هذي كل قصتي

السلام عليكم ورحمت الله وبركاته أنا كنت عضوه سابقه معكم بس من بعد ماحملت مادخلت النت لأني كنت خايفه على الجنين وعدت نفسي ماأدخله إلا بالأشهر الأخيره المهم حبيت اكتب لكم قصة أجهاضي لأني حابه افضفض لاغير أول ماتلقيت خبر حملي فرحت أكثير لأني كنت انتظر هالحمل بفارغ الصبر بشرت زوجي وكانت فرحته لاتوصف لما رحت لدكتوره كان عندي سبع أسابيع وشفت الكيس وقالت فيه جنين كان مثل الخيط ولحمد لله تطمنت وصرت أخذ حمض الفوليك وبعدها أخذت موعد بعد شهر وحصل عندي ظرف وفاة جدي وعدى موعدي ومارحت له وظليت فقط على حمض الفوليك بس كان بطني يكبر بسرعه والوحام ذبحني ولما كملت ١٤ اسبوع رحت لمستوصف أفتح ملف جديد وكان فيه دكتوره سعوديه متخصصه وأخذ فتح الملف وقت طويل شوي على بال ماسوت لي الهنديه تحاليل سريعه وكتبتها في الملف وسوت نسختين وخلت ملف عندها وملف معي وأرسلتني على الدكتوره لما شافتني اسألتني أنتي في أي شهر قلت لها في الثالث وقالت هل سبق وسويتي تحاليل قلت نعم في مستوصف خاص عملت جميع التحاليل وكل شي تمام قالت خليني اسويلك سونار وإعادة تحاليل واشوف قلت اوكيه استلقيت عالسرير وجت تسوي السونار أول ماحطت الجهاز قالت ؟؟؟؟؟؟ ويييييين يافلانه مافيك جنين بس كيس والله العظيم على قوة الخبر إلي صدمني كان اسلوب الدكتوره أكثر صدمه لي على طول قامت وتبعتها مثل الرجل الالي ومانطقت بكلمه وصارت تكلم النيرس إلي معاها في الغرفه مادري وش قالت لها أول ماجلست عالكرسي قالت لو أني مسويه لك سونار قبل لاأفتح ملف كان أفضل وصارت تتكلم عن الملف أنه جديد ونظامه أول مره يجيهم من الوزاره وله طريقه جديده وصرت أقول هذي وش فيها أنا في مصيبه وهذي متحسره على ملف وعلى طول قالت أنا بحولك على مستشفي الملك سعود وسوت التحويل وقالت أنا قد كتبت لك في الوصفه على حديد وكالسيوم قبل لأسوي السونار لك خلاص اصرفيهم واستفيدي منها إذا عملتي التنظيفات لاحظوا كل هذا وأنا ساكته مازلت في صدمه والله العظيم أني ماظلمت هالدكتوره ولا بكلمه وغلات بناتي ماكذبت عليها ولا بكلمه وهي دكتوره معروفه بس ما حبيت أكتب اسمها او اشوه سمعتها كنت اتمنى اسمع منها كلمة الله يعوض عليك بس للأسف ماسمعتها هل لان عندي بنتين ومو بكريه أو لان عيني مادمعت بس والله أنه قلبي هو إلي ينزف أنا ما أحب أبكي قدام أحد ابدا المهم طلعت وأنا في صمت على طول طلعت لزوجي وبناتي الاصغار إلي كانوا فرحانين بحملى والله ماهم دارين وش حمل بس يسمعون ابوهم ومتحمسين حق نونو جديد وانصدم زوجي من الخبر إلي ياالله وصلته له قال أرمي تحويلها مانبيلها مستشفي طلعت لمستشفي السعودي الألماني وفتحت لي ملف مراجعه ودخلت على الدكتوره إيمان وماقلت لها شي قلت بس أبي اسوي سونار اطمن على الجنين قالت اوكيه كان زوجي معي سوت سونار وصارت تحوس وتحوس وتسأل أسأله كثيره عرفت أنه فعلا كيس من غير جنين والدكتوره ماهي قادره توصل لي الخبر وقالت روحي أشربي ماء وأرجعي قلت أكيد طلع مافيه جنين قالت وش عرفك قلت لها أنا سويت سونار وجيت هنا اتأكد بس قالت أحمدي ربك وربنا يعوض عليك كأن الروح ردت لي حسيت أنها متعاطفه معي وقمه في الأسلوب والتعامل حولتني على دكتوره زينب علشان تعيد السونار مره ثانيه وعادته لي بدون ماتتكلم وقالت تعالي معي رحت معها عند الدكتوره أيمان مره ثانيه صارت توشوش لدكتوره إيمان على بالها ماعندي خلفيه عن الموضوع ولما عرفت صارت كمان هي توسيني وبعدها حسيت فعلا أني انسانه لي مشاعروأحاسيس وسوت تحاليل لهرمون الحمل وحصلت النسبه منخفضه وقررت لي تنويم وصمت الساعه ١٢في الليل إلي الساعه ١٢ الظهر ودخلوني العمليات والدكتوره أيمان شخصيا هي إلي سوت التنظيفات ورجعوني الساعه٣ العصر لغرفتي والحمدلله كنت بخير وكان تعامل الدكتورات والممرضات قمة الروعه عكس ماكنت اسمع حبيت أفضفض لكم إلي في قلبي وادعولي ربي يعوضني خير وابرك وحبيت اسأل إلي سبق واجهضت متى حصل لها حمل مرة أخره لأني طلعت من العمليات وأنا نظيفه مافيني ولا نقطه دم وقالت الدكتوره بعد اسبوع تقدري تنامي مع زوجك لأنك مو بحكم النفاس واليوم كملت عشرين يوم واسأل الله يرزقني بالحمل السليم ويرزق كل محرومه يارب