اعملي معانا أحلى المشروبات الشتويةخلاص دخلنا في فصل الشتاء والجو ابتدى يبرّد...
وفي الوقت ده بنكون محتاجين نشرب حاجات ساخنة بنكهات لذيذة وجديدة علشان تدينا طاقة وتدفينا...
شيكولاتة ساخنة بالكريمة
زيّني الأكواب بالبندق أو بالشيكولاتة المبشورة وقدّميها ساخنةشيكولاتة ساخنة بالكريمة
المقادير:
- كوب شيكولاتة خام مبشورة (ممكن تستخدمي الكاكاو)
- كوب لبن
- 2 ملعقة قشطة
- 1 / 4 ملعقة بن أو نسكافيه
- سكر حسب الرغبة
- 2 ملعقة بودرة كريم شانتيه
- بندق أو شيكولاتة مبشورة للتزيين
الطريقة:
1- سيّحي الشيكولاتة على حمام مائي ساخن.
2- بعد ما الشيكولاتة تسيح تماماً، ضيفي عليها اللبن والسكر والنسكافيه أو القهوة، وقلّبيهم كويس مع بعض.
3- اضربي الكريم شانتيه والقشطة بالمضرب الكهربائي.
4- صبّي الشيكولاتة في أكواب التقديم، وضيفي على الوش خليط الكريمة والقشطة المخفوقة.
5- زيّني الأكواب بالبندق أو بالشيكولاتة المبشورة وقدّميها ساخنة.. وبالهنا والشفا.
*******************
ممكن تزيّني الكوب بالكاكاوشيكولاتة بيضة ساخنة
المقادير:
- كوب شيكولاتة بيضة خام
- كوب ونصف لبن
- ملعقة كبيرة قشطة
- ملعقة فانيليا
- سكر حسب الرغبة
- كاكاو للتزيين
الطريقة:
1- سيّحي الشيكولاتة البيضة على حمام مائي ساخن، وبعد كده ضيفي اللبن على الشيكولاتة، وقلّبيهم على النار كويس، وبعد كده ضيفي الفانيليا والسكر والقشطة مع الاستمرار في التقليب.
2- صبّي الخليط وهو ساخن في أكواب التقديم، وممكن تزيّني الكوب بالكاكاو.. وبالهنا والشفا.
*******************
زيّني الأكواب بالبندق المبشور أو بالكاكاوقهوة الموكا
المقادير:
- 6 ملاعق كبيرة لبن بودرة
- 4 ملاعق كبيرة بودرة كريم كراميل (موجودة في السوبر ماركت)
- 3 ملاعق صغيّرة نسكافيه
- 3 ملاعق بودرة كريم شانتيه
- 3 كوب ماء مغلي
- سكر حسب الرغبة
الطريقة:
1- حطّي كل المكوّنات دي في الخلاط الكهربائي، واضربيهم كويس مع بعض.
2- صبّي الخليط ده في أكواب التقديم، وزيّنيهم بالبندق المبشور أو بالكاكاو.. وبالهنا والشفا.
*******************
زيّني السحلب بالمكسرات وجوز الهند والقرفةسحلب بالمكسرات
المقادير:
- 6 أكواب مية
- 6 ملاعق صغيرة نشا
- كوب ونصف لبن
- 5 ملاعق كبيرة سكر
- 1/ 4 ملعقة مستكة مطحونة
- ملعقة صغيرة جوز هند
- ملعقة صغيرة قرفة
- مكسرات على حسب الرغبة
الطريقة:
1- اخلطي النشا واللبن والسكر والمستكة مع المية في حلة، وحطّيهم على نار متوسّطة مع التقليب لغاية ما يغلوا.
2- صبّي الخليط في أكواب التقديم، وضيفي عليهم المكسرات وجوز الهند والقرفة.. وبالهنا والشفا.
*******************
ممكن تزيني الأكواب بالكريم شانتيهمشروب الفانيليا
المقادير:
- 3 / 4 كوب لبن
- سكر حسب الرغبة
- ملعقة كبيرة فانيليا
- كاكاو (للتزيين)
الطريقة:
1- حطّي اللبن على النار لغاية ما يغلي، وبعد كده ضيفي الفانيليا والسكر، وقلّبيهم كويس مع بعض.
2- صبّي المشروب في كوب التقديم، وممكن تزينيه بالكريم شانتيه.. وبالهنا والشفا.
__________________