السلام عليكم

السلام عليكم و رحمة الله و بركاته

أختي أنا بدخل في الموضوع على طول و اتمنى انج تنصحيني و تعطيني حل لأني ما لقيت أحد يساعدني و تعبت من التفكير

السنه اللي طافت نفس هالوقت كنت اشتغل صيفي و شافني واحد في الدوام و عجبته و قرر يخطبني

أنا الحمدلله متحجبه و لبسي محتشم و أسلوبي دايما جدي و رسمي (يعني ما عجبته لاني مايعه أو شي !! لا .. الريال كان مقتنع من قراره )

المهم .. هذا كان شهر 7 - 2009 .. الريال كلم أهله و سألوا عنا و أمه زارتنا شهر 1 .. يعني بعد 6 شهور من أول ما شافني ..

أمي أول ما شافت أمه انصدمت!! لانه نحن بيض و أمه سمرا .. و ما عجبوها و قالتلي انسي الموضوع

و زيارتهم كانت زيارة تعارف .. يعني ما كانو جايين يخطبون .. جو يتعرفو على أهلي و يشوفوهم

و طلعو من عندنا و ما سمعنا عنهم أي شي .. اختفوا .. ما اتصلوا ولا شي

قبل اسبوعين أمه اتصلت لأمي و قالتها انهم حابين يخطبوني وو السبب انهم اختفوا شهور أنهم عارفين اني ادرس و اني تخرجت شهر 6 !!

المهم .. أمي ما عطتها فرصه تتكلم و قالتها اسمحيلي انا اعتذر من هالموضوع و سكرت الخط!

و بعدها أمي كلمتني و سألتني عن رايي .. قلتلها أنا ما يهمني اذا الولد ابيض أو أسمر .. المهم يكون الولد زين

قالت بس أسمر!!!! ترضين تتزوجين أسمر و عيالج يطلعون سمر !! قلتلها يا أمي أنا ما يهمني الشكل ولا اللون!! هذي خلقة رب العالمين و ما في فرق بين الأبيض و الأسود

عصبت و ما عجبها كلامي و قالتلي اتفاهمي مع أبوج و انا ما يخصني

انا استحيت افتح الموضوع مع أبوي .. بس هم اتصلو بأبوي بعد ما شافو ان امي ما عطتهم فرصه

و أبوي كلم أختي في الموضوع !! و أختي قالت له هذيلا سمر و نحن مش موافقين .. قالها اذا سمر انا ما أبغي أزوج بنتي عبيد !!

و بعدها كلمني و قاللي شوفي .. كلنا عند الله واحد و ما في فرق بين الأبيض و الأسمر بس نحن عندنا عادات و تقاليد .. و ما نزوج الا اللي من معارفنا و جماعتنا و ناس من ثوبنا .. بس هذيل ما نعرفهم و لا يعرفونا و عاداتهم و أسلوب حياتهم غير عنا .. و انتي بنتي و ما بزوجج الا و انا مطمن عليج .. يعني اللي نعرفه أحسن من اللي ما نعرفه عشان أنا أكون مطمن عليج

و بعد ما قالي هالكلام ما قدرت أقوله شي .. سكتت!! بس صليت استخاره و مرتاحه .. و ابغي أبوي يعطيهم فرصه و يشوفهم أو يسأل عنهم .. بس هو قالي اعتبري الموضوع انتهى .. و انا استحي ما أقدر افتح الموضوع مع أبوي

شو لازم اسوي الحين؟؟؟ أرضى بقرار أهلي؟؟ ولا أحاول أقنع أبوي؟ بس كيف؟؟

أنا متوكله على ربي و اللي كاتبنه أنا راضيه فيه .. بس مو عارفه شو أسوي الحين؟؟ اسكت و انسى الموضوع؟؟ أو اتكلم مع أبوي؟

اخاف اسكت و اظلم الريال اذا كان خلوق و محترم

انصحيني و ريحي بالي :(