زهرة ايامي;14089674:
عن الروضات
بنتي ان شاء الله قريب تكمل ثلاث سنوات
يعني ان شاء الله السنة الجاية بوديها روضة
للحين متحيرة بين الروضات
و خوفي الأكبر عليها من الباص
كله يتخيل ليي المشاكل القبلية مالت الباصات
و بعد كله معورة قلبي اني بوديها احسها بعدهي صغيرة
اما بالنسبة للعقاب
احاول اعاقبها و بطرق جديدة بعد بس ساعات افقد السيطرة على نفسي
يعني مرة كتبت على الطوف و هي ما تسويها
جبت ليها النشافة و خليتها تمسحه و كانت مستقبلة الموضوع
بس حسيتها مستانسة حدها بعدين قالت اكتب و انظف مرة ثانية ؟
يعني مستانسة تحس انها مسوية انجازو و تبي تعيده
و الله ما نعرف شلون نتصرف وياهم
هو صدق أني وياش أن أطفال الثلاث سنوات صغار على الروضة يعني ينظبطون على بكير صف وتعليم وأكل في وقت محدد وكل شي باستئذان بس بعد حلو لأنهم لما يروحون مستوى ثاني وهم ما دخلوا مستوى أول يكون المنهج سريع شوي باعتبار انهم حاطين في بالهم ان المعظم داخلين مستوى أول فتشوفينهم يمشون الأساسيات بسرعة عشان يبدأون الجد خاصة في العربي في مستوى ثاني يعطونهم تركيب وتحليل وتجريد على بسيط فبيصير صعب عليهم لو ما كانوا داخلين الروضة من قبل .
بالنسبة للباص لا تحاتين تكون وياهم مشرفة في الباص وتنتبه ليهم بس الأهم ان تكون الروضة زينة وتاخد مشرفات على قد المسؤولية .
أما عن خربشة بتش على الطوف فهميها أن القلم يستعمل بس في الكتابة على السبورة أو الورقة ، وكل ما شفتينها حابة تكتب جيبي ليها السبورة والقلم وعشان سالفة المساعدة كلما بغيتين تمسحين شي جيبي ليها قطعة قماش وخليها تسوي وياش وبس :thumbs_up:
همــسات;14089704:
شخباركم
سندس
انتين للحين معاناتش وياه الروضه والباصات؟؟؟؟؟؟
هلا همسات شلحوال ؟ ؟ ما حجيتين عن علاوي ؟
قلبي عن غيره تسكر;14090545:
في موضوع الكل يمكن يعاني منه
مثال
نواره جافت اهل ابوها واهلنا عندهم بي اس بي وقامت تصرخ وخذوا ليها
اشتروا وتمت تلعب فيها
خلصت موضه البي اس بي طلعت موضه الدي اس
الكل عنده
وين ما راحت
بيت ابوها كللللللللهم اليهال عندهم
بيت اهلي كللللللللللللهم عندهم
واهل ابوها عيال عمها موجودين وكلهم عندهم وبعد عماتها ماشاء الله اغلب الاسبوع يكونون موجودين وعندهم ولا يخلونها تلعب
وفي الروضه خبركم بعض اليهال يدعسونها
ولا يتكلمون عنها وتنقهر الا تبي
واحنا حاقرينها
وعدناها ان اذا كل درجاتها يابت A نفس قبل بنشتري ليها وسكتت بس الامر قام يطور ان مايعطونها
كل يوم تصيح ونحقر وصار على السالفه من بدايه الكورس
واهي تصرخ كلللللللل يوووووووم
وتقول حجي ماشاء الله مادري من وين متعلمتنه ههههههه
غصب تكسر خاطرش
وان مايعطونها تلعب وتوقف نفس الفقيره تطالعهم
وعقب اشتريناها
الي ابي اتوصل ليه ان لو حاولنا نعلم اطفالنا على القناعه الي حوالينهم يجبرونا على ان نترك هالعاده
كل ام تقدر تلبي طلبات عيالها لو من ماي عيونها تبيعه وتشتريه
بس اوقات لازم يتعلمون... لكن في هذي الحاله شلون نعلمها بكل الطرق حاولنا وياها مافي فايده لان وين ماتروح عندهم دي اس ويجبرش المجتمع انش اتسايرينه
حلوة فكرة انكم تشجعونها على الدراسة بهذي الطريقة يعني تكون الهدية دافع ليها عشان تنجز أفضل بس لما تحسون ان الشي اللي قاعدة تطلبه ماليها حاجة فيها أو ما يناسب لسنها مثلا ، حاولوا تقنعونها انها تقترح هدية غير ، بعطيش مثال ولدي محمد حلم حياته بجد أن يكون عنده بلي ستيشن ويوميا يحن يبغى بس أني وأبوه عارفين انها بتم عنده اسبوع بالكثير وبيخربها أو بتنكسر وغير هذا هو طالب نوعية غالية فقمنا بين فترة والثانية نشتري ليه أتاري وما تتم عنده شي فقلنا فلوس البلي ستيشن نقدر نشتري ليه ابها أشياء أهم ما دام هدا حاله بس المشكلة انه كل اسبوع يلتقي في ولد خالته ويشوف عنده ويصير خاطره فيها وكل يوم يحن وهالمرة جته انفلونزا عدلة لدرجة انه ماياكل ولا يقوم من مكانه بس من تكلمينه يقول ادا صرت زين بتجيبون ليي بلي ستيشن ؟ :!!: وهني كسر خاطرنا واشترينا ليه بس السالفة بشكل عام يبغى ليها وعي من المجتمع ككل يعني آباء وأمهات مو كل شي تطلع موضته لازم يصير عندنا ولازم نفهم اولادنا كلا حسب عمره ان الناس ليهم قدرات مادية ومو كل شي عند فلان لازم يصير عندنا واي شي مالينا حاجة فعلية ليه نقدر نستبدله بشي أكثر أهمية ويتناسب ويا اهتماماتنا مو نشتري بس لمجرد التقليد .
