الرماح المتكسره;12546240:
المهم عطوني ابراتبن حق الطفل عشان ينشطون الرئه عشان يقدر يعيش اذا انولد
وعطوني ابراه عشان يخف الالم وانام
بس طبعا كنت اغمض عيوني بس ما اقدر انام
وزوجي كل شوي يروح ويرجع لان ما يرضون يخلونه ويايي واجد
وبعدين بعد جو زوجات اخواني وتمو يروحون ويرجعون يطمنون عليي ويحاولون يسلوني ويقولون لي بعد ويش تبين بتصيرين ام بس اني ما فيه فايده
كنت مو مستوعبه الي بيصير وتميت اتخيل وكل ساعه اسكت شوي وارد اصيح
وزوجي بعد كان حده منهار وطبعا عطوه الورقه مالت بيانات الطفل وجاء سألني ويش تبين تسمينه قلت له ما ادري انت تصرف لان كلش ماليي زاغر شي وعطاهم الورقه بدون ما يكتب اسم الطفل بس سجل بياناتنا احنا
المهم العصر او المغرب ما اذكر جت دكتوتري زينب الجفيري وقالت ان ما بيفتحون الربط وبيتابعون حالتي على حسب ويش يصير واذا كل شي اوكي بيطلعوني الجناح
المهم تميت ذيك اليله كله قاعده وقلت لزوجي ارجع البيت واي شي بيصير بخبرونك ومسكين كل ساعه يتصل يتطمن
طبعا كلش ما جاني نوم بس كنت ميته من الجوع
اقول ليهم ابغي اشرب ماي لان مو ماكله ولا شاربه شي من قبل بيوم قالو لا لان يمكن نسويش عمليه ما يصير انتظري لبكره الصبح وانتين عليش السيلان يعني عادي
المهم يوم ثاني العصر خف الدم والالم
قلت ليهم خلاص مادام صرت احسن طلعوني من هالحجره بموت من الخوف
تخيلوا طول الوقت كله صراخ وبس المره تصارخ والي تولد تقول ليها اخذي نفس وادفعي دفعه طويله واني طول ما اني هناك اسمع كل شي واقعد اصيح وبعد تميت ليله ثانيه هناك لان على قولتهم يبون يطمنون اكثر
ويوم الخميس قالو خلاص بيطلعوني الجناح بس كان كلش ما فيه سرير حتى يقولون ليي ان ناس والدين من قبل وما ليهم مكان المهم اتصل زوجي لابويي وخلاه يتصل لواحد يعرفه
ونقلوني للجناح الساعه اربع بس قالو ما فيه حجره خاصه لان اصلا بالموت صار فيه سرير
وطبعا كانت نفسيتي زفت ونوم كلش ما انام
يوم الجمع هجت الدكتوره وقلت ليها ابغي اطلع قالت لا للحين يبي لش متابعه وقالت انتظري للسبت المهم يوم الجمعه العصر جابو صوبي وحده الظاهر قريب بتولد وكانو يقولون ليها اذا جاش الطلق كل خمس دقايق نادينا والليل بدى عليها الطلق وتمت تتألم واني اسمعه وميته من الخوف قلت شكلي بولد قبلها من الخوف وتمت على هالحاله للصبح وكل شوي يجون يجيكون شكثر توسعت
الصبح على سبع ونص ثمان توسعت 4 سم وودها يش انس تميت حالتي حاله واصيح وجت الدكتوره وقلت ليها مو قادره استحمل الوضع ابغي اروح البيت قالت لي اذا تبين وقعي وامشي لان م واني دكتورتش وقلت بوقع واتصلت لزوجي عشان يجي وجاء وراح للدكتوره قالت له خلها تتم لبكره يسوون ليها تلفزيون ويتأكدون
المهم جاء ليي وقال لي يا الله قومي قلت له بس ما بطلع اخاف يصيدني شي وبعدين اندم وتميت اصيح
طول ما اني في المستشفى كله صياح
المهم يوم السبت الظهر بعد جابو وحده صوبي بس ما ادري ويش فيها
واليوم كلمتها وعورت قلبي وخلتني في حاله من الوسواس طلع ان الطفل توفى وهي الحين في التاسع
وولدوها وطلع مكتمل كل شي
المهم جت اليوم دكتورتي ومن جت قلت ليها اليوم بتطلعوني الا تقول انزين انتظري بسالش شخبارش قلت ليها الحمدلله بس مو قادره استحمل وضع المستشفى سببتون ليي رعب شكلكم تبوني تجيني حاله نفسيه من الولاده
قالت ليي لا لاتحاتين كل شي طبيعي وخلاص اليوم رخصه وطبعا قدر الامكان ما تتحركين وقلت خلاص خير شر ما بتحرك كله على السرير وما بطلع من شقتي الا اذا دخلت التاسع
ألف ألف سلامة عليش يا رمووحة
كل هذا صار لش
الله يساعدش صرااحة
زين ألحين رخصوش لو للحين؟؟؟؟؟؟
وليش خليتينها تفحصش من تحت
يمكن هذا الي سبب لش توسعة
وأني اعرف وحدة اليوم راحت المستشفى وولدها متوفي
يمكن هي إلي اعرفها نفسها الي شفتيها
ايمها نجاة البنية هذي؟؟
ربي يعوضها ياارب