بنات الامارات..منو بيجهزني :( !!!

مبرووووووك ........ اختي لاتتشرين وايد اشتري الاشيا الاساسيه واللي بتحتاجينهن والسوق فيه الغالي والرخيص ..... ابتدي في الاشياء اللي بتاخذ وقت في التجهيز..... فستان العرس ..... المخاوير .... العبي ... والشيل .. سمعت انه فيه محل في عيمان عندهم شيل وعبي اوكي نفس ماي فير ليدي ولاتكثرين منهن بعد.... والاشياء الباجيه على مهلج ........ لاتستعيلين ولاتكثرين اللبس لاتخذين وايد .......... الموضه تتغير وبيطيحن في جبدج ......... جان بتشترين من السناتر ترا كل السناتر اسعار البضاعه اللي فيها نفس الشي..... اشتري البضاعه اللي سعرها فيها ولا تكثرين ..... الرخيص جيمته تروح لبسه ولبستين وخلاص....... والميك اب خذي الالوان اللي تكونين متاكده بانج تستعملينها والعطور بعد لاتخذين وايد منهن بعد نفس الشي بتملين منهن وبتعقينهن....وفيه لبس النوم بعد فيه اشياء اسعارهن معقوله..ولاتحاتين ....انشاء الله عقب ماتعرسين بتاخذين كل اللي تبينه. ولاتنسين كثر الشي مامنه فايده .....فلوسج بتحتايلهن في اشيا اهم ... وعقبال من شوووووووووف عيالج يراكضون عدالج ...................:clap:

مشكوورة الغالية ما قصرت ...

رفعت معنوياتي وريحتي بالي شوي ...:D

الباقي أتمناه من أخواتنا .....يحددونلي الأماكن ...والكمية بعد

[c]
انتي حالج من حالي.. انا ريلي يته حاله وقرر عرسي بعد شهرين بس انا حالي افضل شوي لاني بديت اصلا ازهب وسويت الفستان. اقصد بديت فيه يعني.. :)

اوكي..

شوفي الغاليه:

اول شي لا تكثريــــــــــن.. لانه صدق بيطيح في جبدج... خذي الاشياء الضروريه..

يعني:

مخاوير,,,,,,,,,,,,,,,,, من 5 الى 10 قطع (القطع سيري سوق السور.. وايد اوكي اسعارهم.. يعني الوار عندهم تقريبا 20 او 25 وقطع رووووووووعه صدق) والتفصيل عاده شي في الشارجه ورى سوق المجرة او في العين.. والله اسعار العين رخيصة مب وايد غالي..

المغربيات............. 2 او 3 يكفن للوقت الحالي.. (في محل في الملابلازا يسويهن باسعار اوكي .. جربيه)

ملابس داخليه.................. على الاقل 10 اطقم (عندج لاسينزا + ومنز سيكرت + نعومي.. هييل المحلات تقريبا اسعارهم اوكي. وتحصلينهم في اغلبية المراكز)

قمصـــــان نوم,,,,,,,,,,,,,,,,,,,,على الاقل 10 او 15 قطعه

بيجامات,,,,,,,,,,,,,,,,,, يبالج 5 قطع..

عندج الملابس الداخليه للاستخدام اليومي,,,,,,,,,, ممكن تاخذين 10

عندج الفوط,,,,,,,,,,,,, على الاقل طقم واحد

العبايات والشيل,,,,,,,,,,,,,,, طقم عروس + طقم عادي + شيل وعيايات للاستخدام اليومي.. (مركز بوهيل.. عندج ماي فير ليدي الحين مسوي تنزيلات لين اخر الشهر الحقي عليه.. لو انها مب وايد بس تنفع.. وعندج ماي سويت ليدي يسوون الطقم على 700 و600 درهم.. وحلوه موديلاتهم)

النعل والشنط,,,,,,,,,,,,,,,, يعني على الاقل واحد اسود +ابيض+ بيج+ اي لون ثاني تحبينه +جوتي للستخدام اليومي بعد.. يعني طلعتي للسوق ولا شي ولا طلعه عاديه يكون عندج وحد مريح.. والشنط خذيلج وحده سودا عمليه .. ووحده بيج.. وخذي اي لون انتي تفضلينه.. بس يكونن شوي رسميات وشكلهن غاوي حق عروس.. :)

ممممممممممم شو بعد..
باقي العطور.. والدخون.. وهالاشياء والمكياج.. خذي شي بسيط.. والالوان الاساسيه.. مثل الاسود والكحلي والبيج والابيض .. وبعدين اغلب علب المكياج تي الوان متعدده..

فســــــــتان العرس.. اجري فستان افضل.. او فصلي واحد يديد بس قولي للمصمم انج تبين تردينه خلاف.. بيرخص عليج السعر وااااااااااااايد..

لا تنسين جوتي العرس.. امسات في المنتدى وحده قالتلي انها في فريج المرر شي محلات تفصل وبسعر اوكي رخيص..

مممممممممممم شو شو شو بعد..
هيه لا تنسين تحجزين في الصالون.. اهم شي.. عن تتوهقين خلاف ما تحصلين حجز..

اذا اذكرت شي بحطه.. اتمنى اني قدرت افيدج الغاليه





[/c]

اول شي قوليلي انتي من وين؟... وكم ميزانيتك ؟و شو اهم شي عندج؟مثلا في ناس يهمهم الذهب وناس يهمهم اللبس

أختي
الله يعينج
سيري مركز المنال الطابق الثاني مقابل السلم المتحرك محل فيه قمصان
نوم حلوة واسعارها زينة جادلي وايد وياه ينفع


اختي روحي سوق المجرة وايد اسعاره زينة في الشارقة
وسوق البحر
والخياييط اللي ورى سوق المجرة اسعارهم حلوة

ونصيحة لا تفوتين التنزيلات في المارينا وأبوظبي مول أسعارهم تكون اوكيك عشان البدل والشنط والأحذية
صراحة تبين تشترين أحذية ونعل من حامد سنتر في أبوظبي
وايد اوكيك اسعاره وبعد ترتاحين لنعل وتبقى عندج فترة
ما أدري اذا في شيئ ثاني تبينه خبريني

ان شاء الله هالموضوع بيفيدج اذا تبين تجهزين حق العرس :smile:

للمقبلات على الزواج ويريدون يعرفون كل شي بالتفصيل لتجهيزات العرس "بنات الامارات فقط"

واي سؤال انا في الخدمه ان شاء الله :smile:

ياعلني فداكن واحدة ورا الثانية ..يارب


حبيبتي دنيا أنا من أبوظبي والذهب مو مهم وايد عندي ، أحب أكون متوازنو في كل شي ، وميزانيتي مب كبييييييييييييييييرة أبدا ...يعني 40 ألف ..الحمد الله ... ما أفكر أبدا أثقل على الريال ...كفاية أنه ما خذ هموم مصاريف ثانية ....الله يعين الجميع ....عشان جيه أفكر أني
أتشرى الأشياء المهمة ...خاصة أني واحدة عملية :p .


ممكن حد يقسم لي ميزانيتي ...ويحدد لي ميزانية كل شي ..(يعني الماكياج كم أحدد له ، والعطور ...الخ)

والله أنكم ما قصرتوا أبد ..واسعدتوني وايد ....راح أطبع هالصفحة وأسير اتشرى ...:


شي مهم خواتي ...أريد أفصل فستان العرس ....لكن ما أعرف وين ؟!

ممكن يعني نصيحة !!
:o

الغاليه انتي خبريني انج من وين وان شاء الله بقدر اساعدج..

أبووووووووووظبيييييييييييييي.....دار الظبيانيات :cool:

:)








































:(

بالنسبة لقمصان النوم ... أنصحج بصناعية عجمان لان فيها معظم الماركات و بأرخص الأسعار....

و أنصحج لا تكثريين وااايد من الزهبة و أشتري الأغراض اللي بتستعملينها دوووووووووم




و بالتوفيق

بالنسبة لصناعية عيمان ..والله أنا واااايد سمعت عنها لكن ما أدلها أبد !!
:o


ولا أعرف حد قاللي أنه قدر يوصلها ...بالعكس ...سمعت أن البعض ما سمحولهم يدخلون !...:(

