زوج رائع, و لكن .....

حلو تفاعلكم يا بنات الله يخليكم.

ملاحظة: اغلب اللي وافقوا و كانوا منطقيين و عقلانيين هم بنات السعودية و عمان و الامارات و قطر.
ملاحظة ثانية: الرجل اللي نتكلم عنه يعمل بقطر و نص ساعة طيران و يوصل بلده.

بنات البحرين فيهم انانية, يبون زوج تفصيل على ذوقهم و يكون جارهم بعد. لاحظت ان البحرينية ما تبغي تتنازل, و تتمسك بكل شئ, يمكن بسبب وضعهم المادي.
لاحظوا اني قلت ان الزوجة بتروح معاه بعد فترة, يعني لما يعرفوا بعض اكثر, مو على طول.
عموما المراة السعودية ما شاء الله عليها هي الافضل في الصبر و فهم الرجل و تقديره.

اتمنى تفاعل اكثر.

انا برأي تروح معاه لان الغض من الزواج السكنة و تكوين عائلة و لما يكون الزوجين و الابناء مع بعض بتتلافي مشاكل كثيرة

و انت شنو يضمنك انج تلاقي انسان احسن منه في المستقبل؟ لا الدين و لا العقل يرفض الزواج من انسان متميز في دينه و اخلاقه. اما بخصوص الغربة, فانت ما بتعيشي في المكسيك!! دولة خليجية و احسن من البحرين بعد.

zozo al7aboba;14363145:

خيووو احنا البحرينين مو انانيين بس بطبيعة ديرتنا صغيره فتعودنا على ان كل وحده تتزوج من بلدها وتستقر وياه اهني فنحس بصعوبة لو بنتغرب

عكس بنات السعودية وقطر بلدتهم كبيره ومتعودين ان كل وحده تاخذ من منطقه ثانية فهالشي طبيعي عندهم

1) هل توافقي على الزواج منه؟ نعم - لا
نعم

2) هل توافقي بالذهاب معاه؟ حتى لو كنت موظفة او جالسة بالبيت.

نعم اروح و رجولي على رجوله :lol:

3) لو وافقتي, بس تبقي ببلدك و هو ببلد, هل بتكوني خسرانة احلى ايام حياتك؟

نوعا ما ,, لازم بيصير نقص

و هل بيتغير موقفك و بتروحي معاه بعد فترة من اكتشافك لان الايام معاه احلى؟

اكييد ما اخليه

و انا جاوبت بنعم :

لان اذا في كل هالمواصفات الزينه و اللى هي صراحه صارت نادره هالايام ليش لا
و احنا في بلدنا ما نزور اهلنا الى في الاسبوع مرتين
يعني نفس الشئ راح ازورهم بين وقت و قت و ما اخليهم و المكالمات و النت الحين في طرق اتصالات وايد و بسرعه و بسيطه لان المستقبل زوج و الاولاد

1) هل توافقي على الزواج منه؟ نعم - لا
طبعاً اذا ما يعيبة شي فقط ع شغله برى نعم
2) هل توافقي بالذهاب معاه؟ حتى لو كنت موظفة او جالسة بالبيت.
اكيييد بروح وياه عجل ليش متزوجتنه ؟؟ و انا تهمني وظيفتي فترة اشتغل هناك
أو آخذ اجازة من الشغل طول فترة السفر بس مو كثر فارس احلامي اضحي بنفسي عشانه
و هو بعد اذا مرتاح بشغله و عارف الاماكن فالديرة الي يشغل فيها يكون افضل
3) لو وافقتي, بس تبقي ببلدك و هو ببلد, هل بتكوني خسرانة احلى ايام حياتك؟ و هل بيتغير موقفك و بتروحي معاه بعد فترة من اكتشافك لان الايام معاه احلى؟
مستحيييييييييييييييييل اوافق انا هو بروحه و اني بروحي << لازم بلزق فيه ههه
اتمنى اجاباتكم تكون بنعم او لا, و علموني شنو رياكم اجمالا في الموضوع, يعني ليش اخترتي نعم او ليش ترفضي؟
موضح بإجابات الاسئلة
انا اتمنى بالمستقبل يتقدم لي شخص يشتغل بنفس
بلده يكون احسن أخلاقة عالية يخاف ربه وظيفته زينة بالأول
الاخير الاخلاق هي الي تبقى حتى لو تقدم لي واحد يشتغل
برى و مثل المواصفات الي ذكرتيها عاادي و اوافق و يسلمووو ع الطررح

لو تقدم لكم شاب ممتاز في اخلاقه, مهذب, محترم بين الناس و يحب اهله, ذكي و جامعي, و وظيفته مرة مرموقة و راتبه فوق الزين و شكله مرتب و حلو و اهله طيبين. بس انت ما تعرفيه و هو تقدم لج عن طريق معارف, يعني خطبة تقليدية و اهلج سالوا عنه و سمعوا كل خير. بس العيب و العائق, انه يشتغل بره البلد, يعني في دولة ثانية, و يرد كل اسبوع بس في الويكند.

