تطوراتي للأسف للأسوء

السلام عليكم كيف حالكم اخواتي احب ابارك لكم بالشهر الله يتقبل منا ومنكم صيامنا وقيامنا ياحي ياقيوووم

احب اشكر كل وحده سئلت واهتمت بمشكلتي جزاكم الله كل خير ويوفقكم دنيا واخره
الرابط اللي كانت فيه مشكلتي تسرعت بزواجي ولي نصيحه للي ماتزوجت

http://forums.3roos.com/showthread.php?t=524398

واحب اعتذر عن التأخير بسبب ظروفي ومثل ماتعرفون النت ماعندي الاببيت اهلي الله يعين
راح اقول لكم وش التطورات للأسف مو للأحسن

بدخل واقول وش اللي صار واتمنى منكم النصيحه وش اسوي هو استمر او لا والاسباب اللي خلته تسوي كذا لاني تعبت معاه وودي اخذ قرار وافتك وخاصه قبل رمضان ابي اريح نفسي من هالدوامه اللي عايشتها
راح اقول وش صار

الحين انا وياه متهاوشين وبمشكله والغلط منه طفشت وحلفت اني مااعتذر مثل اول وش يحدني اعتذر له وهو الغلطان في كل مره يقلبها علي تعبت من هالعيشه تحملت كثيرر من هالحركه الحين لنا اسبوع لاكلمني لاسئل ومطنشني ولاكأني زوجه المهم قلت اللي يصير يصير يعني اللي قهرني ان كلامه كان منه علي وتجريح ويبني اعتذر لو تنطبق السماء على الارض مااعتذرت ادري اصلا اني ماكنت كذا بس هو خلاني كذا لاني تعبت من هالاسلوب وبنفس المشكله تخيلي يدوور حتى وصل اللي يبيه اللي هو قلب السالفه علي وهو الحين المسكين المظلوم ويبي اعتذر ماراح اعتذر ماراح اكلمه ولااسوي شي قلت لاامي وشكيت لها حالي والحمد الله تفاعلت معي لان كم مره تشوفني ادخل واسلم عليها وعلى طوول خانقتني العبره وبدوون مااحس اقولها اللي صار تقول هذا رجال ولاتقدرين تردين عليه يعني طنشي بس انا تعبت وقلت لها بطنشه ولاراح اكلمه قالت اذا يبيك صدق وشاريك بيكلمك وهو حظرته لاسئل ولاحتى كلف على نفسه يعتذر لو من جوال طفشت من منته اللي تجيب الهم وطفشت من معاملته وطفشت من اسلوووبه الشين
اكتشفت انه مطلع شريحه غير جواله من القهر واجهته وقلت ليش قال جوالي خرب وانقهرت اكثر لانه يابنات يكذب كثيررر اعوذ بالله وش دخل الجوال بالشريحه واضحه المهم شاكه لكن ماطحت فيه لان الحين صار جلوسي مع اهلي اكثر ويقدر يسوي اللي يبي بدون محد يدري
ااااااااه يااخواتي تعبت منه كثير
الشي الثاني صار يخيلني عند اهلي كثير يابنات والله اللي متزوجه مسيار يمكن مرتاحه اكثر مني انا مو عارفه وش اسوي واذا فكرت قلت وش ابي فيه عند اهلي اريح بس الين يعني الى متى استمر على كذا لاانا متزوجه ولاماادري وش اسمي هالحاله
اشك يابنات انا يستخدم شي بس مو عارفه ايش شي ريحته تقرف ولونه اسوود شفته بالصدفه سبحان الله كل ماستمر معه اكتشف اشياء كثيره غافله عنها مو غافله لكن هو يستغفلني ومستغل جلوسي عند اهلي لاتقولون لي حاولي تجلسين في البيت لان هو بنفسه يقوول بوديك عند اهلك واذا قلت بجلس ماابي اروح يقول برجع متأخر وبكون تعبان او بسافر اعذار سخيفه وواضحه انها كذابه يبي يفتك مني بااي وسيله طلبت منه ان نطلع برا مو لازم مطعم لو حتى جلسات عادي تغيرر جو وقال مو فاضي يعني ماادري ليش مايبني في البيت يابنات حركاته هذي خلتني اشك بااشياء كثيررررره

الشي الثاني واللي صدمني اكثر وخلاني انقهر ولاعرفت وش اقول وللحين ماقدر وش اقوله لاني مااقدر وش ارد عليه صراحه اكتشفت انه يشوووف افلام اباحيه سبحان الله طلعت منه غلطه يعني ماادري وش قال وزل لسانه وادري انه ندم انه قال عشان كذا استغربت تأخيره لما يرجع البيت يابنات شي يقهر واحد متزوج ويشوف كذا وش يبي ناس تتمنى تتزوج عشان تحصن نفسها

وفي شي ثاني انا مره جوالي خرب ووواضطريت اخذ جواله اذا احتجت تخيلو يوقف على راسي وتحسون انه كل شوي خايف يروح شوي ويرجع بسرعه ادري الجوال فيه شي بس مو عارفه ايش وش اللي خايف منه ماادري شي ييحير ويقهر نفسي بس اشوف وش فيه لان حرصه اني ماااشوف شي بجواله مو طبيعي حتى اذا ارسلت لحد رساله يقول انا برسلها تدرون ليش مو عشان الرساله يشوفها لا لانها عاديه مره ولااهتم انها يشوفها مافيها شي عشان مااشوف الارقام هذا اللي استنتجته من حركته والله اعلم بس شي واضح والله اللي اعرفه لو انه واثق اعطاني الجوال وراح او على الاقل مايقول انا برسل او يخليني على راحتي تخيلي تكلمني ويجي احد فوق راسك انحرج مع اللي اكلمها

بقول شي ادري انه محرج شوي لكن مضطره صرت مااشتهي ابد شي اسمه جنس يابنات والله العظيم احس بقهر لما هالشي افقده هو السبب اهم شي يريح نفسه ويعطيني ظهره ولافكر قال ارتحتي مع اني فتحت هالموضوع ويكتفي برده وش تبيني اسووي تخيلو بس يابنات هالرد قسم بالله شي يقهر
والشي اللي للحين ماتغير اي شي يسويه ويقهر ادعي علي عشان افتك منه بموت ولاشي يشيله من حياتي

ماادري ليش يجيني احساس انه مايحبني لاني حسيت مثلي مثل اللي اتزوجهم وانفصل عنهم حسيت الرجال خلاص ماتفرق معه وقال مره ان كلكم مثل بعض وحاولت اقول وش فيني يعني قول العيب ماقدر وش يقول بس اتوقع انه حافظ هالكلمه وجاي يقولها طيب قال انتم نفس بعض قلت انتم يالرجال نفس بعض من القهر قلته طبعا له قال لا نختلف قسم بالله حسيت ودي اقتله باللحظه وقتها كنت بقوله عن كل عيوبه عشان يعرف وشلون احنا مثل بعض احس يعتبر نفسه ملاك ماابي يكون كامل الاوصاف على الاقل يكون شي فيه اسمه احترام وتقدير ويقدر وش اسوي وش اضحي خاصه الظروف الماديه صعبه وحارمه نفسي من اشياء كثير وللحين ودي حتى لبس العيد يوم طلبت منه عشان ماابي اطلع برمضان قال بعدين يعني انا وحده وعجز عن مصروفي لو يجي اطفال راح ينحرمون من اشياء كثيره وكل وحده تبي تعطي طفلها اللي يبي ولايحس انه اقل من غيره
والله يابنات تعبانه كثيررر وقاهرني على فكره هذي اول مره اطنشه كذا ولااكلمه يعين حتى ماكلمته يجي ياخذني اتووقع انه يقول ماصدقت على الله افتك منها بس وش اقول اللي مااحترم امه وشلون يحترمني والله اني استغرب يعني الحمد الله خالتي في حالها صح تهاوش ويجي منها كلام عادي انسانه كبيره بس رده عليها غريب كثيرر ماكأنها امه واذا نصحته وقلت انا عادي بس هذي امك وحرام اللي تسويه حتى لما قلت لامي على معاملته مع امه تستغرب وتقوول هذا انسان مو طبيعي صرت اقول لامي عشان لو يحصل انفصال ماتتعب وتوقف معي

اشياء كثير لكن هذا اللي حظرني الحين وجيت افضفض
قسم بالله من كثر مااني ضايق صدري ماصرت اقدر اخذ قرار انا ماابيه
بس خايفه من الطلاق ماادري ليش يابنات

ابي نصايحكم .....
هو صح اللي انا سويته يوم اطنشه ولاااكلمه ؟
ابي تعلموني وش هالشي اللي يستخدمه طبعا هو مدخن بس اتوقع في شي معه لان الريحه غريبه والسواد هذا غريب اذا احد يعرف؟
الافلام الاباحيه والشريحه الجديده وشلون اتعامل معها وش اسوي وش اقول ؟

ابي النصايح منكم وترشدوني وش الصح لاني تعبت كثير
بنات لاتنسوني من دعواتكم في هالايام ورمضان
الله يفرج على كل مهمومه يارب ويصلح الحال ويكتب لي الخير وين ماكان يارب