لمة الليبيات لشهر ذو الحجه1431 ه

والله يا ملوكه كلامك صح
لكن الصراحه بابا مافيشي الخلصه البايخه هادي
وموليه معادش نحب نسافر مع ماما وبابا من الدور الي يعيشوا فيه هههههههههههه.وديما خواتي يقولوا ياريت رجالتنا زي بابا

يارب الود مايرحل ولا الدنيا تفرقنا ولا ورد الهناء يدبل ونفقد ريحه حباينا
ان غابو عنااا نعاتبهم ونزود ملاماتنا نراسلهم ونخبرهم وانهم فرح دنيتنا
وان صدوااا عنا نعدرهم ونهديهم محبتنا ^_^

ننس .... كيف حالك .. وكيف حال بنوتك ..

ملوكة كنت نقرا في قصتك بالنسبة ليا مفروض ماتطلقش على موضوع تافه هكي
لان في بنات يعانو من رجالتهم احرف من هكي وفمهم ساكت في سبيل ماترجعش لي اماليها مطلقة وخايفة على صغاره
يعني كان طاحت في انسان ماعنداش اسلوب ولباقة في الحديت تطلق معقولة

هاااااااايات ياحلواات

دلوعة بيشو كيف حالك اليوم ماتتصوريش قداش نعزك

عروسة ليبيا عندها مشكلة في النت الباين .. لا اكثر ولا أقل وسلم الي طمني عليها ...

ملكه .. ممكن لان الاجانب حياتهم منظمه اكتر .. والضغوطات الحياتيه ...هي موجوده عندهم وعندنا لكن تختلف .. لكن والله انى نعرف نماذج .. ماشاء الله امتله للحياه الزوجيه .. وسعداء حتى بعد فتره من الزواج ..

بس نادر هالشي يمكن واحد في المية من باقي الشعب ... يعني مش عارفه كيف .. ليش بس ... مرات انقول ربي يجمعني بأيمن في اقرب وقت
ومرات انخاف وانحاول انأجل الموضوع باي طريقة ... خايفة لا يصير في حياتي ملل والكل يقولي ليش تجيبي في نكد .. ولما نطلع برا
نحب الزواج ونحب الكبل كيف يحبوا بعضهم ... ووو الخ ...

ملوكة والله عندك الحق اني عندي قناعة ان رجالتنا مايعرفوش يحبو الزواج عندهم استقرار اكتر منه حب ومشاعر..تلقي الراجل يتزوج يبي حاجات معينة من الزواج ومايخطرش على باله المراة شن تبي ..تلقيه بعد السنة الاولي ينسي الكلام الحلو ومايفكرش يقضي وقت مع مرته الا كان يساير فيها مش عارفة علاش رجالتنا هكي حاشا البعض بس

حاشا البعض من النادر جدا .. بس يلا الحمد لله احنا انديروا الي علينا وخلاص !! يعني المرا كل شي منها
التنظيف الحوش وتنظيف نفسها والاكل والحمل وووووووو .. ومع هدا مطلوب منا نكونوا علي سنقة عشرة
انشوف في الاجانب كيف تطلع المرا فيهم ... قسما بالله غوووووووووووولة .. مع هدا تشوفيه كيف فرحان بيها

ملكة في مملكته;13636470:
شوفوا ... القصه ان فيه زوز اتزوجوا زواج عيلة
المهم خلاصه الموضوع ان اهلها طلبو مؤخر 10000 جنيه موخر .. وعلي قولة بوها حبر علي ورق
ماعلينا ... تم وصار واتزوجوا !!!
يوم الدخول وهما خاشين للفندق ... قالها افتحي الدرج الاول .. حتلقي شيك بقيمة 10000 جنيه
يوم الي انقولوك خوديهم واطلعي اعرفي روحك طالق وطالق اكيد بسبب يعني ردي بالك تغلطي معاي لاني مش حنعطي فرصة
اول غلطة حنقولوك خوديهم واطلعي وقالها برضوا ان فيه زيه هالشيك في حوش لما انرووحوا تلقيه في درج الاول ......

يعني تخيلوا تبدوا حياتك بالتهديد مالبشي معني !!!
كيف شعوركم .. البنت توا تقول نبي نطلق ..

مفروض هي بي ذكائها تتغير من طبعه ومن تفكيره
وهو كان صريح معها من اول ** بعدين كم كان مهرها؟؟ لو ماخر10000

بس نحس هذا طبعه وتفكيره وهي مفروض تتغير منه لو تشتغل زي شغاله يعني راجل شنو يبي غير بيت نظيف ولبسه جاهز واكله يعني مهما كان مفروض مديره جدول تنظيف لي بيتها
وتكسب محبه زوجها ليها (وسنه اولي وتانيه كلها امتحانات ودروس للحياه الزوجيه)






بنسبه شربه ملفوف تعرفي ياريت نرجع وناكلها من تاني
اني نقصتني وكل نسمن شوي نديرها اسبوع
لكن كرهتها معاش حبيتها

كنت نفطر عصير وتفاحه والغدي شربه ملفوف وسلاطه
وكل مانجوع ناخد شريه للمده اسبوع نقصت 3 كيلوا تقريبا اول مره
والحق لا صار عندي هبوط ولا شي تاني

صح ممكن يا دلوعه .. .فكرتك منطقية . صحيتي علي الأهتمام ..

