السلام عليكم ورحمة الله وبركاته
سويت اليوم الكيكة الاسفنجية الهشة وزينتها بالتوفي والمكسرات
المقادير :
3 اكواب دقيق جميع الاستعمالات انا استخدمت الفاخر الكويتي
ملعقة واحدة كبيرة بيكنج بودر
ربع ملعقة صغيره ملح
4 بيضات مفصولات (المح لوحده والزلال لوحده)
ملعقة كبيرة فانيليا
كوب حليب
كوب ونصف سكر
ثلاثة ارباع كوب زبدة ذائبة او بدالها زيت
الطريقة :
انتبهوا للطريقة لان الكيكة الاسفنجية محتاجه دقه واي شي تسويه مختلف راح تطلع لج الكيكة مو اوكى ....
1- حطي الدقيق مع البيكنج بودر وانخليهم (ضروريه هالخطوه لاتقولي ماعندي وقت اساس الكيك الاسفنجي النخال فركزوا خواتي بليز)
2- افصلي البيض الزلال لوحده والبيض لوحده وانتبهي يكون الزلال صافي مااختلط بالصفار ضروري
3- اضربي الزلال بمضرب الكيك مع رشة ملح خفيفة لحد ماتحسي انه راح يثقل عندج ساعتها زيدي سرعة المضرب لحد مايتشكل عندج رغوه مثل الكريمه ...
4- الحين اضربي الصفار لوحده مع اضافة السكر والحليب اليه تدريجيا لحد مايتغير لون الصفار ويفتح ساعتها ضيفي الفانيليا والزبدة او الزيت تدريجيا مع الاستمرار بالخفق
5- بملعقة خشب حطي الصفار على البيض وقلبيه ببطئ وبحركة دائرية وبخفه وبدون عجله لحد مايمتزج الصفار والبيض
6- هذه الخطوه مهمه وهي ان احنا نحط الدفيق عالخليط شوي شوي مع التقليب بملعقة الخشب وبنفس البطئ وحكرة دائرية وحاسبي يكون الخلط جدا بطئ عشان نحافظ على فقاعات الهواء اللي اتشكلت في ضر البيض كلا على حدا .
لما تحسي ان الكل امتزج ساعتها حطي المزيج في بايركس مدهون ومرشوش بالطحين ... وحطيها في الفرن وخلاااااص
وهذه طريقة من الطرق العديده لصنع الكيك الاسفنجي (عندي عدة طرق بس ذي افضلها واتمنى تجربوها )
التوفي جدا سهل كوب سكر وعلبة قشطة
الطريقة:
نحط السكر عالنار لحد مايتغير لونه الى البرتقالي ومباشره نضيف له علبة القشطه مع التقليب المستمر وخلاص
وهذي اول قطعه شوفي شلون هشه وناعمه من جوا
