السلام عليكم بنات
وعدتكم ان قريب بنزل تورته الشيكولاته
وانا جيت اوفي بوعدي :)
مقادير كيك الشيكولاته في طريقتين
الطريقة الاولى :
نفس مقادير كيكتي اللى تعرفوها من مواضيع التورته السابقة
7 بيضات
كوب ونصف سكر
كوب ونصف دقيق لكن المرة دي ننقص منهم معلقتين كبار ونضيف مكانهم معلقتين كبار كاكاو
وفانيليا
الطريقة التانيه :
ودي اللى انا عملتها
7 بيضات
كوب ونص سكر
2 كوب دقيق
باكوا شيكولاته 200 جرام (استخدمت شيكولاته بالحليب)
معلقة كبيرة زبدة
معلقتين فانيليا
ربع معلقة صغيرة قرفه
معلقة بيكنج بودر
خلط البيض مع السكر والفانيليا لمدة 5 دقايق ثم ضيفت الدقيق والبيكنج بودر والقرفه وخلط من تحت لفوق
قطعت الشيكولاته وسيحتها في حمام ميه وضفتلها الزبدة
وخلط
وضيفتها للخليط السابق ودخلتهم الفرن على درجة حرارة 170 لمدة 40 دقيقة
الاحسن نزين الكيك تاني يوم
قسمت الكيك وبفرشه وزعت سيرب ( شيره - عسل - محلول سكري )او حتى عصير اللى بيكون مع الفاكهة المعلبة
والحشو كان علبة كريمة خفق ضربتها كويس مع ربع كوب سكر ثم ضيفت لها معلقتين كبار نوتيله وقلبت برفق
وحشيت طبقات الكيك بالكريمة ورشه من البندق المجروش
وبعد كدة ظرف دريم ويب خفقته وغلفت بيه الكيك ومش مهم يكون مرتب لانه مش هيبان
هنبدا نجهز تغطيه الشيكولاته اللى اسمها (جناش)
عباره عن
نص كوب كريمة خفق
100 جرام شيكولاته طبخ
ومعلقتين كبار زبدة
معلقتين عسل ابيض
وممكن نضيف معلقة سكر كبيرة
الطريقة
نقطع الشيكولاته لقطع صغيرة
هنسخن الكريمة على النار ومعاها السكر وبعدين لما تبدا تغلي نضيفها للشيكولاته ونضيف الزبدة
نخلط كويس ونضيف العسل وهو اللى بيدي للجناش لمعه
نخلط لحد ما نوصل للشكل دة ونسيبه نص ساعه عشان يتماسك شويه وممكن نحطه في التلاجة 10 دقايق
نرفع الكيك على حاجة مرتفعه عشان نبدا نحط الجناش عليها وبنرفعها عشان الزيادات تنزل تحت ماتتجمعش في طبق التقديم
نحط كل الجناش ونتركه يتوزع لوحده وبعدين نبدا نساوي من الجناب ولما يتصفي كل الزيادات نحطها في طبق
وندخلها التلاجة نص ساعه وبعدين نكمل التزيين
والتزيين زي ما نحب
ودي بعد ما زينتها ويارب تعجبكوا
F:F:F: