوم لغيري ووو قلت يمكن يفهم او يحس .. والله ودي اصارحه بس ادري ان اللي فيه كافيه لكن تاكدي ان بيجي يوم لازم اتكلم فيه .. ربي يشرح صدري ويشيل عني ويفرج ضيقه .. ابي اصارحه وارتاح .. تعبانه .. انا وايد متحمله معاه ومقصره ع نفسي عشان واسمع تعليقات من أهلي بزياده ومتحمله وساكته وساعات اتهاوش معاهم عشانه بس هم مايدرون لان ساعات تجيني كلمات تعور القلب منهم مثل ليش ماتسوين او تشترين او تصرفين وين تودين معاشج ليش انتي بخيله ليش ماتعطين امج و ابوج شفيها لو ساعدتيهم لان اخر فتره كانوا ولازالوا يبنون فبيت اهلي ويوسعون وانا والله العظيم كان بودي اساعد واعطيهم بس والله اللي يزيد من معاشي اصرف فيه علي بيتي ونفسي وبنتي وعياله هو بعد من زواجه السابق بس اهلي مايعرفون هالشي وماعمري بينت لهم ان هو مقصر علي وانه دوم يجيب ويسوي ويحط لي ومبديني عالكل .. واخره موقف صار اليوم منهم .. جاتنا وحده المستشفي تتحمد علي لامي بالسلامه وهي من عمري بس مب متزوجه وتوها شاريه سياره جديده وكان قبل عندها سياره وعطت لاختها فقاموا يباركون لها وبنفس الوقت يقطون نقزات علي ان ماشاالله عليج خذتي سيارة احلامج ومتعتي نفسج اي جذي نبيج ليش تجمعين او تخشين العمر يومين ووو وبينهن وبين نفسهم نظرات ادري انهم قاصديني بس شاقول غير الله كريم وعارف بالحال وعارف انا شقد مسويه لزوجي وشايلته ومش مقصره ع نفسي الا عشان راحة زوجي وعقب كل هذا يكون هذا جزاي من زوجي الله يسامحه .. وانا من النوع اللي ما احب ان اهلي يحسون عن شي صاير بيني وبين زوجي ومستحيل اخلي احد يدري حتي العيال اللي هم عياله يعني احب اي نقاش او خلاف يكون بينا احنا الاثنين بس .. انا وايد فيني ووايد مصدعتكم معاي سامحوني بس لاتمنعوني افضفض وكلمه طيبه منكم او دعوه بفرج الهم وتسخير زوجي لي تكفيني بس بعد لاتحرموني رايكم ارررررررررجوكم

 

فضفضي يالغاليه واخذي راحتج بالكلام
كلنا خوات
والله يفرج همج والحمدلله على سلامة الوالده وربي يقومها بالسلامه
ما الومج والله العظيم ما الومج على اللي تمرين فيه ...

الله يفتحها عليج ويبارك لج في زوجج اللهم امين
ويفتحها عليكم
سامحيني على التأخير بالرد كان عندي مشكلة بالنت امس والحمدلله انحلت اليوم

غاليتي ... تصيدي الفرصه المناسبة ...
يمكن في الوقت الحالي ينقلب الموضوع ضدك ...
خصوصا انه مضغوط .. تحملي ودوسي على نفسج شوي ... بس هاليومين الى ان تتحسن احواله ونفسيته وواجهي وصارحي لكي ترتاحي وتقبلي كل ما تسمعين ...

وادعي الله ليل ونهار وصلي قيام الله والله ترتاحين ونصيحه من واقع تجربه قيمي الليل بسورة البقرة وبعدها ادعي الله سوف يفرجها لك ان شاءالله