1) هل توافقي على الزواج منه؟ نعم - لا
اوافق
2) هل توافقي بالذهاب معاه؟ حتى لو كنت موظفة او جالسة بالبيت.
3) لو وافقتي, بس تبقي ببلدك و هو ببلد, هل بتكوني خسرانة احلى ايام حياتك؟ و هل بيتغير موقفك و بتروحي معاه بعد فترة من اكتشافك لان الايام معاه احلى؟
اوافق اروح معاه او مثل ماقلتي بالويكند اييني

اتمنى اجاباتكم تكون بنعم او لا, و علموني شنو رياكم اجمالا في الموضوع, يعني ليش اخترتي نعم او ليش ترفضي؟
شوفي الغلا اهم شي الاخلاق ودام اخلاقه عاليه ووظيفته زيينه ليش لا
وبالتوفيق لليميع

ايوا الان احلى بدانا نشوف كلام عقل من البحرينيات, بس غريبة ان بعضهم قالوا مو مشكلة نظل بالديرو دام هو يجي كل ويكند!! مو صعبة شوي بس تلاقي زوجك يومين بس؟؟ شلون بيتكون الانسجام و التفاهم؟؟

اذا جاءكم من ترضون دينه و خلقه فزوجوه

يالغاليه بنات البحرين مو انانيين بس مثل ما قالت زوز البحرين احنا بلدتنا صغيره و متعودين على اللمه و انه نكون مع بعض في كل شي
في الفرح و الحزن تجوفين الجار يحتويش قبل اهلش كلنا خمسه بيوت متلاصقه ياحلاتنا يمكن عشان جدي صعب على الوحده تتغرب

بس الزمن تغير و الواحد يدور الافضل و انتي ادرى بحال الديره و الاشغال و واااايد اجوف بنات متزوجين و بعد فتره تتغرب هي و زوجها لانه حصل عرض افضل في ديره خليجيه ثانيه و تروح معاه

وسائل الاتصالات لله الحمد متطوره عندنا الانترنت و الموبايلات يخلون البعيد قريب

دام هالانسان اخلاقه ينشهد بها و تعامله زين فمايعيبه شي .. ليش لا ..




بس هالخطوه يبي لها تفكير تفكير تفكير .. الغربه مو سهله ابدا .. بتكون سهله و جنه اذا تأكدتي انه هالانسان اخلاقه الكل يمدحها و تعامله مع الناس احسن تعامل
لانه راح تكون هالانسانه بروحها مالها الا زوجها لازم يصير لها الام بحنانها و الاب بعطفه و رحمته و الاخ و الاخت و الصديقه


الله يوفقش و يوفق كل ممن و مؤمنه و يرزق كل العزابيه الازواج الصالحه

حبيبتي انا من بنات البحرين اللي رفضوا وهالشي موب عيب ولا حرام يعني بس اذا اهو يايي من قطر ولا الامارات باروح وياه عشان اوضاعي الماديه اتحسن شالحجي ليش احد قالج احنه طراروه الوحده اتزوج عن اقتناع بالريال نفسه موب عن الوضع المادي بس وهم اذا اهو زين وظروفه موب عاجبتني او موب مرتاحه للغربه ليش اوافق انا اللي بعيش معاه موب انتي حبيبتي فكل وحده اتقيس هالمواصفات على حياتها ومااعتقد انه هاذي فيها انانيه الطرفين لهم الحق في الموافقه والرفض وان شاء الله بييني واحد من ديرتي وبمواصفات احسن ومثل ما قالوا لج البنات هاذي يعتمد على شخصية البنت اذا اهيا اصلا ماعندها مشكله في السفر حتى لو كان ساعه ونص بالطيارة ودولة خليجية ولا اجنبية ناس تقبل وناس ماتقبل فلا تعممين على بنات ديرتج انهم انانيات يالغالية احنه مافيه منه
يسلمو

