,.-~*'¨¯¨'*·~-.¸-(التجمع العاشر لحوامل شهر يناير (1) 2011)-,.-~*'¨¯¨'*·~-.¸

والمسكة الثانية يسمونها مسكة البيسبول

بترضعين من صدرج اليمين ... حطي البيبي بين خصرج وذراعج اليمين ... ريوله ورا .. وويهه جدام ... ومسندته على ايديج اليمين ... جذي ... ايديج اليسار لها مطلق حرية الحركة ...

ليش مهم اتكووون عندج ايد فاضية؟؟

لأن البيبي اول شي لازم يكون جسمه كله لاف باتجهاك ... يعني مو منسدح ورقبته لافة عليج .. لأ ... بطنه على بطنج ... هذا في المسكة الأولى ... وفي المسكة الثانية ... يكون البيبي منسدح على جنب ...

اذا خليتي البيبي منسدح على ظهره ولاف رقبته ممكن يصير فيه شد عضلي في رقبته هههههههههههه حياتي والله اللي يصير فيهم شد ... جنه صج

ثاني شي ... الإيد الفاضية ... راح تمسكين فيه الصدر ... من وين؟؟؟ من منطقة الهالة ... مو من الحلمة ....

انسوي زوووووووووووم على البيبي ....

لازم تنطرين لما يفتح حلجه على كبره ... يشرع حلجه ... ممكن اتحطين طرف الحلمة على شفايفه .. سبحان الله ردة فعل اتخليه يفتح حلجه حيييل ... من كبر حلجه عاد ههههههههههه

وبعدين ... اتسووين حرف ال c بالإبهام والسبابة ... وتمسكين الصدر من منطقة الهالة وابعد ما يكون عن الحلمة ... وحتى من ورا منطقة الهالة ... وتدخلين أكبر جزء ممكن داخل حلجه ... يعني الحلمة كلها واغلب الهالة .... الهدف؟؟

حطي لسانج الحين فوق عند سقف الحلج ... شاتحسين فيه؟؟ اللهاة ... يابسة مو صح؟؟ ايييي ... ردي بلسانج شوي لي ورا .. تكملة اللهاة بس مو يابسة ... صح؟؟ هم اييييي ... الهدف ان الحلمة توصل ذيك المنطقة .... فهمتيني؟؟؟ ليشششششش؟؟ صح؟؟؟

المنطقة لينة ... اذا البيبي قعد يمص فيها ... انتي ما تتعورين ... وبعدين المجسات مالت الرضاعة موجودة في منطقة الهالة ... فلما المنطقة تدخل داخل فم الطفل ... المخ يستلم الرسالة ان البيبي قاعد يرضع ...

التقاط الطفل لصدر الأم ... اهو أكبر سر من أسرار إدرار الحليب

اذا البيبي التقط الحلمة بس ... تذبح ... تعور ... وتشقق الحلمة ... وكلها جمم يوم ... ويخف الحليب ... وتقولين نشف الحليب

اذا البيبي التقط الحلمة بس أو حسيتي ان التقام الطفل للصدر مؤلم ، حطي صبعج الصغير ادخل حلج البيبي من الطرف وفتحي حلجه شوي شوي علشان يهد صدرج ... وجربي مرة ثانية ....

ترى الرضاعة نفسها ما اتعور ... يكون الوضع بس اهو اللي غلط ...

الحين حطينا الصدر داخل حلج البيبي ... شفتي المسافة اللي بين ويهج وويه البيبي ... في الفترة الأولى من حياته ترى هذي المسافة اللس يوشف فيها الأشيا واضحة ... استمتعي ... البيبي الحين قاعد يتأمل ويهج ويشوفه واضح احلى لحظة ... ولا يمكن أي شخص يشاركج فيها ...

اتبعي حنجه نقطة التقاء الوجه مع الاذن ... وشوفيه يتحرك ... قاعد يمص ... ويبلع ... وساعات تسمعين صوت البلع ... انتبهي له ... يمص يمص يمص ويبلع ... طبعا أول شي راح يسوي المصات السريعة ... جنه يدق هرن علشان الحليب يطلع ... ططااااطط ...