دمتم سالمين
اختكم شريفة

الله يسمع منج وتنفرج عليه وعلي لاني تعبانه وايد والله وودي اليوم قبل باجر اصارحه وارتاح واللي بسمعه بسمعه المهم وقتها يكون عارف اني عارفه وان مهما خش عني ربي بيفضح الغلط مهما طالت مدته .. وساعتها بقوله يا انه يختارني بدون خربطه ويحلف عالمصحف انه مايكررها او يخوني باي وسيله من الوسايل او يختار خربطته ووانا لي الله انا وبنته لان عياله من زواجه السابق من زمان عماتهم شايلينهم ومربينهم لانه كان منفصل عن امهم من وهم صغار وايد البنت كانت سنتين والولد سنه والحين هم ماشالله البنت سبع سنين والولد سته سنوات .. اهم شي من بداية المصارحه احلفه عالمصحف واطلب منه انه يسمع مني للنهايه ومايهدني ويقوم يابلفيت زعل وبنفس الوقت انه يرد علي بكل صراحه ومن غير لف ودوران .. وغير هذا بعد بقول له هل انا مقصره معاك في شي .. شايف علي شي انت مش حابه .. وعقب هذازببدا معاه باللي عرفته عنه وبقول له ابيك تصارحني بكل شي .. وعقب مانتكلم بكل صراحه بطلب منه يختار قدام ربه وعالمصحف بيني وبين الخربطه اللي بحياته وان مهما صار ابيه يخلص لي مثل ما انا مخلصه ووفيه له بحضوره وغيابه فلازم يخليني انا بعد مطمنه له وواثقه فيه طول الوقت بحضوره وغيابه .. انا لي حق مثل ماهو له حق عندي .. ولا شرايج اختي ..

وانا ان شالله بجرب كلامج وبقرا البقره فقيام الليل ومع صلاة الفجر وبطلب من ربي انه يهديه لي ويسخره لي ولبيته ويبعد عنه بنات الحرام وبنات ابليس اللي مالهم غير خراب البيوت وبس ..

ادعيلي حبيبتي ادعيلي .. وانا ان شالله بتواصل معاج اول باول واعلمج باللي بيصير معاي .. واتمنا يكون خير .. اتمنا . 

شصار معاج ...
بانتظارج وان شاءالله مافي الا كل الخير يارب

حبيبتي في شي جديد صاير معاي ..
انا قلت لج قبل بأجل مصارحتي له باللي عرفته عنه لسن ماتنحل مشكلته اللي هو طايح فيها ..
مشكلتي مادري اذا قلت لج قبل او لا من كثر سوالفي مادري شقلت وماقلت .. حاليا مشكلته ماديه ومشكله كبيره .. انتي مثل ماشرحت لج قبل اغلب مشاكله ماديه وانا اللي تقريبا متكفله بكل شي من لوازم البيت وعياله وهو لما يكون عنده اي ريال .. من ريال لين عشره الاف يجي يعطيني اياها ويقول لي تصرفي فيها وشوفي اللي ناقصج وناقص العيال .. انا صحيح اصرف وشايلته وايد بس هو للامانه وربي شاهد اي ريال يجيه يحطه بيدي ويخليني انا اللي اشتري واوزع المبلغ ولا يسألني شسويت بالمبلغ لثقته فيني .. عموما ارجع للتطور اللي صاير وابي شورج فيه لان قلبي قارصني شوي وانا عمري ماتخوفت من شي الا وطلع بعدها احساسي وخوفي بمحله .. حاليا هو يبيني اخذ مبلغ من شركه تمويليه نفس قروض البنوك مادري اذا عندكم نفس هالشركا او لا عموما الشركات هاذي تطلب كفيل مايكون عليه التزامات عشان بالنهايه تضمن حقها مثل ماتعرفين لو ان انا ماسددت ياخذونها من الكفيل .. المهم هو طبعا مايقدر والتزاماته خياليه وخواته كلا يقول يالله نفسي ومستحيل يطلب منهم لانه عارف ردهم بدون مايطلب .. المهم جاني البارحه وقال لي لقيت كفيل فقلت له من ؟ قال اخت رفيجي انا كنت قايل له ادور كفيل وهو عليه التزامات فقال لي بيسأل اهله اذا حد فيهم يرضى يازوجته او اخته ورد عليه بنفس اليوم وقال لزوجي اخته وافقت .. عاد انا بقول لج الصج انا شاكه ان اللي بتكون الكفيل وحده هو يعرفها لا اخت رفيجه ولا شي .. ولما سألته رفيجك من منه لان يمكن اطلع اعرف هله قال شدراني .. معقوله اختي تصدقين هالكلام انتي في احد مايعرف رفيجه اللي لهالدرجه واقف معاه وجايب اهله يكفلون من منه ؟ ابصراحه نقزني قلبي من اول ماقال اهل رفيجي يازوجته او اخته .. شرايج انتي ؟ انا عموما صار عندي خلفيه عن اسامي بعض اللي شفتهم بالمسن عنده غير اللي كانوا مطرشين له صورهم .. وبصارحج بشي سويته مادري اذا بتنتقديني فيه او بتكونين فيه معاي .. كل ايميل كان هو مطرشه لوحده او العكس طبعا في وقت زواجنا ماعلي من اللي قبل خذت له صوره وحتى البنات اللي مطرشين له صورهم بعد في فتره زواجنا عندي صوره لهم وايميل الفندق خذت له صوره بعد ... كل شي يخص بنات في ايميله عندي منه صوره ... بتسأليني ليش سويت جذي بقولج مادري بس اعتقد انه ممكن يكون دليل لو جيت اصارحه وانكر مع اني بكون وقتها محلفته عالقرآن .. ابي رايج فالمسألتين .. البنت اللي بتكفل والصور اللي خذتها للإيميلات ؟ ولو طلعت اللي بتكفلني وحده فعلا هو يعرفها وانا عرفتها بوقتها شاسوي ؟ شوري علي .. اتراجع واطلع من المكان او امشي الموضوع وكأن شي ماصار ... ؟ ماعتقد اني عقبها بسدد الأقساط لو اكتشفت انه يعرفها وتعرفه .. بخليها هي عقب تبتلش فيهم جزا لها لخيانتها وخيانته لي ... مادري مادري شاسوي ؟ ارجوج ابي الرد بسرعه .

