موضوع الشعر حسب تجاربي في الموضوع
بالنسبة للوجه : احسن حاجة هي الفتلة هنا les coiffeuse يستعملوها تصفي الوجه علكيف
وتقعد فترة طويلة باش ينوض تعلمتها نقدر نديرلها للناس بصح ليا شوية صعبة
لغاية ما لقيت اختراع هنا يتباع اسمه مقص الفتلة الايراني معاه اسطوانة ينعتلك كيفاش ديريه
ننصح بعدم استعمال الرجينة للوجه مع الوقت تصبح البشرة مترهلة في البداية ما تحسيش بعد تتمدد البشرة يصبح فيها ترهلات
فيه ناس نعرفهم يديرو كريم la creme depilatoire هذا غلط جدا على البشرة مواد كيماوية العياذ بالله دير سرطان الجلد عفانا الله وعفاكم ان شاء الله الواحد ما يتهاونش بامور كيما هذو
يعني الفتلة نستعملها في وجهي كله باستثناء الحواجب فوق الحواجب الحمد لله هداني الله
من ساعة ما درت عمرة بطلت نعمل حواجبي من ترك شيئا لله عوضه احسن منه
بالنسبة للابط واليدين والرجلين استعمل سيلك ابيل احسن شيئ جسمي تعود عليها والالم خف بالاستعمال المتكرر
المنطقة الحساسة اول ما جيت هنا اغلبية الشعب بل كله يستعمله الحلاوة ( السويت ) اللي هي الرجينة
تنظف وتبيض تنحي الطبقة الميتة وبمرور الوقت تخف تدريجيا
فيه اخوات يستعملو ا زيت النمل يشكروا فيه بزاف لمنع ظهور الشعر هذا بعد ما تستعملي سويت تدعكي به المنطقة
وفيه كريم السعد او زيت السعد او حشيشة السعد كلها منتجات لنبات السعد يقلل نمو الشعر
بصح للامانة الواحد باش يتبع السنة عندي قرابة سنة وليت نحلق ويفضل ماكينة حلاقة للنساء مش اي شفرة او موس تروحي تحلقي بيه
فيه نوعية للنساء مليحة
لقول النبي صلى الله عليه وسلم : ( الفطرة خمس :
الختان وقص الشارب وقلم الظفر ونتف الابط وحلق العانة ) متفق على صحته
يعني فيه في الابط بيكتريا لا تزول الا بالنتف وفي العانة بيكتريا لا تزول الا بالحلق
اكيد حكمة قوية نجهلها والا ما قالها رسولنا الكريم عليه الصلاة والسلام
فيه اخوات ملتزمات يقولك بلي نتف العانة بالتدريج يسبب برود في العلاقة الحميمة
صح الحلق يطلع شعر كل 3 ايام ويعمل حساسية بصح اللي يتبع السنة اكيد راح يفلح
بالنسبة لليزر ما استعملتوش بالرغم انه منتشر
