•• التجمع الثامن لحوامل (11) نوفمبر 2010 ••

السلام عليكم

شخباااركم ؟

اني جيييييييييييييت :lol:

اليوم من الصبح متشيطرة قبل ما اروح الدوام حطيت غسلة الثياب الملونيين في الغسالة .. ومن رجعت وقبل ما اتغذى سيدة غسلت المواعين المتراكمة ونشرت الثياب وحطيت الثياب الغامقين .. وجيت اتغذا بمعكرونة حمرة يمي يمي ...

اليوم رحت جيكت نتيجة تحليل السكر اللي سويته امس .. طلع على الحااافة .. الطبيعي المفروض اقل من 7.8 واني طلع ليي 7.7 >> تخيلت روحي ماخذة في مادة من المواد خمسين خخخخخخخخخخخخ منجحيني بالغصب ..

قلت للدكتورة عن نتيجتي قالت موعدي الجاي بتخليني اسوي التحليل اللي كل ساعة يجيكون السكر .. وبتشووف ..

عاد واحنا في البريك طلعت بستوك توقي .. تتذكرونه ؟ اموووت عليه :lol: وقمت آكله .. قالت ليي الدكتورة حاسبي الجوكليت مو زين .. قلت ليها ولدي يستانس من آكل حلاوة لو اسكريم .. يقعد يناطط ويناقز من الوناسة .. قالت الاشياء اللي انتين تحبينها هو بيحبها .. واذا من الحين عودتينه على الخرابيط بعدين بيغربلش :worn_out:

وعلى طاري الاكل الصحي .. اني بين فترة وفترة آخذ ليي فواكه وامزمز فيه .. وباقي اكلي كله خرابيط .. صايرة ما اشتهي اللحوم .. من الاساس ما آكل سمك ولا ربيان .. وقبل كنت آكل دجاج وقليييل لحم .. الحين الدجاج ما ارغب ليه .. واللحم اشوة بس بعد مو اي وقت .. فمعتمدة على النشويات والحلويات والخرابيط .. وطبعا السلطات صرت ما اشتهيها ..

الواجب طويل وااجد .. وما ادري ارد على من والله من ..

عاشقة قلبي ووردة البرية .. عليهم بالعافية بيبياتكم بالثياب .. وعقبال ما اروح اني اتسوق بعد :lol:

ووردوو .. عجبتني صالتش .. مودرن وناااعمة ..

بقايا حلم .. الحمدلله انش تطمنتين .. وصدق العيادة يقهرووون .. جان على الاقل اتصلوا وخبروكم ان الدكتورة مو موجودة مو تطقونها مشوار وآخرتها ما في احد .. بس يالله اهم شي اكلتين سمك وتطمنتين على البيبي :adore:

الوافية .. ترى يبين من شكلش ان بطنش ما بيكون كبير ههه .. حتى وزنش اتوقعه ما بيتغير واجد وهذا من حظش .. لأن ما شاء الله فيش طووول .. وعليش بالعافية على التسوووق .. خاطري اتسوق تسويقة طوووووووويلة من 4 الى 12 مثلش بس للاسف ما فيي شدة ورجلي ما يساعد خخخخخخخخخ ..

هبوولة .. اكيد اهلش وصلوا بالسلامة الحين .. الحين خلاص ما بنشوفش وهالله هالله في كيس اللوز اللي جابوه لش :lol:

ريما .. ضحكتيني وزوجش ينتظرش وانتين تغسلين المواعين هههههه .. اني وقت الطلعة ما عليي من شي عسى لو البيت خرابة .. اهم شي ركيض اركب في السيارة قبل ما يصير شي وتتكنسل الطلعة خخخخ .. اللي يشوفني يقول محبوسة في سجن .. مع ان اي وقت ابغي اطلع اقدر اطلع بس اني صايرة ما احب اطلع الا وي زوجي ..

*************

وو كم مرة اقول ليكم ان الجدران ليها اذاين .. بتحشون حشوا وقت اللي بنتجمع وطلعوا كل اللي في جبدكم .. بس اهني حاسبوا شوي .. صدقوني ما اقول هالحجي الا من الاعترافات والحقائق اللي شفتها من ناس اعرفهم كاتبينها في النت ومفكرين ان محد يعرفهم .. يعني لو بتحشون بأسم ثاني مو مبين انتون من مو مشكلة بس اسمائكم اهني معرووفة ومكشووفة ابسط مثال وحدة من سترة رجلها من الكوفة .. وعندها بنات ثنتين شين وباء والحين حامل وبتولد في الحج .. مباشرة بيطيحون عليها هي من .. صح لو لااا ام شهد :D .. سواء انتين او غيرش .. او حتى لو اني .. ما فيها شي ان الناس يعرفون احنا من بس نحاسب في كلامنا وما نحش في احد يمكن هو نفسه يتابع ويشوف ردودنا بدون ما ندري .. انفع القي محاضرات لو لا ؟ خخخخخخخخخخخ :D

***************

بالنسبة للطلعة ..لو اجتمعنا في بيت وحدة من البنات .. طبعا كل وحدة تجي بطبقها مثل آخر مرة اجتمعنا .. يعني ما نبغي نكلف على راعية البيت .. راعية البيت عليها الماي والشاي والقهوة :lol: .. واحنا علينا الاطبااق .. سواء اجتمعنا على غذا او عقب الغذا .. بس اني افضل غذا عشان يمدينا نقعد واجد ونسولف ونعاين دبيب بعض ونشوف منهي دبتها اكبر خخخخخخخخ ..

فلو بنجتمع تاريخ 2\7 يعني ما باقي وقت كلشششش .. فبسرعة قرروا من بيجي ومن لا .. وكل وحدة وش بتجيب وياها ..

جحه
ههههههههههههههههههههههههههههههههههههههههههههههه

عجبتيني

اقول لش ما انجوز لازم انحش لما يصيدونا ونتصير لينا سالفه

جحه باركي ليي

ولدي صار له اربعه ايام يرف بشكل يومي بس عاد كل يوم رفه الى رفتين عن العين والنفس

توه موتعي لروحه شكله

شحوالش ام شهد ..

بالبركة .. زين تشيطر :lol:

شعووور حلييييو لكن .. احس من قام بيبييي يتحرك حسيت بحلاوة الحمل .. :adore: >> الله يرزق كل محرم ولا يحرمنا من الشعور بهاللحظات مرة ثانية وثالثة .. الله كريم ..

والحين ويش بتجين التجمع لو لا ؟ :D

امس رحنا بيت حماتي لان من زمان ما شفتهاااااااااا

استغربت من شكلي:hysterical:

تقووووووووووول يؤؤؤؤؤؤؤ توش الخامس وصرتين جذي جلحه وتفجرتين:(

جتني الصيحه على شكلي:'(


اذا تجمعتون وجيت من الحين اقول ليكم لاحد يهرب من شكلي:mad:

جحة حمرة;12483038:
شحوالش ام شهد ..

بالبركة .. زين تشيطر :lol:

شعووور حلييييو لكن .. احس من قام بيبييي يتحرك حسيت بحلاوة الحمل .. :adore: >> الله يرزق كل محرم ولا يحرمنا من الشعور بهاللحظات مرة ثانية وثالثة .. الله كريم ..

والحين ويش بتجين التجمع لو لا ؟ :D

اي بجي :)

ام شهد11;12483052:
امس رحنا بيت حماتي لان من زمان ما شفتهاااااااااا

استغربت من شكلي:hysterical:

تقووووووووووول يؤؤؤؤؤؤؤ توش الخامس وصرتين جذي جلحه وتفجرتين:(

جتني الصيحه على شكلي:'(


اذا تجمعتون وجيت من الحين اقول ليكم لاحد يهرب من شكلي:mad:

الحال من بعضووووووو

اني بعد متفجرة :worn_out: >> ضريبة الامومة ..

باركي ليي اليوم وصلت 20 اسبوع يعني اجتزت نص فترة الحمل :cool:

جحة حمرة;12483078:
الحال من بعضووووووو

اني بعد متفجرة :worn_out: >> ضريبة الامومة ..

باركي ليي اليوم وصلت 20 اسبوع يعني اجتزت نص فترة الحمل :cool:

مااتوقع وصلتين ليي اني نفخ وتفجر جان ما اوصل 100 كيلو في التاسع:|
:adore:مبروك دخولش 20 الاسبوووووووووووووع عقبال مانبارك لش بولادتش بالسلامه

اهلين جحة ،،

زين اليوم حول عليش النشاط ان شاء الله اليوم وكل يووم

وحاسبي حق اكلش اقصد الحلوووويات لاتكثرين منها لا يجيش سكر بعيد الشررر


ومثل ماقلتيين الجدران ليها آذان فالمفروض البنات يحاسبووون عن لا أحد يصيدهم ويروحون فيها هع

وعلى الطلعة برايي تصير عقب الغدى لان يمكن مانقدر نقعد فترة طويلة لان اذا في شقة وحدة من البنات مابنقدر نتبطح << دبحتها ههه

خصوصا الحين العصرية طويلة فما في مشكلة لو رحنا عقب الغدى

وانتون شوفوا بعد رأي الاغلبية شنو يقولون


ومبرووك الاسبوع ال20 عقبال الاسبوع ال 40 والولادة بالسلامة يارب

لو تشوفين خشمي يا جحه تهربين

ماادري جيفه وصل الى هالمرحله وتعد حدوده وزياده

عقب الغدى لو قبله انتون فصلوو واحنا بنلبس

أم شهد

ما أتخيل خشمي يكبر

مو ناقصة ههههههههه


كلاسيك

حياش حجزي لش على الطيران من الحين عشان تحصلين حجز

هههه

.
.