السلام عليكم
بخصوص الصور اللي اخذتيهم من ايميله وايميلاتهم
خليهم واحتظفي فيهم كدليل
ولكن سالفة هالبنت اللي تتحمل انها تكفله قويه شويه
يعني انا من يوم انا طفله صغيره كان ابوي يقول لا احد يكفل احد اسمعها دايما يرددها
لما كبرنا قال حتى الاخو لايكفل اخوه كل واحد فيكم يتحمل نفسه بنفسه ومصاريفه ولا يحط شي فوق طاقته

فألحين غريبه لاتعرفه ولا يصير لها ترضى تكفل صديق اخوها .... !!!

قويه والله

احس ان حان الوقت المناسب اللي تصارحينه في كل شي .....


ولج القرار
استخيري





دمتم سالمين
اختكم شريفة

اختي انا مثلح قلت قويه ولليوم مش داخله عقلي هالسالفه .. ماتشوفين قلت لج قلبي قارصني من الموضوع .. على كلامه المبلغ بسيط ومايخوف .. والله لو عشرة الاف بهالزمن الاخ مافيه ثقه باخوه والدليل علاقته هو بأخوانه وخواته كل واحد فيهم يقول يالله نفسي وطاح قبل بكذا مشكله محد فيهم سأل عنه او اهتم فعلا مثل مايقول اقصد اهتمام فعلي مش كلام وبس اللي مامنه رجا .. فديتج انا ودي اصارحه وكل يوم اقول اليوم بس والله العظيم والله العظيم وضعه كل يوم قاعد يتردى وكل يوم اشوفه من سيء لأسؤ .. انا لليوم متأكده من انه يكلم ويعرف وحده او ثنتين وقاعدين يساعدونه عادونه بيعشقهم بهالطريقه او بيتولع فيهم .. خبرج تفكير بنات شوارع وكل همهم يخربون البيوت .. حسبي الله ونعم الوكيل فيهم ... حسبي الله ونعم الوكيل .. حسبي الله ونعم الوكيل .. والله خاااااايفه وايد اختي ومادري شاسوي ... نفسيته جدا تعيسه ومش قادره افاتحه وهو بهاي الوضع وحتى لو طلعت اللي بتكفلنا وحده انا اقدر ابلشها وقط السالفه عليها بطريقة عدم تسديدي للمبلغ ودايما يلجؤن لمن عقب للكفيل وهو اللي اطيح براسه .. لو فعلن وحده يعرفها والله بخليها تندم قد شعر راسها واخليه هو بعد يعرف ان الله حق .. انا المفروض اروح معاه بكره عشان اخلص الموضوع .. مادري افكر بأيش ولا ايش تعبانه حدي اختي .. اقوله عن البنات اللي بالأيميل او الفندق اللي شفت لهم رسالة شكر بالاقامه عندهم او عن الكفاله او عن اللي بالتلفون .. واظن اللي بالتلفون هم نفسهم اللي بالأيميل .. شاسوي .. دوم يقول لي اوثقي فيني انا والله ما اخونج وانتي والنعم فيج .. كلامه شي وافعاله شي ثاني .. تعبت والله .. اختي قاعده اكتب لج وانا اصيح من اللي فيني .. وايد والله العظيم وايد .. انا شاريته وشاريه بيتي وعندي بنت الله يحفظها لي مابيها تغيش بعيد عن ابوها .. مادري ليش قاعد يصير فيني جذي انا ماسويت شي بحياتي سيء لهالدرجه عشان يصير فيني جذي .. احبه وخايفه عليه وخايفه على بيتي وعلى نفسي .. مابيه يعتقد اني ضعيفه او مغفله ابيه يتأكد اني كثر ما احبه ماراح ارضى بالغلط بحياتنا .. مثل ما انا صاينته وحافظته بوجوده وغيابه لازم هو بعد يصوني ويحفظني بحضوري وغيابي .. ادعيلي وقولي لي شاسوي ما ابيه افتح الموضوع بوقت غلط واكون سبب في شي سيء يصير له .. والله بندم وقتها قد شعر راسي .. قولي لي متى اقول له وشلون ابدا ؟

