التجمع الثاني لحوامل شهر فبراير ((2))

مساء الخير للكل
كيفكم ؟ وكيف العيد ويااااكم
حبيت أطل عليكم من زمان عنكم !!


.
.


ليان
الحمد لله ع سلامتك
والله يعوضك خير يارب

مرحبببن \\
جماال الزهره \\ الله يساعدش اكرة شي اذا بس جهال وصبيان بعد وانتون بس ثنتين ههه
لو اني منش خلهم يولون ولا اوديهم مكان \\ السياقه تتعب عدل .. اني من حملت لو بس اروح بيت ابويي احس ضهري
يالمني \\

ام ملاك \\ حليو اسم ملاك \\ ان شاء الله بنوته وتسمينها ملاك هههه ويتحقق حلمش ..

نوادر \\ اهلين خيوو \\ امس كنت في بيت ابويي متجمعين العائله كلها وقعدنا في الحوش نشوي تكة ودجاج استانسنا
واخيرا حسيت بالعيد ههههه

احاول اني ما اكل كل يوم ولا اكل واجد مافيني شده على السكر صراحه \\ بكبري حزبانه للموعد .. باقي واجد عليه
بس الايام تمشي بسرعه اغمض وافتح بشوف جى الموعد ...

ما ادري اذا نسيت احد الذاكرة مش ولا بــد !!

هااااااااااااااي كروشـــات ,,
شخباركم ,, وينكم ؟؟
شكلكم بعدكم مشغولين ويه العيــد
أحس من أمس لليوم ما زادوا إلا صفحتين بس

يالله خلونـــا نتشطر ونفتح التجمع الثالث

ضحكة كذزوووووبة اني بخير الله يسلمك وعلى التجهيزات انا عن نفسي ماراح اكثر راح اخذ اشياء بسيطة جدا والله يعين

رسيل انا بخير وانتي كيفك وكيف الحلوة ان شاء الله استانست

الفرقد عليكم بالف عافية عشان كذا مابينتي واحسن ليش غيرتي جو والعيد حلاته بالمة الاهل

جمال انا بخير الله يسلمك وين وصلتوا حق زواج اختك ان شاء الله خلصتو واذا على التجمعات ماشاء الله اغلب التجمعات اكثر منا ونحن بعدنا نتوحم خخخخخ

ايه والله يا ندوره
التجمعات البقيه سابقينـــا بواااجد
حتى اللي بعدنــا بالأشهر ماشاء الله عليهم هابين ريح , واحنـــا خخخخخخخخخخخ
مثل ما قلتين بعدنــا نتوحم
وبالنسبة لتجهيزاتنــا الحمد لله كل الأمور تمام

قاعده أطالع اميمه في دار الأيتام
صايمـه الليلة عشان بكره تحليل السكر ,, وأحس روحي من الحين راسي يفتــر من الجوع
الله يعين بكره , والله شايه همه
تحليل السكر بحملي بولدي لعوزنــي ,,, اتذكر اني طول ذاك اليوم كنت دايخه و ما أقوم من مكاني
مالي خلق ولا شــي ,, ولاأكلت ولا شي حتى بعد التحليل من اللوعه والدوخــه
وحتى الترجيع رجعت :$

جمال الزهره \\ الله يكون في عونش \\ اني بعد حزبانه والسبه الصيام
اني ما اتعشى الا متاخر وحتى لو تعشيت من وقت \\ احس روحي بعد بجوع

متى اخلص منه وافتك

فرقوده : أحس روحي فيني شي غلط لأني قاعده وما آكل
وخايفه اغلط وآكل ,, لأي الصراحه صايره واجد آكل ونفسيتي دائماً مفتوحـه للأكل

شكلي بقوم أنــام
احس ظهري يألمنــي ,, وهدوي مصدعنــي من التحجج
بنيمه وبنـــام

سيي يوووو كروشــات
وتصبحون على ألف خيــــــــــــــر

ههههههههههه \\ ايي تدرين اني بعد من زادت الاشهر احس نفسيتي انفتحت ازيد من الاشهر الا طافت

