هل انا على حق ام خطيبي؟

و عليكم السلام ...
بخير و انتي شخبارج ..
حبوبة لا تتحسسين من هالشي كل ريال يحب يفرض الشي الي يعجبه على شريكه حياته طبعا بتفاهم مو باسلوب ينفر الطرف الثاني منه ..
و انتي اكيد تعرفين طبعه احين لكم تقولين سنتين مع بعض فـ 100% تعرفين شيحب و ما يحب ..

يعني من ناحية اللبس يمكن فارض عليج شغلات انتي ما تحبين تلبسينها و مانعج من البس الي انتي معتاده عليه ..

قبل كل شي شوفي ليش يبيج ما تلبسين اللبس الفلاني .. و ليش العبايه ما يبي فيها هالشغلات ..

اهوه ريال و يعرف هالامور .. ما يبي فيج اشيه مفلته للنظر لغيره ..

يعني يمكن يبيج سمبل يحبج ببساطتج ..

يمكن انتي تحسينه انه يقيدج بامور انتي ما تحبين تسوينها بس لو تاخذينها من جانب ثاني بتشوفين العكس ..

هو لو ما يغار عليج كان ما قالج لا تلبسي هاللبس لا تخلي هالامور بالعباية ..

يعني ياخذ و يعطي معاج بالحجي طبعا لازم تقعدين معاه تشوفين ليش ما يحب و و ..

حتى ما تحسين ان يجبرج تسوين شي انتي مو مقتنعه منه بالحوار كلشي يوصلج لنتيجه ..

و بالاخير .. الله يوفقج ان شاء الله .. :)

انتي جربتي تاخذين رايه في الاغراض الي تشترينها ؟

لازم تجوفين شلي يحبه عليج من لباس و يفضله لطلعات و للبيت طبعا لج الحرية المطلقة
بس لازم تاخذين رايه بلبسج عباره اهوه اول شخص بيجوف شتلبسين و بيعطيج رايه بصراحه
انا خطيبي جذي ان اروح السوق وياه افتر على المحلات قبل لا اشتري الشي اخذ رايه ان عجبه الشي اخذه
عاد هني اهوه يتحمل الفرارة من محل لمحل عبارة اخذ الشي اكون انا معاه مقتنعين منه
من ناحية العبايات ان خاطري بشي تطريز معين اهوه ما يحبذ الالوان الملفته فاي شي بخاطري اسويه لون اسود و سلفر
يعني لكل شي حل ان كنتي على وفاق معاه
انا بالبداية كنت اتحسس من هالشي بس شف ت ان يبي مصلحتي و كنت اشاوره في كلشي و اهوه بعد ياخذ رايه ان نروح نتشرى ويا بعض

يعني جذي رايكم مادري اشوف الشي زياده عندي لانه عايشة في بيئة الرجل يعطي المراه الحرية المطلقة في كل شي او الله عطاني رجل يتكلم فيعني مادري احس مثل التحكم

مادري شقولج بس صعبه الانسان اللي مثل خطيبج ما يعجبه شي الله يعينيج يارب حاولي تعرفين شلون ذوقهم لان بعض الرياجيل ذوقهم صعب

غاليتي

ماعليه لو انك تحبينه سوي الي يبغاه

وحابه اقولك ان الرجل في الخطوبه يحكم يتحكم

لانه شي جديد عليه ويحب يحسسك انك مسؤله منه

بالعكس المفروض هالشي يبسطك انه حريص عليك

ومنتبه للبسك وذوقك

والله يوفقك

مشكوورين خواتي انه بجرب ان اسايرة في اللي يبيه

خذيه معج للمول...وريه شنو اللي يعجبج من ستايلات و الى آخره...و بعدين قولي له..الحين وريني او قول لي شنو اللي يعجبك و ترضاه من اللي نقيته او من المعروض و ما نقيته؟؟؟...ترى يمكن هو غيران عليج او حابج تلبسين ستايل معين بس ما يعرف يعبر صح..الرجاجيل ترى اسلوب التخاطب عندهم مو شي..تلقين نيته طيبة بس كلامه ينزل على القلب مثل الخروع ههههههههه...فحاولي تفهمينه و تتفهمينه فديتج :-)

هلا حبيبتي

بالنسبة للعباية ممكن يكون معاه حق بحجة انها ممكن تلفت النظر عاد ليش يتحكم بلبسج!؟ ما اعتقد اذا لبستي اي شي تحت العباية لأن ما راح يبين شي

انتي قعدي معاه سأليه ليش ما تبيني ألبس هاللبس .. يمكن عنده رأي فهاللبس ... نصيحة مني حاولي تسايرينه و تسوين اللي يبي لأن بعد فترة بيمل

الله يعينك ..

بس الافضل لك علشان تتجنبين المشاكل مع زوجك من أول حياتكم خلك على كلامه .. وحاولي تقنعي نفسك بالاشياء اللي يحبها .. لأنك اذا استمريتي على رأيك وتمسكتي فيه . . هالشئ ينفر الرجل من مرته .. لأنه يعتبر هالحركة منها " عنآد " ..!!!

مثل ما قالوا البنات اذا تحسين انه ما يبغاك تلبسين شي انتي تحسي انه عآدي .. تكلمي معاه بهدوء واستفسري عن السبب ..

وان شاءالله تتسهل أمورك .. وحطي في بالك .. ترى كل الرجال كذا .. يحبون يفرضون على حريمهم شي معين ويتحكمون فيهم ..

:)

حبيتي حاولي تلقي شي يعجبك ويعجبه
واهم شي لو ما يحبك مايغار عليك

الله يوفقك ويتمم عليك زواجك بكل خير..
غلاي.. لاتتضايقين .. هو توه على وجه زواج ..يعني اول امرأه تكون بحكمه
عشان كذا يحاول يتدخل بملابسك ..يفرض شخصيته في حياتك
انتي لاتعقدين الامور..ترى راس مالها لبس..وهو اولى في رضاه وطاعته بعد الله
لذلك الغيره ايام الخطوبه تلعب دور كبير .. وربي
لو كل مايقولك شي..تقولين له من عيوني..حاضر على امرك لو تبي اللبس لك
بشت لبسته .. وربي راح يخجل لأنه في هالحاله يبي يفرض سيطرته
يعني بيشوف مدى تقبلك له ولأوامره .. وانتي تعرفين الرجل مثل الطفل
طيعي شوره..وصدقيني راح يخجل في كل مره يأمرك فيها وبعدين بيقولك
سوي اللي تبين..وعلى راحتك ..
وطيعي شور اوخيتك باختصار ..وماراح تضيعين بإذن الله :)

المشكله هنا انه مقتنع بحقيقة ان له الحق ان يتحكم فيج
لازم تفهمينه انك بوضع و عمر انتي قراراتج تعود لج انتي
وانج مومتعوده على هالاسلوب من الحياه في التعامل بين المرأه والرجل

عادي
اصله بيتحكم سواء في بيت اهلك ولا في بيتك
يعني تعودي على طاعته من الان هذا لو تحبيه وتبغي تتطيعه