.. شلوون اقنع زوووجي ؟!! بنات ديرتي بليييز ..

الله يساعدش واني عكسش خخخ

إنزين الحين يقول ليش انش تصيرين قمر (وبالفعل الوحده تصير اكشخ بدفه راس برأيي ) المهم قولي له يعني بلفت النظر اكيد بدفة الراس دخلي إليه من هاده الباب ،،، وزياده بيني ليه انش ما بتسوين غير الواسع والي استر من ناحيه انه ما بتكون مفتووحه وله راح يبان الثياب لانه الدفه إذا وحده ما تعرف ليها ما يناسب لانه الكو والماكو راح يطلع


اني زوجي ما يرضى البس دفه راس وايد يدوب بس في الماتم او المناسبات الإجتماعيه البحته خخخ ليش لاني اصير حلوه على قولته فبجذب الأنظار ولانها بعد تكشف

وحتى عبايه الكتف لازم سوده بلاكي بلاكي خخخ

وطبعا اطيعه لانه هو يبي جديه مع مرور الوقت قمت اسوي ديزاين بالدفه نفسه او ازيد قطعه بعد تكون سوده واقتنع وفهمته اني انثى ولازم ابي تغير في العبايه لانه هاده يسعدني ولازم تفهم هاده الشعور

ومعلش خيو تحملي شويه شويه

والله يعطيش الحمال الثابت وبتشوفين انه الدفه اسهل عليش وسع واسهل

^^
هلاا خيوووه ..
والله جبتينهااا .. بدخل له من هالباب إني اصير حليوة بها خخ وياارب تضبط !

اممم بس شنو قصدش عن الحمال يعني ؟ شدخل الدفة ؟؟ بالعكس احسها تعيق اكثر اذا الوحدة في ايدها بيبي !

كان ياماكان;14254157:
خذي لك العبايه اللي يكون معاها خمار للركبه

يعني تكون العبايه كتف واسعه والغطاء يكون خمار مخيط واصل للركبه

شفته على بنات كثير وساتر كانه عباية راس مفصول الجزء الفوقي عن التحتي

اختي الله يسلمك احمدي ربك فيه رجال يخاف ويغار عليكي
وكلام اختي كان ياما كان صحيح
الخمار انا من الناس الي البس هالنوع يعني البس عباية كتف غير مطرزة سادة وواسعة
والبس الخمار الطويل بس مو للركبه الين نصف الفخذ يعني يغطي ذيك المنطة وهو عبارة عن طبقات وطريقة لبسة سهله لان له مطاط يمسكه من فوق وشكلة جدا مرتب وسهل في البس وساتر صراحة بما اني جربت عباية الراس وصراحة حتى الراس حلوة وتستر بس لازم لك وقت عشان تتعودين عليها بس للي عنده اطفال تتعب
فجربت هالنوع مررره مريح ومرتب وساتر ...... ودايما الطالبات في الجامعه يسألوني عنه
اهو كثير يشبه حجاب الصنعانيات باليمن بس اقصر منه لان الصنعانيات يجي طويل الين الركبة او اطول شوي .... حتى لما اروح المستوصف يسألني الدكتور انتي يمنيه واستغربت ^o)
بعدين عرفت إذا لقيت صورة نزلتها :)

خيوو الحين طالعه موضه الدفه الايرانيه .. اسمه "الشادور" او الجادر .. بصراحه واااجد مرتب وستور .. وينمسك من الراس باستيك .. تلبسينه فوق البالطو .. مثل يعني ما قالو البنات قطعه فوق الراس توصل لين الركبه ..

ترى عبايه الراس .. ارقى وارتب على البنت .. بصراحه انى البس بالطووو معنى اهلي من قبل لا اتزوج وانا بالمدرسه يلعوون عليي البس دفه راس وكنت اقنع نفسي بانه ما تسترني وتحكر حركتي .. ومن تزوجت صرت البسها بمحرم والكل يشوفني يقول واااجد احلى عليي دفه الراس حتى زوجي يستانس لين يشوفني فيها .. واقول بواصل عليها وارد على البالطو ..

الله يهديني ويهديش ويهدي الجميع على لبسهااا .. ولله ما في على اللباس الزينبي ..

خييو انتين لبسي عباية الراس بدون ما تفكرين انش تكرهينها وبتحبينها صدقيني :)

الله يوفقش

آنتي بآسلوبج آقنعيه ..


