تجمع بنات الجزائر لشهر صفر 1432 هجري

heaven's road;14331297:

سهى الله يجعل ايامك كلها ورود

hachemia;14306275:
السلام عليكم يا لبنات , ان شاء الله تكونو كامل بخير.
حبيت نقوللكم بلي الموديلات هادو تع الكاراكو يهبلو , العام لي فات كانت لا مود تع الكاراكو اللي يكون مخدوم بالساتان , شفت عند الخياطات دي موديل بزاف تشوفي واحد تنساي لاخر , مام في الاسواق غير هوما و مرات يكونو اغلى من تع القطيفة , بصح في الجي ما شفتش حاجة شابة درت حتى حفاو رجليا بصح ماكاش حاجة شابة تراديسيونال , لي تايور و السواري كاين في كل حانوت بصح التقليدي ماكاش حاجة شابة , اللي تحوس على حاجة شابة و جديدة تروح للبليدة , في لا غو عبد الله و زنقة النصارى و باب السبت و السوق , ثم تلقاي كلش , في السوق اللي جاي جيست قدام لا جونس كاين الرخس و كاين السواري و لي تايور و الحوايج تع دايمن . و في لا غو عبد الله و زنقة النصارى تلقاو التراديسيونال , و السواري
و في زنقة النصارى كاين حانوت اسمو التلمساني , هداك الحانوت فيه غير لاكلاس و الحاجة الشابة , شوي غالي بصح دايما عندو دي موديل ما تلقاوهمش عند وحد اخرين ,
احنا عندنا في الدزاير مشكلة انو كامل التجار يشرو من نفس البلاصة في سوريا و لا المغرب , و في كل حانوت تدخلي تلقاي نفس لي موديل , بصح هداا الحانوت لالا , انا شريت قفطاني من عندو , ما كاش لي شاف هداك القفطان و ما قاليش شباب , ههههه كي رحت لعند الحفافة من بعد عرسي بمدة قاتلي بلي وصلها الخبر بلي لبست قفطان شباب انا غلبني الضحك بصح عجبني الحال , انا ما نحبش نلبس كيما واحد اخر ,
اتخيلو عروسة في نهار عرسها تكون تتصدر بالكاراكو حتى تلقى واحدة لابسة كيفها سواسة ..... ههههه
المهم هذا بالنسبة للقضيان لي قبل العرس , و ننصحكم ما تشروش اول حاجة تعجبكم , نهار تشوفو ونهار تعسو و نهار تمسو و نهار تشرو كيما تقول ماني
اولا لان الحاجات اللي تشروها تجي بلي شوا , كاين بروميي شوا و يكون غالي طبعا و كاين دوزيام شوا و يكون ارخص .
شوفو الاسعار و لاكاليتي تع الحوايج و قارنو و شوفو واش يخرج عليكم
بصح نصيحة على حوايج التصديرة احسن انكم تشرو حاجة بروميي شوا باه تبقالكم مدة طويلة سورتو التقليدي
اما بالنسبة للحوايج تع كل يوم عاادي مشي مشكل لوكان تشري دوزيام شوا باه تنقصو شوي مصروف .
و اهم نصيحة انكم ما تكثروش , شفت بنت عمتي و جهازها و الله غير خسارة في خسارة هديك الخزانة عمرتها كامل و ما لبستش ربعها , اولا لانو جسمها تبدل بعد الزواج و هدا بسبب الهرومونات و ما تقولوش بلي راه تديرو ريجيم و لا تديرو سبور ,
المشكلة في زيادة الوزن بعد الزواج هو الهرمونات مشي الماكلة .
و الجسم يلزمو على الاقل عام باه يتعود على الهرومونات و مقدار الاكل اللي تكونو تاكلوه . يعني زايدة زايدة , هادا من غير ادا حملتي و جبتي بيبي ثماك تع الصح تتخلط
على ديك اشرو حوايج يكفوكم ما تشروش باه تعمرو الخزانة وخلاص
كاين حاجة برك قد ما تشرو منها ما نقولكمش احبسو هي الملابس الداخلية , و خصوصا _ under wear _ , وانتبهو للكاليتي
اتاكدو دايما بلي كي تشروهم يكونو في ساشيات و ادا كانو غير محطوطين للهوا اغسلوهم قبل ما تستعملوهم , لانو المراة تكون حساسة في الفترة الاولى تع الزواج و اي حاجة ممكن تسببلها التهابات و فطريات , و الصح يقول الوقاية خير من العلاج ,
اما بالنسبة لي سوتيان مشي شرط تكثرو بزاف , و مام هادوك احسن انكم تغسلوهم , مرة قريت على واحدة هنا في الماريكان جاتها فطريات في صدرها كلاتهولها كامل , حارو فيها الاطباء لانو هداك النوع من الفطريات كاين غير في الدول الاستوائية , حتى من بعد باه اكتشفو بلي الفطريات كانت في لي سوتيان اللي تشريهم المراة هاديك اللي كانو مستوردين من اندونيسيا , بصح كان ديجا تروتار المراة هاديك خسرت صدرها و نحاوهولها ,
هدرت بزاف اليوم
المرة الجاية نكمللكم واللي تحب تستفسر على اي حاجة راني هنا

ღ MiMi ღ;14334926:

سلااام البنات

ميماتي سامو لونا فردوس سهى واشراكم توحشتكم بزاااف

انا راني مليحة الحمد لله و عندي امتحان سمانة الجاية كيما موالف هههه

دخلت نطمن على ميماتي خفت عليك كي شفت وش صاري في مصر ربي يحفظك من كل سوء

ان شاء الله نحاول ندخل غدوة الكونكسيو زادت كملت عليا

heaven's road;14340820:

محلاها منافسة هههه و المستسلم بكل روح رياضية السيدة ميماتي هههه

ميماتي التيليفيزون عندي قرن ماتفرجتوش انشاء الله خير و انشاء الله ما يتضر حتى واحد
ميمي حتى حنا توحشناك و ربي يقدرك مع الامتحانات و راني معاك في لوبوان دو في تاع العرايس حتى انا ما نحبش الشارجي بزااف نشتي السابل و الاوريجينال لاكلاس