الوضع الطبيعي للبيبي اللي توه مولود ... انه راح يمص 5 دقايق وينام ... شاتسوين؟؟ راح اتقعدينه

تلعبين في اذونه ... أو تحت حنجه ... اتنشطينه علشان يصحصح معاج .... حبيبي اهو توه صغير ... ودايخ .. بس انتي تبينه يشبع مو يلعب ... وبعدين لازم يشبع ...ولا انتي اللي بتأذين ...

اول فترة ممكن الرضاعة تاخذ 45 دقيقة للوجبة الواحدة ... بعدين يكبر شوي يصير بروفيشينال ... 15 دقيقة الا الرضعة خالصة هههههههههه

الفك يحتاج يصير اقوى ... والبيبي يركز أكثر ... ويعرف التكنيك

الحين جربنا مسكات مختلفة ... ومتأكدين ان البيبي والأم مرتاحين في القعدة ... وان البيبي التقط صدر الأم بطريقة صحيحة ...

انشوف البيبي شنو يسوي ... قلنا راح يشرب شوي وينام ... شاتسوين؟؟؟ اتقعدينه من النوم .... شلون؟؟

ممكن:
-اتحركين اذونه
-تلعبين ابحنجه
-تعصرين صدرج شوي داخل حلجه لأن سبحان الله ... البيبي لما يحس بطعم الحليب يمص ويبلع تلقائيا ...
-اتشيلينه من صدرج ... وتفتحين المهاد ... لأن المهاد ممكن يخدره فينام ...

ومن اجمل الأشياء اللي ممكن اتسوينها ... انج اتشيلين هدوم البيبي (بس خلي الغرفة شوي دافية علشان برد التكييف) وتحطينه على جلدج مباشرة ... Skin to skin contact .... هالتجربة سبحان الله لها مفعول وتاثير على الطفل .... اتخليه أهدى ... وتشبعينه احتايجاته النفسية والعاطفية

مرة على مرة ... راح اتصير هالعملية سهلة ...

انزين أول ما تولدين ماكو حليب ... شدراج انه صار في حليب؟؟؟

اهم اهم اهم اهم شي ... انه من اول ما يطلع البيبي ... كل ما يصيح يبي يشرب ... اتحطينه على صدرج علشان يدر الحليب ... وراح اتكلم عن در الحليب في النقطة الياية ...

اليوم الأول ماكو حليب .. الاثني ممكن يبدي يطلع الحليب ... انا شخصيا ما طلع الحليب الا ثالث يوم بالليل ... شلون عرفت؟؟؟

فجأة ... قعدت من النوم ولا ما شاء الله ولا قوة الا بالله ... صدري مشدوووود حيل ... وحاااار ... اخترعت ... دقيت على النرس ... مخترعة ... شنو هذا قالت لي ... هذا الحليب ... ويابت لي جهاز الشفط وخخففنا من الحليب شوي علشان اقدر احط صدري داخل حلج بنتي ... وجذذي كانت البداية السعيدة

الرضاعة ... مصدرها الأساسي المخ ... وجهازها الصدر

مع الحمل يبدي الجسم يتهيأ للرضاعة .... علشان جذي يزيد مخزون الدهون عند الأم ... خصوصا عند الصدر والحوض يا فرحتنا هاا؟؟

المهم ... الدهون الزايدة ضرورية لإنتاج الحليب ....

... المخ هو المنظم لإنتاج الحليب ... شلوووون؟؟؟

لما البيبي يطلع ... وينحط على صدر الأم ... في مجسات تشتغل من فم الطفل ... موجودة في منطقة الهالة ... ترسل رسالة إلى المخ ... اتقوله في بيبي قاعد يرضع ... اول يوم المخ يسجل شكثر البيبي شرب .. ثاني يوم ... اتلاقين الصدر انملا في نفس الوقت ... ويوم بعد يوم المخ يغير من تركيبة الحليب لتتناسب مع عمر الطفل واحتياجاته ... يعني الحليب اللي يطلع من صدرج وبيبيج عمره شهر غير في تركيبته عن الحليب اللي يطلع وعمر البيبي 4 شهور ... سبحان الله ...

وكل ما كبر البيبي .. المخ يسجل .. اليوم البيبي شرب الصدر كله .. يعني باجر احتاج انتج كمية أكبر ... علشان البيبي يحتاج حليب أكثر .. سبحان الله كل هذا يصير واحنا ما ندري

المهم ... لما الام اتكون مو مرتاحة من الرضاعة ... اتهقين المخ راح يرسل رسالة لأنتاج الحليب؟؟ اكيد عرفتي انه لأ ... علشان جذي ممكن الألم أثناء الرضاعة (الألم غير الطبيعي طبعا) يخلي الحليب يقل ...

ولما اتيين في النهاية تفطمين البيبي على مراحل ... لما البيبي اليوم ما يشرب حليبته في موعدها ... سبحان الله ... ثاني يوم الصدر ما ينترس مثل اليوم اللي قبل ...

لهذا السبب انقول ... في المستشفى لا تخلون أحد يعطي البيبي حليب صناعي ... خليه دايما من صدرج ... وعقب دايما من صدرج ... من اتدخلين الرضعة تتخربط الحسبة ولا ماي عقب .. ولا شاي اعشاب ... لأن معدة البيبي صغيرة وممكن شربة ماي ولا شربة اعشاب تشبعه ويروح عليج موعد الرضعة ...

سبحان الله الرضاعة ميزان حساس ... نظام رب العالمين ...زاد الطلب ... زاد الإنتاج ... قل الطلب ... قل الإنتاج ...

من اهم الأخطاء الشائعة في التطبيق .. نظام 10 دقايق على الصدر اليمين و10 دقايق على الصدر اليسار ... ويالله ... خلصنا ... خطأ

الحليب يطلع على مراحل ... وبحطلكم صورة الحين توريكم الحليب اول ما يطلع شلون شكله وعقب شلون يصير شكله ...

الحليب يطلع على 3 مراحل:

1. الحليب الخفيف : وهو حليب يتكون اغلبه من الماء ... يطلع اول شي علشان يروي عطش البيبي ... سبحان الله ... علشان جذي ما يحتاج البيبي اللي يرضع من امه ماي ... عكس البيبي اللي يشرب حليب صناعي ...

2. الحليب العادي: هو الحليب اللي فيه المواد الغذائية اللي يحتاجها الجسم ... ووقت الشفط يبين لونه ابيض عادي ... يطلع فترة ...

3. الحليب الدسم: وهذا الحليب اللي يشبع البيبي ... ويكون لنوه مصوفر شوية ... واذا خزنتي الحليب في الثلاجة بتشوفين طبقة دهنية تكونت فيه


اذا وانتي اترضعين حولتي على الصدر الثاني خلال المرحلة الأولى أو الثانية يعني البيبي ما شبع ... بس عادة لما يوصل للمرحلة الثالثة .. اللي اهي بعد حوالي 20-30 دقيقة من بدء الحليب ... راح يشبع البيبي ويصبر بين رضعة والثانية ... سبحان الله

هذا لنك عن الحليب اللبي .. الأصفر اللي اول ما يطلع بعد الولادة ... ويوريج انه ممكن يطلع بالوان مختلفة

ترى انا قاعدة اتعلم وياكم

[COLOR=#cc3366]http://www.breastfeeding.com/helpme/...colostrum.html

سبحان الله ... وهذا لنك ثاني عن طريقة شرب الحليب ... شلون الشفطات السريعة اللي أول شي ... وشلون الشفطات البطيئة اللي عقب ... سبحانه من فطر هالمخلوق الصغير على هالشي

http://www.breastfeeding.com/helpme/...ive_sucks.html

من الأشياء اللي بتواجهج وانتي ترضعين سالفة:

حليبج ما يشبع البيبي ....

