حياكم في تجمع حوامل وامهات قطر لشهر جمادي الاخر لعام 1431ه 2010م

مساء الخير حبيباتي .. والله لكم وحشة .. وأنا ما دخلت يومين كله عبالي المنتدى لي الحين مسكرينه

دوحانية فديتج بالنسبة للحمل لا تحاتين ولا تفكرين وكلي أمرج لرب العالمين ومب شرط تحتاجين علاج .. أنا أختي في حملها الأول احملت بعلاج عند شحاته وقالها البويضات عندج ضعيفة وايد بس سبحان الله بعد ما ربت بسنتين احملت بدون علاج وما توقعت هي في بالها انها ما تحمل الا بعلاج بس ربج رحيم وقادر على كل شي سبحان الله ..
وشوفي دوحانية أنا ما حملت 10 سنوات تعرضت لأكثر من ابتلاء والحمد لله رب العالمين ..ما أقولج فقدت الأمل لكن ضعف عندي الأمل وقلت انا مافيني عيال خلاص وكل من سألني ادمعت عيني ما أحب حد يسألني ..واتذكر شهر 9 اللي طاف كلمت دكتورتي اللي تعالجني قلت لها ابي علاج للحمل .. قالت لي أنتي توج من فترة طالعة من العملية ما نبي نعرضج لعلاجات وأدوية بننطر سنة وعقبها بنبدأ نعالجج .. وكلت أمري لله وكثرت من الاستغفار بكل وقت وقراءة القرآن وبالذات سورة البقرة فيها سحر عجيب سبحان الله ..ودخلت مركزرياضي اشتركت شهرين وبديت أتمرن عشان نفسيتي كانت تعبانة وايد وفي نفس الوقت أنا أعرف إن التمارين تنشط المبايض فقلت بجرب والخيرة فيما اختاره الله .. وكملت تمارين شهر والشهر اللي بعده ما حضرت الا 10 حصص وتبارك الله طلعت حامل الحمد لله رب العالمين ما صدقت لاني كنت مستبعدة الحمل وانا كانت هرموناتي متخربطة تجيني الدورة كل شهرين ونص بس الرياضة وايد ساعدتني ..ورب العالمين أكرمني وعوض صبري خير .. الله يرزقج حبيبتي لا تحطين في بالج شي وتوكلي على رب العالمين ..( معليه فديتج طولت عليج كتبت قصة حياتي بس بغيتج ما تفقدين الأمل يوم تشوفين قصتي )

أختي جينا فديتج ضحكتيني بسالفة الروج الغامج .. الله يبعد عنج الضيقة حبيبتي .. عن نفسي لما اتضايق أتوضا وأقرأ قرآن أحس براحة الحمد لله ..

نور الحلوة .. ألف مبروك أختي عالحمل وربي يبلغج فيه وأنتي بخير وصحة وعافية يا رب

حزن الزمان .. بالنسبة لي مستشفى حمد وبس .. من تجارب خواتي وهلي أحس مستشفى حمد الأفضل .. بعطيج موقف واحد تعرضت له خالتي هي راحت عشان تربي في الأهلي واسمله عليج وعالجميع صادها نزيف حاد وقت الولادة ما اعرفوا شيسوون لها حولوها على طول مستشفى حمد يعني هذا شتفسرينه أصلا العيادات الخاصة دايما اذا تعرض المريض لأي انتكاسة اومضاعفات يخلون مسؤوليتهم ويحولونه حمد على طول .. انتي اختصري هالمشوار كله وتوكلي على الله وخلي ولادتج بحمد هذا رأيي وأنتي شوفي اللي ترتاحين له .. الله يهون عليج وعلى كل حامل يااااارب

العفو حبيبتي ولو ..
أختي حزن بالنسبة للغرف فعلا زحمة وايد .. اذا تعرفين حد بالمستشفى كلميهم أول ما يدخلونج قسم الدخول للولادة .. عشان تحصلين غرفة ..هذي مشكلتهم زحمة في الغرف .. بس إن شاء الله ربي يسهل عليج وتتيسر كل أمورج وقت الولادة يا رب ..