اه واسوني و ادعولي انهم مايخذون ولدي مني

الله يكون في عونج يارب ،
بس منو قال إن الحضانة تنتقل تلقائيا ً للأم الحاضنة بمجرد زواج الحاضنة ؟؟؟؟؟
اللي معروف بالقانون إن الحضانة تسقط عن الحاضنة بمجرد زواجها ، ولا بد إن أم الحاضنة اللي اهي
جدة الولد أو البنت أن تطلب انتقال الحضانة لها ، وأن تقدم أدلة وشهود على عدلها وتوافر المكان المناسب للحضانة ،

لكن ، اسمحي لي أقولج هالكلميتن ، وأدري يمكن ما يعجبونج بس فكري فيهم زين ،
ترى الولد لو راح عند أبوه ، ما هي نهاية العالم أو الدنيا ، لأن الولد يحتاج لأبوه ،
يمكن هالشيء ما تشوفينه ولا تدركينه إلا بعدين لما يكبر الولد ويصير بمرحلة يحتاج فيها لوالده جنبه ،
ولاحظي الأولاد الصغار ، لما يكونون بعيدين عن أمهم لأي سبب كان ، ما يحسون بالإنكسار اللي يحسونه لما يكونون بعيدين أن أبوهم لأي سبب كان وفاة أو انفصال أو سفر .... إلخ ،
ومثل ما البنت قريبة من أمها ، ترى الولد قريب من أبوه ،
لأن الولد يتأثر في أبوه ، من خلال روحته معاه المسجد أو الديوانية أو الطلعات العادية ،
تلاقينه يتأثر في أبوه ، ويتعلم تلقائيا ً من خلال تصرفات والده ،

أختي ، عسى الله لا يحرمج من ولدج ، ولكن حتى لو لا قدر الله راح الولد لأبوه ،
ترى يمكن خيرة ، يمكن بعده عنج يصقل شخصيته من خلال تأثره في والده أو أولاد عمه اللي حوالينه ،

وتذكري ، قول الله تبارك وتعالى :
فإن مع العسر يسرا ، إن مع العسر يسرا

قال الله مع وليس بعد العسر يسرا ،
لذلك اقعدي بينج وبين نفسج ، وشوفي هالأزمة اللي إنت فيها شنو استفدت منها ؟؟؟؟
فالله تبارك وتعالى رحيم لطيف بعباده ، لا يقدر لهم شرا ً محضا ً أبدا ً ،
حاولي تشوفين الجانب المشرق من هالأزمة ،
وراح ترتاحين صدقيني ،
لا تنظرين لكل مشكلة على إنها ضدج أو إنها نهاية العالم ،
لكل مشكلة ولها حل ، بل حلول ،
بس المشكلة فينا إحنا ، لأننا نبي حل يرضينا إحنا حتى لو ما كان الحل المناسب ،