قصة ولادتي بالجازي

كان يوم الأربعاء تاريخ 1 ديسمبر 2010 رحت مع زوجي ستي سنتر ومشيت مشي يمكن ساعتين، وعقبها تعبت ورجعت بيت أمي ، حسيت بشي نفس الرطوبة، قمنا ورحنا السلمانية عشان نستفسر، قامو النرسات اللي هناك فحصوني وقالو لي مو مفتوحة ولاسانتي بس بداية تقلصات وطلق، ورجعت البيت.
ابتدا عندي الطلق من الفجر يوم ثاني، قمت من الرقاد على ألم قوي، ورحت الحمام وشفت شي بني فاااتح، خفت وايد.:-o

تاريخ 2 ديسمبر اللي اهو يوم الخميس، قامت أم زوجي وعطتني ماي ورد وزعفران، ورحت أمشي في الفريج من الصبح، والعصر رحت ممشى عالي ومشيت ساعه بعد، رديت في الليل رحت السلمانية قالو لي للحين روحي ورجعي عقب 8 ساعات.


4 ديسمبر 2010 يوم السبت من الصبح نزل علي افرازات بنية مع دم خفيف، قام زوجي وداني مع أمي مستشفى الأمل، وقالت لي الدكتورة الهندية الدبة أن الراس نازل ولازم احين احين أولد قيصرية ولاطلق صناعي بأسرع وقت وخرعووووني وسوو لي تلفزيون .... فقمنا ردينا بيتنا وزوجي هني حده مرتبك وخايف ويحاتي، رحنا الساعه 3 السلمانية مع امي وزوجي وام زوجي،، كالعااااادة قالو لي مافي شي ومفتوحه نص سانتي ورجعي البيت وهذي طلق دلاعه :thumbs_down:،،، لكن انا فيني طلق قوي وألم مو محتمل. حى كان استقبال بنت خالتي لكن ولا رحت ولا احد راح.

5 ديسمبر 2010 يوم الأحد عشت يومي في طلق عند أمي، ماقدر اقعد كله في الحمام، رحت مشيت مع أمي لي البرادة ورجعت، وكل ماتييني الطلقة أتصل حق زوجي او أسوي له رنة عشان يحسب لي اذا كان الطلق منتظم أو لا،، الالم حزتها زاااد علي صار كل نص ساعه وعقبها كل ربع ساعه، اتصلت حق زوجي وقلت له خلاااص ماصبر وبروح اولد لكن مو في السلمانية بروح مستشفى المحرق للولادة.
المهم 6 ديسمبر 2010 على الساعه 3 الفجر رحنا كاااااااان يومها ضبااااب ولا ينشاف الطريج ، ورحت المحرق للولادة ودشيت ولاااعت جبدي ومن الخوف راحت الطلقه مني، وبين ان مافيني طلق، وقالو لي صبري بتيييج الدكتورة الروسية، لكن انا شرررردت وقلت لهم بسررعه عشان مايودوني مابيهم يشوفوني، صج صج صج وسااااخه هالمستشفى.
قام زوجي قالي خلاص ماردج البيت انتي تعبانة وايد، بوديج مستشفى البحرين التخصصي، وانا اقوله لا خلاص مافيني شي راح الطلق،، لكن انا فيني :lol: .

6 ديسمبر 2010 يوم الأثنين الفجر على الساعه 4 ونص، دخلت مستشفى البحرين التخصصي، فرق السما والأرض في المعاله، وياو سوو لي تخطيط النرسات مابين ان طلق منتظم، راحت النرس تنادي الدكتورة، ويوم نادتها تفاجأو أن يه لي طلق وبين لهم، قامو وفحصو علي وقالو لي ان متوسعه 2.7
عقبها راح زوجي يكمل الأجراءات، وودوني غرفة خاصة وسوولي تمارين مشي وبالكرة الصفرة،

وعلى الساعه 1 الظهر ركبو الطلق الصناعي وكنت متوسعه 3، وراحت معاي مرت اخوي داااخل العمليات ولبسوها نفسهم وكانت تهديني وتساعدني مسكيييينة.
ولدت على الساعه 6 ونص، وعقبها خيطوني، تألمت في الخياطة واااااااااااايد.
وعقب دشوا علي كل اهلي وانا مو مستوعبه كنت مخدرة، وعلى الساعه 7 ونص ودوني غرفتي.