عفية بالله هذا منطق؟؟؟ شلون الله سبحانه وتعالى يسوي نظام متكامل لتغذية الطفل ... بعدين يطلع ما يشبع؟؟

اذا البيبي مو قاعد يشبع معناته في شي غلط قاعد يصير ... والأغلب إنه مو قاعد يشبع من الرضاعة لأنه ينام وما اتقعدينه فبالتالي كل شوي يشرب شوية .. ينام ... يقعد بعد شوي يوعان ... وترجعين اترضعينه ... ينام ... يقعد .. بعد شوية هم يوعان ... يعني حلقة مفرغة ... الحل انه يقعد ، يشرب رضعته كاملة 30-45 دقيقة بعدين ... ينام ... راح ينام على ألأقل ساعتين إلى 3

على فكرة ... من فوائد الرضاعة الطبيعية انها تعلم البيبي متى شبع يوقف ... الممية اتخليج اتحاتين ... ما شرب ... لازم يخلص الكمية ... دق دق دق ... خل يشرب حليبته ... جك بم ولا الياهل قاعد ياخذ أكثر من حاجته ... وتعود على ترسة المعدة أكثر من حاجته

نا بصراحة كنت ابجي بالنفاس من كثر ما حنوا علي بنتج ما تشبع .,.. شربيها حليب صناعي ... حرام عليج ...

تخيلوا ... حرام علي اني ما اعطيها صناعي!!! ولما دقيت على الدكتور ابجي ... جان يقول لي .. ما عليج منهم ... طالما قاعدة تكبر معناته اللي تسوينه صح ...


وهم صار لي موقف غريب ... بعد طلعتي من النفاس ... قلت خل اجرب الحليب الصناعي ... اول مرة .. ما انتبهت ... بس ثاني مرة ... ول بنتي حبيبتي ويها قب كله حبوب حمرة صغيرة ... لما سألت الطبيب ... قال لي صار عندها حساسية من بروتين البقر اللي في الحليب ... يعني مممكن الحليب الصناعي يسبب حساسية ... ديروا بالكم ...


والبيبي اللي يشرب من حليب امه صح ... مو شرط يقعد كل ساعتين ثلاث علشان يشرب حليب ... ترى ممكن يطول شوية بين رضعة والثانية ... يعني السالفة مو ألارم ههههههههه

في شي ثاني ممكن نتكلم عنه ... شنو الأشيا اللي ممكن تساعدكم على الرضاعة؟؟؟

في حلمات بلاستيك شفافة ... تشبه الممية ... انا استعملتهم اول يومين علشان بنتي ما كانت اتعرف تمسك صدري عدل ... واتساعد الحلمة البلاستك ان الحلمة الطبيعية تاخذ شكل طوالي أكثر ... والله استعملتهم يومين والحمدلله كل شي صار زين

اشكثر اترضعين؟؟

بصراحة أنا قريت رايين ... أول واحد كل ساعتين في النهار وكل 4 ساعات بالليل ... والراي الثاني ... كل ما البيبي قام يبي يشرب حليب ... أنا اتبعت الراي الثاني ... يعني اذا بنتي نايمة ... خلال النهار ... ساعتين ونص ليه ثلاث ... ما راح اقعدها علشان ترضع ... لأنها اتكون شبعانة اصلا ... اذا ياعت بتقوم اتفج حلجها

واذا نايمة بالليل 5 ساعات .. هم ماني مقعدتها هههههههههههه

بس اول شهر راح اترضعون وايد خلال اليوم ... اريح شي ... صاح البيبي ، طلعي صدرج ... رضع ... لا تركضين المطبخ واتسوين رضعة .. واتجيكين الحرارة ... سهالات .. كل شي موجود وبالطريقة الصح ...

شلون تعرفين البيبي يوعان؟؟؟

في برنامج أوبرا من تقريبا سنتين كانت مستضيفة واحدة ادرست صياح البيبي ... وكل بجوة شنو تعني ... اكو انواع منها:

- آه آه ... هذي تعني ان فيه غازات ويبي يتجدى ...
- ناااه ناااه ... هذه المهمة ... يعني يوعان ههههههههه حبيبي يحط البيبي لسانه ابلهاته ويصرخ .... فتطلع فيها حرف النوون اول شي ...
- عاااه عاااه ... هذي بعد ما يبيلها ... بطني يعورني لحقوا علي ...

وترى البيبي ممكن يصيح لأن مل ويبي اتغيرين قعدته ولا اتفرين الكرسي ... راح الأم اتعرف كل بجوة شنة معناتها ...

طبعا أنا ركزت في ناه ناه هذي وطلعت صج ... وبعدين اتلاقين البيبي لما اتحطين صبعج يم حلجه يركض وراه ، ولا يحط ايده بحلجه ... هذا يعني انه يوعان ... لا تنطرينه يشرع حلجه ... اكو بيبيات ينهار لما يبجي ... وما اتلحقين عليه .. الأفضل انج اتلبين رغبة سمو البيبي قبل لا تتدهور الحالة وتتوهقين فيه ترى عادي اتصير هالسوالف ... أهم شي خلي أعصابج حديد

أمهات المستقبل ... أهم شي اتكونين In Control ... لأن انتي الأم ... لازم تتحكمين بالموقف ومو اتخلين الموقف يتحكم فيج ... اذا صاح البيبي ... اوقفي شوية ... شوفي شلون قاعد يصيح ... شنو نوع البجوة ... حاولي اتعرفين ليش يبجي ... واتصرفي على هالأساس ... لا تخترعين وتتلبكين ... ترى اهم انتف بس ما شاء الله ... ممكن يشيلج بصراخه ... وخصوصا عقب اول يومين ثلاثة ... فجأة يصير عنده شخصية ههههههههههه

اشلون اتعرفين البيبي شبع؟؟

في الرضاعة الطبيعية ما تقدرين اتقولين والله البيبي شرب 60 مل .. أكيد اتشبعه الرضعة ... لأ أكيد ما راح اتعرفين قياس الرضعة ... بس اذا انتي كل مرة شرب حليبته ... اتحسين صدرج فضى ... والله راح اتحسين فيه كان متروس وصار فاااااضي ... واذا نام البيبي عقب 5 دقايق من الرضعة اتقعدينه وتخلينه يكمل ويشبع ... ونام 2-4 ساعات .. يعني شرب حليبته وشبع ونام ...

في إشارة ثانية ... الخروج وانتوا بكرامة ... يصير سائل .. طبعا اول 3 ايام لونه اسود ويولع الجبد انصحج اتخلين المستشفى يبدلونه هههههه ، عقب يصير لونه اصفر ... طبعا انا اتكلم عن حليب الأم .... مثل لون ... آسفة على التشبيه ... المستردة ... وساعات يصير فيه مثل حبوب ... يعني ممكن يخرج 3-6 مرات في اليوم (هلا هلا بالحفاظات السنعة لأنه ممكن يخر)

وبعد؟؟ البيبي هم يبول ... فتعرفين انه شرب وشبع ومشى في جسمه وطلع بصورتين مختلفتين ... اذا حسيتي انه ما يطلعه بطنه ولا مو قاعد يبول ... على طول سالي دكتور ... لا تخافين ... ولا تستكتين ... شي مو فاهمته سالي عنه .. لأنج أول مرة اتصيرين ام

والشغلة اللي ما راح اقدر اعيد وازيد عليها كفاية ... اهيا:

خلي البيبي على صدر واحد لييييييييييييييييييييين يفضى تماما ... يعني حتى لو 45 دقيقة إلى ساعة ... شغلي التلفزيون ، ولا حطي مجلة يمج وقعدي تقري فيها .... على ما يخلص ... واذا خلص وللحين يوعان ... حطي على الصدر الثاني ...

بس لو سمحتي ... لو سمحتي ... مو 10 دقايق وتبدلين ... ولا 20 دقيقة وتبدلين ... ما في رقم محدد ... وخري البيبي ، وعصري صدرج (بس عصريه صح هههههههه) اذا للحين في حليب ... خليه يكمل عليه ... اذا قصرتي مدة الرضعة في كل صدر ... انت اتحدين من انتاج الحليب في كل صدر لهذي الكمية الصغيرة اللي تطلع بس خلال 10 دقايق مثلا ... وبعدين انقول ::


الحليب خلص ... ولا صدري نشف!!!!!!

