كيف أبدأ مع بنتي ؟؟؟ خبراتكم يا امهات ..

um 3looy;13088570:

هلا حبيبتي

الله يوصلش بالسلامة انشالله

بالنسبة للحمام يبغي له صبر والحمد لله قررتين تعلمينها وهذي الخطوة الأولى

أول شي كرهيها في الحفاظ .. على طول قولي لها وع .. ريحة .. انتين حلوة واللي تسويها في الحفاظ مو حلوة .. لازم نسويها في الحمام مثلي ومثل البابا ومن هالكلام يعني ..

وطبعا لازم تكونين مجهزة الغطاء اللي يجي على الحمام وأنتي بكرامة مخصص للأطفال ( أحسه أفضل من القيصرية ويختصر التعب )
وتشترين لها الملابس الداخلية المخصصة لتعليم الاطفال بعد اللي مثل النايلون تحسبا للكوارث
واذا البنت من النوع اللي تحب الالعاب أو التشجيع بالصور والنجوم وهالسوالف جهزي لها وسيلة فيها هالاشياء عشان التشجيع

وبعدين أبدأي معاها شوي شوي يعني مثلا اليوم الأول فصخيها الحفاظ من الصبح الى العصر وطبعا كل شوي تودينها الحمام وتسألينها اذا كانت محتاجة للحمام أو لا ... وكلما تحسين أنها محتاجة للحمام تودينها ( وخصوصا بعد ماتشرب كمية من الماي أو العصيرات )
وحاولي توقتين لها اذا كانت تبغي تخرج .. وكل طفل له طريقة اذا بيتبرز وانتين بكرامه .... يعني مثلا ( علوووي لما كان بيخرج كان يروح ينخش ورا الكراسي ) وأعرفه اذا سوى هالحركة وعلى طوول أوديه الحمام ..

وبعدين بدأي يوم كامل تخلينها بدون .. وشوي شوي راح تتعلم وراح تعرف شلون تتحكم بنفسها لما بتروح الحمام ...

بس أهم شي التشجيع .. والصبرر ( حتى لو عملتها على نفسها حاولي تضبطين الاعصاب عشان لاتتعقد من الصراخ أو الضرب)

وفي بنات منزلين تجاربهم مع عيالهم عن سالفة الحمام حاولي تدورينهم وتقرينهم وانشالله تستفيدين منهم

وبالنسبة للرضاعة .. اخذي لها الاكواب اللي يجون مخصصين للأطفال ويجون أشكال وأنواع تشجع الطفل وخلي لها الحليب فيه أو عصيرات ...
وفي ناس مثلا يخلون ملح في المرضعه عشان تكره طعمها وماتحبه ... وفي وحده من الامهات قبل فترة نزلت عن تجربتها بعد وكانت تخلي ورق الشاي في الحليب وتقول ان فيها دود ( وعجبتني الفكرة ) بس ناسية اسم العضوة ..
وشوي شوي راح تتركها انشالله ..

والنوم بالهز .. علميها تنام مثلا على قصص .. والاطفال يحبوون القصص وخصوصا اللي فيها أكشنات وتجذب ..
واني ماخذه لعلووي وميمي السلحفاة المضيئة أخليهم في أسرتهم وأشغله لهم ويطلع في السقف كله نجوم وقمر
ويستانسون عليهم وأقعد أقول لهم قصص من اختراعي لما يتعبون وينامون

وأحيانا أبوهم ينيمهم ويقول لهم قصص يعني حاولي تتناوبون على الموضوع
ولاتخلينها في سريرها الا اذا تعبت خلاص وبتنام عشان مع القصص والظلمة تنام شوي شوي
وبدون هز

وانشالله تستفيدين من اللي كتبته

شمعة محبة;13092134:

مشكوووره أم علاوي والله استفدت من تجاربج ..

والله يخلي لج علاوي واخته ..

المشكله ان ما احس بنتي تفهم عدل .. يعني الحين اذا توصخ أبين لها ان هذا وع وصخ ..
ساعات تفهم وساعات لا ..

هالمشكله ...