lole alex;13934669:
بنات لو سمحتوا ممكن تقولولي على أنواع الميكب اللي ممكن اجيبها في جهازي والحاجات الضروريه
لأني كل اللي شايلها برفانات وكريمات يعني مكمله كام مجموعه البرفيوم بالكريم بتاعه
فكنت عايزة طبعا كريم أساس وبودر وبلاشر ومانيكير واي شادو
بالنسبة لكريم الأساس انا بستعمل جورداني درجة بورسلين وكنت عايزة أجيب أماندا حلو وله لأ وتغطيته كويسه وايه الدرجة المناسبة ليا منه اللي تكون زي بورسلين كده أو افتح درجة
والبلاشر والآيشادور عايزة اجيب العلبه بس عايزه نوع كويس وتقولولي سعره
والكونسيلر ؟؟؟
والمانيكير ؟؟؟
ممكن تقولولي النوع والسعر والمكان لو أمكن
لأني هنزل أشتري عالطول
بس لازم طبعا اعرف الميزانيه هتكون في حدود كام
ولو فيه حاجة ناقصة ياريت تقولهالي ربنا يكرمك
لأني مزنوقه جدا في الوقت وطبعا شايفين الجو عامل ازاي ومعنديش وقت عشان انزل اتفرج انهارده واشتري بكره
بوصي انا بستخدم منتجات جولدن روز فالوقت حالي وكويسة معايا خالص
عندي الفاونديشن السائل بستخدمه فالشتا عشان يكون مرطب في عامل حماية من الشمس وتغطيته جميلة سعره في حدود حاجة و 70 وانا كنت بستخدم الدرجة بورسلين من جيورداني اوريفليم وكانت كويسة معايا والمقابل ليها في جولدن روز هي درجة رقم 23 لو انتي عايزة افتح يبقى شوفي 22 بس اختبري ال 23 الاول بردو زيادة تاكيد
وبما انك بتستخدمي جيورداني فا هقارنلك بينهم
التغطيه جولدن روز اعلى بمراحل .. الثبات جولدن روز اعلى من جيورداني كتير
الملمس الاتنين ناعمين جدا .. جولدن روز مقاوم للمايه يعني بخرج بيه فالشتا مش بيروح ولا بيسيح
الكونسيلر بردو من جولدن روز ممتااااز الاستيك بتاعه بيعجبني جدا وسعره حوالي 20 ج وفي منه 5 درجات كنت جايبه الدرجة 3 ودي اغمق واحده
الايشادوهات هاتي علبة كبيرة اللي فيه 80 لون دي وريحي دماغك وهتلاقي ماركات كويسة جدا زي بريتتي وومن و ميس روز و ميس اني المهم جربي الخامة قبل ما تشتريها كل ما كانت طرية واللون يبان زاهي تبقى حلوة والسعر بيتراوح من 40-55 ج وفاصلي كويس خصوصا لو هتجبيها من الزنقة
المانيكيرات لو عايزاها نضيفه وتعيش وتستخدميها لاخر نقطة بدون ما تنشف يبقى اماندا او فلورمار او جوردانا الامريكي , السعر اماندا 12-14 حسب المكان
فلورمار 14 وجوردانا 16 جنية .. وانا بفضل اماندا عليهم لان فرشتها حلوة اوي ولمعتها جميلة بس ميمنعش ان جوردانا ممتازة وفلورمار كمان بس انا عجبتني فرشة اماندا اكتر
اقلام الكحل لو مكنتيش جبتيها هاتي من اوريفليم الشهر دا نازل واحد وعليه واحد متفوتيش الاسود والاخضر والازرق والموف حلوين خالص
الماسكرا لو قدرتي تجيبي من جولدن روز المزدوجة يبقى ممتااااااز وسعرها مابين 33-35 ج
البودره انا نادر لما بستخدم بودره ومش عندي الا اللوس بودر من اوريفليم اسمها اير سوفت ودي نازلة الشهر دا .. حلوة خالص وفي بنات شكرت اكتر في بتاعة جولدن روز بس فعلا مش جربتها على وشي عشان احكم عليها لكن لما عملتلها تست على ايدي محستش بفرق بينها وبين اوريفليم والسعر بردو بيتراوح بين 40 - 50 ج
