أول مشاركة ليا في المنتدى..طبعا متابعة , متهيالي ناس كتير زيي لحد ما بتيجي اللحظة المناسبة للمشاركة..واهي جت
معلش هرغي شوية كتير عشان لازم تفهموا دماغي اللي مودياني في داهية:o
الحكاية ..
فستانين عاجبيني جدا و مختلفين عن بعض تماما وانا احترت بينهم وقربت يجيلي اكتئاب لان لازم اخد قراري بسرعة..فرحي ان شاء الله 12 نوفمبر الجاي
انا اصلا كنت مش حابة فكرة الايجار وكان فكرتي ان فستان بسيط وبتاعي احسن من انه ايجار ومش بتاعي وحد لبسه قبلي وهيلبسه بعدي وكده..الكلام ده في دماغي من زمان ومع ذلك لا دورت ولا فكرت و ناوية افصل مثلا او تفصيل وايجار اول لبسة هيتعمل امتى..لحد ما باقي على الفرح شهر وحسيت اني بستهبل ومش هلحق :biggrin: فقلت انزل اشوف المحلات والايجار وكده وفي الاول كنت متضايقة شوية من الفكرة بس دلوقت عادي..
المهم
اول فستان عجبني بعد شوية لف كان فستان منفوش شوية زي فساتين ديزني..عارفين الاستايل ده؟ انا اصلا نازلة ادور على حاجة سيمبل بجيبونة تل..هو ده من غير جيبونة اصلا ومفيش غير تطريز بسيط جدا على الصدر والوسط وشكله فعلا زي الأميرة:thumbs_up:
فكرة الفستان ده في منظره كده..بس الوسط اعلى شوية..يعني مش مكمل تجسيمة الوسط زي الصورة
كان معايا خطيبي( او جوزي يعني لاننا كاتبين كتابنا:) ) وعجبه جدا جدا عليا..كنت قلقانة من فكرة انه يبيني تخينة ..انا اصلا وزني 60 كيلو ..بس عقدة بقى..المهم شكله جميل وكنت فرحانة وانا لابساه..
تاني يوم بلف مع صاحبتي وانا اصلا خلاص الفستان ده دخل دماغي دخلت اتيليه صغير لقيت عندها فستان قريب منه جدا في كتالوج..نفس الاستايل..وهتجيبهولي جديد من المصنع في خلال ايام لو انا عايزاه وهلبسه اول واحدة..ومش هدفع اي حاجة غير لو خدته ولو مش اخته خلاص..تقريبا هيوصل 1000 جنيه لانه ما فيهوش شغل..زي الاولاني اللي في الاتيليه..طبعا عجبتني الفكرة جدا عشان عقدة الايجار دي
هو ده بس الصورة مش باينة
مش عارفة قلت اكمل لف..كان باقي اتيليه كويس لسة ما رحتوش..هناك بقى لقيت فستان قريب جدا جدا من الفستنان اللي كان نفسي افصله قبل ما اشوف الستايل المنفوش ده ..بس مكنش في وقت ولا حد موثوق فيه ينفذهولي..اول ما شفته اتشديتله وصممت اقيسه وشكله عليا جميل جدا وعجب صاحبتي موت والنهاردة خدت خطيبي_اللي كان متحمش جدا لمنفوش ده_ قالي تحفة وعجبه جدا مع اني ما قيستهوش تاني ..
انا كنت خلاص استقريت على المنفوش..بصراحة التاني عاجبني جدا عليا وديله تحفة _كان نفسي في فستان بديل_ بس لونه اوف وايت..عارفة انه شيك جدا بس انا بفضل الابيض..بحس له بهجة مش في اي لون تاني..
هو قريب من ده..
بس ديله اطول كتير وعليه فيونكات..ومش فيه الفناكيش اللي تحت دي..بس فيه حاجة تانية ظريفة برده
انا آسفة على الرغي بس بجد مش عارفة اتصرف ازاي..انا قلت لبتاعة الاتيليه تجيبلي الفستان..
التاني شيك جدا انا عارفة والاواني مبيني زي الاميرة وشكلة بنوتة خالص ..مش عارفة اخد قرار...
انا اسفة جدا على التطويل...بس محتارة جدا وزهقانة