تنور منزلي بضياء(( هاااشم ))

تنور منزلي بضياء(( هاااشم ))
بيوم فااض بالأفضاال جمعه
رزقني الله بسيد هااشم
الحمد لله على ماا أعطى






السلااااااام عليكم بنااات

الحمد لله رب العالمين تمت ولادتي في تاريخ 24\9 قبل 11 يوم الساعه 3الا عشر دقايق


نجي للتفاصيل طبعا موعد ولادتي اللي حددته لي الدكتورة على حساب الدورة 13\9 أي رابع أيام عيد الفطر و أني كنت من شهر رمضان كل يوم أنتظر الولادة و لكن يمر اليوم و لا تصير أي علامة من علامات الولادة و خلص شهر رمضان كله و مرت أيااام العيد و كنت عايشة شوية اكتئاااب لاني ابغي أولد و مع هذا كان كل شي طبيعي و لله الحمد و ما كانت عندي مشاكل طاف موعدي يوم و يومين ... و ثلاثة و أربعه و خمسة
..
..
..
..
..
..
لين صرت مطوووفه 10 أيام من موعدي و كان كل شي أووكي من حركة البيبي و وضعي الصحي فما قررت و لو لثااانيه اني اروح اراجع الدكتورة عن سبب التأخير قلت مدام إني احس ما فيه شي البيبي ما بروح و متى ما يأذن له رب العالمين يطلع بيطلع



المهم يوم الخميس كنا متجمعين في بيت ابوي العود ويه خالاتي و كان الوضع حليوو يعني لمة أهل تغدينا و أكلنا االسووويت بعد الغدى و كملنا اللمة بالسوالف و الضحك لين صارت السااعه تسع و نص الليل حسيت اني حصرااانة حددددي و مو متحملة اجود رووحي فركضت للحمام>> طبعا شي طبيعي لاني من الظهر ما دخلت الحمام و خبركم ثقل الشهر التاسع يستلزم دخول الحمام مرتين كل ساعه

المهم دخلت الحمام و رجعت أقعد ويه الجماعه و بنت خالتي الصغنونة كسرت استكانة شاااي بالغلط و صاارت صوبي قطعه كبيرة زجاج فقمت عشان اشيلها و مرة وحده حسيت بشي لا إرادي ينزززل مني داااافي خفت و صرخت خفيف بس محد انتبه لي لااهين بالسوالف فبدون وعي ركضت برررره و اتصلت في زوجي و قلت له تجي لي الحين الحين بسررررررررعه لا تتأخر
قال لي خير وش صاير يحتاج ألبس لو أجي لش بثيااب البيت ؟؟ تبغين أجيب وياااييي الاغراض؟؟ ها سيده بنروووح المستشفى ؟؟؟
حضرته مفكرني دايركت بولد و ما يدري شالسالفة
عصبني و قلت له تعال لي الحين و بعدين بقول لك
10 دقايق ووصل زوجي وفي هالاثناء ما حبيت أخبر امي لاني للحين ما احس بألم فخبرت اختي انه شووية مااي نزل عليي و الحين بروح البيت قالت لي بكون ويااش على اتصال و خبريني إذا صار شي ...