:o :o :o

انا بقول لج وبنصحج بحدود المبلغ .... ومبرووووووك مقدما انا بعد عرسي بعد شهرين وقاعده اتزهب .... شوفي
بسم الله ... اول شي خلي 12 الف الى الف 15درهم حق الذهب وهذه مافيها جدال يعني تزيد ما تقل عن جذا ... تدرين ليش لانه هو اللي يظل وبتستفيدين منه طول عمرج واذا طاحت موضته ترومين تبيعينه وتاخذين بداله بس خلي عندج الفواتير .... وانا انصحج تروحين تاخذينه قبل العرس لو كان عرسج بعد رمضان خذيه برمضان ولو قبله ترومين تاخذينه من الحين .. خذي طقم عليه الجيمه ( متروس ) واطقم خفيفه ( علاقيات وملاحقها \)وخواتم (ولا تكثري منها )و كم اساور ....وساعه ماركه ومو لازم تكون ذهب واذا ظل من فلوس الذهب ترومين تزيدين ساعه و جم خاتم الخ
ثانيا : حطي 7 الاف درهم حق المخاوير والمغربيات لانهم هم اللي بينلبسون وايد يعني بحدود من ثمان لعشر مخاوير والباقي جم مغربيه وانصحج تسوين المخاوير ورا سوق المجره والمغربيات اسعارهم حلوه في سوق المرر جربي محل ( جار القمر _ خياطة كريمه للمغربيات )
ثالثا : 3000 درهم مكياج وركزي على الاساسيات مثل الفونديشن والمسكرا والبلاشر وتكون من الزين واللي عليه الجيمه لانه ينحط على الويه عشان ما يتحسس ويهج وانصحج تاخذينهم من ماركات مثل كريستيان ديور وغيره واحسن مكان عندج واسعارهم احسن وارخص بشوي من باريس غاليري واريج عندج ( الحواج ) السوق المركزي بالشارجه والباقي مثل الكحل والاي شدو والروجات ووووو من رد ايرث اسعارهم حلوه وبعد عندج لايف ستايل عندهم اشياء حلوه ورخيصه ...ولاتاخذين من السوق المفتوح مكياج ابدا مثل السوق الجديم ووو....نصيحه من مجرب
رابعا : ملابس النوم والبيجامات ( 4000 ) درهم وخذي من نعومي ولاسنزا الملابس مالت العروس وعندج اشياء حلوه عند العريش اللي بالسوق الجديم واسعارهم حلوه وترومين تجادلين .. والبيجاوات والملابس الداخليه الخفيفه اليوميه من عند سناء اللي بالصناعيه واللي بالوحده اسعارهم حلوه ... وعندج محلات بالسوق الجديم تبيع جلابيات حلوه حق البيت ( خفيفه ) ... وترومين تزيدين بالميزانيه 500 درهم حق هاي الشغلات اذا انتي من النوع اللي يحب الجلابيات اكثر من ملابس النوم والبيجامات يعني اشتري اللي تحبين تلبسينه اكثر من اللي ماتحبينه وما تعودتي تلبسينه لانه ينلبس بالبيت ومحد بيشوفج ....
;)
عندج الحين العبايات والشيل ... انا اقول بما انه العيد جرب وبفترة عرسج فصلي طقمين عليهم الجيمه يعني فيهم حركات وفصوص ( مال عرايس ) بس بدون دفاشه والوان لالالا.. وخذي عبايه مسكره ووحده اسلاميه خفيفات حق المشاوير العاديه وعبايه شل للمناسبات ولاتنسين العبايات كلهم طقم مع شيلهم اهم شي ... وخذي لج جم شيله ثانيه وانصحج بمحل الغشوه وحناين بالسوق الجديم ممكن تفاصلين بالسعر وعندج بعد بوهيل دبي ... وميزانيه العبايات ويا الشيل من 3000الى 3500 لا تزيدين ممكن تشترين وااايد عقب العرس
وبحوالي 2000اشتري العطورات والدخون وهاي السوالف وممكن تزيدين اذا كنتي بتاخذين دهن عود من الغالي اللي بحدود الف درهم .يعني على الميزانيه
\ملاحظه انا ما اضفت فلوس الصالون والفستان وملابس المصممين لانها هاي بروحها ميزانيه ... فاذا كانت من ضمن 40000 حاولي تخفي من كل شي عشان يظل حق الفستان والصالون ... وانتي وشطارتج انج تاخذين وتفاصلين عشان توفرين بالميزانيه ...
والله يوفقج ...
اختج ماروكووو

يا علني فداكم يارب...




حبيبتي ماروكو فديتج والله ..واااااااااااااااااااايد سهلتي علي عسى الله يسهلج دربج ودروب جميع المسلمين ...آمين .

ماشاء الله عليج اختي ماروكو.. ما خليتي شي.. صدق فنانه.. :)

حمدالله انا جيه تقريبا سويت وخلاص ما بقى شي خلصت كل زهبتي تقريبا الحمدالله.. بس باقي اللقط الاشياء من الخياييط..

تسلمين والله..

وربي يحفظج

حيااااكم كله من واجبكم يا خواتي .. وانا بعد يا ملاك خلصت تقريبا باقي لي القط من الخياييط على قولتج وبعد الذهب ما خلصته .. يالله ان شاء الله يتم كل شي على خير .. ومبرووووك لكم وعقباااااااال الباقييييين ..
بااااااااي

ممكن طلب يديد....

بالنسبة لفستان العرس .....واااااااااااااااااااااااايد متحيرة ..أفصل ولا أأجره أحسن ....

ومع إن في خاطري أفصل عند المحل على أساس أرده وهو يأجره عقب ...


فاللي عندها فكرة بلييييييييييييييييييييييييز تقولها ...والله يحقق أمانيها. :(

:D