انا ضعيفة امام امي

سلام بنات
بصراحة ما حبيت اعرض مشكلتي بس لما يأست قلت مالي الا افضفض و اخذ نصايحكم و ترى سالفتي طويلة يبي لها قراءة كامل

السالفة يا بنات انا انا احب امي وااااايد و اعتبرها مثل اختي كل شي اقول لها و افضفض لها و ما اقدر ارفض لها طلب حتى لو على حساب مضرة لي .. كل شي و لا زعلها.. لو تزعل مني اضل اصيح و اعتذر حتى تكلمني و ترضى عني.. و طبعا امي زعولة و زعلها ياخذ له من يومين لاسبوع

امي وايد قوية الشخصية و من قوة شخصيتها احسها طغت على شخصياتنا في البيت حتى طغت على شخصية ابوي و هي تدير البيت كامل على نظام معين مستحيل احد يتجرأ و يغيره .. حتى صرنا نخاف منها و نخاف من زعلها اذا بالغلط غيرنا شي من نظامها..

حتى اتذكر لما كنت صغيرة كانوا يسئلوني صديقاتي في المدرسة من تخافين منه اكثر امج و لا ابوج؟؟

و كنت اقول بعفوية اخاف من الماما و يتضحكون علي:'(

المهم يا بنات انا كبرت و حاولت اطور من شخصيتي و خصوصا انا كنت ادرس بالغربة فقدرت اطورها الحمدلله بس ما زالت شخصيتي امام امي ضعيفة و لحين كل اوامرها مطاعة حتى لو امرها يضرني.. اكيد بتقولون شلووون؟؟؟

شوفوا الحين انا متزوجة ... و انا احاول قد ما اقدر اني ما اقول لها كل شي عن اسرار بيتي انا و زوجي.. بس و الله من جد ما اقدر .. صدقوني لها اسلوب في الكلام يخلي الواحد غصب عنه يتكلم و يقول كل شي و هو ما يدري.. و بعديييييييييين تقعد تدخل روحها و تبدأ بالشغل على حياتنا الزوجية و تدير لنا حياتنا:badly: و اذا زوجي يرفض شي تضل تنتقده و تسبه طبعا في عدم وجوده و هاي الشي يضايقني وااااااااايد.. يعني انا برأيي مو شرط شخصية ابوي تنطبق على شخصية زوجي و بيئة زوجي مو مثل بيئة بيتنا
يعني هو ربى في بيت غير و له عاداته و تصرفاته و له اسلوبه في التعامل معاي و انا متوافقة معاه يعني امشين حياتنا بالتفاهم و الحوار و ما عمري خشيت عنه شي كل شي معاه صفحة مفتوحة
و امي الغالية الله يهداها ما يعجبها هالشي يعني كله تبيني اسوي اشياء و تقول لي مو شرط تخبرين زوجج فيها.. و انا ما اقدر اسوي شي و ما اخبر زوجي احسه غلط يمكن لو عرفها بيزعل مني اني ما خبرته او بيزعل من الشي نفسه الي بسويه.

او تقول لي لا تخلين زوجج يمشي كلمته عليج.. قلت لها ماما كل شي بينا بالتفاهم محد يمشي كلمته على الثاني

يعني لو قالت لي امي اليوم تعالي عندي و زوجي قال لي قعدي بالبيت ابيج و لا مرة طعت زوجي كل مرة اكسر بخاطره و اطلع اروح لامي لانه ما ابي زعلها و هو طبعا عرف مع مرور الايام شلون اسلوبي مع الوالدة و ما مرة كلمني مع اني احس انه هو متضايق..

و امي و ام زوجي ما ادري ليش بس احس بينهم شرار :mad: المهم انه امي على طول تسحب الحجي مني يوم الي اروح بيت ام زوجي و تبيني اقول لها شنو صار و شنو ما صار و نفس الشي ام زوجي كله تبي تسمع اخبار امي و انا احاول ما اخبر الثنتين..

بس شيسوون مثلا انا هديت امي شي او دخلت يوم البيت حاملة طبخة .. تلاقينه تتصل لام زوجي و تقول ترى بنتي هدتني جذي و جذي و يابت هالطبخة الفلانية و العكس صحيح و ام زوجي بعد نفس الاسلوب تقول لامي اليوم يات بنتج و هدتني جذي و جذي و يابت جذي و تصير غيرة ما بينهم و انا اطيح فيها..:struggle:

و بعدددددد يا بنات تصوروا اني مالي صديقات .. كل صديقاتي تباعدوا عني لانه حتى ما التقي فيهم بس اواصلهم بالتلفون و مثل ما تعرفون التلفون ما يكون صداقات.. يوم الي امي تدري اني فاضية تبيني اقعد معاها و تزعل لما اقابل اي شخص ثاني..

يعني كنت لما ادرس بالغربه ارجع بالاجازة و لا اجازة من الي رجعتهم قابلت صديقاتي و ابتعدوا عني .. تضايقوا.. و الحين لما تزوجت تبيني كل يوم اقعد معاها و لما قمت اشوف زوجي يتضايق قلت لها ماما ما اقدر امرج كل يوم و زعلت مني لفترة طويلة :'( و قمت كسرت بخاطر زوجي و صرت ازورها من مرتين الى اربع مرات اسبوعيا و اذا درت اني زرت اهل زوجي ازيد من مرة بالاسبوع يا ويييييييييلي:011:

بنات شسوووووووووووووووووووي؟؟؟ ما اقدر على زعل امي بس بجذي اضطر ابيع كل الناس الي حواليني و اخسر زوجي :'(
و كله اقول زعل الناس كلهم و لا زعل والديني( امي و ابوي) يعني لو اموت و امي و ابوي زعلانين مني شنو العذاب الي بتعذبه.. و بعدين ارجع افكر اقول لكن زوجي شذنبه هو متزوجني يبي زوجته تكون معاه زوجة صالحة و تطيع اوامره و ما تعصيه ... يا ربي احس حياتي متناقضة:badly::badly: سااااعدوني بنات!!!!!