علي حيدر علي نور المهد >>> قصة ولادتي

السلام عليكم ..

اخباركم كروشات وامهات عروس ؟؟؟ واخبار بيبياتكم؟؟

اليوم بعد ماريحت شوي .. جاية اقص لكم قصة ولادتي

المليئه بالمفاجئات .. والي ماكنت ابدا حاسبه لها حساب..

انا من تجمع ديسمبر .. على حساب الدكتوره اولد 2 ديسمبر

بس كتبة الله ولدت بتاريخ 29 سيبتمبر.. في الاسبوع الـ30

وجت حبيبي علي حيدر علي .. :)

القصه ومافيها .. اني بالاسبوع الـ 26 الى 27 بدء ينزل عندي

ماي .. رحت لدكتورتي على طول وخبرتها .. سوت لي فحوصات

ودنيا :badly: وهلكتني لمدة نص ساعه .. وبعدها قالت هذا مو ماي

الجنين .. بس بنتاكد بالاترساوند .. وسووا لي وشيكت على الماي

وقالت مانقص شيء منه .. رخصتني وقاالت كل شيء اوكي وانا هذي

اني اتبول وانتون بكرامه .. :o ماكنت مقتنعه لان فرق بالريحه واللون

وقدرتش على التحكم .. بس شسوي اذا قالت ان كل شيء اوكي ..

فوظت امري الى الله .. وظل ينزل كل مره شوي وانا لازلت اداوم ماعطوني

اجازه ولاشيء .. كل مره ينزل مني شوي .. والين يوم 28 سيبتمبر ..

نزلت اخر القطرات بالليل الساعه 12 وبدء معاي الطلق .. وظليت بالبيت

اطلق ورجلي يهدي فيي .. ويبغى يوديني المستشفى وانا معانده ..

لان مو حاطه ببالي هذا طلق .. جت الساعه 8 الصباح وانا خلاص اتعفرت

بالارض مو قادره .. وديت ولدي كرار عند جيرانا من البلد .. و انطلقنا الى

المستشفى .. الساعه 8 وشوي وصلنا .. ونقلوني غرفه يقيسوا لي

نبض قلب الجنين والطلق .. طبعا انا بهالوقت قلت لها عطيني اي شيء

مهدء مو قادره وهي تقول انتظري شوي نشوف الطلق صحيح او كاذب

وانا ميته الم :badly: شوي ركب زوجي وقلت له احس بشيء يطلع

وقال لها .. والله بس شالت عني البنطلون حبيبي علي طالع راسه :woo:

تبهدلوا كل الي بالقسم .. ودخلو علي فوق 10 ممرضات و4 دكاتره ..

وموعارفين يلبسوا القفازات من البهدله .. وعلى السريع .. انا ادفع وهم

لسى يجهزوا ومسكته دكتوره وطلع على طول على الساعه 9 و 23 دقيقه

الصباح .. اخدوه للحضانه على طول يركبوا الاجهزه عليه:'( وانا ظليت

بالغرفه ينظفون لي الرحم لان المشيمه تقطعت شوي .. ظليت الى الساعه

12 الظهر وانا انتظر يركبوني اشوف ولدي علي .. وينقلوني بعدها الى غرفتي

زرت علي وتطمنت عليه والحمدلله نزلت غرفتي ونمت لي نوم عميق من التعب

وسهر يوم كامل .. وطلع زوجي يجيب لي ملابس لان ماكنا حاسبين انها ولاده ..

لما جى صحاني واخدت شور وطلبت لي العشاء .. وجوني البنات الي معاي

بالغربه وجابوا لي ولدي كرار اشوفه .. وهدي كل الي حصل لي بولادتي ..

والله يسهل عليكم ولادتكم ويحفظ بيبياتكم من كل سؤ ..

بيظل ولدي علي بالمستشفى شهرين تقريبا .. لين يكتمل نموه ويتحسن ..

دواتكم اله بالصحه والسلامه ويبلغني فيه هو واخوه يارب ..

زرته اليوم .. والحمدلله .. اليوم سمحوا لي احط يدي على جسمه :adore:

وعطوه قطره صغيره من الحليب عن طريق انبوب .. والحمدلله تقبله :)

ان شاء الله الله يحفظه لي ويطلعه مثل ماطلع اخوه كرار ..

واسمحوا لي ان طولت عليكم ..

ولاتنسوا دعواتكم :o