نور الموالي;14091022:
ودي ارد عليكم وحدة واحدة بس مااعرف اسوي اقتباسات متعددة
ام هادي الله يعينش بصراحة صايرة ام وابو تلبين طلبات وتجيبين اغراض
سندس سالفة الباصات والمواصلات مشكلة مع الكل قبل اسبوع ولدي جاي لي مشي
من المدرسة ومدرسته بعيدة عن شقتنا وبينا وبينها شارعين رئسيين يعني خطر كلش عليه
ليش ياماما ؟ قال انتظرت انتظرت ماجات السيارة اللي انتو مكلفينها بتوصلي
رحت الى بيت صديقي فلان وصديقي فلان اشوف اذا ابوهم موجود يوصلني
لكن طبعا الكل في عمله وماحصل احد يجيبه
وجاني تعبان وهلكان من المشي
هو عجبني انه صرف روحه واستغربت لاني كلش كلش ماتخيلت يندل الطريق
ولانه ولدي اصلاً مايطلع لوحده اطلاقاً ماتخيلت بتجيه الشجاعة يجي مشي او يفكر
انه يزور اصدقائه اللي معه في الصف ويطلب مساعدة
لكــــــــــــــــــــــــن ضغطي ارتفع على صاحب الباص وكلمت ابوه في الدوام وقلت له حالاً يكلمه يهاوشه
طلع مقفل جواله
انتظرنا لليوم الي بعده وتأخر ابوه عن دوامه عشان يتفاهم مع صاحب الباص بمانه دائما مقفل جواله
شكانت حجته قال هو مرات مايجي معي يروح مع جاركم ( زوج عمة ولدي ) ففكرته حتى هالمرة راح معه
أنا من الاول استغرب اذا ولدي ركب مع زوج عمته اقول وصاحب الباص مايسأل مايقول وين ولدكم
ركب وياه خلاص ماركب وياه براحته
مايقول ممكن الولد يروح مشي
او يجلس ينتظرني داخل المدرسة وانا أمشي عنه
المهم اتفق ابوه معه انه مايرجع الا مع الابص واتفق مع الباص انه لازم يجيبه ومن اليوم ورايح يسأل عنه ويتفقده
___________________________________
ام حسين
حياش بيننا خية وزين منها مشرفة الباص متحملة ومتعاونة
شاعرية - الله يحفظ حنين ودائما يخليها شطورة
زهرة ايامي
لاتحاتي بالباص ترى انا قبل اسجل بتي الروضة دائما احاتي الباص اقول صغيرة وشلون بتصعد وتنزل منه اخاف تطيح
ووووو
واخرها صادها حادث وهي نازلة من الباص ومنها تيقنت انه الي نتوقعه يصير فتوقعي خير وشيلي كل فكرة سيئة
ام حور
الله يساعدش خية
بالنسبة لمعانتش مع بيت عمش عانيت شوي مثل معاناتش بس مو مع بيت عمي مع اهلهم
الكلمات تنقال عادي ووحدة الله يذكرها بالخير دائما تقول لبتي جلسي يالتيسة وقومي يالتيسة
وبتي ام سنتسن فشسوت بتي من غير شعور بدأت تقول خالتي التيسة
هي ماقصدها تسبها هي قصدها خالتي اللي تقول التيسة ( لانه ماحد يقول هالكلمة غيرها)
عاد منها قطعت مااروح ولاأتزوار الا من مناسبة لمناسبة
انا لنفاخ البطن فهو طبيعي اذا كانت ترضع صناعي
لاتشيلي هم خية
قلبي من غيره حبيت مواقف نوااار عدل
ولي رد مفصل بخصوص الموقف الاخير بس الى مابعد تعبت الان من الطقطقة على الكيبورد
نور : طالعي الرموز اللي تنحط تحت في الرد بتشوفين مربعين لاصقين في بعض هديلين حق الاقتباسات المتعددة ، اي رد تبغين تقتبسينه اشري عليهم وانتقلي للرد اللي بعده ونفس الشي سوي لين ما تخلصين من كل الردود الموجودة في الصفحة وتأشرين مثل ما قلت ليش على المربعين اللاصقين في بعض خلاص بتنتهي الصفحة وحطي اضافة رد بيطلعون ليش كل الردود وبعد كل رد اضغطي enter واكتبي اللي تبغينه وخلاص .
زين ما سويتون ويا راعي الباص وعن بتش ويا نسيبتكم بيني وبينش ولو انها حفظت منها الكلمة اللي مي عدلة بس داوتها بالتي كانت هي الداء . وياريتها عرفت انها تسميها خالتي التيسة عشان تعرف ان الجاهل يقلد كل شي وتتعظ :D