حبيبتي هاذي اخر اموري ولج الحكم

اليوم الظهر كنت طالعه ورايحه اجيب معاه عياله من المدرسه وعقب يابلفيت بروح للمجمع ابدل اغراض شريته امس وطلع قياسها غلط .. المهم بنتي الصغيره ملقوفه وايد ولازم تتعبث بكل شي وقامت تلقط اوراق زوجي اللي بالسياره والبطاقات وتحذفها وانا قمت القط وراها وبالصدفه شفت بطاقة سحب الي باسم وحده واسمها كان مار علي قبل من ايميله فما اوصف لج شلون صارت حالتي وما استحملت ... ما ان وقفنا قدام مدرسة ولده ننتظره يطلع الا انا خلااااااص قمت استغفر واتعوذ من ابليس بصوت وهو حس ان فيني شي وسألني شفيج فقلت له ولا شي وتم يحن يحن فقلت له فالبيت مش هني قال لا الحين قولي فقلت له فالبيت وركب ولده السياره وهو للحين يسأل شفيج فقلت له فالبيت مش قدام اليهال لكنه اصر الا يعرف لين ما انفجرت وقلت له من هاذي من فلانه ؟؟؟؟ جاوبني من هاذي اللي بطاقتها عندك وانت كنت قايل لي ان رفيجك فلان اللي عطاك بطاقته عشان تسحب منها مبلغ لك ... فسكت وقال هذا اللي فيج .. اذا ماتعرفين شي لاتتكلمين .. فقلت له قول لي انزين علمني فهمني وحده معطتك بطاقتها على اي اساس شاللي بينكم .. انا من زمان ساكته وبالعه الويعه بقلبي واقول مابقول له شي لين ماتنحل اموره بس هالشي وايد والله وايد وقعدت اصيح فقال لي شاللي جا فبالج لعب بعقلج ابليس خذتج وجابتج افكار .. كان يتكلم بكل برود وانا احترق وطبعا قلت كلام وايد بأن شاللي انا قصرت فيه كنت ولازلت اسعى لك بكل شي واي شي تبيه احاول اسويه شايلتك انت وعيالك وبالأخير تخلي وحده مادري من وين تعرفها تصرف علينا انا وعيالك وين وصلتنا ؟؟ طبعا علا صوتي وايد قدام العيال وانا كنت مابي اتكلم قدامهم بس هو اصر .. عقب قال لي بنتفاهم فالبيت .. ونزل عياله بيت امه ورحنا انا وهو البيت .. ما ان وصلنا الا بدا يقول شعندج قولي .. فقلت له ليش تسوي فيني جذي انا شسويت لك او شقصرت فيه بحقك بالاخير هذا جزاي .. فقال لي اذا ماتعرفين شي لاتتكلمين هذي صج انا ماصارحتج بموضوعها لان صعبه على اي ريال يقول ان في وحده تساعده وخصوصا لزوجته لان اعرف تفكير الحريم شلون وووو من هالكلام ... قال هالانسانه ابوها يعرف اللي بيني وبين بنته ..فقلت له شنو يعني اللي بينك وبينها .. قال هذي اعرفها من زمان قبل لا اتزوج اللي قبلج وساعدتها من زمان والله يشهد ان كل اللي بينا علاقة اخوه ومافي اي شي بيننا .. فقلت له عيل ليش خاش عني موضوعها وللعلم ادري انك طالب من غيرها وفي بنات ووو وقلت له كل اللي اعرفه وعرفته عنه من ايميلات وصور وفندق ووو المهم هو مصدوم شلون عرفت هذا كله بس مايبي يوضح بس زوجي واعرف له وقلت له رغم كل اللي عرفته تميت ساكته وناطره متى تنحل امورك وكنت مراعيتك حتى بقهري وحرتي وفوق هذا لاني احبك وشاريتك وذكرته بعد بكلامه انه مابيخونني واني لازم اوثق فيه مهما صار .. فنزل راسه وقال انا مارقدت ولا لمست ولا حبيت غيرج انتي وقبلج الخايسه اللي ماتستاهل طليقتي .. طول مافي وحده في ذمتي مستحيل اخونها .. يوم انفصلت اعترف عرفت بنات الدنيا والدين وقبل ماتزوج الخايسه هم نفس الشي بس من صرتي انتي بذمتي وقبلج هذيج ماخنت صدقيني .. ومن خذتج والله مالمست غيرج .. ادري الموضوع صعب تفهمينه وبغض النظر عن هالبنات بس للأسف ان البنات في هالوقت بيدهم وايد امور اكثر من الرياييل وقال وايد امور انتي ماتعرفينها بقولج عليها عن اللي معطتني بطاقاتها هذي هي اللي جايبتلي شغل ومصالح مع ناس وهي اللي مشاركها بسجلات تجاريه في محولات منها لمساعدتي وهي اللي قدمت اوراقي بشركة بترول غير عن اللي انا فيها وراتبها احسن بوايد لانها عارفه وضعي شلون صاير .. ادري المفروض ما اروح لها ولا اطلب منها بس لو انتي ريال وعندج بيت ومسؤلية عيال وزوجه وماعندج ريال لهم ولا لقمه لهم بتسوين اي شي عشانهم بس ماخنتج صدقيني اما موضوع الفندق هذا مش اول مره هذي المره الثانيه اللي يصير فيها حجز بأسمي بس مش لي وماوضح اكثر المهم ختم كل الكلام اللي قاله وانا قلته بأوثقي فيني وصدقيني ماسويت اي غلط بحقج ولا بسوي ويوم اني ماصارحتج بهالأمور لان ادري انها بتجرحج وبتأثر عليج والحريم دوم يفكرون بمشاعرهم ۸۰٪ و۲۰ ٪ بعقلهم عشان جي ماصارحتج .. وقال الزمن ماخلا لي الا هالشي لا اخو وقف جنبي ولا اخت .. الأخو وقت ماطلبت منه بس 100 ريال للبترول قال ماعندي فشلون في ازماتي وخواتي شفتيهم بعد مايدرون عني ووقت ماتهاوشت مع وحده فيهم من زمان جات وقالت لج انتي شلون طايقته انا لو منج اخليه وارجع لهلي ابرك .. وقعد يصيح ويقول صعبه علي والله اللي انا اسويه بس غصبن عني الدنيا وايد ضدي ومش مخليتني ارتاح وللحين قلبي ينزف من حب قديم واللي باقي منه هالقلب والله ماعطيته الا لج وصدقني والله احبج وايد بس حبي لج مشوش من ظروفي الوصخه يمكن سويت للي قبلج وايد وايد وايد وانتي للحين ماسويت لج شي ينذكر من اللي سويته للخايسه بس والله احبج وبيجي يوم اوفيج حقج وكل يوم بيني وبين نفسي افكر شلون اعوضج وشاجيب لح وشاسوي لج وووو وايد كلام .. مادري شاقول لج اختي سكت عنه صج وقلت له انا مصدقتك بس مب راضيه عن هالشي وكذابه لو قلت اني راضيه بأنك تطلب من بنات شي انا تربيت في بيت يقول أن هالشي غلط مهما كانت المعرفه غلط بحقي .. ولو تصدقين هالكلام كله مجرد اختصار للي دار بيننا .. من الساعه وحده ونص لين خمس وربع واحنا نتكلم بس في خاطري اطلب منه  شي الليله .. ابيه يحلف لي انه مايخوني ولا يسمح لأي شي يضرني ويجرحني لا بحياته ولا بعد عينه عقب عمرا طويل ابي انام وانا مرتاحه ومطمئنه على نفسي وبيتي وعيالي وبالأول والأخير عليه .. مادري شاقول بعد .. خلاص ماعاد فيني كلام .. ابي تعليقج
:'(