ام النايف برد عليج من كلامج, اللي خلقج خلق غيرج, فموجود من هو احسم منج و موجود من هو اشين منج. يعني مافي ميزة لبنت البحرين على غيرها, بالعكس كلنا بنات و زي بعض. بس واضح ان السعودية مثلا اكثر عقلانية و طول بال و ربة بيت ممتازة. لني مثلج بحرينية, بس كلمة الحق تنقال. و محد قال ان ال.بحرين طراروة! ابدا بس على وشك. الظاهر انت مو عايشة بالبلد. و بعدين يمكن ما يجي واحد من ديرتج ابدا و يمكن يجي بس ما يكون زي ما تبين. العقل زينة و لا مجال كبير للعواطف في موضوع الزواج. اذا الانسان ممتاز, اضحي علشانه او لا؟ هذا السؤال مو ديرتي حلوة و ابغي ربيعاتي و ابغي اللمة!! مشاكل شكثر بسبب ان الزوج بعيد عن زوجته مع ربعه و الزوجة بعد من مكان لمكان. على فكرة, في الغربة العلاقة بين الزوجين تصير مرررة قوية و يتفاهموا بسرعة و يصير بينهم انسجام كبير.

في النهاية هي قرارات عقلية و تعتمد على الناس و درجة وعيهم.

دانة المنامة;14357069:
سلام عليكم,

طبعا كلنا نحلم بفارس الاحلام و حاطين صفات خيالية بعقولنا, لكن الواقع مختلف و علينا ان نرضى بالاقل و بصفات متوازنة و غير مبالغ فيها.

حبيت اعمل مسح و اشوف رايكم حبيباتي.

لو تقدم لكم شاب ممتاز في اخلاقه, مهذب, محترم بين الناس و يحب اهله, ذكي و جامعي, و وظيفته مرة مرموقة و راتبه فوق الزين و شكله مرتب و حلو و اهله طيبين. بس انت ما تعرفيه و هو تقدم لج عن طريق معارف, يعني خطبة تقليدية و اهلج سالوا عنه و سمعوا كل خير. بس العيب و العائق, انه يشتغل بره البلد, يعني في دولة ثانية, و يرد كل اسبوع بس في الويكند.

1) هل توافقي على الزواج منه؟ نعم - لا
نعم
2) هل توافقي بالذهاب معاه؟ حتى لو كنت موظفة او جالسة بالبيت.
نعم
3) لو وافقتي, بس تبقي ببلدك و هو ببلد, هل بتكوني خسرانة احلى ايام حياتك؟ و هل بيتغير موقفك و بتروحي معاه بعد فترة من اكتشافك لان الايام معاه احلى؟
اكيد بخسراحلى أيام حياتي لأنه اذا بعدوا عن بعض ما راح يفهم كل واحد الثاني ,اكيد بعد اذا بكون في بلد وهو في بلد ليش متزوجة اصلا .
وطبعا

اتمنى اجاباتكم تكون بنعم او لا, و علموني شنو رياكم اجمالا في الموضوع, يعني ليش اخترتي نعم او ليش ترفضي؟

جوفي كل الصفاااات الزينه موجوده فييه
بس الي صاير عائق مثل ماتجوفينه اهو الرزق
الرزق مو بيد الانسان
هذا بيد الله وماقدر اعترض عليه وين يكووون
يمكن يكون الرزق بعيييد ويمكن يكون قريب ويمكن قليل ويمكن كثير
لو رفض هالرزق من رب العباااد جان بتدمر كل حياته وكل صفاته بترووح
بس انه عندي نقطه دوم اقولها انه وزوجي ع الحلوه والمره
يعني وين ماكان زوجي اكون معاه وانه مره اتحمل كل شي عشان راحه زوجي
لان راحه زوجي معاي تسوى الدنيا ومافيها
لو كان زوجي شغله على سطح القمر بروح وياه واكون يمه وظهر حقه لان يستمد طاقته مني
لو ماكنت معاه وتميت بديرتي واهو بعيد مابكون فيه اي طاقه
دام فيه كل هالصفات الزينه اكيد برتاح في غربتي معاه لان بيتحمل فيني

عندي عادي اوافق وحنا عندنا في البحرين خيرات الله ماخدين من السعوديه واعرف واحد ماخد سعوديه وساكن هناك بس كل يوم يجي البحرين حق العمل تخيلوا بس عايشين سعيدين طبعا في هذي الحاله صار اهو الي يروح ويرجع

دام متفاهمين ويحبون بعض ليش لا