علي مدي سنوات الطفولة والمراهقة يقطع الابن منزل اسرته رايح جاي وهو يستمع لنصائح وجمل ثابته لا تتغير حتي اصبحنا مع مرور الوقت نحفظها جيدا ونتوقعها(واهالينا يقولوا واحنا نكملهم) واسترجاع هذه المقولات يبعث في الوجدان قشعريرة ما مصحوبة بالكوميديا ويعمّق محبة اهالينا في القلوب, ويجعلنا نكتشف كم الهيستيريا والقلق والمسؤولية التي تكبدها الاهالي في سبيل ان تقف وانت كبير فخورا براي الناس فيك"شكله ابن ناس ومتربي"
*"مش عايزة اسمع صوت"وفي هذه الجملة تدريبا مبكرا علي تقبل القمع والديكتاتورية اللذين ستواجههما طوال حياتك.
*"متردش عليه"وهي نصيحة اذا التزمت بها ستكسب مديرك
*تقعد في اول صف قدام السبورة.
*"لو مش فاهم حاجة ..ارفع ايدك وقول للاستاذ مش فاهم_ما تتكسفشي..فاكرين المدرسين زي اللي كانوا ايامهم زمان.
*بص كويس وانت بتعدي الشارع.
*متتاخرشي بعد المدرسة وتقعد تصيع مع اصحابك..وهي نصيحة ستحقق لك قدرا كبيرا من السعادة الزوجية فيما بعد.
*اللي بيشيل قربة مخرومة بتخر عليه لوحده.
*ومالها الكتب بتاعة الوزارة؟
بص كويس وانت بتعدي الشارع.
*افرد ضهرك
*مفيش مذاكرة علي المزيكا ..او..بتذاكر ازاي والبتاع ده شغال جنبك.
*متمشيش حافي في السقعة دي.
*صليت العصر؟
*ربنا يهديك..ربنا يهديك..واحيانا انك لا تهدي من احببت.
*اطفي التليفزيون وقوم ذاكر او..اطفي البتاع ده وقوم ادخل اوضتك.
*اوعي تقول لحد هاتلي حاجة.
*اقفل صدرك.
*بلاش وقفة الشبابيك والبلكونات.
*كل علي مهلك..وامضغ كويس..وماتكلشي وانت واقف ..وكل من قدامك متحفش..
*كفاية رغي في التليفونات
*متقعدشي قدام المروحة وانت مستحمي
*المسلسل مش هينفعك ...قوم.
*انت فاكر احنا مستنيين حاجة منك؟!
*متعليش صوتك.
*بلاش لعب في الشارع.
*يابني اللي ذاكر ذاكر خلاص..قوم نام.
*بلاش لعب بالمقص..بيجيب الفقر.
*يابني كلم خالتك العيانة اسال عليها.
*اوعي حد غريب يديلك حاجة تاكلها او تشربها او تاخدها منه.
*النوم لحد الضهر بيجيب الفقر.
*اوعي تكدب عليه تاني مرة.
*لازم تاكل سلطة.
*
لو شفت خناقة ملكشي دعوة بيها.
*عيب..لازم تحترم الاكبر منك.
*كلمنا لما توصل.
*ملكشي دعوة بالسياسة.
*بلاش اكل برة.
*لو فلحت ابقي تعالي (اعمل بيبي علي قبري)..ايه الخيال ده؟!!!
*متلبسشي القميص علي اللحم زي العيال الصايعة.
*يابني انت مسطول ولا ايه؟
*انت فاكرنا نايمين علي وداننا؟
*وطّّي المدعوق ده شوية.
*يابني قوم ذاكرلك كلمتين ينفعوك.
*ايه اللامبالاه والاستهتار اللي انت عايش فيهم دول
*انت فاكرنا لاقيين الفلوس دي في الشارع
*والله ما انت فالح.. وادي دقني اهي.
*ماتتكلمشي بصوت عالي في الحمام.
*متنامشي غير لما تغسل سنانك.
*متلزقشي في التليفزيون كدة..نظرك هيضيع.
*ضرب امثلة تشجع علي الكفاح واشهرها "احد الاقارب اللي كان بيذاكر علي لمبة جاز او علي العامود اللي في الشارع ونجح واخد الدكتوراة وسافر امريكا"
*سلم علي عمك كويس يا ولد.
*يابني محدش بينفع حد.
*ما تطلعشي ايدك من شباك العربية.
*قصة الغريق الكاذب اللي كل مرة يقول الحقوني..لحد ما غرق بجد
* التهديدات المخيفة شكلا والكارتونية مضمونا..مثل..هقطم رقبتك او هقطعلك ايدك او هقطعلك لسانك..او هدبحك دبح.
*ربنا يرزقك بعيل يوريك اللي وريتهوني
*متطلعشي علي الملاية النضيفة ورجليك متوسخة كدة.
*متقعدشي عريان كدة قدام اخواتك البنات.
*غير القناة دي بلاش مسخرة وقلة ادب.
*نسيت تشرب؟ نسيت تاكل؟ نسيت تقول هاتوا مصروفي؟ نسيت تعكنن عليه؟
*طلع ايدك من جيبك وانت بتكلمني.
*ياللا يابو كحكة حمرا..انت فاكر نفسك هتقعد تاكل معانا؟
*عايزة ابص الاقيك قدامي دلوقتي حالا.
*ماتتشاقاش في الفسحة وكل ساندويتشاتك.
*ادي اللي انت فالح فيه.
من كتاب (شكلها باظت )للكاتب الساخر:عمر طاهر
يا رب يعجبكم
منقوووول
تحيــــــــــــاتي
اللى يعجبها موضوعى تدعيالى ربنا يهديالى فارس ويجعله من الصاحين البارين وامام احد الحرمين ان شاء الله
وطبعا متنساش تقيمنى:040::040::040::040:
وطبعا متنساش تقيمنى:040::040::040::040: