اليوم جايبة طبقين من اللحم
*صالونة اللحم
قبل الزواج عمري ماسويت صالونة او طبخت غذاء كامل
بعده تغير كل شي
صار لازم اطبخ لزوجي اللي مايعجبه اي شي
واول مرة سويت صالونة لحم
رجع البيت قال لي انا مااشم ريحة شهر رمضان
بما ان صالونة اللحم معروفة ف الشهر الفضيل عندنا مع الخبز(الثريد)
لما كنا صغار ونرجع من المدرسة ونمر عند بيوت الناس
نشم ريحة الصالونة المميزة
من جذي هو قال لي يبي يشم ريحة مميزة
وصرت ادور ف النت عن طريقة الصالونة
وكل مرة اجرب نوع ثاني
ونفس الشي الريحة ماترضى تطلع
لما اسال امي او عمتي يشرحون لي بطريقة ماافهمها
وبعد اجرب لكن ماانجح
يعني تعلمي كان من بعد خيبات امل ف النجاح
لكن الحمدلله نجحت
وحبيت احط طريقتي-الطريقة البحرانية- لاني ماشفتها ف النت والمنتديات
المقادير
لحم
خضروات منوعة
جزر بصل ثوم طماطم بطاطس كوسة باذنجان قرع لوبياء باميا فلفل اخضر
>> انا استخدمت البطاطس والجزر والطماطم والبصل والثوم بس
ورقيات
بقدونس شبت(سبنت) كزبرة(تابل)
البهارات الصحيحة
ورق غار
ليمون اسود
دارسين-قرفة
هيل
البهارات المطحونة
فلفل اسود
ثوم بودرة
زنجبيل بودرة
بهارات مخلوطة
كركم
بصل بودرة
واي اضافة تحبونها من لمساتكم الخاصة
الطريقة
اول شي ننظف اللحم
نقطع البصل والفلفل والثوم والجزر والبطاطس والطماطم واي اضافة من الخضروات
ونحط البهارات الصحيحة
القرفة الهيل ورق الغار
بدون اضافهة الملح عشان تتسرع عملية استواء اللحم
نغلي الماي ونضيفه ع المكونات السابقة
نرفع النار ليمن يبدا ف الغليان
نقصر عليه ونخليه ع نار هادية ليمن يستوي
هني بعد مااستوى ونشف الماي>>>خطوة اختيارية
تقدرون تنتظرون الى ان يجف الماي
او تكتفون باستواء اللحم
انا اسوي الطريقتين يعني اذا نشف الماي كان بها
مانشف وحسيت اللحم استوى اكتفي بدون ماانتظر
بنشوف ان الخضروات صارت ذايبة
هني اهم خطوة عشان تصير الصالونة غليظة وكثيفة
نهرس كل الخضروات
انا شلت اللحم عشان يصير اسهل ف الهرس
بعدها نضيف البهارات المطحونة والملح ومعجون الطماطم
نخلطهم وية بعض
ونرجع اللحم ونحط الخضروات اللي نحب ناكلها
لان هذي الخضروات بتظل مثل ماهي بدون ماتنهرس او تذوب
الطماطم اذا تبونها ماتذوب ضيفوها ف النهاية
نضيف الماي مع الليمون الاسود
نرفع النار ونخليه يغلي
بعدين نقصر عليه عشان تتكثف الصالونة وتستوي الخضروات
وهذي صالونتنا استوت
سويت وياه رز ابيض عادي
وهذي صورة غذانا
الصالونة عن قرب