ركبت له السيارة و اني شاااقة الحلق بااالنص:lol::lol: مستانسة قرربت ولادتي
و كان هو مقرر بيطللع البحر ويه الشباب و قال بتصل فيهم بكنسل الطلعه قلت له لا روووح للحين ما في ألم توو الناااس وصلنا البيت و سويت له دلة كوووفي و قلت له تيسر اذا صارر شي بتصل فيك و كان طبعا على طوووووووووووووووووووووووووووووووووووووووول الماي ينزل بدون سيطرة عليه
طلع زوجي السااعه 11 و نص تقريبا و قمت غسلت الثياااب و نشرتهم و كنت اطالع بنات تجمع سبتمبر و خبرتهم انه الماااي نزل علي و سألتهم الدعااء و بعدها قمت قلت بستغل الليلة في قراءة القران و بااكل تمر عجووة و بشرررب ماااي واجد عشان تتسهل ولادتي
و كنت كل شوووي ارووح الحمام و اللي ما اسيطر عليه ينزل على جيس كنت قاعده تحته ...>>خايفة الاخت على الكراااسي هعهعهعهع:D
و ذيك الليلة ما الحق اصك باب الحمام مرة الا وارجع مرة ثانيه وفي الآخر تمللت و حطيت لي جيس كببببير و فوووقه فووطة و قلت خلاص ما بقووم و اقعد و كانت اختي تتصل فيني كل شوووي تسألني اذا بدأ الالم لو لا و اني لذيك الحزة كنت رااايقة:biggrin:و أصرت علي اتصل في امي و اخبرها او اخبر عمتي لانهم أخبر في هالسوالف تقول لي حراام تعبت 9 أشهر ترووح و يصير في البيبي مكررروه و خبرت زوجي يقول لامه و جتني على طول عمتي الله يطووول في عمرها و قالت لي يالله البسي بنروح المستشفى قلت ليها لا ما بروح للحين ما في الم مستحيل اروح لهم الحين قالت و الجاهل بيختنق بيخلص عليه الماااااي قلت لها لا للحين ينزل المااااي للحين ما خلص و سوت لي دارسين بعدها قلت لها روحي ارتاحي اذا بنروح المستشفى بنتصل فيش و راحت و هي مو متطمنه و زوجي كان على طول كل شوووي يتصل يسأل عن التطورات


و الساعه 3 الفجر بدأت أول طلقه خفيفة و طلع مفعول الدراسين و تبعتها الطلقه الثااانيه بعد 5 دقايق بالضبط و كنت احسب الوقت بي الطلقات و كان منتظم الالم كل 5 دقايق ... طبعا من خبرات البنات الله يحفظهم و من المواضيع اللي في عرروووس عرفت اني لازم اتنفس بشكل صحيح و احافظ على هدووئي عشان اساعد نفسي الرحم ينفتح بسرعه و يخف الأم و فعلا هذا اللي صار كل طلقه كنت آخذ شهيق وويه الالم زززفير

استغليت الوقت قرأت سورة مريم و يس و الانشقاق و كم دعاء و كااااااااااااااااااااانت ليلة حافله بالنسبة لي و لزوجي اللي رجع قبل الاذان بنص ساعه واني كنت اتعصر من الالم المستحمل
بعد صلاة الصبح قلت له روح نام و ريح الصبح بنروح المستشفى و بتتعب
دخل ينام و اني كنت بين النايمة و القاعده في الصالة كنت اوتعي على عصرة الألم و كنت اشوووف انه الساعه صارت 6و نص الصبح و عمتي ذيك الحزة طقت الباب و سألتني عن الاخبار خبرتها ان الالم بدأ من الساعه 3 وللحين محتمل اذا زاد بتووجه الى المستشفى :biggrin:وردت سوت لي دارسين و كوبة حليب و زاد الالم بعدها على الساعه ثمان و نص دخلت الحمام اتسبح و كانت آخر قطرات المااااي تنزل في الحمام :biggrin:
طلعت لبست ثيابي و سشورت شعري من الملل و الخووف الخفيف:biggrin:وقعدت زوجي ما رضى يقوم بسهاالة و اني ارفع صوتي قوووووووووووووووم زاد الالم عشان يقوم هعهعهعهعهع
و أخذ شنطتي و شنطة البيبي للسيارة و جت عمتي و قلت لهم بنمر على امي لانها للحين ما تدري عني و كنت اتصل فيها بس ما ترد اكيد التلفون بعيد عنها وصلنا بيت ابووي و نزلت لامي
ركبت الدرج و شفتها في الصالة تتريق ويه ابوي و اخوي الصغير ناديتها و ابوي يسألني خير شصاير واني اقول له مو صاير شي قلت لامي يالله بنروح المستشفى الماي نزل علي من امس الليل و خلص الماي الحين و ينزل قطرات دم و رحنا المستشفى حطوا علي جهاز الطلق و كان طلق بارد و جيكت الدكتورة التوسع عندي كان الحمد لله 3 سم تقريبا والمااي طبعا خلص عن البيبي بس الحمد لله كان النبض اووكي الى الساعه 11 و نص كشفت علي دكتورة ثانيه و صار تقريبا 4 سم و قرروا يركبوني غرفة الولادة