وطبعا ... أهم شي شلون انعرف البيبي قاعد يشبع .... انه اتشوفينه يكبر ووزنه يزيد

على فكرة ... اول ما ينولد البيبي ... فلنفرض طلع وزنه 3.5 ... عقب يومين شي طبيعي ينزل وزنه ... ويصير ممكن 3.25 ... وبعدين يرجع يكبر مرة ثانية لا تخافين

السؤال المعتاد اشلون انزيد الحليب؟؟؟

فيه تكنيكس لزيادة الحليب ، منهم:

- مثل ما عرفنا من البداية ... انتاج الحليب في الصدر تعتمد على الطلب والسحب ... كل ما زاد الطلب .. يعني كل ما البيبي شرب أكثر ... يطلع حليب أكثر ...

- علشان البيبي يشرب حليب أكثر .. لازم يكون ماسك الصدر صح ... ايكون لسان البيبي تحت الحلمة والهالة .. وشفته اللي تحت نازلة بعد ليه تحت ... والمص اصلا يكون مريح وما يعورج صدرج ... واذا في عوار (ترى انا ما حسيت فيه) اهوا عوار الرحم يرجع ليه مكانه

- اذا البيبي مو قاعد يشرب وايد ... شفطي بعد ما البيبي يخلص علشان اتشجعين الإنتاج ههههههههه ... انا كنت ارضع من صدر واشفط من الثاني ... والرضعة اللي بعدها اعكس ... ارضع من الصدر اللي شفطت منه واشفط الصدر الثاني ... لين تضبط معاج الحسبة واتحسين صدرج قام يطلع حليب عدل ...

- اول يومين ثلاثة ... لا تسوين شي ... ريحي جسمج ... وبس رضعي البيبي كثر ما يبي ... شربي ماي وايد ... وارتااااااااااااحي ...

- علشان اتشجعين الإنتاج في الحالات الضرورية ... وبعكس الوضع العادي .. نقلي البيبي من صدر لي صدر ، على الاقل 3 مرات على كل صدر في الرضعة الواحدة ... كل ما البيبي فتر في الرضاعة ولا ريح شوي حطي على الصدر الثاني ... وبعدين بيريح مرة ثانية .. رديه على الأول ... وبعدين الثاني مرة ثانية ... ههههه خليج وراه علشان الصدر يتحفز ... الصدر اتييله اشارة ان اوه الرضعات ورا بعض خل اجهز نفسي هذي طبعا طريقة تحفيز للإنتاج مو الرضاعة الطبيعية

- لا تقدمين للبيبي مصاصة ولا ممية ... خلي كل احتياجات المص اللي يبيها البيبي ياخذها من صدرج ... وبعد لا تعطين البيبي أي شي ثاني ... لا ماي ولا شاي اعشاب ... ورجاءا البيبيات الصغار لا تعطونهم بسكوتة في الحليب لأن ممكن القمح في الحليب يسبب حساسية للطفل ... فماله داعي تبدون مشوار الحساسية امبجر ...

- شربي ماي لسد العطش ... واكلي اككل متوازن وصحي ... في فاكهة وخضرا وبروتينات ... المكسرات مفيدة ... اي نوع من المكسرات اتحبين ... وعلى فكرة .. الحليب ياخذ طعم اللي تاكلينه .. نفس ما ماي البيبي ياخذ طعم اللي تاكلونه ...

- الشفط ما يقلل الحليب ... الشفط مع الرضاعة ايساعد على زيادة إنتاج الحليب ..

- مدرات الحليب تشمل: الحلبة ... الشمر أو حبة الحلوة ... في ناس اتقول معجنات ... انا جربت المكسرات .. كنت آكل لوز (بيذان) ني مع كل رضعة ... الحلبة كنت اغليها مع الحليب واشربها ... وسفوف في شمر