الرئيسية ركن الشات والمواضيع الترفيهية والألعاب شات عروس لمة الليبيات الجزء 15 لشهر ربيع الاول

لمة الليبيات الجزء 15 لشهر ربيع الاول

عروسة ليبيا 18-02-2011 9,775 رد 426,464 مشاهدة
ن
نسرين.
عروس مبدعة
23-02-2011 | 04:10 AM
ميد انيت قلتي بعد 10

هههههههههههههههههههههههههه
هي هات يجوا 10 سنوات

منو قال ربي كابت لينا عمر لي بعد 10 سنوات
منو قال اصلا ها تون هكي مجرد كلام واسهل من حكي مافيش


باه لو تقولي صح انتي كيف بتعشي فيهم 10 سنوات وكيف ناكل ونقري ونشرب

او بتعيشوا بره وبعد 10 سنوات تفكروا انها بلدكم ليبيا
سموحني عليها
ع
عروسة ليبيا
مشرفة سابقة
23-02-2011 | 04:13 AM
حبوبه علاش تقولي هي حرام عليك فيا


شن مش حاسا بينا

حاسه وحاسه وحاسه وحاسه شني مش عيلتي كلها بينكم غادي

ليبيا جيت منها من شهور وكلللللللللللللللللللللل يوم نكلم ف ناسي وامي ونبكي معاهم ويبكو معاي

والله بوذاني هادو نسمع ف ضرب والخبط وف بنغازي نكلم ف صحباتي وهم بنات وبروحهم فالحوش وجنب الكتيبه بتاع الفضيلللللللللللللل مش بعيد منها

وكنت نسمع ف عياطهم والدنيا تقوليش حرب


قسم بالله نبدا نقز ف جنب راجلي ويشد فيا يكتف فيا ويسكت فيا ونعيط عياط بتاع خلعه

بلادي دمي حاجه مفروغ منها ماتبي تبرير
ارجوكم معش تقولو هكي والله عيب ف حقنا مش حلوة من بنات بلادي


لي برا نتقطعو اكثر منكم ياخي لما نكلم الناس غادي نحسهم صابرين ويحكو عادي

احني نفرفشوووووووووو والدموع زي المطر ربي عالم

ليبيا اهلي وبوي وخوتي وخواتي وعيالنا وكبارنا

وكلللللللللل من ليا غادي فيها

وع ترابها وسلامته من سلامتها

وياخي جينا بين نارين ناس ف بنغازي وف طريق المطار عز الضرب وناس ف طرابلس ع اطراف جنزور وف قرقارش وسياحيه

وخوي وولاد خالتي كانو ف طريق مسافرين بر ف عز المشاكل

انا شاء الله كلامي واضح معش بنرد فيها النقطه هادي بتاع الي برا مش حاسين

واحنى الي ماعندنا شعور بيكم


بخصوص قولتك اني معصبه

القذاذفه عندي فيهم اعز الصاحبات واعز ناس وونسب مع اهل راجلي ماعنديش مشكله فيهم وحت الفرجان حصه كبيره لينا فيهم

المشكله في سياسته كانظام دوله وسياسته ومشاكله مش ف شخص ف حد ذاته ولا في اني


والي صار من دم ومشاكل مش ساهل مسح حتى الحسنااات هادا رايي انه لو دروو حاجات كويسه ف 40 سنه

راحو بي هالدم والموتى

فا مش انا شماعه الموضوع ولا مصيره متوقف علا رايي فيه


2006 هما اعترفو انها قديمه وقالو اسفين وحصلناه ف يوتيوب كان حد معاود منزلها جديد واعتذرو

العربيه ماغطتش شي بس توا من امس او اول امس درت روحها بدت تكلم ع ليبيا

في قنوات معتدله

فوتو الجزيرة عندك فرنس 24 =ي بي سي =سي ان ان=رويترز الحريه = الحوار =ان بي ان = المستقله = المنار =المصريه للاخبار =

ووغيرهم هلباااااااااا يغطو ف الاحداث

========================
ك
كبيدة بيشو
عروس مشرقة
23-02-2011 | 04:14 AM
احنى سكان الجماهيرية نبوووووووووووووو الامان والاستقرار مش اكتر
زي قبل نطلعو ونخشو امتا مانبو ونعيشو زي مانبو
وباب حوشنا يبات مفتوح عااااااااااااااادي جدا زي قبل
هدا اللي نبوه فقط
وانشالله بأدن الله بلادنا حتتصلح وحاتكون افضل من قبل واهم شي الامان
حنى شعب عمرنا ماسمعنا صوت الاطلاقات الا فالافراح وانشالله من يوم وجديد ايامنا افرااااااااااااااح
ن
نسرين.
عروس مبدعة
23-02-2011 | 04:14 AM
ضيوا تصدقي فتحت الفيس نخلعت
والله صفحه ررئيسه مامسيتها
ول سكرتها مشيت صفحتي خاصه وقعد نخش لي صفحات لي انا نبيها وعارفتها مافيها شي