كنت اطالع السقف ما كنت ابي اشوووف ممرات المستشفى عشان لا أخووف روحي و اعفس نفسيتي و كنت لهلوقت محافظة على التنفس بشكل صحيح دخلن غرفة الولادة و كانت حلووووة بالنسبة لي حتى الممرضة تسألني ليش شلون كنتي متوقعتنها ؟؟؟
قلت لها كنت اتخيلها ظلام و فيها ضوء خفيف و طاولة خشب عليها مقص و كم ابرة و خيووط و كم وااير ههههههههههههههههههههههههههههههههههههههههههههههههههه >>كانت في بالي انها رعب بس الحمد لله طلعت اكشخ بوووووووووووووووووواجد من اللي في بالي


قلت لزوجي خذ أمي و امك و ارجعوا البيت شكلي بطوول و رجعوااا طبعا من طلعوا عني زااااااااااااااااااااااااااااااد الالم و في تزايد و تزايد و كنت انام و اقعد بعدين قلت للمرضة ابي اروح الحمام شيلي جهاز الطلق شالته عني و رحت الحمام و في الحمام جتني الطللقة حسيت روحي بولد و من راحت ركضت دايركت على السرير قبل لا يرجع الالم و قلت لها لا تركبين الجهاز تعبني ابي ارتاح 5 دقايق :'(
قالت لي اوكي اذا صار شي طقي الجررس و على الساعه 2 جت و ركبت الجهاز اللي يضاااااااااااايق:badly: وكنت اشوف قوة الطلق وصل في الاربعين حزة اللي كان بارد كان ما يطوف خمسة و عشرين
و الالم في تزايد و كنت اقرا ما تيسر من القران و تذكرت المحرومين و دعيت لهم بالذرررية (( إلهي أرزق كل محرومة عاجلا غير آجل))

الساعه 2 و نص ما قدرت اتحمل صرررحت انادي النرس و قلت لها تعبااانه جيكي كم التوووسع جيكت و الحمد لله كان 8 سم بقياااس ايدها بس الحقيقة كنت 10 سم و الحمد لله لحقت علي الدكتورة جيكت و قالت حزة اللي تحسين بدفع ادفعي و اني كنت اتنفس و ادفع
و ادفع
و ادفع
و ادعي للمؤمنين و المؤمنات
و ادفع
و اعصر
و الحمد لله رب العالمين طلع الغاااااااااالي سيد هاشم و حطووه على صدرررري و جودته بيدي و بعدها قام يصيح و قالت لي الدكتورة يالله ادفعي عشان المشيمة تطلع و بعدها خيطتني
طبعا انشق لي وااااجد من داخل و تمت تخيط فيني ما يقارب الساعتين :confused:و حتى الخياط من بره كان واجد بس الحمد لله على كل حال كانت ميسرة من رب العالمين





اسمحوا لي اخواتي على الاطاله و التفااصيل و دعواتكم لكل محرومة و لولدي بالهداية
طبعا هذا ولدي البكر الله يحفظه لي من كل سووء و اليوم كملت 11 يوم من تاريخ الولادة و للحين ما طاح الخياط و انشاء الله بستخدم الليل المرة و كنت من يومين استخدم السافلون
و في الآخر الله يسهل على كل حامل ولادتها و يرزق كل محرومة