محتاااااااااااااااارة

السلام عليكم و رحمة الله و بركاته

اولا شكرا على اتاحة الفرصة لعرض المشاكل الخاصة من خلال المنتدى و العمل على ايجاد حلول لها و الاهتمام فيها

انا عندي مشكلة تخصني انا و زوجي احنا الحين متزوجين صار لنا تقريبا 3 سنوات بس من بداية فترة الزواج انا حسيت انه غير الناس شوي بس قلت يمكن مع مرور الايام و العشرة راح اقدر اغيره او يمكن هو يتغير من نفسه و وايد واجهته و حاولت اني اجادله و اصارحه بس مع الاسف القاه ما يتغير و مشكلته تتلخص في الآتي :

1- هو انسان خجول معاي جدا في رومانسيته يعني طوال السنوات اللي عشته معاه ما عمره غلط و قال لي كلام حلو مثل باقي الناس على سبيل المثال : احبج ، وحشتيني ، حبيبتي او اي كلمة عادية ثانية و لا عمره فاجأني بوردة او بهدية او حتى بمسج حلو يخليني احس انه يحبني و حتى لما سجلت اسمي بتلفونه الجوال بكلمة حبيبتي اتصل فيني غضبان و مو عاجبته الحركة حتى ان هالشي سبب لي جرح كبير اكبر من الدنيا كلها .

2- هو انسان طفولي يعني عنده شغف كبير بافلام الرسوم المتحركة و العاب الاطفال الالكترونية و ما عنده مانع انه يشتريها باغلى سعر او يتابعها مهما كلفه هالشي من وقت او جهد و ممكن يندمج معاها لساعات طويلة من الليل .

3- غير ملتزم باداء الفروض في وقتها يعني عادي انه يصلي صلاة الفجر لما يقوم من نومه على راحته و حاولت كثير انصحه و احيانا كنت احاول اخليه يقوم بالوقت المناسب بس ما كان يسمعني و مرة سألته عن قراءته للقرآن و تفاجات انه ما يفتح المصحف الا في المسجد يوم الجمعة فقط و هالشي متعبني وايد نفسيا لاني ما احب اللي يهمل فرض الله .

4-ما عنده ذوق و لباقة في التصرف فلما يكون عندنا واجب ( عزاء - عرس - اعياد ) اكون الملقن له و اعلمه شلون يتصرف بحكم ان والدته ما علمته هالامور .

5-انعدام الخصوصية نهائيا و اخباره عن تفاصيل امورنا لوالدته هو متعلق فيها وايد و يحبها كثير و انا مو ضد حبه لها بالعكس انا احب ان يكون زوجي بار بامه و ابوه بس انه يساويني معاها بكل شي انا ضده يعني مو معقولة انا اطلب شي ممن هي ما تعرفه و لا تستخدمه يقوم يشتري لي و لها الشي نفسه مهما يكون الوحدة تحب تكون لها اشياء خاصة فيها و بس او اشياء حصرية يقدمها لها زوجها و بنفس الوقت ممكن يشتري لها ثاني خاص فيها بس مو مثلي انا اقصد العطور و الملابس او اي شي ثاني يعني ممكن يشتري عطرين بس مختلفين او يهدينا عطرين بس مو بنفس الوقت .

كل هالامور زادت مخي تعقيد و قلبي تعب و ياما صارحته و كرهته و ياما حاولت انسى و اعيش معاه بدون ما ابالي بس لكل شي حدود

احنا بينا حاليا طفلة بس احسه هو الطفل مو هي او احسه اخ او احس انه زوج من خشب تربطني معاه ورقة عقد

للاسف ابي احس به كزوجي الحبيب بس متى مااادري ؟؟

يا ريت تفيدوني و جزاكم الله عني خير الجزااااااااااااااااااااء



نووووووووور