بما اني من فترة بطبخ اكل صحي نظرا لزيادة الوزن :o:o
فقررت اشركوا معايا وانزلكوا اكلات ووجبات صحيه للى زي حلاتي بيعمل رجيم :D
عملت النهاردة فيليه هامور مشوي انما ايه طلع طعمه لذيذ جدااااااااااااا
يلا نبدا على طول
اولا هغسل السمك واعصر عليه نص ليمونه واسيبه يصفي ميته خالص
هجهز تتبيله عباره عن 3 فصوص ثوم مهروسين وملح وفلفل اسود ومعلقة صغيرة زيت زيتون ورشه شطة واقلبهم سوا وافردهم على قطع السمك اللى عندي
هسخن طاسه تيفال كويس اوي واحط فيها السمك يتشوي والطاسة احسن من الشوايه عشان السمك بيتهري وممكن يلزق في الشوايه ومش نعرف نطلعه سليم وهيتفتت مننا
كدة خلاص السمك استوى
نيجي للمهم بقى التتبيله اللذيذة جدا
نهرص فص توم وعليه رشه بسيطة فلفل اسود ومعلقتين كبار خل بلسمي ومعلقة مستردة و4 معالق ميه ومعلقة زيت زيتون وحته بصل اخضر نقطعها صغير جدا ونقلب التتبيله كويس اوي ودة شكلها
هنوزع التتبيله دي على السمك وهو سخن
والسمك بقى جاهز وانا قدمته مع رز مسلوق وبروكلي على البخار وقطع سمك تكة كانت عندي شويتها وكانت اكله لذيذة جدا جدا الحمد لله ويارب تعجبكوا
وطبعا ماننساش السلطة الخضرا