تشرفييييناااا

:)

Classic848;12483150:

يا حظكم تجتمعون

ودي اجي اشوفكم كلكم

تعالي حياااااااااااش:)

ا
بقايا اني خشمي مافيه عرض كلش

بس الله يسلمش هالحمل خربني فووووووووق تحت

الله يسهل علينا ونقوم بالسلامه وتالي نشتغل على روحنا من تعديلات وصيانه

الامهات يقولون الجاهل او ما تجيبنه وتشوفين خشمه مو طويل كل اسحبي خشمه على شان يطوووول

اني شكلي بسوي العكس

بسحب خشمي بدل مااسحب خشم ولدي خخخخخخخخخخخخخخخخخخخخخخخخخخخخخ

ام شهد11;12483187:
ا
بقايا اني خشمي مافيه عرض كلش

بس الله يسلمش هالحمل خربني فووووووووق تحت

الله يسهل علينا ونقوم بالسلامه وتالي نشتغل على روحنا من تعديلات وصيانه

اشوى دام من الاساس مافيه عرض

يمكن يعني مابيتأثر لش واجد

ايي ان شاء الله الله يسهل علينا كلنا يارب وعقب نتفرغ لروحنا

ام شهد11;12483192:
الامهات يقولون الجاهل او ما تجيبنه وتشوفين خشمه مو طويل كل اسحبي خشمه على شان يطوووول

اني شكلي بسوي العكس

بسحب خشمي بدل مااسحب خشم ولدي خخخخخخخخخخخخخخخخخخخخخخخخخخخخخ

:lol:

باكووو

ماني قادرة سريري يناديني .. بس ابغي اول شي اشيل ثياب الغامقين من الغسالة وانشرهم وعقب احط ثياب البيضان وبنام .. خاصة ان ثياب البيضان يبغي ليهم ثلاث ساعات ومو لازم اشيلهم اول ما يستوون :lol:

حياكم عصير ليمون يمي يمييييييييي .. :adore:

بالنسبة للطلعة على رااحتكم .. اذا على غذا بجيب ويايي كوسة محشي .. بشوف النسوان اللي يطبخون في البيوت وبوصي على كوسة محشي وانتون وحظكم حلو لو لا خخخ .. واذا عقب الغذا بجيب اسكريم سنكرز عشان اولادكم يناقزون ويناططون خخخ :D

بقايا ..

اني آكل حلاوة واجد وصايرة ما اتحرك كلشش ملشش كلا منبطحة ونايمة .. وفي الشغل حركتي قلييلة كلش .. انزل من السيارة وامشي خطوتين واوصل مكتبي .. ولو بطلع يا اروح الحمام لو حجرة الريوق واثنينهم صوبي كلش .. وفي البيت كلا منبطحة لو نايمة .. يبغي ليي حركة ومشي .. وتقليل السكريااات

ام شهد ..

اني متوني ملاحظ .. بس وجهي احسه ما تغير لكن اللي حولي يقولون ليي ان تغير :worn_out: بس ما سألت للاحلى لو للاكره خخخخ خفت يقولون للاكره ويصيدني احباط هههههههههههه

كلاسيك ..

حياش ويانا .. شوفي زوجش متى بيجي البحرين وبنلتقي وياااش

ام شهد11;12483192:
الامهات يقولون الجاهل او ما تجيبنه وتشوفين خشمه مو طويل كل اسحبي خشمه على شان يطوووول

اني شكلي بسوي العكس

بسحب خشمي بدل مااسحب خشم ولدي خخخخخخخخخخخخخخخخخخخخخخخخخخخخخ

يقولون اللي ينولد وخشمه مفشووووووخ حده هذا اللي بعدين يصير طويل وحد السيف :lol: .. خالاتي اللي هم خالات ابويي من ينولد جاهل اول ما يعاينون خشمه .. يعتبرون ان علامة الجمال هي الخشم :lol:

بقايا

متى تفكرين تروحين الى حكيمة الهاشمي ؟ في اي اسبووع ؟

خاطري اروح بس ما ادري متى انسب اسبوع للروحة :hysterical: