مو معقولة!! بعد 1430 سنة و للان ما تغيرنا!!

تدرين انا شنو رايي لو البنت عارضوا اهلها من رجل ذو دين بسبب القبلية ؟؟!! انها تلجأ للمحاكم !!

اختي اهي مو اول بنت ولا اخر بنت على الدنيا الا عشان اخووج خلاص يوقف حياته عشانها
بنات حوااء واايد
وماضن انج ماراح تلاقين له بس السالفه يبالها صبر ووقت
مو حي الله بليله بتلاقين !!
واذا كانت السالفه عن حب
يقدرون يلجأون للمحكمه وتخلص شغلتهم بنص اليووم
اذا كانو من صج يحبون بعض ولا يبون بعض على سنه الله ورسووله
ماكو زواج بالغصب
كل شي قسمه ونصيب !!
والله يوفقه ان شاء الله

سلام, لا تفهمو ا غلط, اني ابغي رايكم في موضوع القبلية و ان البنت ما تتزوج بره العائلة. اخوي ما له علاقة بالموضوع

طيب اهي حررره !!
دام اهي ماتبي خلااص
وهاي تفكير قدييم
بس السعوديه الله يحفظها ويحفظ اهلها متمسكين بهل الشي بنت عمك لولد عمك وهلون !!

بصراح انه احنا عندنا القبايل ماتتزوج الاقبيلي لكن ادا البنت كبيره ومافي حد اكبر منها تتزوج من بره العائله بس يكون قبيلي وهو من بره العائله

كذا عندنا وادا البنت جاها واحد من بره العيله ملانه عادي ادا وافقت تتزوجه بس انا افضل كذاااااا لان افضل شيء عادات القبايل

اذا كان ولد عمها ريال صالح و ناجح بحياته و يصلح للزواج .. خلاص ليش لأ؟ بغض النظر عن العادات و التقاليد !!

اما اذا كان فاشل و طبعه شين .. و الاهل جبروا بنتهم عليه و ظلموها معاه .. انا هني اقول لا و لا و الف لا للعادات و التقاليد .. ما يصير يفضلون العادات و التقاليد على مستقبل بنتهم و سعادتها

انا مع اللي ترتاح له البنت او الولد يوم يبون يتزوجون..في ناس مرتاحين لهالشي و ما يمانعونه فهم احرار..صح ان اصل التفكير هذا غلط لان مثل ما ذكرتي نبينا (عليه الصلاة و السلام) حذر من القبلية..لكن بنفس الوقت الدين ما يمنع ان احد يهتم بنسبه و نسب اللي بيتزوج منهم..اذا كان الاهتمام هذا ثانوي لحسن الدين و الخلق..اللي هم الاصل بالموضوع..حتى بالتاريخ الاسلامي الكثير من الصحابة و حتى زوجات الرسول رضي الله عنهم و ارضاهم كانوا من الملمّين بعلم الانساب و الرسول عليه الصلاة و السلام ما نهاههم عن العلم هذا او زجرهم..لانهم كانوا معتدلين باللي يعرفوه بهذا العلم و بنظرتهم للآخرين من خلاله..لا بل في احاديث نبوية تحذر و بقوة ضد التنكر للنسب..نسب الشخص نفسه لنسب ثاني..التخلي عن نسبه..او الطعن بنسب الآخرين

اللي انا اكرههههه هم المتعصبيييين للفكر هذا و مستعدين يظلمون ظلم بحححتتتتت في سبيله!..و ايضا اللي ياخذون موضوع النسب و القبايل و يطلعون منه تبريرات للنمطيات و الدونية اللي يمارسوها على الناس اللي مو من قبايلهم او عشايرهم..

بس اللي عنده هالشي امنية او عادة يمشي عليها و ما يمانع انه يلغيها يوم يلقي الشخص المناسب دينا و اخلاقا..فعااااااادي جدا..

لكن بالنسبة لي..بما اني لاجئة بالغرب موضوع القبايل موضوع ما له اي تأثير على الامر هذا للعوائل..الجاليات هنا بشكل عام..و يمكن هالشي نعمة من رب العالمين..تهتم فقط اذا الشخص مسلم و محافظ على تعاليم الدين..و لا الجنسية..او القومية..او العرق..و هذي الامور كلللللللها قلييييييييييييييل اللي يهتم لها..لان اذا الكل اهتموا فمعناها ماحد بيتزوج!..و هالكلام مو مبالغة..لان الجاليات مختلللللطة فصعب احد يتعصب لاحد ثاني..و صديقاتي كللللهم متزوجات من غير جنسيات و عرقيات او انهم مولودات لاباء و امهات من جنسيات و عرقيات مختلفة..و هو شي جميل جدا..لانه يقرب بين المسلمين بالغرب اكثر خصووووووصا اللي كانوا من ديانات ثانية و اسلموا..و سبحان الله حتى الاطفال او الاشخاص اللي مولودين من هالزواجات اشكالهم تهبببببببلللللل فيهم جمال مووووو طبيعي..ما شاء الله لا قوة الا بالله..

فا بالنهاية الموضوع محكوم بوضع الشخص الاجتماعي و عاداته و افضلياته الشخصية..لكن انا معج بان التعصب المفروض يكون معدوووووووووووووووم بامتنا..و انا اضده الحين و بعدين و داااائما و ابدا!

و الله يوفق الجميع..

عادي احنا عندنا تتزوج من بره العائله بس بشرط تكون مكافئه لها من ناحية المستوى الاجتماعي ماقصد المادي لا .. يعني عائله كبيره ومعروفه مثلها

ينقل للركن المناسب

عادات خطاء طبعا لان زواج الاقارب لاقدر الله ممكن ينتج عنة اطفال غير اسوياء
الله يغافينا ويعافيكم

كلامك صحيح .. بعض العوائل الله يهديهم يقومون الدنيا وما يخلونها تقعد اذا تزوجت البنت من برى العائله .. ويعتبرون البنت سوت عار على العائله .. وما يغفرون لها .. ويقاطعونها .....!!!

للأسف هالمشكلة منتشره وبكثرة في السعوديه .. حتى العوائل الغير قبلية واللي تكون كبيرة تلاقينها ما تزوج بناتها واولادها الا من نفس العائله .. لأنهم يعتبرون الخروج برى العائله فيه تنقيص لبناتهم .. وانهم فيهم عيب ....!!!! وللأسف هالتفكير متواجد في عائلة زوجي .. صحيح انا من برى عائلتهم مية بالمية .. ما اقرب لهم وما يقربون لي .. لكن في الاجتماعات .. من جد احس اني غريبه بينهم .. تخيلي وضعي ما فيه الا انا اللي اسم عائلتي يختلف عنهم :087: .. وألاحظ انهم رسميين معاي بزياده .. وهالشئ ينكد علي طلعتي معاهم .. وحتى حصلت بعض المشاكل البسيطة من قرايب زوجي .. وقاموا يتكلمون عليه حتى الحريم الكبار الله يهديهم سمعت منهم كلام زي اللي يقول .. ليش تزوج برى العائله اكيد متنقص بناتنا ....!!!! :(

.. لكن الحمدلله اهم شي ان الوحده تكون مرتاحه مع زوجها ومرتاحة في بيتها ..


انا ما اقول ان القبلي يتزوج غير قبليه او العكس .. بس انا اقول ع الأقل يطلعون برى العائله شوي .. لأن لها الكثير من الفوائد .. وممكن الواحد يتجنب الكثير من المشاكل اذا تزوج برى عائلتهم ..

:)

من خلال ردود البعض الظاهر ما في فايدة. يعني شنو تكافؤ النسب و هذه الخرابيط! مو الرسول (ص) زوج بلال من وحدة من الاشراف. روحوا شوفوا في قسم قضايا و حلول, في وحدة ابوها بيزوجها لابن عمها و هي مو حابته يعاملون البنت مثل البهيمة للاسف.

احلى الليالي ..

حبيبتي .. فيه عوائل صعب تقنعينهم يغيرون عاداتهم وتقاليدهم .. وهم عارفين انهم على غلط .. لكن .. يخافون من كلام الناس ...!!

علشان كذا تلاقين الغالبيه ما بيدهم شي .. لأن الأب والجد والعم والخال والأخ ............الخ .. كلهم تربوا على انهم ما يطلعون برى العائله .. واللي يطلع برى العائله يعتبر مسوي شي .. ومتنقص لبنات العائله وما يحبهم ومن هالخرابيط ..

يعني السالفه يبي لها سنين طويلة علشان تقدرين تغيرين افكارهم .. مو بالسهولة هذي تحل ...!!!

والشي هذا انا عايشته .. للأسف .. لأن عائله زوجي من العوائل اللتي لا تؤيد الزواج من برى العائله .. لكن زوجي حب يبعد عن مشاكل القرايب .. وتزوج من برى العائله .. لكن تعالي شوفي حالتي اول الزواج .. والى الآن .. تخيلي ما فيه الا انا اللي برى العائله .. ما اقرب لهم ولا يقربون لي لا من بعيد ولا من قريب .. وفعلاً أحس اني غريبه بينهم في الاجتماعات .. حتى احياناً احس معاملتهم رسمية بزياده :( ......!!! واول الزواج سمعت كلام من الحريم الكبار الله يهديهم يتكلمون على زوجي .. ويقولون : ليش ياخذ من برى ؟ وش فيهم بناتنا ؟ وش العيب ؟ ...........الخ من الاسئله الجاهلية ...!!!

شفتي كيف ؟!

هي ترجع لتفكير الكبار بالسن اولاً .. وبعدين ترجع للتربية اللي تربوا عليها العيال ....!!!

:)

اهلين خيوتي احلى الليالي

بما انا احنا في البحرين ما عندنا قبائل مثل السعوديه او الدول الخليجه الثانيه
فتكلم عن البحرين

العوائل في مجتمعنا البحريني اتحسينها تبغي البنت بعد ما تزواج اتكون جنبهم
او ما يحسون بالامان

و مو شرط البنت تعيش بالديره اتكون سعيده و مرتاحه و حياتها تخلو من مشاكل
يمكن اتكون برى الديره و حياتها مستقره و اكثر من سعيده


الله يرزق اخوش البنت الصالحه اللى تسعده

انا اقولك بصراحه

صعب انك تغيرين بالعادات لان انا بقولك ليه
لو سألتني انا وبتاخذين رأيي انا المهم
عندي انه ولد ناس ويخاف ربه ومصلي
مو شرط من نفس القبليه


لكن لو تسألين مثلا ابوي اعمامي وخوالي يعني كبار العايله مايوافقون
لان هالشي مو بيد البنت ابد بيد ولي امرها


يعني بختصاار للحين كبار العايله للحين متمسكين بالعادات والتقاليد





ترى مو عارفه اوصلك اللي ببالي ان شاءالله فهمتو علي

خيتؤؤؤ عصر العصبيه والتحجر هذا هوه ما تغير ولليوم لين باجر عيال القبايل ما ياخذون الا منهم وفيهم لأسباب وايد أهمها الحلال ما يطلع بره وما يدخل رجال غريب ما يعرفونه على عائلتهم مومهم نفسية البنت شلون هم أدرى بمصلحتها هذا حجيهم طبعا مو مهم يحبها يكرها كل هذا مو مهم أهم شي تاخذ من قبيلتها ومن عائلتها وطبعا وما في شي يخلصنا من هالعادات الجاهليه غير تغيير هالعقول المتعصبه ولكن من وين بتغير إذا هم رابين على هالعادات أستغفر الله يا رب وأعوذ بالله من هالعقول