=)

لبسيها وبتحبينها عن نفسي ماعرف البسها بس في الضروريات البسها خصوصا انه حامل الحين واذا بطلع عن لا اركب فوق والدرج وعفسة اخذ دفة عمتي واطلع

سوي لج البشت حلوة ووسيعة انه سويتها والحين البسها زوجي يستانس لما البسهل لانها وسيعة

انتي نفس مشكلتي اختي
اول ما اتخطبت قالي زوجي نفس الشي
واني قلت اوكي بلبس
وفعلا لما شافني لابستنها عجبه

بس مرة مر عليي الجامعة عشان يعطيني كتبي وشافني مبهدلة فيها
شعري طالع واياديي وحتى شوي من صدري
لان ما اعرف اتحكم فيها

في نفس الوقت قال لي بسرعة بوديش اقرب محل عبايات فصلي عباية كتف
هذي ماتستر

اني من رايي ان اللي متعود يلبسها في الصغر يعرف يتحكم فيها وتكون مرتبة عليه وتستره
بس اللي مو متعود عباية الكتف افضل

اختي طيعي زوجك لازم ترضيه
وعباية الراس تفتن اكثر حتى لو كانت واسعة او فراشة

قولي له انا ماعرف لها تطيح من على الراس و من جدام مفتوحه و جسمي راح يبين و يدي تطلع بعد

هالموضوع مثار جدل بين كل الناس دفة الراس و البالطو

صدق ان البالطو او دفة الكتف مو حرام و ناس يسوونها ساتره و ينطبق عليها مقاييس الحجاب الشرعي بس بعد الوحده لازم تطمح للأفضل وما في احسن من العباءة الزينبيه و اني وحده البسها و كلي فخر وواثقه من نفسي <<<< طبعاً هذا الكلام موجه للبنات الي قالوا ما اول !!!!!!!!!! سبحان الله

اما عن صاحبة الموضع

انتي حاولي ان تلبسينها لما تكونين وياه و اوقات الي بتروحين مكان تحسين ما تتحركين براحتش فيها مثل الجامعه البسي دفة الكتف مع ان احس لو بتجربين بتتعودين عليها و في الف موديل يخلي الدفة ثابته عليش وما تطيح

ولا تخلين هالشي البسيط يأثر عليكم و صدقيني لو طاوعتينه بتكبرين في عينه

و غريبه شبابنا هالأيام ياخدن البنت تلبس دفة راس و يخلونها تلبس دفة كتف الله يهدي زوجش و يخليكم لبعض

كلامه صح حبيبتي هذا هو اللباس الشرعي

والله اني وجهة نظري ان دفة الراس جايه ويا الموضه هالايام عفر بس في محرم ايصيرون عجايز يلبسونها باقي الايام يصيرون بنات ويلبسون بالطو

وش هالهرار احس روحي عجوز قولي اني مو متعوده عليها اهون من هالعذر
انا وحده من اللي يلبسون العبايتين الكتف والراس
لكن ما احس بالفخر والراحه الا بالراس بصراحه شعوري غريب اخذ راحتي فيها جربيها خيو مره مرتين وشوفي
سوري على الاسلوب لكن كلامش قهرني خخخخخخخ

اممم اني خطيبي جذي بعد على طول يقول ان عباية الراس حلوة

لا تطلعين بعباية ومن هالحجي .... لكن ما يقدر يجبرني لاني شارطة عليه في المقابله

اممم بقول لش طريقة وشوفي تناسبش او لااا .. وجربي وما راح تخسرين شي

وقت اللي تشوفينه يتحجى عن الدفة ومصر عليها

قولي له اوكي .. يازعم سمعتين كلامه << عشان بس يحس برجووولته

وبعدين وانتو طالعين اختاري محل عادي للطلعة عشان ما تتنرفزين من شكلش دام انش مو مقتنعه يعني

بحر مثلااا

لا تتصرفين على طبيعتش يعني كأنش مو مرتاحة من شكلش او مو مقتنعه فيه

اذا سألش شفيش قولي لا ما فيني شي .. ولا تسولفين واجد يازعم منقهرة من الدفة ومو حابتنها

<< اني اسوي جذي في كل شي ابيه وخطيبي ما يرضى فيه

وفي النهاية يقتنع عشان ارجع على طبيعتي من جديد

جربي وقولي شصار وياش

:)

قلبي عن غيره تسكر;14253519:
مافي موضوع
بس الي فهمته من الاخت ان يبي يلبسج عبايه راس وانتي مب مقتنعه
قولي له ان العبايه الراس صح انها بلبسها من فوق لي تحت بس احسها ماتسترني تنفتح اقل شي وثيابي تطلع
وماعرف امشي فيها وحتى الي يلبسونها ويمشون فيها وخاصه عبايات الراس مال البحرين اكثرهم تفصل لان تكون حرير وطايحه واقل هوا تفصل الجسم عدل
وانتي قولي له مابتسوين عبايه كتب ضيقه
سويها الموديل السعودي الي تكون من فوق لي تحت وسييع جنها عبايه راس بس صايره على الكتف

واذا ماقتنع قولي له نص ونص تلبسينها مو على طول يعني طلعات مجمعات تلبسين كتف وزيارات بيوت واماكن عبايه راس
ارضاء طرفين وان شاء الله يوافق

أتفق مع الأخت عن غيره تسكر في أن أوقات تكون دفة الكتف أستر خاصة مع كثرة الحركة . .