وحده قالت ليي اليش يقولون اليش تصومين قبل بيوم \\ كلش عادي ما يحتاج اهي ماقاالو اليها تصوم وسوتة عادي

وانتي من اهل الخـــيير

شخباركم بنات
ويش امسويين

ضحكة كذوبة اللسته مالتش اوكي وتمام التمام بس احس فيها اشيا ما احس بناخذها يعني الغسالة الصغيره احس ما اليها داعيونسيت الباقي ياربي ما عندي مخ الى التركيز وصايره ما اقبض شي عندي ضعف ذاكره بس هذا الي اقدر اعلق عليه

اني للحين ما رحت نكست فما اقدر افيدش
اني اخذت اغراض من مذركير ورعاية الامومه في مجمع الرفاع وبعد كم مكان عاديين بس عجبوني الاغراض واخذتهم وبكمل ان شاء الله على شهر 12 الباقي بس مو من اهني بروح السعوديه لان الخيارات اكثر

وبالنسبة لطريقة تنزيل الصور تنزلينهم من الكيمرا الى الجهاز واهني موقع عروس فوق عند لوحة التحكم فيه موقع رفع الصور على عروس ترفعينهم وتنزلينهم بالرابط المباشر اهني في الرد وبينزلون وان شاء الله نشوف اغراض البيبي


فرقدوده عليكم بالعافيه المشويات وان شاء الله دوم هالوناسه

باقي البنات ميقات خرفت نست ويش كنتوا كاتبين فما تدري ويش ترد عليكم اسمحوا اليها

الله يعين الذاكرة ههههه على نهاية الاشهر يبين ليي حتى بننسى اسامينا ههههه

الله يسهل على الجميع يااارب ..!!

تصبحون على خــــير واشوفكم باجر بأذن الله !!

شخباااركم صبايا
ندورة :D باقي 3 أشهر و بنشوف يطلع ولد لو بنت خخخ
ضحكة, تصدقين عاد زوجة أخوي في بناتها الثنتين أخذت كله نيوبورن و 0-3 و جابتهم صغنونيييين يعني يضيعون في الثياب، عاد لما حملت بالثالثة أخذت اللي أصغر من نيوبورن جان تجيبها ما شاء الله طويلة و دخدوخة :D و ما لبستها الثياب حتى شهر هههه، و اللستة تمام خيو بس أني نسيت أعلق عليها، بالعكس ذكرتيني بأشياء ناستنها في لستتي :thumbs_up:
فرقودة, إن شاء الله :) و عليكم بالعافية المشاوي
ميقات, شخبارش ويش مسوية
عسى بس ما نسيت أرد على أحد

كروشات فيني الصيحة :'( ،بقدر ما أني فرحانة إنّي بتحول في شقتي الجديدة بقدر ما أني زعلانة لأني بغيب عنكم و ما أدري لمتى :'( لأن للحين ما طلبنا تحويل للنت:thumbs_down: يعني آخر شي بكرة أشوفكم
سامحوني و ابروا ذمتي يمكن زعلت أحد أو شي

هلا ام ملاك شخبارش

عاد بنفتقدش عدل وحولوا النت بسرعه علشان ما تغيبي عنا وايد

وانتي من اهله فرقوده

صباح الخير :)
توني قبل نص ساعه راجعه من المستشفى
سويت تحليل السكر ,, واحس جبدي لايعه وتعبانه :sick:
وخايفه آكل وأرجع :badly:
أكلتي من امس الغدا ,, والمغرب شربت عصير
يعني ما تعشيت
والحين ابي انام وولدي مطفشني :confused:

يتصفح الموضوع حالياً: 2 (2 من الأعضاء و 0 من الزوار) ‏هنوف المملكه, ‏طوق الزهور