قصة ولادتي بابني

مرحبا كروشات
الله يسهل على كل حامل ويرزق المحرومات بالحمل السليم والذرية الصالحة
طبعا اللي يذكروني انا فقدت حملي الاول بنتي بسبب ولادة مبكرة بالشهر السادس الله يجعلها شفيعه لي ولابوها يارب

بعدها صارت نفسيتي زي الزفت وكنت اتمنى احمل مباشرة عشان انسى احداث ولادتها المأساويه والحمدلله ربي ماخيب دعائي ورزقني بالحمل

مرت شهور الحمل بطيئة وكنت اخذ فيها مثبتات والدكتورة نصحتني بالراحة التامهو نجي ليوم الولادة طبعا كنت بالاسبوع ال 38 وانا بيت اهلي صحيت الصباح الساعة 11 الا امي مسويه ساندويشات كبدة فقلت لها وانا استهبل يمه شكلي بولد اليوم قالت لي ليش؟ حاسه بألم قلت لها اي طوووووووول الليل مانمت من الطلوق وانا اصلا مافيني لا الم ولا شيء
المهم عطتني الساندويتش توني بحطها بفمي الا سبحان الله انفجااااااااااار من تحت
عاد انا ما ادري شنو السالفه اثاري كيس الماي انفتح علي وطيران عالحمام وانا مشاعري مختلطه خايفة وفرحانه بنفس الوقت والمويه مش راضيه توقف طبعا الم مافيه نهائيا
جلست بالحمام لين امي جابت لى ملابس ثانيه عشان ابدل ثيابي اللي غرقت كلها من موية الرأس ولبست بعدها فوط صحيه وجلست ادور ادور بالحوش وانا اقرأ سورة مريم وامسح على بطني يوم جات الساعة 2 قالت امي لاخوي يلله اختك بتولد عالمستشفى وطلعنا طبعا بالسيارة وهم حاطين تحتي اكياس وفوط خايف اخوي يحليله منى اوسخ سيارته هههههههههههههه وانا الم مافيه ماغير عندي كيس تمر واكل واكل وماي زمزم اشرب منه
وصلنا للمستشفى ونزلت عالطوارىء وبرضو ماكو الم قالت امي لهم ولاده ودخلوني حق الكشف دخلت يدها الدكتورة واصرخ ذيك الصرخة وامي مسكينه تقول لهم شوي شوي على بنتي قالت الدكتورة مفتوح خمسه سم الا عيوني تصير كذا :adore: قلت ماشالله يارب تساهيل
طلعوني فوق على غرفة الولاده وانا برضو مافيه الم غيرت ملابسي وعطتني الحقنه ثواني الا ابتدا مفعولها وكل شوي حمام الين هدا بطني المهم نومتني عالسرير وركبت لي الممرضة المغذي وحطت فيه طلق صناعي اقل من خمس دقايق الا الم واصل مليووووووووووووووووون وانا ماغير اصرخ وادعي بالسهالات جت تشيك قالوا مشاءلله 7 سم لكن الراس بعيد كثير قوموني بالموت قدرت اوقف لان الطلقة ورى الثانيه وقالوا لي امشي بالسيب وكلما جات الطلقة شدي على تحت عشان يسهل نزول الرأس وانا اتعصر من الالم طلعت روحي :'( ماغير ابكي وابكي واقول يااااااااارب ارحمني خلاص بعد كل هالمحاولات انفتح الرحم 10سم لكن للاسف الراس مانزل بالحوض قالت لى الدكتورة شكل الحوض ضيق عندك لازم عمليه وانا بشدة الالم قلت اي شيء اهم حاجة اخلص من هالتعب خلااااااااااااااااااااااااص كان هالكلام الساعه 7الا ربع وجهزوني بسرعه بسرعه وطلعوني عالعمليات الا امي ياقلبي عليها تقول هاه ولدتي حبيبتي واقول لها لا يمه عملية وانا ابكي وهي طاحت ياقلبي عليها ماقدرت تتمالك اعصابها وركبوني فوق غرفة العمليات والدكتورة حاولت اخر محاولة وانا اصررررررررخ من الالم وانذبحت من الكشفيات شافت انه الراس مافيه امل ينزل وحطولي الكمامة حق التخدير ورحت في عالم ثاني
ماصحيت الا على صوت امي وخالتي وانا في غرفة الملاحظة واسمعهم يسألون الممرضه عن احوالي قالت لهم لسى ماصحت
الا انا اقووووول يمه يمه شفتوا ولدي قالوا لي ايه يهبل وتجي الممرضة تقول مدام مافيه كلام عشان العمليه انتي تعبانه ارتاحي
والحمد لله طلع عبودي حياتي عالساعه 7وعشر ورورني صورته بالجوال

وتوته توته خلصت الحدوته :L:
أسال الله ان يرزقني بره ويجعله من الصالحين