هاي لؤلؤة كيف حالك توا

حياة حلوة شربة المفلوف هادي جديد بطريقة حلوة .. جربيها وقولي قالت ملوكة هههه
حتي انا كرهتها بعد ما نقصت بيها فترة !! بس هادي غير

هنو الدلوعة حبيبتى و أحلى صاحبه لياااا عرفت علياااااااا فى اللمه اللى فاتت!!!!!!!!!!!
نعرف من جدييييييييييييد...
الأسم :- دلوعة أنوشى
العمر:- مواليد 85
معيده فى الجامعه وعندى إيفاد ومسافره بعد الفرح طووووووووووووول ان شاء الله:adore:
نحب التعاااارف واااااااااااااااااااااااااجد ويكون عندى أصدقااااااااء من جميع الأماكن:call:
نحب السفر موووووووووت ومدمنة أنترنت ونمووووت فى الألكترونات يعنى ( كاميرات موبايلات وما إلى ذلك) نحب الطرحااات الجديده فى كل شى...:thumbs_up:
وقااااااااااااااااااااااااااااااااااااااعده ندير فى قائمه ان شاء الله بداية بتاااات ههههههههه بس طبعا ملابس بس من غير عادات بنغاااازى لأنى مسافره طلعت منها ههههههههههه...:lol:
أه وعلى فكرة مصراتية الأصل بنغازية المنشأ والدراسه فى درنه وخطيبى من ضواحى درنه...:D

مفهمتش يا حياة حلوة .. كل مانسئل علي حاجة اتقوليلي .. علي ماتعودي راجلك ..
انا طبعا مش حنفهم شن اتقولي لين انجرب

بس الي فهمته ايمن يبينا انعيشوا زي كأن مخطوبين .. ميبيش جو اتزوجنا خلاص نموتوا
خاطري نفهم شن تقصدوا !!!
أيمن يقول ... توا نحبوا بعض لان البعد زايد الشوق
توا ترقدي علي صوتي بعدين بترقدي وانا بجنبك
وبكرة بتنوضي علي شكلي
وبعدو مش حنروح للغدي وتاكلي بروحك
وبعده نقولوك وتي روحك مسافرين يومين

الي فهمته ميبيش روتين ... وعلي اي اساس ميبيش روتين
وعلي اي اساس بنعوده ..

دلوعة انوشي اهلا وسهلا بيك نورتي اللمة احلي لهجة عندي الدراونة تعجب فيا هلبة وبعدها مصراته حتي هما عندهم لهجة حلوة وانتي ماشاء الله جمعيتهم الزوز

انا مصراتية ههههههههههههههههههههههه
نبي نعطيك كلمة انحبها
في مصراية يقولوا برقلي (( اشبحلي ))
فيكي حتي انا انحبك لانك اتحبي المصارته
مصراااااااااااااااااااااااااااااااااااااااااااااااااااااااااااااااتية يا مسمحني بيضاء والخلخال جرحني...

ملكه القصه اللى حكيتيها ... ممكن الراجل قاللها هكى ... يبى يورى لامالى البنت ان الزواج مش صفقه .. وفى نفس الوقتهو المفروض يتراجع عن اللى قاله لانه هكى حسسها كأنهم يلعبواااا فى لعبه .. لكن الخاسر هو اللى بياخذ 10000....ونحس ان كلمته اللى قالها هادى تبى شيخ يفتى فيها ... زى اللى يقوللها راجلها لو طلعتى من الحوش اعتبرى نفسك طالق

ملوكة شفت القصة لكن معقولة في عريس يوم دخلته يدير هكي
اينكد عليها وعليه!!! معناها هو اصلا مسبل عليها المفروض هيا ماقعدتلاش
من يومها اول يوم معاها ودار هكي امالا بعدين كيف؟ معروفة كيف اعطب
وبخصوص الرجالة بعد يتزوجوو اصلا هما هكي الرجالة الليبين مايحبوش ايبينوو
لولووو
ان شاءالله كل سنة وانتو مع بعض وربي يسعدكم ويرزقكم بيبي ايفرحكم
احكيلي على صبغة لوريال امتاع 10 دقايق

تشوفو في راغب علامة في ابشر قداااااااااااااااش جنتل الراجل هدا

حبيبة ايمن ربي يحفظهولك ايمن لكن نصيحة مني ماتصدقي شي من كلام الخطوبة لان الراجل يتغير هلبة بعد الزواج الرجالة زي الصغار يبدا يبي الحاجة ومتعلق بيها لما تبدا عنده يقل اهتمامه بيها تدريجيا وتبدا مسألة تعود..اني صارتلي صدمة من الواقع بعد الزواج خطيبي كان مدلعني هلبة واول الزواج استمر الوضع لكن مع الوقت كل شي يتغير حتي من ناحييتي اني اختلف كل شي على قبل الزواج يبي عقل كبير وقدرة على انك تتحملي وتسايري وتنسي وماتوقفيش على الكبيرة والصغيرةوتحبي روحك قبل ماتحبي راجلك..وربي يوفقك وتعيشي كيف ماتبي واحسن