متجدد: عماننا مع اعصار فيت

ربي يسلمكم يا سكرة ..ويحفظ اهلكم وغاليكم

اام مهند مثل ما ذكرتي الاضرار كثيرة وماشاء الله شبابنا فيهم البركة بتشوفيهم بيعدوا عمان مثلما كانت في غضون ايام

عاد مؤسسة دار العطاء الخيرية دووم سباقة للخير والمساعدة .. بتبدا بالمساعدات الفورية ومد يد العون .. وبيروحوا من بكرة اذا تعدل الوضع .. عاد من تو احاتي زوجي اذا راح باجر وجت الامطار !!
ربي يحفظ شبابنا واهالينا

الله يصبر قلب ام عبادي فديتها ويطنها بسلامة اهلها يارب

الحمد لله على سلامة الجميع ... وربي لعماننا وشعبها حافظ امين يااااااااااااااارب...

عندنا الاوضاع هاديه الحمد لله ماشي مطر...

تصدقي ام مهند انا طول الوقت اقول لزوجي ياربي كيف اوضاع ام مهند بجد قلقت عليج..حمدلله تطمنا .. وتواصلنا مع بعض بجد يطمن قلوبنا

بك املي..حطيت لكم الوصلة في كل الاماكن الي كنت متوقعة بتزورها مثل شات وتجهيزات.. شخبار اوضاعكم واي منطقة ؟

حمد لله على سلامتكم جميعا يا بنات ،،

فلور انتي وين بأي صوب الحين ؟




سوسو بإذن الله كلنااااااااااااااا عماااااااااااااان ،، وبنجتاز المحنة مثل ما اجتزناها أيام جونو ،،

وديان سماائل نازله بقوه
والافضل من اللي ساكنين بالخوض يحتااطوا
الله يستر ما نعرف وش بيصير
الامطار بعدهاا تنزل مره غزيره ومره خفيفه

الله يستر وتعدي هالايام بسلامه

اخوي بيته ف العذيبه عند مسجد الرحمن وكلمته من 3 ساعات يقول الحمد لله ماشي اوديه صوبهم بس ماي المطر متجمع ... وربي يحفظ الجميع ...

ام المهند انا ف بركا يالغلا ...

سوسو نفس الشي كان قلبي معاكم والله ،، رغم ان بيتكم مرتفع بس مع قوة هالإعصار والهوا بو جا ما شوية الصراحة ،،

أم سليماني بعد كنت على تواصل وياها أول بأول ،، أقارن الوضع

يلا حمدلله على كل حال

انزين تو الاجواء اعتقد هادية عند كلكم صح؟؟ شو التواقعات
شي بيكون امطار بالليل ولا كيف

يا بنات الحالة لسه ما انتهت ،،

بالعكس تو بددددددت


الحين الأودية والفيضانات هي اللي راح تتعبنا ،، نسأل الله السلامة ،،


بك أملي ،، حمد لله على سلامتك يالغالية .. مثل ما قلتي الحين السدود راح تمتلي والله يجعل العواقب سليمة يااا رب

أهم شي مثل ما قالت بنوتة ان الجميع محتاط ، مهما كان هذا ما أول درس لنا ،، وبإذن الله مجتازين المحنة بكل قوة ،،

بنات شو رايكم اي وحده تكتب رد تكتب استغفر الله
والحمدلله الاعصار راح
وما زال التحذير عن ما قد تسببه الاودية
وبكره في امطار وهذه المعلومات الحين من التلفزيون انقلها لكم

سوسو ما عندي فكرة والله ، الكهربا كانت مقطوووعة مرة تفتح ومرة تبند ،،

لسه ما عرفت ايش التطورات والتوقعات الجاية ،، ما صدقت فتحت الكهربا سيدة على عروس نتطمن عليكم ،،


أحد من ولاية صور ؟؟؟؟

يا ليت أحد يطمنا على البنات اللي في عروس من ولايات الشرقية ،، ربي يكون في عونهم ما شوية اللي مروا فيه ،،

سوسو ما تقصري
بس انا مرابطه على منتدى الخيمه والتلفزيون
حتى نوم ما اناام بس اتاابع اخاف يفوتني شي

عندنا الجو بعده محمل بالغيوم ومدري يمكن تمطر زياااده

وبعد شوي بنزل اشوف الوادي مره ثالثه

اللهم حوالينا ولا علينا

صور جديدة للوضع الحالي

الله يستر .. يارب سترك

وان شاء الله الوضع بيكون افضل

استغفر الله

عروسو طمنينا كنت ابي ارسلج مسج بس تو كلمت اختي في الحيل وطمنتي وقلت اكيد اوضاعكم بعد مستقرة حمدلله

تو اخوي متصل يقول صاير حريقة كبيرة في غبرة بسبب التماس كهربائي بس ماعرفت وين وكيف..ربي يكون بالعون
بس تصلت صديقتي هناك وطمنتي على اوضاعها وماطلع شي مثل كلام الي يوصل انه غبرة غرقانة وماعرف شو .. ربي يحفظ الجميع

استغفر الله

مشكورة دلوعته في ميزان حسناتج

مثلما وصلني اخر الاخبار

تشير اخر صور الاقمار الاصطناعية وخرائط الطقس الى تواجد مركز العاصفة الاستوائية " اعصار فيت " في بحر العرب على بعد 46 كيلو متر من مدينة قلهات بولاية صور وتتحرك نحو الشمال الشرقي باتجاه سواحل باكستان .. واستمرار هطول الامطار الغزيرة المصحوبة برياح نشطة على المنطقة الشرقية ومحافظة مسقط ومناطق الداخلية والباطنة والظاهرة خل......ال 24 ساعة القادمة .. و الاجواء غير مستقرة وعلى الجميع اخذ اقصى درجات الحيطة والحذر والابتعاد عن الاماكن المنخفضة ومجاري الاودية ( العمانية

ام المهند انا ربيعتي صوريه ... بس هي حاليا ف مسقط واطمنت على هلها اللي ف صور كلهم بخير الحمد لله ...
عندنا غلا خالد من صور بس ما اعرف رقمها ... اللي تعرفه ياليت تطمنا عليها ... وعسى ربي يحفظ الجميع ...

بدا عندنا مطر خفيف احينه ...

استعفر الله العلي العظيم واتوب اليه ..

مشكله اللحين تحصلي في المنتدياات تهويل وما تعرفي الصدق من الكذب

عندنا طاحت نخله فوق وايرات الكهربا من الصباااح ومحد جا يشلها !!

الله يستر وما تنقص الوايرات بالليل بس