السلام عليكم ورحمة الله وبركاته
اشحالكن خواتي الغاليات؟؟
كل مرة أغيب عنكن وعن منتديات عروس بسبب ظروفي وانشغالي
لكن لأنهن الخوات في هالمنتدى كانن دوم ويايه من يوم كنت أستعد وأتجهز للعرس
وشاركنيه الفرحة يوم عرست
واتشاركت وياهن قصة حملي الأول وولادتيه الأولى
وعقبها قصة حملي الثاني والولادة ولله الحمد
اليوم .. حبيت أزف لحبيباتي في منتديات عروس
خبر حملي الثالث ولله الحمد
وحبيت كالعادة أخبركن بقصة الحمل بالتفصيل
في البداية
للخوات اللي ايحبن ايعرفن قصة حملي الأول
اتفضلن هالرابط
وهالرابط فيه قصة ولادتي بغاليتي ونور عيوني ميثاء
وهالرابط فيه قصة ولادتي بحبيبي وولي العهد محمد
ونفس قصة حملي الثاني اتكررت وياي هالمرة
لأني عقب الولادة الثانية
ابتديت أمنع الحمل بالطرق الطبيعية
عشان أخلي البيبي ياخذ كفايته من الرضاعة الطبيعية
لكن كالعادة .. لازم أمزج بين الرضاعة الطبيعية والصناعية عشان البيبي يشبع
وطبعا رجعت للدوام وللوظيفة
وقلت خلاص
لازم أرتاح شوي وأتفرغ للعيال أكثر
لكن رب العالمين إذا أراد شيئاً
إنما يقول له كن فيكون
المهم في نص شهر 7 صار عندي شرات النزيف لكنه خفيف من غير لا أعرف السبب
وراجعت الدكتورة وقالت يمكن من الرضاعة
وتاريخ 21 – 7 – 2010 شرفت الـ ....
يعني آخر مرة .. كانت بالتاريخ المذكور
في بداية شهر 8 .. يعني قبل رمضان
قمت أحس بدوخة فظيعة ولوعة
فسرت المستشفى على بداية شهر رمضان
لأنه إحساس اللوعة قام ايزيد وخصوصاً مع الصيام
وقمت أحس بآلام بسيطة في البطن
سويت تحليل دم عشان أتأكد أنه فقر الدم ما رجع
وفنفس الوقت .. الدكتورة طلبت أني أحلل تحليل حمل
ومن التعب رجعت البيت وقلت لهم ثاني يوم إن شاء الله برجع لهم عشان آخذ النتيجة
وثاني يوم في المستشفى عرفت أنه ما عندي أنيميا ولله الحمد ونتيجة الحمل سلبية
وقالت لي الممرضة اللي خذت عنها النتيجة
يمكن اتكون اللوعة بسبب التعب والإرهاق وطلبت مني أرتاح وأنام عدل
رجعت البيت
ومرت الأيام
وكل ما قرب موعد الـ ...
أحس بآلام فظيعة في المبايض وفي البطن وتقلصات تشبه آلام الـ ... .. لكن بصورة أكبر
وغديت أحس بالدوخة بشكل أكبر واللوعة قامت اتزيد
واليوم اللي قبل موعد الـ ...
صار عندي احتقان والتهاب في الحلق (بلاعيم) وتعبت واااايد
وزاد التعب يوم كنت أصلي التراويح
لأنه وقتها زادت علي الحمى وصرت أحس بحرارة داخلية في جسمي والدوخة زادت
فطلبت من ريلي عقب السحور
أنه ياخذني للصيدلية عشان آخذ لي مضاد حيوي
لأني بكون صايمة الصبح وبالتالي إذا زاد العوار أكيد بتعب
المهم الوقت كان وااايد متأخر ونحن تمينا ندور وندور عشان انحصل صيدلية مناوبة
ويوم وصلنا الصيدلية
قلت حق أبو محمد
اشرايك تاخذ لي جهاز تحليل الحمل قبل لا أشتري المضاد الحيوي
لأنه المضاد مب زين حق الحامل
وفسرت له طلبي أنها الدوخة زادت علي
وبالتالي خذ لي جهاز فحص الحمل المنزلي ورجعنا البيت
وصلت البيت وأنا أحس بالوهن والتعب
دخلت الحجرة .. وعلى طول على الفحص
قريت التعليمات .. وسرت أسوي الفحص
النتيجة ظهرت
قمت أشوف علامة موجب .. خط واضح والخط الثاني خفيييييف
من الصدمة قلت لا أكيد الفحص غلط
طلعت وشفت ريلي واقف في الحجرة
قلت له
مبروك .. أنا حامل
ابتسم وشرات سالفتيه في ثاني حمل .. اتحرا الموضوع مقلب
وقال لي هالمرة شكلج صدق مسوية مقلب
وأنا ما خليته على أعصابه
على طول راويته نتيجة التحليل
بس بعد .. تم فترة مصدوم
عقبها اتصل بأمه ايبشرها واتصل بأمايه وبشرها
الحمدلله يا رب
صح بنتي كان عمرها 10 شهور يوم أنا حملت ثاني مرة
وولديه هالمرة كان عمره 9 شهور يوم حملت في هالبيبي
لكن أنا أقول الحمدلله يا رب
وشرات ما قلت لكن في حملي الثاني
كل هدية من رب العالمين ما تساوي أموال الدنيا كلها
وحلاتهم يوم يكبرون ويكونون سند لنا في هالدنيا بإذن الله تعالى وأولاد صالحين يدعون لنا بعد مماتنا
والحمدلله يارب
الحمدلله على نعمه ظاهرة وباطنة
صح كل مرة كنت أقول بأجل موضوع الحمل شوي
لكن سبحان الله اللي يعلم اشكثر أحب اليهال وأحب أني أييب وايد عيال إذا ربي كتب لي
ويوهبني هالنعمة في كل مرة
خواتي وغالياتي
كالعادة .. بغيت أطلب منكن الدعوة الطيبة
أنه ربي يحفظ لي ريلي وبنتي الغالية وولدي الغالي
ويتمم لي حملي على خير ويرزقني الذرية الصالحة كاملة الخلق والخلقة من غير زيادة ولا نقصان
آاااامين يا رب العالمين
ويرزق كل محرومة الحمل عاجلاً غير آجل
ويسهل ولادة كل حامل وتفرح بشوفة ضناها
آااااامين يا رب العالمين