قبل اسبوع من الولادة جاني لم منتظم يروح ويجي كل 3 دقايق بس الألم كان محتمل ، وكنت انتظر اني اشوف شئ يدل على ولادة ممثل افرازات مخاطية او دم بس ما شفت فقلت اكيد مقلب من مقالب الطلق الكاذب ونمت ومن قعدت من النوم ولا كأن صايدني الم كلش ملش ما فيني شئ
وبعد اسبوع بالضبط من هاي الموقف كان يوم العيد يوم الاربعاء ما فيني اي بوادر كلش لا وجع ولا اي شئ رحت جدحفص الظهر لتخطيط وكانت الساعة 2 واشوي وانصدمت بالسستر تقول لي تعالي الساعة 4 لآن التخطيط يبدا من 8 الصبح الى 12 الظهر
ومن 4 العصر الى 8 بالليل واني بطلع من المستشفى شفت جارة بيت عمي جايبين بتهم تولد وقعدت وسولفت اشوي وياهم ورجعت الشقة وركبت 3 طابق وطلعت روحي على ما وصلت الشقة وقمت احوس اشوي وسبحت بناتي وشفت الساعة قريب بتصير 4 قعدت زوجي من النوم قلت ليه قوم ودني التخطيط ابغي اصير اول وحدة ما احب انتظر دوري ما قدر يقوم من النوم فأخذت السيارة ورحت ابروحي وما فيني اي بوادر ورحت وسويت التخطيط وطلع اوكي وما بين اي طلق واني طالعة شفت جارتنا سألتها عن بتها تقول للحين ما ولدت ودعت لي تقول يارب ان شاء الله نص الليل يودونش المستشفى وان اقول ليها الله كريم لكن في خاطري اقول امش بوزي لو ولدت الليلة واني طالعة من المستشفى اتصلت فيني بنت اختي تبغي تجي تعايد فيني اهي ويا خطيبها وعلى ما اوصل للشقة وصلوا معاي بنفس الوقت سلمت عليهم وقلت ليهم اني بتقدم فوق اسوي طريق ليكم واول مرة بحياتي كلها اركب ادرج بشكل سريع اتخيلوا الوضع ما كنت ابغي يشوفني خطيب بنت اختي واني انافخ على الدرج فركبت بسرعة ودخلتهم المجلس ورحت قعدت زوجي من النوم وقعدوا ويانا بس نص ساعة واستأذنوا .. مستعجلين خبركم معاريس جدد الله يهنيهم ،، المهم لاحظوا للحين ما في بوادر أذن وصلينا وطلعت ويا الجهال عشان بنرمي الضحايا وبنروح نتعشى بالحديقة ويا الأهل كلهم لاحظوا اني نزلت من الدرج للمرة الثالثة وعلى فترات متقاربة وصلنا الحديقة وحطينا العشى وقام زوجي راح يتمشى اشوي ويا زوج اختي حتى اقول ليه المفروض تمشي وياي قال لي عندي سالفه وياه بخلصها وبجي اتمشى وياش واني كنت اسولف واضحك ويا الجماعة وخواتي ولا فيني اي ذرة ألم المهم كلها نص ساعة وجه زوجي يقول لي
قومي خل نتمشى توني واقفه الا احس سيلان على فخذي ورطوبة شكيت بالموضوع قلت يجوز عرق او منكت علي ماي او عصير من الجهال وما حسيت ورديت وقفت ونزلت مني كمية كبيرة من الماي الدافي اهني قلبي بدأ يدق قلت فشيلة مو حزه ولادة وانا قاعدة بمكان عام ورديت قعدت من الفشيلة طالعت اختي وقلت ليها روحي اتمشي ويا زوجش ما ابغي يحس بشئ والجهالوا خليناهم يروحون يلعبون بالالعاب ظليت ويا اختي العودة وزوجي يسألني وش صاير اقول ليه ينزل على ماي ما صدقني بالبداية ولا استوعب مسكين المهم خليت زوجي يكمل القعدة بالحديقة ورحت الشقة اني واختي العودة وبناتها وطول الطريق اختي مو عارفة تسوق اني اضحك عيها اقول ليها قومي بسوق عنش لان ما فيني اي وجع دخلت الشقة وسيدة الحمام ونزلت علي كمية كبيرة من الماي حسيت ان نص بطني هفت بس غريبة ما في الم كل مرة تجيني تقلصات وبعدين ينزل على الماي هالمرة ماي بدون الم رحت وسبحت بماي دافي قلت خل يجيني الطلق ويحمى على لكن ما ي فايدة حسيت جسمي فرش ومصحصحة حدي ومسكينه اختي قرت لي حديت الكساء وسورة مريم والزلزله ولا في فايدة يا صخر ما يهزك ريح المهم تالي قلت لأختي قومي روحي بيتكم واذا صادني شي بتصل فيش دام ان زوجي وصل من الحديقة خلاص لا تخافيني اكو وياي وحسيت روحي تعبانه بس ابغي انام ونمت الساعة 11 وقعدت على صوت التلفون 12 ونص اختي متهوسه علي لكن ما في الم ورحت الله يعزكم الحمام ونز على بعد كمية ماي هني بدأ الوسواس وياي وظليت افرفر بالمنتديات اشوف وش سالفة الماي اللي نزل بدون طلق وخفت اكثر لمن شفت الردود وصبرت روحي لين صارت الساعة 3 ونص الفجر ورحت السلمانية كان الوضع جدا هادئ بالمستشفى وعطيتها الكارد وقلت يها نازل مني ماي وفحصتني تقول لي هاي ماي البيبي وقالت لي متوسعة 3 سانتي واني اقول معقوله بدون الم يالله باقي 7 سانتي وافتك وركبوني غرفة الولادة وحطوا علي سيلان واني كل ساعة اخبرهم ابغي اشوف زوجي لين ما جه لي غرفة الولادة وقلت ليه ابغي التلفون خله وياي وانت روح للجهال شكلي مطوله ومسكين طردوه من الغرفه وجت الدكتورة وفحصتني مرة ثانية تقول لي 3 سانتي بس مو مال ولادة تقول هاي التوسع لأنش والده من قبل فطبيعي الرحم يكون فاتح عندي وصادني حاله احباط الساعة 6 ونص تبدل الشفت وجوا دكاترة غير وكل دكتورة تسألني ما في الم اقول ليهم لا لا استمليت من زود من يسألوني واني نفس الجواب بس كتبت لي الدكتورة على مضاد حطوه لي في السيلان لان الماي قل واجد عن البيبي واهني انحبست كل ساعة ابغي اروح الحمام بالغصب يالله يخلوني اروح المهم جت لي الدكتورة الساعة 9 الصبح واني واصله حدي ومعصبة قلت ليها اني جاية ليكم من الفجر توقعت بتسون لي حل وبتحطون على طلق صناعي دام ما فيني طلق ما توقعت بس بتركبون علي سيلان وبتحبسوني وما بتخلوني اروح الحمام خليني اروح البيت لبناتي واول ما يجيني الطلق الطبيعي بجي ما رضت قالت لي الراس كلش تحت وممنوع تتحركين المهم كسرت خاطرها عفر قالت لي بعطيش فرصة لطلق الطبيعي للساعة 12 الظهر واذا ما في فايدة بحط عليش طلق صناعي وجت 12 ومحد عطاني وجه واني انادي الدكتورة لين جت لي دكتورة شفت اول ليل قعدت تطالع الملف ونادت السستر وقالت ليها حطوا عليها طلق اللحين البيبي نبضاته ضعيفه وحطوا على طلق الساعة وحدة الا ربع والحمدلله بدأ جسمي يتفاعل ويا الطلق لكن ببط شديد وبعد ساعة وصلت 5 سانتي وخلاص وقفت على 5 وبعد ساعة ونص جت الدكتورة تفحص وسوت توسعة لي واتذكرتش يابقايا وطلعت روحي وشفت ايدها كلها دم الله يغربلها وبعد اشوي وصلت 8 سانتي واني احس اني ابغي اولد وادفع بس البيبي ما ساعدني ما يدفع وياي لآن تعب مسكين وفي هالاثناء اتصلت لي امي من مكة وشلت التلفون واني اصيح واقول ليها شكلي بموت صكت التلفون وراحت اختي للشيخ عشان تخبره ان عندنا حالة ولادة متعسرة وطالبين الدعاء من الحجاج وقام الشيخ جزاه الله خيره ونادى بالمكرفون وسووا لي حملة دعاء وتوسل لتسهيل الولادة وامي مسكينه وقفت على مصلاها تصلي ركعتين لي وتتوسل بالله على عمري امي تالي الدكتورة شافت ان بطني منفوخ قالت لي مثانتش مليانه لازم نفضيها