اقلام تحديد الشفايف من ايفون او اوريفليم حلوة
واقلام الكحل لو في لون مش لقياه في اوريفليم وعايزاه من برا يبقى هاتي من جوردانا الامريكي عندهم الوان جميلة جبت اللون الروز الفاااااااتح يعني تقدري تقولي ابيض بحطه جوا العين لونه جميل وبيدي نور ووسع تحفة بجد وسعره 25 ج ولو الميزانية تسمح يبقى انقلي على برجوا وسعره 45 ج
الجلوسات فلورمار روووووعة وجولدن روز بردو رووووعة والسعر 35 ج للواحد عندي منهم وحبيت فلورمار اكتر لان لونه اقوى
الروج ايفون الترا كلر ريتش احلى من جولدن روز عن تجربة للاتنين
وباور شاين من اوريفليم يخبل نعومة ولمعة كريستالي تجنن
البلاشر هاتي ماركة لودنمي جميل جدا وسعره مابين 7 - 10 ج
مزيل مكياج البشرة (( لوشن )) يبئى جارنييه الاخضر وسعره 15 ج
مزيل مكياج العيون (( سائل )) يبئى جارنييه الاخضر بردو وسعره 15 ج
الاتنين دول تحففففففففففففففة اللوشن بيشيل المكياج من لمسة واحده بدون حك ولا فرك
السائل بئة روعة من هنا لبوكرا لو ماسكرا ووتر بروف هيطلعها بدون ما تجهدي عنيكي والاحلى ان مش بيحرق العين تماما انا بشيل بيه الكحل من جوا عيني وما شاءالله ولا الهوا
الاماكن بئه
جولدن روز هتلاقيها اما في محل ريتشي ريتشي في الديب مول ... اوو بلبل حيران قالت انها جابتها من صيدلية اسمها رشدي في رشدي
فلورمار هتلاقيها اما فالزنقة في كذا محل حاطت الاستاند بتاعها او في محل ريتشي ريتشي فالديب مول او في كارفور فالممر اللي بين المحلات هتلاقي جزء مكتوب عليه فلورمار ودا اسعاره زي برا بالظبط يعني شوفت الجلوس فالزنقة ب 35 وجبته من كارفور ب 35 بردو
ماركة بلاشرات لودنمي و الايشادوهات العلب الكبيرة عليكي وعلى زنقة الستات
جوردانا الامريكي فالزنقة بردو .. في محل اسمه العالمية جمب فؤاد بتاع الدهب دا عنده فلورمار وجوردانا وبرجوا كله اوريجينال اصلي وبالاضافة لاماندا
اماندا هتلاقيها فالزنقة .. يعني انتي لو روحتي الزنقة هتخلصي ميك اب الالوان كله من كحل و بلاشرات وايشادوهات ومانيكيرات وكمان لو عايزه مستحضرات عناية بالبشرة والشعر شابوهات وغسولات وشاورات كده يعني هتلاقيها هناك وبسعر احلى من برا يعني مثلا مزيل جارنييه السائل موجود في كل مكان ب 15 انا جبته من هناك ب 12 و شامبو جي كازانوفا ب 15 وطالع هناك جبته ب 12 وهكذا في كل الحجات لان المحلات دي بتبيع القطاعي بسعر شبه الجملة
انما ميك اب الاساس من بودره وفاونديشن وماسكرا يبقى مكان يكون فيه ستاند جولدن روز
وجربي جلوسات فلورمار هتعجبك اوي
طبعا منتجات ايفون واوريفليم معروف مكانهم :D
انا كده خلصت لو عندك سؤال عن حاجة او عايزة تشوفي صورة حاجة بلغيني لان كل الحجات الفوق دي عندي وممكن اصورلك اللي عايزاه F:F:
lole alex;13935035:
بنات من فضلكم كنت عايزة أعرف نوع استشوار كويس
انا مش اعرف اي ماركات فالاستشوارات لان مش جربت بس اسمع ان براون كويس
بس عندي البيبي ليس st0 وممتازة جدا وبتنجز بسرعة