نفسي يكون عندي أم

بسم الله

في البداية انا مو يتيمة لكن عندي ام مو زي الامهات..ولا زي اللي بسمعه واشوفه حتى اني احيانا اشك انها امي

لما كنت صغيرة كانت تستنى بابا يخرج عشان تتفنن في ضربي بأي شي في يدها..مرة كانت جالسة تسمعلي الدرس وبعدين اكتشفت اني مو حافظة عارفين ايش سوت؟ بالقلم الرصاص المبري اللي في يدها غرزته بقوووة في ركبتي( هل دا طبيعي؟)..ومرة ما افتكر السبب بس ضربتني بفرشة الشعر عارفينها اللي فيها دبابيس فضية؟ كانت تضرب بوحشية ولما خلصت كان جسمي كلللله نقط دم حمرا..ومرة كمان ما افتكر انضربت بايه بس افتكر ان انفي سار ينزف بغزارة من شدة الضرب..ولما شافتني انزف وقفت وقالتلي لما يوقف الدم حاكمل..وكنت ادعي ربي ان الدم مايوقف ابدا.

لما كبرت شوية ماسارت تقدر تضربني بسبب حجم جسمي( طولت وعرضت)..فايش كانت تسوي؟؟؟كانت تنقل لبابا كلام عني وطبعا كله غلط..وكانت قدامه تكلمني بهدوء وحنان وتقوللي ياحبيبتي وياقلبي واول مايخرج اروح اكلمها ماترد عليا.(كل يوم على كده)

والان انا كبرت اكتر واتخرجت من الجامعة وسار يجيني خطاب ولما كنت اخرج عشان يشوفوني كانت تقوللي على تصرفات معينة وانا كنت اسمع كلامها..بعدين اكتشفت ان دي التصرفات تعتبر عيب في نظرهم ومافي احد يسويها الا اذا كان يبغى يطفش العريس.

غير كده لما تروح زيارة او عزيمة طبعا كل أم تجلس تمدح في بنتها بس هيه تسوي العكس..تطلع كللل العيوب فيا..وحصلت مرة انها قالت اشياء غلط عني لناس بدون علمي بعدين صادفت اننا بعد فترة نقضي الصيف معاهم..وقتها قالولي انتي شي تاني غير اللي قالته عنك امك.

انا ما اعرف سبب دي المعاملة واللي حكيته جزء بسيييييط..المشكلة انها مع الناس شي ومعايا انا شي تاني..انا اشوف امهات صاحباتي غير وخالاتي امهات برضو بس غييييير..انا اسمع عن حنان الام واحضان الام بس ولا مرة شفت شي منها

واخيرا سامحوووووووني بس ماعندي احد افضفضله.