وجابوا الهوز وفضوا مثانتي وفعلا من شفطوا المثانة البول الله يعزكم بطحوني على جنب وصكوا ارجولي وقالوا لي عصري عشان تنفتحين 2 سانتي وتوصليني 10 وفعلا كلها جم عصرة وردوا قلبوني على ظهري وقالوا لي الراس بيطلع عصري بس اني راحت قوتي كلش وقالوا لي الجاهل نبضة بطئ بيموت واستجمعت قوتي وعصرت والدكتورة توسع فيني من تحت بيدها وسيدة سحبت راس حمود وما حارست الجسم يطلع دخلت ايدها وسحبت حمود وحسيت كأنها ساحبه مصاريني وسيدة قصت الحبل السري وركضت فيه واني ارتحت وسيده اتصلت لامي كانت توها رافعة راسها من سجدها الأخيرة وخبرتها اني ولدت بالسلامة وتالي اتصلت لزوجي لأن زوجي ما جه المستشفى قعدت ويا بناتي وتالي مسكين جه لي وجت اختي والحمدلله ما سووني جراحة وسيم بس من قوه الدفع ومن التوسعة انشقيت بس من الداخل وخيطتني غرزتين بس لكن اتأذيت من البواسير اخس من السيم وبعد فترة جابوا لي نور اعيوني حمود سامحوني طولت عليكم بس حبيت تعشون الاحداث وياي
نسيت اقول ليكم نزل على الماي بدون طلق الساعة 8 الليل يوم العيد وولدت يوم ثاني العيد المغرب الساعة خمس الا ربع
قصة ولادتي المتعبة بضياء عيني
أ
26-11-2010 | 09:06 AM
ا
26-11-2010 | 09:23 AM
الحمد لله عسلامتج وطلعتي من الشر
م
26-11-2010 | 09:30 AM
الحمد لله على سلامتك
~
26-11-2010 | 10:35 AM
الحمد لله على سلامتج عزيزتي يتربى بعزكم
قصتج حلوة لان كاتبة كل التفاصيل
قصتج حلوة لان كاتبة كل التفاصيل
س
26-11-2010 | 12:18 PM
مبروك ماجك والف الحمدلله على سلامتك...
ا
26-11-2010 | 12:19 PM
حمد الله على السلامة يا الم
وتستاهلين سلامة حمود
عقبالنا يا رب
وتستاهلين سلامة حمود
عقبالنا يا رب
ن
26-11-2010 | 12:26 PM
الحمدلله على سلامتج حبيبتي
الف مبرووك والله يخليه لكم ويتربى في عزكم ان شاء الله
الف مبرووك والله يخليه لكم ويتربى في عزكم ان شاء الله
د
26-11-2010 | 12:33 PM
مبرووووووووووك حبيبتي ويتربى ف عزكم...وعقبالي وكل محروم يارب
ا
26-11-2010 | 12:49 PM
لحمد الله على سلامتش \\ ويتربى في عزكم يااارب
ف
26-11-2010 | 01:40 PM
الحمدالله ع سسلامتش
وع سسسلامة حمـــــود
ربي يحفظهمم لشش ..
وع سسسلامة حمـــــود
ربي يحفظهمم لشش ..
ا
26-11-2010 | 01:42 PM
الحمدالله على السلاامه,, ومبروك ما جاش
ا
26-11-2010 | 01:59 PM
الف الحمدلله على سلامتش وسلامة البطل...
ويتربى حمادة في عزكم...
الله يخليه ليكم يارب..
تحياتي..
ويتربى حمادة في عزكم...
الله يخليه ليكم يارب..
تحياتي..
أ
26-11-2010 | 07:11 PM
تسلمون خواتي
ن
26-11-2010 | 08:05 PM
الحمدلله على سلامتج حبيبتي
الف مبرووك والله يخليه لكم ويتربى في عزكم ان شاء الله
الف مبرووك والله يخليه لكم ويتربى في عزكم ان شاء الله
أ
26-11-2010 | 09:57 PM
الحمد لله على سلامتك
r
26-11-2010 | 10:50 PM
الحمد لله على السلامة يتربى حمود بعزكم يا رب
&
27-11-2010 | 12:47 AM
الحمد لله على سلامتك
.
27-11-2010 | 12:59 AM
الحمد ع السلامه
S
27-11-2010 | 01:03 AM
ألف مبروووووووووك والحمدلله على سلامتك وسلامة حمود
يتربى بعزكم ياارب :083:
يتربى بعزكم ياارب :083:
س
27-11-2010 | 01:06 AM
الف مبروووك