لانه مرض في مرض
لاسف شديد شوفت ناس كاتبها حاجات متصورتهاش منهم واغلب بيجات درت ليها دليت


صدقيني ضيوا لو تتفكي من الفيس و اخبار ها تتحسن نفسيتك
شوفي ناس اقاربك وصحابك كيف حالتهم بخير والحمد الله
ح
حياتي بدونك سلطه
عروس مبدعة
23-02-2011 | 04:18 AM
يا وخيتي اللي نتصل بيه نلقاه يا اما جارهم يا ولد خالتها يا خو صاحبتها يا مش عارفه شنو و الله حتلا الاتصالات بديت نخاف انرد على ما نفسيتي تعبت

و الله مانستاهلو هكي احنا
يارب فرج علينا
م
مدام اسراء
عروس متألقة
23-02-2011 | 04:21 AM
الله يرحم ولديك ياكبيده بيشو
والله عندك حق القنوات تعبو نفسيتنا وانحنا فى الف خير واليوم الناس فرحانه
بالامان
ن
نسرين.
عروس مبدعة
23-02-2011 | 04:21 AM
الله يرحمهم ويغفر ليهم ويصبر امهاتهم واهلهم


عروسه ليبيا
صدقيني ليبيا بخيييييييييييييييييييييير
انتي بس مكبره موضوع والله مافيه شي من شي يقولوا فيه
وقنوات الاخبار كلها كذب في كذب

بعدين ليش امس قناه العربيه اتصلت واحد تقول مافيش قصف وحني في امان
طلعوها كذابه ياريت كذابه بس
حتي مذيع مش سامح ليها تتكلم ويقص عليها
ك
كبيدة بيشو
عروس مشرقة
23-02-2011 | 04:22 AM
بالنسبة لحبوب الهلوسة هادو واقع شدو ناس من جنسيات عربية يوزعو فيهم على الشباب وهدا مش كدب
اه ولا نسيت لازم يكون كدب لان ماجبتاش القنوات التانية
والله انى شخصيا ضيو معاش نفتح فيهم من قالو القايد مشا لفنزويلا قعدت نضحك وغيرت ومنها احنى الحوش وكلنا وناسنا واحبابنا
معاش نحطو فيها ديما حاطين الشبابية والله بكري جايبين الناس طالعين بسياراتهم في طرابلس وكل منطقة كان تشوفي الكلاكسات والزغاريط
نساوين ورجالة وصغار يهتفو لليبيا والقايد ويغنو والله منظر يهبل وانشالله ربي يهدي الجميع
والله تقولي يلعن بو السياسة والفلوس اللي تعكر علينا حياتنا
اهم شي الامااااااااااااااااااااااااااااااان والله استاحشت نتمشا على رجليا
م
مدام اسراء
عروس متألقة
23-02-2011 | 04:24 AM
وتعرفو توا صاحب راجلى يتصل من البيضاء ايقول مشغولين عليكم قالو توا القصف على طرابلس بطيارات والله راجلى يضحك قاله طرابلس بألف خير كان ماعدش تسمعو الجزيره
ح
حياتي بدونك سلطه
عروس مبدعة
23-02-2011 | 04:24 AM
باه و اللي واقف قدام حوشهم و جاته طلقه
و اللي مروح بالسياره و جاته طلقه

شني هادو يعني خلاص مدام يزغرتو و يغنو و يكلكسو ننساهم ؟؟
ع
عروسة ليبيا
مشرفة سابقة
23-02-2011 | 04:25 AM
حيو هلالا مراحب

