السلام عليكم و رحمة الله و بركاته...
أكيد أغلبكم سمعتوا بالمطاعم السريعة المتخصصة بأقماع البيتزا! بصراحة أنا ما ذقتها لكن شفتها على مواقع كثيرة...
سلفتي جربتها و عجبتها كثير، و طلبت مني طريقة عشان تسويها في البيت! بصراحة احترت و أنا أفكر في طريقة لعملها، و لما بحثت ما لقيت لها أي طريقة، يعني هي تعتمد كلياً على أدوات و أجهزة المطاعم المتخصصة في هذي الشغلة!
و الجمعة اللي فاتت كنت أتفرج على مارثا ستيوارت على فتافيت، و كانت تسوي أقماع الكب كيك، و أول ما شفت طريقتها على طول عرفت شلون بسوي أقماع البيتزا :D
بس حبيت أقول لكم، إن هذي أول تجربة لهذي الطريقة، في خطوات ما صورتها و في أخطاء صارت بذكرها لكم عشان تتجنبونها!
نبدأ بسم الله...
بنحتاج:
عجينتكم المعتمدة للبيتزا
صلصة الطماطم الجاهزة أو طريقتكم الخاصة
خضار لحشوة البيتزا (بصل - فلفل بارد - هوت دوغ - زيتون)
جبن موزاريللا
بنستخدم من أدوات المطبخ:
الأقماع الخاصة بالمعجنات
قطاعة رول للعجين
قدر حجم وسط
غطا قدر حجم صغير
ورق ألمنيوم
نجي للخطوات...
ناخذ مقدار كورة صغيرة من العجينة و نرقها بحجم الأقماع اللي نستخدمها للعجين...
و ننتبه ما نخليها رقيقة، لازم تكون سميكة شوي!
![]("http://www.3roos.com/files/ups/2010/116461/01293976453.jpg")
نلف العجينة لفة وحدة على القمع (و ما ننسى ندهن الأقماع بالزيت)، بحيث بس تلتقي الأطراف، و نقطع العجين الزايد بالقطاعة الرول... و نكبس على الأطراف زين حتى نتأكد إنها ما تنفتح في الفرن وقت الخبز...
و هنا بعد ما جهزت الأقماع و صفيتهم في صينية مدهونة...
![]("http://www.3roos.com/files/ups/2010/116461/11293976453.jpg")
ندخلهم الفرن على حرارة 475، الفرن لازم يكون حامي، و نخبزها لمدة 5 دقايق فقط!
و هذا شكلهم لما طلعتهم من الفرن...
![]("http://www.3roos.com/files/ups/2010/116461/21293976453.jpg")
نتركهم يبردون شوي بعدين نفك عنهم الأقماع المعدنية... و نبدا نجهز الخطوة الثانية!
نجيب القدر و نحط الغطا داخله، و الغطا اللي نستخدمه لازم يكون أصغر من حجم القدر بشوي، يعني لما ندخله في القدر يثبت في وسط القدر، مو صغير لدرجة إنه ينزل لقاع القدر!
و يفضل إنكم تدهنون الغطا بشوي زيت...
![]("http://www.3roos.com/files/ups/2010/116461/31293976453.jpg")
الحين نغطي القدر بطبقتين من ورق الألمنيوم و نتأكد إنه مشدود و ثابت!
و نجيب سكين طرفها حاد و نسوي فتحات في ورق الألمنيوم بحيث ندخل فيها الأقماع و تثبت و هي واقفة!
![]("http://www.3roos.com/files/ups/2010/116461/41293976453.jpg")
فايدة الغطا داخل القدر، إنه يعمل كقاعدة ترتكز عليها الأقماع، و قلت لكم تدهنونه، لأن اللي سويتهم لزقوا على الغطا و اخترب شكلهم شوي من تحت...
الحين نعبي الأقماع بالصلصة و الخضار و الجبن... أنا حطيت تقريباً ملعقتين صغار من الصلصة...
و ممكن إنكم تحشون الأقماع أول بعدين تثبتونهم على القدر...
![]("http://www.3roos.com/files/ups/2010/116461/51293976453.jpg")
![]("http://www.3roos.com/files/ups/2010/116461/61293976453.jpg")
ندخلهم الفرن بنفس الحرارة السابقة، و لمدة 15 - 20 دقيقة...
و هذا شكل الأقماع بعد ما طلعتهم...
![]("http://www.3roos.com/files/ups/2010/116461/71293976453.jpg")
![]("http://www.3roos.com/files/ups/2010/116461/81293976453.jpg")
بالنسبة للأخطاء اللي سويتها:
- أول شي سمك العجينة، كانت أرق من اللازم، فصارت العجينة يابسة شوي...
- ثانياً الحشوة، لما حطيت الجبن كان شكل الأقماع تمام، لكن لما ساح الجبن بين فجوة كبيرة في القمع، فأنتوا أحشوها بالصلصة و الخضار بحيث تتعبى للأخير و بعدين حطوا الجبن و رصوه بشكل كومة صغيرة فوق القمع...
- آخر شي أنا غلطت و خبزتها في الرف اللي في وسط الفرن، فما تحمرت كثير من الجوانب، و بالعكس تحمر الجبن و أطرف الأقماع من فوق... فأنتوا نزلوها على آخر رف تحت حتى تكون قريبة من الحرارة!
طبعاً مو جميلة بجمال الأقماع الجاهزة، لكن تكفي متعة عملها في البيت :)
إن شاء الله تجربونها و تعجبكم...
F: