بسم الله الرحمن الرحيم
و الصلاة و السلام علي خير المرسلين سيدنا محمد الذي اصطفاه ربه لهداية عباده الي الطريق المستقيم فكان المثل الاعلي و المعلم الامين و علي آله و أصحابه الذين إتبعوه و ترسمو خطاه الي يوم الدين
ثم أما بعد/
السلام عليكن و رحمة الله و بركاته
أنا فتحت الموضوع دا علشان كلنا نفسنا نتغير و نكون أحسن مما نحن فيه و كل واحدة فينا مستنية ان حد يشجعها و لما بنكون صحبة صالحة الموضوع بيكون اسهل فربنا ييسر لنا الامر و نبدا مع بعض خطوة خطوة
يالا كلنا نسمي الله و نبدأ ب بسم الله
طبعا كلنا بيبص للتنمية البشرية من منظور بعيد و انه علم قائم بذاته و لازم نتعلمه انا عن نفسي بقول لا لو انسان بيفكر صح و عارف خطواته كويس و بيقدر يحسبها صح يبقي هو مش محتاج تنمية بشرية انت كل ما بتطور حاجةة في نفسك يبقي اسمها تنمية بتنمي ايه نفسك نفسك دي ايه بشر يبقي من هنا جيت التنمية البشرية و طالما كلها تنمية للجوانب البشرية يبقي اللي يفرق واحد عن واحد تاني هو كيفية استخدام المهارات اللي ربنا اكرمنا بيها و طريقة استغلالها
و بكدا اقدر اقول ان التنمية البشرية ليها بعدين اتنين
البعد الاول و دا بعد بيهتم بمستوي النمو الانساني في مختلف مراحل الحياة لتنمية قدرات الانسان و طاقاته البدنية و العقلية و النفسية و الاجتماعية و المهارية و الروحانية
اذا لم يتم اي جانب من حياة الانسان لا كل حاجة و دي من اهم كورساتها الاتصال الفعال و ادارة التغيير و ادارة الوقت و اتخاذ القرار و غيرها من الكورسات
البعد التاني بقي و دا بيتصل باستثمار الموارد و المدخلات و الانشطة الاقتصادية الي تولد الثروة و الانتاج لتنمية القدرات البشرية عن طريق الاهتمام بتطوير الهياكل و البنية المؤسسية التي تتيح المشاركة و الانتفاع بمختلف القدرات لدي كل الناس
يعني في النهاية بتخص الانسان
كدا عرفنا بعدين التنمية البشرية و هما ايه
تعالوا بقي ندخل علي اهم كورس من كورسات التنمية البشرية و هو الاتصال الفعال و ارادة التغيير
قبل ما نبدا ندخل فعليا في الكورس عاوزة كل حد فينا يسال نفسه سؤالين مهمين جدا و هما
1- ما الذي دفعني لادرس و اتعلم فنون الاتصال ؟
2- ما الذي اخطط ان افعله بهذه المعلومات الجديدة ؟
يا ريت كلنا نبدا معانا ورقة و قلم نسجل كل اجابتنا و نجاوب فعلا مش بنقرا و خلاص و يا ريت برضه نكون صادقين مع نفسنا في اجابتنا لان محدش هايشوفها
في الاول كدا ليه اصلا احنا بنحتاج للاتصال
فيه 3 اسباب هما العميلة الاتصاليه كلها و لو حسينا بيهم صح او وصلنا ليهم يبقي احنا فعلا مش محتاجين الكورس دا
1- الحاجة للطمأنينة و الاستقرار
2- الحاجة الي تقدير الذات
3- الحاجة الي الانتماء
شايفين ال 3 اسباب دول نبدا نحللهم و نعرف احنا واقفين فين بالظبط منهم
السبب الاول : الحاجة الي الطمأنينة و الاستقرار
طيب الطمانينة و الاستقرار دول بيجوا منين لما احس براحة نفسية طيب هاحس بيه امتي و ازاي اكيد لما علاقتي بربنا تبقي كويسة هاحس باحلي سكينة في الدنيا
يبقي نسجل مع بعض اول نوع من انواع الاتصال هو الاتصال الاعظم و هو الاتصال بالله عز و جل
لما اتصالي بربنا يكون كويس و تمام اكيد انا هابقي عاوزة اتغير علشان ربنا دايما يشوفني حلوةو لما اوصل لدا هاشوف انا نفسي جميلة من جوا و دا الاهم و بالتالي هاوصل لمرحلة اني اقدر ذاتي مش عايشة و خلاص حد يقولي راي سلبي اكره نفسي
لا انا عارفة قيمة نفسي كويس
و دا كدا السبب التاني : الحاجة الي تقدير الذات
و هي الاتصال بالنفس و كل واحد فينا شايف نفسه ازاي و عارف اصلا هو ماشي صح و لا غلط كويس و لا مش كويس بعرف اميز اصلا بين الصح و الغلط و لا مش بعرف و دا كدا يبقي الاتصال بالذات او بالنفس و لما اتصلت بنفسي عرفت ايه سلبياتها و من هنا ابدا اتغير قبل ما احتك بالناس
علشان كدا انا هادخل التغيير مع الاتصال بالذات
و لما انا خلاص عرفت اتصل بنفسي و بقيت عارف انا مين و قيمتي ايه اكيد علاقتي بالناس هاتتغير و هاعرف اعامل كل حد فيهم بطريقته و اقدر اوصله صح لاني اصلا خلاص لقيت نفسي
كدا نبقي وصلنا للسبب التالت و هو الحاجة للانتماء
و دا بحس بيه لاني مش عايشة في الدنيا لوحدي لا في وسط ناس محتاجة احس اني انا منهم و هما مني بحبهم و يحبوني اذا اقدر افهمهم صح و اوصلهم صح و دا الاتصال بالناس او الاتصال العام
دا كدا يعتبر الموضوع لو حاسيين اني ماشية صح قولي كملي و انا هبدا اخدهم واحدة واحدة و نتكلم بالتفاصيل
و يا رب يحصل تفاعل مع بعض و كل واحدة يبقي معاها ورقة و قلم و تسال نفسها و تجاوب و افتكروا ان ربنا رقيب عليكوا