بالإضافة حاولي في البداية إنج ترضينه وما تعترضين من البداية وترفضين تلبسين دفة الراس في طلعاتج . .

وتجربين معاه ومع الوقت تطرحين له مشكلتج عشان يتفهم أكثر وما يحس إنج رافضه هذا الشي لأسباب ثانية مع عدا انها ما بتكون لج عملية . .

حاولي توجدين بحل يرضيكم وما يزعج زوجج ويخليه أكثر دقه وملاحظه للبس العباية

وفقج الله

يقول الرسول الاكرم : لو كان السجود لغير الله حق لامرت الزوجة ان تسجد لزوجها

طاعة الزوج من طاعة الله
بالعكس عباية الراس احلى
تبين صج صج هيبة

الله يوفقج

العباية تاج والتاج لا يلبس الا على الراس

*أم ملاك*;14254477:
مسامحه على الكلام الي باقوله بس صراحه احنا نلبس عبايات الراس وبالعكس وشحلوهم وحتا انتي بتكون عليج وااايد حلوه انا متأكده والحين مثل ما يقولون البنات انها تطيح من على الراس وتنفتح ويطلعون لثياب بالعكس اكو اشياء وايد صارت فالدفه تقدرين تحطين فيها (آستيك) مثل ما نقوله بالعاميه ) في الراس ولا بتطيح ولا شي ومن جدام تقدرين تحطين فيها ال(طقطق) حتى ما تنفتح والمفروض انج تطيعين زوجج احسن لج من انج تقولين له اوكي وتلبسين الكتف حتى يتعود، اما اذا انتي كللللللش مو مقتنعه حاولي تقنعينه انج بتلبسين الدفه في مناسبات معينه وعباية الجتف في مكان معين ومسامحه مره ثانيه على المداخله واتمنى انج ما تزعلين

بالعكس الدفة ساترة لكن اللي مايؤيدونها هم اللي يطلعون عيوب من تحت الارض

ومثل ماقالت الاخت اذا ماتعرفين تجودينها فيه استيم ينحط في اليد

بحرينيـة 88;14255362:
لا احنا عندنا مو حرام وشيوخنا محللينها بشرط تكون تستر الجسم .. ورجاءا اختي احنا مو في موضوع الحلال والحرام لان تأكدي إني قبل لا ارضي زوجي برضي ربي وما بلبس شي الله محرمنه !! لاني ولله الحمد من عايلة محافظة وماتطلع منها العيبة بس اني مو مقتنعة بدفة الراس وهيه مو فرض واجب علينا .. اهم شي شي ساتر ،،

بنات مشكورين بس شكله محد عنده حل لي لاقناعه ،،

هذا العذر عند الكل انه حلال اذا كانت تستر الجسم ومافيها شيء ملفت

لكن لو بنجي للواقع!! اغلبهم ملفتين للنظر ومطرزين وملونين ووووو :confused:

واغلب اللي يلبسونها حتى لو فضفاضة تبرز مفاتن جسمهم وخصوصا الصدر

حتى للضعاف بعضهم يكون صدرهم بارز وملفت وبالعكس بعضهم متان لكن ماتبين مفاتنهم

خبريه إنه مادام ما اعترض و قال شي في المقابلة فلازم ما يعترض الحين بس بطريقة دبلوماسية هههههههه
فصلي ثنتين عباة كتف و دفة راس
في الطلعات و المجماعات لبسي الكتف و البيوت و الزيارات لبسي دفة راس
مثل اللي أسويه

يضحكون اللي يقولون يلبسون عباية الراس لين راحوا بيوت او مواتم وهم مع نسااااااء

ويلبسون الكتافيات اذا راحوا مجمعات واماكن مختلطة!! تتسترون ويا النسوان وتعرضون روحكم للرجال؟؟



اني ابدا مو ضد لبس عبائة الكتف لكن ماارضى اذا احد يجي ينزل قيمة عبائة الراس مقابل التشجيع على الكتافية

تقولون الشرع حلل بشرط ساترة اوكى مافيه مشكلة بس وين اللي يلبسون عبايات كتف محترمة؟ اغلبهم مزركشين وملفتين

بتلبسون البسوا انتون حريييين بس مو على حساب تشوهون صورة العبائة الزينبية



والمهم في الموضوع زوجها يقول لها انه الكتافية تبرز مفاتنها وهو مايرضى

مو زين تخلونها تعانده وتشجعونها على هالشيء بدل ماتحببونها في عبائة الراس