واحشتيني وخليتني مكانك


تعرفي ع الاقل وجهه نظرك تحترمي فيها ف راي الناس


علاش نخونو ف بعض ونششكو ف بعض مانعرفشششششششش
مره فئران ومره ضاله

كل حد له رايه بس يحترم راي التاني ياهووه

اني نبي ف الخير الدنيا تمشي قدام

ورايي يمثلني انا بس ومادخلنيش ف حد


كل حد رايه ملكه مشاعره ملكه نظرته ملكه

بس نشتركوو كلنا اننا نبو مصلحه بلادنا وولادنا

اني حره ومانفرض ف رايي ع حد ومش لازم نقنع حد
خلاصة هالراي ان بلادي لازم تتصلح نبيها احلا واحسن واحدث واكبر واكتر شفافيه نبيها احلا بلاد فالكون كله
م
مدام اسراء
عروس متألقة
23-02-2011 | 04:29 AM
كبيده بيشو والله انا لليوم نسمع فى القنوات الهابطه هدوا بس قالو صبراته احتلت من المتظاهرين والمشكله ان اماليا كلهم فى صبراته تعرفى لما اتصلت بيهم مانسمعش فيهم من الغناء والزغاريت والالعاب الناريه والهتفات
عرفت قداش انا نزلت مستوى لى الكلاب الضاله تابع هده القنوات
ك
كبيدة بيشو
عروس مشرقة
23-02-2011 | 04:30 AM
انى نبي نفهم شي واحد وينهمممممممممممممم ايام الغارة وينهم ايام كانو الطليان مادايرين فينا خير
والله حناي حكتلي شي على داروه فيهم الطليان والله اتقول مستحيل كيف قعدتو حيين
قالت لما حررنا القايد وانتصرنا قاتلي انى قولتلهم نبي نشوفه القايد نبوس على ايده فكنا منهم هاليهود
القايد ياعروسة جابلكم ايطاليا تبوس على ايد ابن عمر المختار
يعني الواحد مايقعدش يدور لشخص فالحاجات المش كويسة اللي دارها بش يبرر لنفسه علاش تفكيره هكي
لان هدا انسان ومافيش حد مايغلطش لكن المهم يصلح وبأدن الله بلادنا للافضل
ع
عروسة ليبيا
مشرفة سابقة
23-02-2011 | 04:31 AM



كبيده هلا باهي الي ماعندكم سو والامور تمام

وين قطعتووووو مزال عروسة الاميرات والله لها فتره قاطعه ان شاء الله خير





تعرفي حيو وحده صاحبتي

كتبتلي انا نصدمت فيك مانحسابك هكي

ماعرفتش شن يعني الجرم الي درته

لمجرد ان رايي مش راينا مختلف او مش زي ريها

انا ماني مكبره الموضوع ولا اني الوحيده الي نحكي فيه العالم كله مقلوب ةويحكي


مفروض انتي جربتي وسافرتي عارفه

لو انك برا البلاد ح تكون نفسيتك دبل الي جوا البلاد


يلا


الله المستعان
ن
نسرين.
عروس مبدعة
23-02-2011 | 04:32 AM
عروسه
مافيش حد فرض راي ه علي تاني


بس حني نوضوح ليكم فكرتنا وكيف ليبيا هي بخير




وانت ليك واحشه وافلاينت واجده علي ياهو بعتهلك
ح
حياتي بدونك سلطه
عروس مبدعة
23-02-2011 | 04:34 AM
بنصلحلك حاجه حقا يا حيو عاللي قلتي عليه تقريبا سفير الصين
انتي اللي والدك يعرفه خطأمطبعي ان كتبو ان السفير
و هي قالتله المديعه سيادت السفير قاللها انا مدير مكتبه او النائب التاني نسيت بالضبط شن هي المهم صلحلها خلال الحديت
ك
كبيدة بيشو
عروس مشرقة
23-02-2011 | 04:34 AM
لالالالالالالالالالا ياضيو انى ماقوتلك انسي حد
وربي يصبر اهلهم
عليك نور اسراء الواحد يتاعب في نفسيته ويجيب فالمرض لروحه بي هالقنوات
ك
كبيدة بيشو
عروس مشرقة
23-02-2011 | 04:36 AM
لا الحمدلله انى بخير ياعروسة المهم انتي واهلك بخير
واميرة نتصل بيها ماحصلتهاش بكللللللللللللل
انشالله تكون بخير
م
مدام اسراء
عروس متألقة
23-02-2011 | 04:38 AM
انا مازال انقول لا مع ولا ضد
بس لو طلع معمر ماعدش اتحز كل واحد يبى الرائيس من جيهته الشرق يبو والغرب يبو والجنوب يبو وعلى فكره اكيد بيجى حد جعان ابيغطص فيه بطول والعرض وينسا الشعب
على الاقل معمر نعرفوه نبو منه الاصلاحات وبس
ك
كبيدة بيشو
عروس مشرقة
23-02-2011 | 04:39 AM
سبب اللي صاير برا المحطات المريضة مش اكتر
لانها تحارب فينا مش تساند فينا
والمشكلة لما تجيب خبر ويطلع كدب مش تعتدر لالا بعده تنزل خبر اكبر منه
لاحول الله
X