نصيحة يا عرايس .. !!

سلام عليكم
معظم الزوجات تشتكي من مشاكل أهل زوجها ومضايقتهم لها سواءاً بالافعال أوبالاقوال فمثلاً الحماة أم الزوج تقوم بتصرفات استفزازية اتجاه زوجة ولدها أو أخت الزوج تشوفينها وكأنها في معركة وياج فمثلاً تقوم بإحراجك متقصدة عشان تعصبين وخصوصاً لما تصير مشاكل او مشاجرات مع اخوها تظن ان مرته هي اللي ( شوشته ) أو تغير لما تشوفج معاه بقول لكم قصة رفيجتي

رفيجتي المسكينه كانت أخت زوجها تغير منها غيرة موب طبيعية قامت ومسكت يد زوجها الا هو اخوها ودشت الصالة يعني ثلاثتهم دشو مع بعض المعرس في الوسطه و على يمينه مرته (العروس ) وعلى يسارة أخته عاد العروس كانت مجهزة حق الزفة و مرتبة كل شي راح خرطي والكل اتفاجأ من تصرفها لا و طول الزفة تضحك وياه كأنها هي العروس !!!!!!!

فالغيرة لابد منها .. أخذيها قاعدة دائماً ابتسمي امامهم و بيني لهم انج وياه زي السمن ع العسل و كل شي تمام و تموتون في بعض واهتمي بأناقتج و كشختج و عطوراتج ونصيحة مني لج لا تكثرين زيارات لأنها احيانا تسبب مشاكل زوريهم بين فترة و فترة و بعد في شي مهم اتعاملي مهاهم برسمية يعني كل شي رسمي لا اطيحين الميانة معاهم ذلين موب أهلج يعني لو فلت إلسانج بشي ما راح تسلمين منهم فكوني رسمية جداً جداً اصلن جذي بتكونين معززة .. و اذا صارت مناسبة او شي
كوني آخر وحدة تدش وأول وحدة تطلع
وبعد بقول لج شي أخلقي حاجز بينج و بين خوات زوجج جذي راح تسلمين من المشاكل حتى لو قالو لج شي يبون يضايقونج ويعصبونج أبتسمي و طنشي جذي راح يموتون من القهر خخخخ أسأل مجرب ! واذا كلامهم قوي ما تقوين عليه سوي لنفسج برنامج اختي علمتني اياه عدي للعشرة جذي راح تتغلبين على الانفعال لأنج لو انفعلتي راح يزغردون لا تخلينهم ياخذون عليش موقف ضعف ..

طبعاً مو كل العوائل جذي بالعكس في بعضهم طيبين و شحلاتهم مع مرت الولد

يالله مع السلامة