عبروني ! !

بصراحة أول مرة أسمع عن روضة أطفال المهنا
مع اني في مدينة حمد يعني قريب
انشالله أحد يفيدج :biggrin:

خيو ما عندي فكرة بس ما حبيت أطلع بدون ما أرد عليج


الله يوفقكم وإن شاء الله في أحد يقدر يساعدج ..:)

الروضة تصير قريبة مناا بس ماشفت احد اعرفه ود عياله هناك

ليش للحين ماسجلتينه يمكن بعد خلص التسجيل عندهم


بس ان شاء الله البنات يفيدونش

ما عندي خلفية عنها

مشكوورين خواتي اللي ردوا على موضوعي ماقصرتون ( نرجس النرجسية ، زوجي حبيب قلبي أخصكم بالشكر لأنكم متواصلين ويايي في اغلب مواضيعي ، ام عبود ، حنين ، أميرة بصمتي ) حنين فعلا مااتوقع بتسمعين أحد ودى أولاده ليهم لأن الروضة كلش كأنها غير موجودة ماتسمعين عنها لا سلب ولا ايجاب ! يعني ليش جدي من بد الروضات ماأدري وعلى فكرة هي العام الماضي كانت معروضة للبيع بس ما انباعت ! المهم أكيد يدور في بالكم سؤال بعد كل هدا ويش اللي حادني أودي ولدي هناك ؟ ! الله يسلمكم لأن عندي ولدي الصغير عمره ثلاث سنوات وشوي للحين ماني قادرة أشيل عنه الحفاضة ما عنده أي استعداد لهالموضوع بيطلع في راسي قرون حتى اني دربته فترة ولما شفت ان المجهود اللي قاعدة ابدله وياه على الفاضي تركت الموضوع وقلت يمكن يكبر ويعقل أو يهتم أكثر لهالموضوع أو يمكن ادا راح الروضة ينحرج اشوي ويصير عنده تطور في الموضوع ! المهم سألت كم روضة ادا يقبلون ياخدونه بالحغاظ محد راضي واني أبغيه لازم اروح الروضة المهم ما في الا روضة أطفال المهنا تقبل تاخد أطفال عليهم حفاظة وهدا اللي خلاني أوديه ليهم وبعد لأني مجربة تعليمهم ويا ولدي الكبير بس لكن بالنسبة حق ولدي الكبير لازم أدور ليه روضة متميزة لأنه في مستوى تمهيدي ولازم يتهيأ للمدرسة عدل مو أي كلام وفعلا بعد عدة استفسارات وديته العام الماضي روضة مملكة النحل بس ماقبض شي عندهم في الانجليزي كلش مع انه امشي في باقي المواد فقمت ونقلته لوحدة اتدرس في بيتهم بس الصراحة تعليمها فوق الممتاز وخواتي ثنتينهم ودوا أولادهم ليها ولاحظنا استفادة أطفالنا من أول اسبوعين واجد حفظوا سور وأدعية والعربي المنهج مالها كلش قوي رغم ان ولدي كان في مستوى ثاني بس اللي درسه عندها كأنه منهج أول ابتدائي وفي الانجليزي كلش متميزة وواجد قبض ولدي من عندها في كم اسبوع الحروف وكلمات واِشكال هندسية وغيرها بالانجليزي مع انه قعد في روضة مملكة النحل الى شهر ثلاثة وما تعلم في الانجليزي ولا شي ! ! المهم اني كنت افكر أوديهم اثنينهم عندها بس مارضت تاخد ولدي الصغير لأنه يلبس حفاظ وفي نفس الوقت اني متخوفة ان الصغير ما يتقبل سالفة الروضة فكنت أبغيه اثنينهم ويا بعض عشان يتشجع بس ما صارت ! وبعد أعرف وحدة قريبة زوجي تدريسها واجد زين وليها سمعة بس مشكلتها ما عندها مواصلات وبعد فكرت في أنوار الغدير بس هم اشوي أغلى من باقي الروضات وما بقدر أودي الولدين عشان جدي ما ضل قدامي غير أطفال المهنا بس أبغي أعرف عن المدرسات والمنهج . .

ان شاء الله البنات يفيدونج عن المنهج

بس عندي سؤال ممكن تقولين لي اكثر عن الوحدة الي تدرس في بيتهم

ابي اودي بنتي لها

واسفة ع الاطالة

مشكورة حنين على ردش وانشالله احصل رد من باقي الأخوات ، المهم المعلمة اللي تدرس في بيتها تعليمها واجد زين وأكثر شي لو فعلا سجلتين بنتش عندهابتلاحظين استفادة فيه العربي والانجليزي الصراحة هي ويا المعلمة الثانية اللي وياها يتعبون على الأطفال عدل وعندهم اهتمام بالمناسبات الدينية يحيونها ويشرحون للأطفال عنها بس مثل ماقلت ليش هي روضة بيت يعني مومجهزة بألعاب أو وسائل تعليمية غير تلفزيون وطين وأشياء بسيطة كلش وهي بعد على الرغم من انها توها فاتحة هدي السنة الاانها حاولت اتدبر مواصلات حق الأطفال المسجلين عندها ، المعلمة الثانية اللي وياها اتوصلهم بسيارتها الخاصة ورسومها معقولة 22 دينار ومع المواصلات 29 دينار وتوديهم بعض الرحلات البسيطة يعني مورحلة بمعنى رحلة تقدرين تقولين مشوار عندهم مزرعة فيها شوية خيول وطيور تاخد الأطفال ليها بين فترة والثانية ونادي ما اعرف شنو فيه بالظبط بعد اتوديهم لانهم قريبين من سكنها والصراحة حقانية يعني لما تغيبين الطفل بعدر كسفر أو ماشابه تحسب الرسوم باليوم عكس الروضات يعني تاخد الرسوم بس على الأيام اللي حضر فيها الطفل الروضة بس في عليها مأخد واحد تستخدم الضرب ويا الأطفال ما أعتقد داك الضرب المبرح بس اسلوبها على طول جدي وتعترف بها الشي فكرتها أن الطفل ما يتعلم ادا اخدتينه بالضحك والمزاح هي تفضل الشدة بس على الرغم من أن المكان بعد ما فيه العاب مافي يوم جى ولدي وقال ماباروح لأنها تضرب وبعد تعلق على مظهرالطفل هدا مرتب وداك مبهدل ، هدا نظيف وداك وسخ يعني لسانها متبري منها شوي ! الصراحة ما بغيت اغبي عليش شي عشان لايصير في دمتي وانتين على راحتش أكي الصورة صارت واضحة عندش . .
ن

مشكورة خيووه يعني اهي تدرس بس روضة

انا فكرتها تدرس اي مستوى حتى لو في المدرسة